Share on FacebookTweet about this on TwitterShare on Google+Pin on PinterestEmail this to someoneShare on LinkedInShare on TumblrPrint this page

ભારત વિશ્વના એવા દેશોમાં આવે છે જ્યાં પૂર્ણ વર્ષ દરમિયાન મોટાભાગના વિસ્તારોમાં પૂરતા પ્રમાણમાં સૂર્યપ્રકાશ મળી રહે છે. જેથી ભારતમાં સોલાર ટેક્નોલોજી અને સોલાર એનર્જીના વિકાસની અદભૂત સંભાવના રહેલી છે. ત્યારે રાજસ્થાનના જોધપુર ખાતેના યુવાન એન્જિનીઅર્સે વૈશ્વિક પ્લેટફોર્મ પર ટક્કર આપી શકે તેવી સોલાર કાર તૈયાર કરી છે.

કોઈપણ વસ્તુની શરૂઆત સૌથી અઘરી હોય છે. તેની જેમ જ સોલાર કારના આ સ્વપ્ન માટે કેટલાક તોતિંગ પ્રશ્નો ઉભા હતા. સ્વપ્નને સાકાર કરવા માટે ફંડિંગ, માર્ગદર્શન અને આર્મીની જેમ હંમેશા મિશન મોડ પર હોય તેવી ટીમ. જેમાં યોગ્ય લોકોનો સાથ મળતાં 25 મહત્વકાંક્ષી યુવા એન્જિનીઅર્સનું મિશન શરૂ થયું.

સોલાર કાર માટે આ યુવાનોએ 2019માં યોજાનાર વર્લ્ડ સોલાર ચેલેન્જને લક્ષ્ય રાખીને ગતવર્ષે સપ્ટેમ્બર માસમાં પોતાનું શોધ કાર્ય શરૂ કર્યું હતું. જેના માટે તેમનું પ્રાથમિક લક્ષ્ય દરવર્ષે યોજાતી એશિયા સોલાર કાર કોમ્પિટિશન છે. સૂર્ય ઊર્જાનો અપાર ક્ષમતા ધરાવતો સ્ત્રોત છે. જ્યારે અન્ય દરેક જાતની ઊર્જા મર્યાદિત માત્રામાં છે.

સોલાર કાર બનાવવા માટે રાજસ્થાનની જોધપુરના એન્જિનીઅર વિદ્યાર્થીઓને મેન્ટર તરીકે તેમની ફેકલ્ટીએ ખૂબ સહકાર આપ્યો અને મિકેનિકલ એન્જિનીયરિંગના ત્રીજા વર્ષમાં અભ્યાસ કરતા કનિષ્ક વર્ષણી અને અમન સચદેવાની આગેવાનીમાં 25 વિદ્યાર્થીઓની ટીમ બની. જેને આગળ જુદા જુદા ડિપાર્ટમેન્ટ વાઈઝ ડિવાઈડ કરવામાં આવી. વિદ્યાર્થીઓની અલગ અલગ ટીમે ત્યારબાદ પોતાને સંલગ્ન વિષય સાથે સોલાર કાર માટે રીસર્ચ શરૂ કર્યું.

સૌ પ્રથમ તો સોલાર વેહિકલ બનાવવા માટે ખાસ ડિઝાઈન તૈયાર કરવામાં આવી. જે માટે કારની પાવર સીસ્ટમ પર ધ્યાન રાખીની બેટરી અને સોલાર એરે સહિતના પાર્ટ માટે ખાસ વ્યવસ્થા ઉભી કરાઈ. જોકે સ્પર્ધાના નિયમ મુજબ 2000 વોટથી વધુ પાવર ધરાવતી મોટરના વપરાશ પર મનાઈ હોવાથી સોલાર કાર ટીમે 1200 વોટની બેટરીનો ઉપયોગ કર્યો હતો.

આ કારના વજનને શક્ય તેટલું ઓછું કરવા માટે તેમાં લિથિયમ-આયોન ધરાવતી બેટરી ફિટ કરવામાં આવી છે. જે મોંઘી પડે છે પરંતુ પરફોર્મન્સ, ડ્યુરેબિલિટી અને કારના વજનની બાબતને ધ્યાનમાં રાખતા આ બેટરી યોગ્ય વિકલ્પ છે. 65Ah અને 2C કેપેસિટી ધરાવતી આ બેટરી વિશેષ આકારવાળી સોલાર પેનલની મદદથી 19.5 ટકા એફિશિએન્સી સાથે 3થી 4 કલાકમાં ફૂલ ચાર્જ થઈ જાય છે.

કારમાં કુલ પાંચ સેમી ફ્લેક્સિબલ ટાયપ સોલાર પેનલ લગાવાઈ છે. જેની મદદથી હાફ કિલોવોટથી વધુ ઊર્જા ઉત્પન્ન કરી શકાય. સામાન્યરીતે સમગ્ર ભારતમાં એક સરખો 5-6 કલાક સૂર્યપ્રકાશ મળી જ રહે છે જે બેટરીની પર્યાપ્ત માત્રામાં ચાર્જ કરી શકે.

આ કારમાં ખૂબ મોર્ડન ટેક્નોલોજીનો ઉપયોગ થયો છે. જેથી કારને લોક તેમજ ઓન કરવા માટે ફિંગરપ્રિન્ટ સ્કેનર, પાસવર્ડ પ્રોટેક્શન, જીપીએસ અને એનવીએસ સીસ્ટમ સાથે સોલાર ટ્રેકર ટેક્નોલોજીનો પણ ઉપયોગ કરાયો છે. ગ્લાસ ફાઈબરની બનેલી આ કાર કલાકના 60 કિમીની ઝડપે દોડવા સક્ષમ છે. ગ્લાસ ફાઇબરના કારણે અન્ય સામાન્ય કાર કરતા સોલાર કારનું વજન ત્રણ ગણું ઓછું થઈ જાય છે જ્યારે મજબૂતી 2 ગણી વધી જાય છે.

આ સોલાર કારને આહાન નામ આપવામાં આવ્યું છે. વિશ્વમાં આમ તો જોકે સોલાર કારનો કોન્સેપ્ટ નવો નથી. પરંતુ મોટાભાગના મોડેલ પ્રયોગાત્મક હોય છે. તેમજ કેટલીક અગ્રણી મોટર કંપનીઓ સોલાર કારનું પ્રોડક્શન કરવાની પણ તૈયારી કરી રહી છે. જે કાર સામાન્ય રીતે 25 લાખથી વધુ ખર્ચા બાદ મળી શકે છે. જ્યારે જયપુરના યુવાનોએ વિકસાવેલી આહાન સોલાર કાર લગભગ રૂપિયા 3-5 લાખની રેન્જમાં તૈયાર થઈ જાય છે. જો બધુ સમુસૂતરું પાર પડશે તો આહાન કદાચ રસ્તા પર જોવા મળી શકે છે.


Stay updated on the go with Chitralekha News App. Click here to download it for your device.
VIDEOS