Home Variety Cooking Tips

Cooking Tips

Cooking Tips

કાંદા-બટેટાના કુરકુરા ભજીયા

કાંદાના કુરકુરા ભજીયા તો તમે ખાધાં જ હશે. હવે બનાવો કાંદા તેમજ બટેટાના કુરકુરા ભજીયા!

સામગ્રીઃ

  • બટેટા 4
  • કાંદા 2
  • લીલા મરચાં 2 (ભજીયામાં નાખવા) અને 5-6 તળવા માટે
  • આદુનો ટુકડો 1½ ઈંચ
  • લસણની કળીઓ 8-10 (optional)
  • કોથમીર ધોઈને સમારેલી 2 ટે.સ્પૂન
  • લાલ મરચાં પાવડર 2  ટી.સ્પૂન
  • હળદર ¼ ટી.સ્પૂન
  • મીઠું સ્વાદ મુજબ
  • તેલ ભજીયા તળવા માટે
  • ચોખાનો લોટ 2 ટે.સ્પૂન
  • ચણાનો લોટ 5-6 ટે.સ્પૂન

રીતઃ બટેટા છોલીને ધોઈને એક સુતરાઉ કાપડથી લૂછીને સૂકાં કરીને ખમણી લો. ત્યારબાદ તેને 2-3 પાણીએથી ધોઈને ફરીથી એજ બાઉલમાં પાણીમાં પલાળી રાખો. બીજી બાજુએ કાંદાની લાંબી પાતળી  ચીરી સમારી લો.  આદુ-લસણ તેમજ લીલા મરચાંને ખાંડણીયામાં અધકચરા વાટી લો અથવા મિક્સીમાં અધકચરા પીસી લો.

બટેટાની છીણને બે હાથમાં લઈ તેમાંથી પાણી નિચોવીને એક બાઉલમાં કાઢી લો. હવે તેમાં લાંબી ચીરી સમારેલાં કાંદાની ચીરીઓને ચોળીને, છૂટ્ટી પાડીને મેળવી દો. કોથમીર તેમજ આદુ-લસણની પેસ્ટ તેમજ સૂકો મસાલો મેળવી દો. સ્વાદ મુજબ મીઠું ઉમેરી દો. આ મિશ્રણને ચોળીને મિક્સ કરો. ત્યારબાદ તેમાં ચોખાનો લોટ ઉમેરો અને ચણાનો લોટ પણ ઉમેરીને પાણી નાખ્યા વગર મિક્સ કરો. હવે આ મિશ્રણ હાથમાં લઈને વાળતાં થોડું પણ બંધાઈ તેવું બને તો તેમાંથી ભજીયા બનાવવા. પરંતુ જો છૂટું પડતું હોય તો 1-2 ચમચી ચણાનો લોટ ઉમેરી દો.

એક કઢાઈમાં તેલ ગરમ કરીને ભજીયાનું મિશ્રણ અંગૂઠા અને બે આંગળીને મદદ વડે એ રીતે લો કે ભજીયા ગોળાકાર ના બનતાં આકાર વિનાના ભજીયા બને. જેમાં કાંદા તેમજ બટેટાની સળીઓ પણ છૂટ્ટી બહાર દેખાય, તો જ ભજીયા ક્રિસ્પી બનશે.

ભજીયા તળી લીધાં બાદ લીલા મરચાંમાં કાપા પાડીને તળી લો. આ ભજીયા ગરમાગરમ સારાં લાગશે!

જામનગરનાં પ્રખ્યાત તીખાં ઘુઘરા

દિવાળીમાં ફરસાણ માટે ગળ્યાં ઘુઘરા તો આપણે બનાવ્યા જ છે, પરંતુ દિવાળીની રજાઓમાં ગરમ નાસ્તો પણ તો ખાવો ગમશે જ ને. તો બનાવી લો જામનગરનાં પ્રખ્યાત તીખાં ઘુઘરા, ગળી, તીખી તેમજ લસણની ચટણી સાથે!!!

સામગ્રીઃ

  • મેંદો 1½ કપ
  • સ્વાદ મુજબ મીઠું
  • તેલ મોણ માટે 1½ ટે.સ્પૂન
  • તેલ ઘૂઘરા તળવા માટે

ગાર્નિશ માટેઃ

  • ઝીણી ચણાના લોટની નાયલોન સેવ
  • કોથમીર ધોઈને સમારેલી
  • મસાલા શીંગદાણા
  • 1 કાંદો ઝીણો સમારેલો

પુરણ માટેઃ

  • બાફેલાં બટેટા 5-6
  • બાફેલાં લીલા વટાણા 1 કપ
  • આદુ-મરચાંની પેસ્ટ 1 ટે.સ્પૂન
  • સ્વાદ મુજબ મીઠું
  • ધાણાજીરૂ ½ ટી.સ્પૂન
  • લાલ મરચાં પાવડર ½ ટી.સ્પૂન
  • ગરમ મસાલો 1½ ટે.સ્પૂન
  • આમચૂર પાવડર (અથવા લીંબુનો રસ) ½ ટી.સ્પૂન
  • કોથમીર ધોઈને સમારેલી 2 ટે.સ્પૂન

ગળી ચટણીઃ

  • આમલી ½ કપ
  • ગોળ ઝીણો સમારેલો ½ કપ
  • કોર્નફ્લોર 1 ટી.સ્પૂન
  • મરચાં પાવડર 1 ટી.સ્પૂન
  • મીઠું સ્વાદ મુજબ

લીલી ચટણીઃ

  • તીખાં લીલા મરચાં 2
  • આદુનો ટુકડો 1 ઈંચ
  • સ્વાદ પ્રમાણે મીઠું
  • લીંબુનો રસ 1 ટે.સ્પૂન
  • શીંગદાણા 2 ટે.સ્પૂન

લસણની ચટણીઃ

  • લાલ સૂકાં મરચાં
  • લસણની કળીઓ 8-10
  • કાશ્મીરી લાલ મરચાં પાવડર 1 ટે.સ્પૂન
  • સ્વાદ પ્રમાણે મીઠું

રીતઃ મેંદામાં તેલનું મોણ નાખ્યા બાદ થોડો લોટ મુઠ્ઠીમાં લઈ વાળી જુઓ. જો લોટ મુઠ્ઠીમાં થોડો બંધાય તેવો થાય એટલે તેમાં થોડું થોડું પાણી ઉમેરીને મિડિયમ લોટ બાંધી દો. 15 મિનિટ માટે લોટને ઢાંકીને મૂકી રાખો.

પુરણ તૈયાર કરવા માટે બાફેલાં બટેટાને અધકચરા મેશ કરી લો. તેમાં બાફેલાં વટાણા, આદુ-મરચાંની પેસ્ટ, ધાણાજીરૂ, મરચાં પાવડર, ગરમ મસાલો, આમચૂર પાવડર, સ્વાદ મુજબ મીઠું, સમારેલી કોથમીર મેળવીને પુરણ તૈયાર કરી લો.

ગળી ચટણીઃ આમલીને ગરમ પાણીમાં થોડીવાર પલળવા મૂકો. આમલી પાણીમાં નરમ થાય એટલે તેને હાથેથી મેશ કરી લો અને ચાળણીમાં ગાળી લો. ત્યારબાદ તેમાં ગોળ, મરચાં પાવડર, કોર્નફ્લોર, મીઠું તેમજ થોડું પાણી નાખીને ગેસ પર ગરમ કરવા મૂકો. થોડીવાર ઉકળીને ઘટ્ટ થવા આવે એટલે ગેસ બંધ કરીને ઉતારી લો.

લીલી ચટણીઃ મિક્સીમાં મરચાં, સુધારેલો આદુનો ટુકડો, સ્વાદ પ્રમાણે મીઠું, લીંબુનો રસ તથા શીંગદાણા તેમજ જરૂર મુજબ થોડું પાણી ઉમેરીને ચટણી પીસી લો.

લસણની ચટણીઃ લાલ સૂકાં મરચાં, લસણની કળીઓ, કાશ્મીરી લાલ મરચાં પાવડર, સ્વાદ પ્રમાણે મીઠું તેમજ થોડું પાણી મેળવીને મિક્સીમાં આ ચટણી પીસી લો.

ઘુઘરા બનાવવા માટેનો લોટ ફરીથી કુણી લેવો. ત્યારબાદ તેમાંથી મિડિયમ સાઈઝનો લૂવો લઈ ગોળ પુરી વણી લો. પુરીની અડધી બાજુએ 1 ચમચી પૂરણ મૂકી દો. તેજ બાજુની પુરીની અડધી કિનારી પર પાણી લગાડીને પુરીની બાકીની અડધી બાજુ બંધ કરીને ચોંટાડી દો અને દાબીને કાંગરી વાળીને ઘુઘરા બનાવી લો.

બધા ઘુઘરા વાળી લીધા બાદ ગેસ પર કઢાઈમાં તેલ ગરમ કરવા મૂકો. તેલ ગરમ થાય એટલે લોટની થોડી કણી નાખીને જો તે તરત ઉપર આવી જાય એટલે તેલ ગરમ થઈ ગયું છે. હવે ઘુઘરા તેલમાં હળવેથી નાખીને ગેસની આંચ ધીમી કરીને ઘુઘરા બંને બાજુએથી સોનેરી રંગના તળી લો.

એક પ્લેટમાં ઘુઘરા મૂકીને ઘુઘરાને ઉપરથી આંગળી વડે ખાડો કરીને તેની ઉપર તીખી ચટણી, ગળી ચટણી, લસણની ચટણી ચમચી વડે રેડો. તેની ઉપર ઝીણાં સમારેલાં કાંદા, કોથમીર, 2-4 શીંગદાણા તેમજ નાયલોન સેવ ભભરાવીને ચટાકેદાર સ્વાદિષ્ટ ઘુઘરા પીરસો.

રાજસ્થાની મીઠાઈ સાંકલી (ખાજા)

 

દિવાળી સ્પેશ્યલ રેસિપી

Reena Mohnot

જોધપુર જાણીતું છે ઘીમાં બનતી એની દરેક વાનગી માટે! અપવાદ કે ફક્ત આ જ એક મીઠાઈ સાંકલી (ખાજા) તેલમાં બને છે!

દિવાળીની રાજસ્થાની મીઠાઈ સાંકલી (ગળ્યા ખાજા) ખાઈને હું મોટી થઈ છું! આ ખાજા દિવાળીમાં ખાસ બનાવવામાં આવે છે અને તે તેલમાં બને છે! મને આ વાતની ત્યાંસુધી ખબર નહોતી, જ્યાં સુધી મેં એ મીઠાઈ બનાવવાની શરૂઆત ન કરી. મારાં ભાભી પાસેથી મેં જ્યારે જાણ્યું કે, આ મીઠાઈ તેલમાં જ બને છે. ત્યારે મને સંદેહ સાથે આશ્ચર્ય થયું હતું! પણ એક વાત પાક્કી કે, વાનગી અને તેના સ્વાદની વાત હોય તો જોધપુરીઓ તેમનાથી બનતું શ્રેષ્ઠ કરી જાણે છે. ખરેખર, તમે વિશ્વાસ કરજો કે, આ મીઠાઈ તેલમાં જ બહુ સ્વાદિષ્ટ બને છે! તેમાં રહેલાં તલ, ગોળ અને તેલ મળીને જે સ્વાદ બને છે. તે ખરેખર, મંત્રમુગ્ધ કરનારો છે!

સામગ્રીઃ મેંદો 1 કપ, ગોળનો પાવડર 1 કપ, તલ 2 ટે.સ્પૂન, મોણ માટે તેલ 4 ટે.સ્પૂન, ચપટી મીઠું, પાણી ¼ કપ, તળવા માટે તેલ

રીતઃ એક પેનમાં ¼ કપ પાણી તેમજ ગોળનો પાવડર મેળવી પેનને ગરમ કરવા મૂકો. ગોળ ઓગળે એટલે તરત ગેસ બંધ કરી દો. ઉકાળવાનું નથી.

એક બાઉલમાં મેંદો લઈ તેમાં તલ, ચપટી મીઠું તથા 4 ટે.સ્પૂન તેલ નાખીને મિક્સ કરો. ગોળનું પાણી હૂંફાળું ઠંડું કરી લો. આ પાણી તેમાં થોડું થોડું ઉમેરતાં જઈ મધ્યમ કડક લોટ બાંધો. લોટ બહુ કડક ના હોવો જોઈએ. લોટને 15 મિનિટ માટે ઢાંકીને રહેવા દો. ત્યારબાદ તેમાંથી નાના લૂવા કરી લઈ પૂરી વણી લો. પૂરી પર કાંટા ચમચી વડે કાંણા પાડી લો. પૂરીની કિનારીઓ ક્યારેય એકસરખી ગોળ નહીં બનશે. મારાં દાદીમા કહેતાં કે, સારાં ખાજા/મઠરી/સાંકલીની કિનાર હંમેશા અસમાન જ હોવી જોઈએ.

બધી મઠરી વણાઈ જાય એટલે કઢાઈમાં તેલ ગરમ કરી લો. તેલ ગરમ થાય એટલે ગેસની આંચ ધીમી કરીને બધી મઠરી ગોલ્ડન બ્રાઉન રંગની તળી લો. મેં તળેલી મઠરી આપેલ ફોટોમાં થોડી વધુ પડતી ડાર્ક થઈ છે, કારણ કે, મેં તેમાં દેશી ગોળ વાપર્યો છે. તમે પ્રોસેસ્ડ ગોળ વાપરશો તો રંગ હલકો રહેશે. જો જો, સાંકલી તળતી વખતે તમારું રસોડું તલ અને ગોળની સોડમથી મઘમઘી ઉઠશે. હું તો સાંકલી તળતી વખતે જ 4-5 સાંકલી ખાઈ જાઉં છું.

તો આ દિવાળીએ તમારા પરિવાર માટે બનાવી લો ખાસ રાજસ્થાની સ્પેશ્યલ મઠરી. Enjoy!

નોંધઃ જ્યારે સાંકલી તળીને બહાર કાઢો. ત્યારે તે નરમ હશે! પણ થોડીવાર બાદ તે કડક ક્રિસ્પી થઈ જશે. એટલે જેવી તે ગોલ્ડન બ્રાઉન તળાઈ જાય કે તરત જ તેલમાંથી બહાર કાઢી લેવી.

(રીના મોહનોત)

(સાયન્સ ગ્રેજ્યુએટ રીના મોહનોતને એમની પેશન રાજસ્થાની રસોઈકળા તરફ દોરી ગઈ અને નિર્માણ થયું ક્લાઉડ કિચન, ધોરા!  જે અમદાવાદના સ્વાદ રસિયાઓને પીરસે છે અસલ પરંપરાગત રાજસ્થાની સ્વાદિષ્ટ વાનગીઓ! અનેક કઠિનાઈ, પેન્ડેમિકનો ફટકો સહીને પણ ક્લાઉડ કિચન ચાલુ રાખવાના મક્કમ નિર્ધારને કારણે રીનાબહેન, ટાઈમ્સ ફુડ એવોર્ડ, રાષ્ટ્રવ્યાવી મેરીટ એવોર્ડ અને મહિલાપ્રેન્યોર જેવા અનેક એવોર્ડના સતત વિજેતા રહ્યાં છે!)

રાજસ્થાની પાપડ વડી, પાન ઠંડાઈ

દિવાળી સ્પેશ્યલ રેસિપી

Reena Mohnot

રાજસ્થાની પાપડ વડી

સામગ્રીઃ પાપડ 2, વડી ½ કપ, બારીક સુધારેલો કાંદો 1, બારીક સુધારેલું ટામેટું 1, 2 ટામેટાંની પ્યુરી, 1 લીલું મરચું બારીક સુધારેલું, આદુ-લસણ પેસ્ટ 1 ટી.સ્પૂન, ધાણાજીરુ 1 ટી.સ્પૂન, લાલ મરચાં પાવડર 1 ટી.સ્પૂન, હળદર ½ ટી.સ્પૂન, ગરમ મસાલો ½ ટી.સ્પૂન, દહીં 1 કપ, સ્વાદ અનુસાર મીઠું, કસૂરી મેથી 1 ટી.સ્પૂન, કોથમીર ધોઈને બારીક સમારેલી 1 ટે.સ્પૂન, ઘી 4 ટે.સ્પૂન

વઘાર માટેઃ જીરૂ ½ ટી.સ્પૂન, ચપટી હીંગ, તેજપત્તા 1, આખાં લાલ મરચાં 2,

રીતઃ વડીનો વેલણ વડે બારીક ભૂકો કરી લો. પાપડના નાના ટુકડા કરી લો. કઢાઈમાં ઘી ગરમ કરી તેમાં પાપડના ટુકડા તળીને કાઢી લો. આ જ ઘીમાં જીરૂ, હીંગ, તેજપત્તા તેમજ લાલ મરચાં વઘારી લો.

હવે તેમાં કાંદા સાંતડીને આદુ-લસણની પેસ્ટ તેમજ સુધારેલું લીલું મરચું નાખી દો. ટામેટાં તેમાં સાંતડીને ટામેટાં પ્યુરી નાખીને થોડીવાર ધીમા તાપે ચઢવા દો. તેમાંનું ઘી છૂટું પડે એટલે દહીંમાં બધા મસાલા મેળવીને કઢાઈમાં નાખી દો. ધીમા તાપે થવા દો. જ્યારે તેમાંનું ઘી ઉપર આવવા લાગે ત્યારે 1 કપ પાણી મેળવીને શાક ઉકળવા લાગે ત્યારે તેમાં તળેલા પાપડના ટુકડા તેમજ વડી નાખીને થોડીવાર બાદ કસૂરી મેથી નાખીને ગેસ બંધ કરીને ઉતારી લો. ઉપરથી સમારેલી કોથમીર ભભરાવીને સર્વ કરો.


 

પાન ઠંડાઈ

સામગ્રીઃ કાજુ 4 ટે.સ્પૂન, પિસ્તા 4 ટે.સ્પૂન, બદામ 4 ટે.સ્પૂન, ખસખસ 1 ટે.સ્પૂન, વરિયાળી 2 ટે.સ્પૂન, ગુલકંદ 2 ટે.સ્પૂન, કાળાં મરી પાવડર 1 સ્પૂન, નાગરવેલના પાન 8, મિશ્રી 1 કપ, દૂધ 1 લિટર, ગુલાબની પાંખડી 1 ટે.સ્પૂન, બદામની કાતરી 1 ટી.સ્પૂન, પિસ્તાની કાતરી 1 ટી.સ્પૂન, ટુટી-ફ્રુટી 1 ટી.સ્પૂન

રીતઃ બદામ, પિસ્તા, ખસખસ, કાજુ અને વરિયાળીને અલગ અલગ વાસણમાં 4-5 કલાક માટે પાણીમાં પલાળી રાખો. 4-5 કલાક બાદ બદામની છાલ કાઢીને બદામ, પિસ્તા, ખસખસ, કાજુ તેમજ પાનના પત્તા અને ગુલકંદને પણ મિક્સીમાં પીસી લેવા. વરિયાળીને અલગથી વાટીને તેમાં 1 કપ દૂધ મેળવીને આ મિશ્રણ ગળણીથી ગાળી લો.

ગુલકંદવાળા મિશ્રણમાં પીસેલી વરિયાળી મેળવી દો. હવે આ મિશ્રણમાં બાકી રહેલું દૂધ, ગુલાબની પાંખડીઓ, મિશ્રી તેમજ કાળાં મરી પાવડર મેળવીને ફ્રીજમાં ઠંડુ કરવા માટે મૂકી દો. ઠંડાઈ પિરસતી વખતે તેમાં બદામ-પિસ્તાની કાતરી તેમજ ટુટી-ફ્રુટી મેળવી દો.

(રીના મોહનોત)

(સાયન્સ ગ્રેજ્યુએટ રીના મોહનોતને એમની પેશન રાજસ્થાની રસોઈકળા તરફ દોરી ગઈ અને નિર્માણ થયું ક્લાઉડ કિચન, ધોરા!  જે અમદાવાદના સ્વાદ રસિયાઓને પીરસે છે અસલ પરંપરાગત રાજસ્થાની સ્વાદિષ્ટ વાનગીઓ! અનેક કઠિનાઈ, પેન્ડેમિકનો ફટકો સહીને પણ ક્લાઉડ કિચન ચાલુ રાખવાના મક્કમ નિર્ધારને કારણે રીનાબહેન, ટાઈમ્સ ફુડ એવોર્ડ, રાષ્ટ્રવ્યાવી મેરીટ એવોર્ડ અને મહિલાપ્રેન્યોર જેવા અનેક એવોર્ડના સતત વિજેતા રહ્યાં છે!)

નાળિયેર બરફી

Reena Mohnot

દિવાળી સ્પેશ્યલ રેસિપી

સામગ્રીઃ તાજું નાળિયેર 1 નંગ, સાકર ¾  કપ, દૂધ 1 લિટર, ઘી 5 ટે.સ્પૂન, ગુંદર 2 ટે.સ્પૂન, એલચી પાવડર 1 ટી.સ્પૂન, ચાંદીનું વરખ

રીતઃ નાળિયેરને ખમણી લો. એક કઢાઈમાં 2 ટે.સ્પૂન ઘી ગરમ કરી તેમાં ગુંદર તળી લો. આ ગુંદર એક વાસણમાં કાઢી રાખો. હવે એ જ કઢાઈમાં બીજું 1 ટે.સ્પૂન ઘી ઉમેરીને ખમણેલું નાળિયેર શેકી લો. લગભગ 10 મિનિટ જેટલા સમયમાં નાળિયેરનું છીણ શેકાઈ જશે. ત્યારબાદ તેમાં દૂધ મેળવીને તવેથા કે ઝારા વડે હલાવતાં રહો. જ્યાં સુધી દૂધ ઉકળીને ઘટ્ટ થાય.

હવે તેમાં સાકર, તળેલું ગુંદર, એલચી પાવડર મેળવીને હલાવતાં રહો. તેમાંની સાકર જ્યારે ઓગળી જાય ત્યારે તેમાં બીજું 2 ટે.સ્પૂન ઘી ઉમેરીને એકસરખું ઝારા વડે હલાવતાં રહો, જ્યાં સુધી નાળિયેરનું ખમણ ઘી ના છોડે.  હવે ગેસ બંધ કરી દો. એક થાળીમાં ઘી ચોપડીને નાળિયેરનું મિશ્રણ પાથરી દો. ઉપર વરખ લગાડીને બરફીના પીસ કરી લો.

(રીના મોહનોત)

(સાયન્સ ગ્રેજ્યુએટ રીના મોહનોતને એમની પેશન રાજસ્થાની રસોઈકળા તરફ દોરી ગઈ અને નિર્માણ થયું ક્લાઉડ કિચન, ધોરા!  જે અમદાવાદના સ્વાદ રસિયાઓને પીરસે છે અસલ પરંપરાગત રાજસ્થાની સ્વાદિષ્ટ વાનગીઓ! અનેક કઠિનાઈ, પેન્ડેમિકનો ફટકો સહીને પણ ક્લાઉડ કિચન ચાલુ રાખવાના મક્કમ નિર્ધારને કારણે રીનાબહેન, ટાઈમ્સ ફુડ એવોર્ડ, રાષ્ટ્રવ્યાવી મેરીટ એવોર્ડ અને મહિલાપ્રેન્યોર જેવા અનેક એવોર્ડના સતત વિજેતા રહ્યાં છે!)

રાજસ્થાની ખસ્તા પુરી, કચોરી

દિવાળી સ્પેશ્યલ રેસિપી

ચણાના લોટની રાજસ્થાની કચોરી

સામગ્રીઃ મેંદો 2 કપ, ઘી 4 ટે.સ્પૂન, મીઠું સ્વાદ મુજબ, તળવા માટે તેલ

પૂરણઃ ચણાનો લોટ 1 કપ, અજમો 1 ટી.સ્પૂન, જીરૂ 1 ટી.સ્પૂન, જીરા પાવડર 1 ટી.સ્પૂન, ધાણાજીરુ 1 ટી.સ્પૂન, મરચાં પાવડર 1 ટી.સ્પૂન, હળદર ½ ટી.સ્પૂન, ગરમ મસાલો ½ ટી.સ્પૂન, આમચૂર પાવડર 1 ટી.સ્પૂન, કસૂરી મેથી 1 ટે.સ્પૂન, તેલ 2 ટે.સ્પૂન

રીતઃ મેંદામાં સ્વાદ અનુસાર મીઠું તેમજ ઘી ઉમેરીને લોટને મિક્સ કરો. મિક્સ થયા બાદ લોટને હાથની મુઠ્ઠીમાં લીધા બાદ વળે એવો થાય ત્યારબાદ થોડું થોડું પાણી ઉમેરીને સોફ્ટ કણક બાંધીને ઢાંકીને થોડીવાર માટે એકબાજુએ મૂકી દો.

ચણાના લોટને સોનેરી રંગનો શેકીને નીચે ઉતારીને તેમાં બાકીના મસાલા ઉમેરી દો. મીઠું સ્વાદ મુજબ ઉમેરો અને આમચૂર પાવડર જોઈએ તેટલી ખટાશ પ્રમાણે મેળવો. હવે તેમાં 2 ટે.સ્પૂન તેલ મેળવી દો.

કચોરીના લોટમાંથી લૂવા લઈ તેમાં પૂરણ ભરીને ગોલા વાળીને કચોરી વાળી લો. કઢાઈમાં તેલ ગરમ કરી કચોરી તળવા માટે નાખીને ગેસની આંચ ધીમી રાખીને કચોરી ગોલ્ડન બ્રાઉન તળી લો.



રાજસ્થાની ખસ્તા પુરી

સામગ્રીઃ મેંદો 2 કપ, રવો 2 ટે.સ્પૂન, ઘી 4 ટે.સ્પૂન, અજમાના પાન ¼ કપ, અજમો 1 ટી.સ્પૂન, કાળાં મરી પાવડર 1 ટી.સ્પૂન, જીરૂ 1 ટી.સ્પૂન, મીઠું સ્વાદ અનુસાર, ચાટ મસાલો, તળવા માટે તેલ

રીતઃ મેંદામાં અજમો, જીરુ, કાળાં મરી પાવડર, સ્વાદ અનુસાર મીઠું તેમજ ઘી ઉમેરીને લોટને મિક્સ કરો. મિક્સ થયા બાદ લોટને હાથની મુઠ્ઠીમાં વાળો. જો વળે તો ઠીક છે. નહીંતર થોડું ઘી બીજું ઉમેરો. ત્યારબાદ તેમાં થોડું થોડું પાણી ઉમેરીને કડક લોટ બાંધીને તેને એક સુતરાઉ કાપડ વડે ઢાંકીને 15 મિનિટ માટે એકબાજુએ રાખી મૂકો.

15 મિનિટ બાદ લોટમાંથી નાની નાની પુરીઓ વણી લો. ત્યારબાદ એક કાંટા ચમચી વડે પુરી પર કાંણા પાડી લેવા. કઢાઈમાં તેલ લઈ કઢાઈને ગેસ પર ગરમ કરવા મૂકો. તેલ ગરમ થાય એટલે પુરી તળવા માટે નાખો. હવે ગેસની ધીમી આંચે પુરીઓ સોનેરી બ્રાઉન તળીને કાઢી લો. પુરીને બહાર કાઢી લીધા પછી તેની ઉપર ચાટ મસાલો ભભરાવી દો. આ ક્રિસ્પી પુરી ચા સાથે સારી લાગે છે.

(રીના મોહનોત)

(સાયન્સ ગ્રેજ્યુએટ રીના મોહનોતને એમની પેશન રાજસ્થાની રસોઈકળા તરફ દોરી ગઈ અને નિર્માણ થયું ક્લાઉડ કિચન, ધોરા!  જે અમદાવાદના સ્વાદ રસિયાઓને પીરસે છે અસલ પરંપરાગત રાજસ્થાની સ્વાદિષ્ટ વાનગીઓ! અનેક કઠિનાઈ, પેન્ડેમિકનો ફટકો સહીને પણ ક્લાઉડ કિચન ચાલુ રાખવાના મક્કમ નિર્ધારને કારણે રીનાબહેન, ટાઈમ્સ ફુડ એવોર્ડ, રાષ્ટ્રવ્યાવી મેરીટ એવોર્ડ અને મહિલાપ્રેન્યોર જેવા અનેક એવોર્ડના સતત વિજેતા રહ્યાં છે!)

બ્રેડ દહીં વડા, લવિંગ-મિશ્રીનું શરબત

દિવાળી સ્પેશ્યલ રેસિપી

 

બ્રેડ દહીં વડા

સામગ્રીઃ બ્રેડ 8 નંગ, દહીં ½ કપ બ્રેડ પલાડવા માટે, પાણી ¼ કપ, તળવા માટે તેલ, કોથમીરની લીલી ચટણી, ખજૂરની ગળી ચટણી, ચાટ મસાલો, વડા માટે દહીં

પૂરણ માટેઃ ખમણેલું પનીર ½ કપ, કાજુના ટુકડા 1 ટે.સ્પૂન, કિસમિસ 1 ટે.સ્પૂન, લીલા મરચાં બારીક સુધારેલાં 2, આદુ બારીક સુધારેલું 1 ટી.સ્પૂન, કોથમીર ધોઈને બારીક સમારેલી, લાલ મરચાં પાવડર ½ ટી.સ્પૂન, જીરુ ½ ટી.સ્પૂન, મીઠું સ્વાદ અનુસાર

રીતઃ પૂરણ માટેની બધી સામગ્રી મિક્સ કરીને એક બાજુએ રાખો.

બ્રેડની કિનારીઓ કટ કરી લો. બ્રેડને દહીં તથા પાણીના મિશ્રણમાં પલાડીને હલકે હાથે દાબીને પાણી કાઢી લો. આ બ્રેડમાં થોડું પૂરણ ભરીને બોલના શેપમાં વાળીને બંધ કરી દો. બધી બ્રેડ આ રીતે તૈયાર કરીને તેલમાં તળી લો. ત્યારબાદ આ બ્રેડ બોલને પાણીમાં અડધા કલાક માટે પલાળીને બહાર કાઢી લો. આ વડા એક પ્લેટમાં રાખીને ઉપર દહીં, તીખી, મીઠી ચટણી તેમજ ચાટ મસાલો ભભરાવીને દહીં વડા તૈયાર કરી લો.


 

લવિંગ અને મિશ્રીનું શરબત

Reena Mohnot

પલાડેલા લવિંગ તથા મિશ્રી શરીર માટે સ્વાસ્થ્યપ્રદ તથા ઠંડક પ્રદાન કરનારાં છે.

સામગ્રીઃ લવિંગ 15-20 (રાત્રે પાણીમાં પલાળી રાખવા), મિશ્રી ½ કપ, એલચી પાવડર ½ ટી.સ્પૂન, કેસરના 8-10 તાંતણા પાણીમાં પલાળેલાં

રીતઃ લવિંગને આખી રાત પાણીમાં પલાળી રાખવા. જો માટીના વાસણમાં પલાળવામાં આવે તો વધુ સારું. સવારે લવિંગને પથ્થર પર પીસી લો અથવા મિક્સીમાં પણ પીસી શકાય. એક માટીનું વાસણ લો. તેમાં પીસેલા લવિંગ તથા મિશ્રીને 1 લિટર પાણીમાં અડધા કલાક માટે પલાળી રાખો. જો લવિંગનો સ્વાદ પાણીમાં આવી જાય તો આ પાણીને ગળણીથી ગાળી લો. ત્યારબાદ તેમાં પલાળેલા કેસર તેમજ પાણી અને એલચી પાવડર પણ ઉમેરી દો.

 

આ શરબત ફ્રીજમાં ઠંડું કરીને પીરસો. આ શરબત પીવાથી શરીરમાં તાજગી આવે છે.

(રીના મોહનોત)

(સાયન્સ ગ્રેજ્યુએટ રીના મોહનોતને એમની પેશન રાજસ્થાની રસોઈકળા તરફ દોરી ગઈ અને નિર્માણ થયું ક્લાઉડ કિચન, ધોરા!  જે અમદાવાદના સ્વાદ રસિયાઓને પીરસે છે અસલ પરંપરાગત રાજસ્થાની સ્વાદિષ્ટ વાનગીઓ! અનેક કઠિનાઈ, પેન્ડેમિકનો ફટકો સહીને પણ ક્લાઉડ કિચન ચાલુ રાખવાના મક્કમ નિર્ધારને કારણે રીનાબહેન, ટાઈમ્સ ફુડ એવોર્ડ, રાષ્ટ્રવ્યાવી મેરીટ એવોર્ડ અને મહિલાપ્રેન્યોર જેવા અનેક એવોર્ડના સતત વિજેતા રહ્યાં છે!)

વધેલી રોટલીનો ક્રિસ્પી નાસ્તો

ઘણીવાર રાત્રે જમવામાં રોટલી વધી જતી હોય છે. બીજા દિવસે ઠંડી રોટલીઓ ખાવાનો કંટાળો આવતો હોય છે. પણ કોઈકવાર આ રોટલી વઘારીને સવારે સ્વાદિષ્ટ નાસ્તો બનાવી શકાય છે!

સામગ્રીઃ

  • રાતની વધેલી રોટલી 4-5
  • કાંદો 1
  • આદુ-લસણ ખમણેલાં 1 ટે.સ્પૂન
  • ગાજર 1
  • સિમલા મરચું 1
  • કોબી ઝીણી સમારેલી ¼ કપ
  • ધાણાજીરુ પાવડર 1 ટી.સ્પૂન
  • લાલ મરચાં પાવડર 1 ટી.સ્પૂન
  • હળદર ¼ ટી.સ્પૂન
  • શેઝવાન ચટણી 2 ટે.સ્પૂન
  • ટોમેટો કેચ-અપ 2 ટે.સ્પૂન
  • કાળાં મરી પાવડર ½ ટી.સ્પૂન
  • કોથમીર ધોઈને સમારેલી ½ કપ
  • લીલા કાંદા પાન સાથે ધોઈને સમારેલાં ½ કપ
  • તેલ 2-3 ટે.સ્પૂન
  • સ્વાદ મુજબ મીઠું,
  • ચિલી ફ્લેક્સ 1 ટે.સ્પૂન(રોટલીમાં નાખવા માટેના શાક તમારી પસંદગી મુજબ લઈ શકો છો. કાંદા ન નાખવા હોય તો તેને સ્કીપ કરી શકાય છે.)

રીતઃ રોટલીઓને એકસાથે મૂકીને એનો રોલ કરી લો. આ રોલના ચપ્પૂ વડે પાતળાં રોલ કટ કરી લો. ત્યારબાદ તેને છૂટાં કરી લો, તો તે નૂડલ્સ જેવા કટ થયેલાં હશે. મોટા ટુકડાને કટ કરીને થોડાં નાના કરી લો.

નોન-સ્ટીક પેનમાં 1 ટે.સ્પૂન તેલ ઉમેરીને પેનને ગેસ પર ગરમ કરવા મૂકો. રોટલીના કટકા તેમાં નાખીને શેલો ફ્રાઈ કરીને ક્રિસ્પી થવા દો. ગેસની આંચ ધીમી રાખવી. થોડીવાર બાદ મધ્યમ આંચે રોટલી શેકવી. 3-4 મિનિટમાં રોટલી ક્રિસ્પી થવા આવશે. ત્યારબાદ રોટલીને એક બાઉલમાં કાઢી લો. રોટલી ઠંડી થયા બાદ તે કડક થઈ જશે. રોટલી ઉપર થોડું મીઠું ભભરાવી દો. (જો રોટલીમાં મીઠું નાખ્યું હોય તો નાખવાની જરૂર નથી.)

પેનમાં 2 ટે.સ્પૂન તેલ ગરમ કરી તેમાં ખમણેલાં આદુ-લસણની પેસ્ટ સાંતડો. 1 મિનિટ બાદ કાંદો ઝીણો સમારેલો ઉમેરી 2 મિનિટ સાંતડો.

કોબી, ગાજર, સિમલા મરચાંની પાતળી સ્લાઈસ કરીને તેમાં હવે સાંતડો. થોડું મીઠું ભભરાવીને કાળાં મરી પાવડર તેમજ મસાલા પણ નાખી દો. સુધારેલાં લીલા કાંદાના પાન તેમજ કોથમીર નાખીને 2-3 મિનિટ સાંતડી લીધા બાદ તેમાં શેઝવાન ચટણી તથા ટોમેટો કેચ-અપ ઉમેરી દો. ગેસની આંચ તેજ રાખીને હજુ 2-3 મિનિટ સાંતડીને ઉતારી લો.

તૈયાર છે રોટલીનો સ્વાદિષ્ટ નાસ્તો!

મંચુરિયન પૂડલા

વરસાદમાં મંચુરિયન ખાવાનું જો મન થાય તો તળેલા તેલવાળા મંચુરિયન ખાવા કરતાં તે જ સામગ્રી વડે પૂડલા સારા રહેશે. આ ગરમાગરમ મંચુરિયન પૂડલા ખાવાની બાળકોને પણ મઝા પડશે.

સામગ્રીઃ

  • ઝીણી સમારેલી કોબી 2 કપ
  • સિમલા મરચું 1
  • કાંદા 2
  • ગાજર 1
  • કોથમીર ધોઈને સમારેલી ½  કપ
  • લીલા કાંદા તથા તેના પાન ધોઈને સમારેલા ½  કપ
  • આદુ-લસણ પેસ્ટ 1 ટે.સ્પૂન
  • લીલા મરચાં 2-3, મીઠું સ્વાદ મુજબ
  • સોયા સોસ 2 ટી.સ્પૂન
  • ટોમેટો કેચ-અપ 2 ટે.સ્પૂન
  • રેડ ચિલી સોસ 2 ટી.સ્પૂન
  • વિનેગર ½ ટી.સ્પૂન
  • કાળાં મરીનો પાવડર 1 ટી.સ્પૂન
  • ચોખાનો લોટ અથવા કોર્નફ્લોર 1 કપ
  • તેલ પૂડલા સાંતડવા માટે
  • શેઝવાન ચટણી પીરસવા માટે

રીતઃ એક મોટા બાઉલમાં ઝીણી સમારેલી કોબી લો. ત્યારબાદ તેમાં કાંદા, ગાજર, કોથમીર, લીલા કાંદા તેના પાન સહિત ઝીણાં સમારીને ઉમેરો. ત્યારબાદ તેમાં સોયા સોસ, ટોમેટો કેચ-અપ, રેડ ચિલી સોસ, વિનેગર, કાળાં મરીનો પાવડર નાખો. તેમાં મીઠું સ્વાદના પ્રમાણ કરતાં થોડું ઓછું નાખવું કારણ કે, ચિલી સોસ તથા ટોમેટો કેચ-અપમાં મીઠું હોય છે. આ બધી સામગ્રીને હાથ વડે મિક્સ કરો. શાકને કારણે તેમાંથી પાણી છૂટશે. હવે તેમાં ચોખાનો લોટ અથવા કોર્નફ્લોર 1 કપ લઈ થોડો થોડો ઉમેરતાં જાવ અને હાથેથી જ મિક્સ કરતા જાવ. જરૂર મુજબ લોટ નાખવો. હાથમાં થોડું મિશ્રણ લઈ તેનો ગોલો વાળવો. જો ગોલો વળે તો મિશ્રણ તૈયાર છે.

એક પ્લાસ્ટીક પેપર અથવા બટર પેપર લઈ પાટલા પર મૂકો. પ્લાસ્ટીક પેપર લો તો તેની ઉપર તેલ ચોપડીને, તેની ઉપર પૂડલા માટેનો લૂવો લઈ હાથેથી થાપીને પૂડલો બનાવવો. એક નોનસ્ટીક તવો ગેસ પર ગરમ કરવા મૂકો. ગરમ થાય એટલે પ્લાસ્ટીકમાંથી પૂડલો તવામાં નાખો. ગેસની આંચ મધ્યમ રાખવી. પૂડલો નાખ્યા બાદ 2 મિનિટ બાદ તેને ઉથલાવીને ઉપર તેમજ ફરતે તેલ રેડવું. 2 મિનિટ બાદ ફરીથી ઉથલાવી દો. પૂડલો બ્રાઉન રંગનો શેકાઈ જાય એટલે ઉતારી લો. આ જ રીતે બધા પૂડલા તૈયાર કરીને ટોમેટો કેચ-અપ અથવા શેઝવાન ચટણી સાથે પીરસો.

ફરાળી સેવપુરી

આઠમનો ઉપવાસ, ગરબાની રમઝટ અને સેવપુરીનો ફરાળ! નવાઈ લાગે છે ને, કઈ રીતે બનશે આ ફરાળી સેવપુરી? તો વાંચી લો નીચે આપેલી રીત!

સામગ્રીઃ

  • બાફેલા બટેટા 2
  • દાડમના દાણા 2 ટે.સ્પૂન
  • શેકેલા શીંગદાણા 2 ટે.સ્પૂન
  • કાકડી 1 (optional)
  • કોથમીર ધોઈને ઝીણી સમારેલી 1 કપ

ગળી ચટણીઃ

  • ખજૂર 1 કપ
  • સિંધવ મીઠું સ્વાદ મુજબ
  • સાકર ટે.સ્પૂન
  • 1 લીંબુનો રસ 1 ટે.સ્પૂન
  • કાળાં મરી પાવડર 1 ટી.સ્પૂન

લીલી ચટણીઃ

  • કોથમીર ધોઈને સમારેલી 1 કપ
  • શીંગદાણા 1 ટે.સ્પૂન
  • લીલા મરચાં 2-3
  • આદુનો ટુકડો 1 ઈંચ

ફરાળી પુરીઃ

  • રાજગરાનો લોટ 1½  કપ
  • સામાનો લોટ ½ કપ
  • સિંધવ મીઠું સ્વાદ મુજબ
  • તેલ મોણ માટે 1 ટે.સ્પૂન
  • તળવા માટે તેલ
  • ઘી 1 ટી.સ્પૂન

ફરાળી સેવઃ

  • રાજગરાનો લોટ 1 કપ
  • સિંધવ મીઠું સ્વાદ મુજબ
  • તેલ મોણ માટે 1 ટે.સ્પૂન
  • કાળા મરી પાવડર 1 ટી.સ્પૂન
  • તળવા માટે તેલ

રીતઃ

ફરાળી પુરીઃ રાજગરાનો લોટ, સામાનો લોટ, સિંધવ મીઠું સ્વાદ મુજબ તેમજ 1 ચમચી તેલ ઉમેરી મિક્સ કરો. તેમાં થોડું થોડું પાણી ઉમેરીને લોટ બાંધી લો. તેની ઉપર 1 ટી.સ્પૂન ઘી ચોપડીને 10 મિનિટ માટે લોટ ઢાંકીને મૂકી રાખો.

10 મિનિટ બાદ લોટમાંથી લૂવા લઈને પુરીઓ વણી લેવી. દરેક પુરી વણાઈ જાય એટલે એક કાંટા ચમચી વડે પુરી પર કાણાં પાડવા. જેથી પુરી તળતી વખતે ફુલે નહીં. એક કઢાઈમાં તેલ ગરમ કરવા મૂકો. ગેસની આંચ તેજ રાખીને પુરીઓ તળી લેવી.

ફરાળી સેવઃ રાજગરાનો લોટ, સિંધવ મીઠું સ્વાદ મુજબ, તેલ 1 ટે.સ્પૂન, કાળા મરી પાવડર तेमતેમજ જરૂર મુજબ પાણી મેળવીને કઠણ લોટ બાંધી લો. આ લોટને સેવની પ્લેટ મૂકી સંચામાં નાખીને સંચા વડે ગરમ તેલમાં સેવ પાડી લો. આ સેવ ગોલ્ડન રંગની તળી લો. સેવને એક પ્લેટમાં કાઢી લઈ તેના નાના નાના ટુકડા કરી લેવા.

ગળી ચટણીઃ ખજૂરના ઠળિયા કાઢી લઈ તેને હૂંફાળા ગરમ પાણીમાં 1 કલાક માટે પલાળી રાખો. ત્યારબાદ તેને બાફી લો. ઠંડું થયા બાદ ખજૂરને મિક્સીમાં નાખી પીસી લો અને એક ચાળણી વડે ગાળી લો. ત્યારબાદ તેમાં સાકર, કાળાં મરી પાવડર, લીંબુનો રસ તેમજ સ્વાદ મુજબ સિંધવ મીઠું મેળવીને ફરી એકવાર મિક્સીમાં નાખીને બારીક ચટણી પીસી લો.

લીલી ચટણીઃ કોથમીર ધોઈને સમારેલી, શીંગદાણા, લીલા મરચાંના ટુકડા, આદુના બારીક ટુકડા તેમજ સ્વાદ મુજબ સિંધવ મીઠું મેળવીને મિક્સીમાં  પીસી લો. પાણી જરૂર મુજબ થોડુંક ઉમેરવું.

બાફેલા બટેટા તેમજ કાકડીને અલગ અલગ ઝીણા ચોરસ સમારી લેવા.

પુરી તેમજ સેવ તૈયાર થઈ ગયા બાદ સેવપુરી પીરસતી વખતે એક પ્લેટ લેવી. પ્લેટમાં પુરી ગોઠવો. તેની ઉપર બાફેલા બટેટાના ટુકડા ગોઠવો. ત્યારબાદ ઉપર થોડી થોડી ગળી ચટણી તેમજ લીલી ચટણી રેડો. ચટણીની ઉપર કાકડીના ટુકડા  (optional), શીંગદાણા તેમજ દાડમના દાણા સજાવીને ઉપર સેવ ભભરાવો અને છેલ્લે ઝીણી સમારેલી કોથમીરથી સેવપુરી ગાર્નિશ કરો. તૈયાર છે ફરાળી સેવપુરી!