Home Variety Cooking Tips

Cooking Tips

ચીઝ ચિલી ટોસ્ટ

0

ઝટપટ તૈયાર થતો અને બાળકોનો તો ફેવરિટ નાસ્તો છે ચીઝ ચિલી ટોસ્ટ! કોઈ વાર રસોઈ બનાવવામાં હાથ અજમાવ્યો ના હોય તો પણ પહેલે પ્રયોગે સફળ થઈ જાઓ એવી વાનગી છે આ!

સામગ્રીઃ

  • 6 સેન્ડવિચ બ્રેડ
  • માખણ
  • 2-3 તાજાં લાલ અથવા લીલાં મરચાં
  • 3-4 કળી લસણ (optional)
  • 1 ટે.સ્પૂન રેડ ચિલી ફ્લેક્સ
  • 4 ચીઝ ક્યુબ્સ

 

રીતઃ દરેક બ્રેડ ઉપર માખણ સરખા પ્રમાણમાં લગાડી દો. એની ઉપર ગોળ પાતળાં સુધારેલાં મરચાંની 4-5 કટકી દરેક બ્રેડ ઉપર આવે એ પ્રમાણે ભભરાવી દો. ત્યારબાદ ઝીણું સમારેલું લસણ થોડું થોડું ભભરાવી દો.  હવે ઉપર ચીઝ ખમણી લો. ઉપરથી રેડ ચિલી ફ્લેક્સ છાંટી દો.

એક નોન-સ્ટીક પેનને ગેસ ઉપર ગરમ કરવા મૂકો. ગરમ થાય એટલે આંચને ધીમી કરી દો. એમાં ગોઠવાય એટલાં બ્રેડ મૂકીને પેનને ઢાંકી દો. 2-3 મિનિટ બાદ ચેક કરી લો. બ્રેડ નીચેથી ગોલ્ડન બ્રાઉન તેમજ ક્રિસ્પી થાય અને ચીઝ ઓગળી જાય એટલે ઉતારી લો.

 

 

વેજ ગોલ્ડ કોઈન

0

બચ્ચાં પાર્ટીને ખુશ કરવા એમને ભાવતી વાનગી બનાવવા કંઈ કેટલીય માથાઝીંક કરવી પડે છે! ગોલ્ડ કોઈન એક એવું સ્ટાર્ટર છે જે સ્વાદિષ્ટ ઉપરાંત હેલ્ધી પણ છે. શું કરીએ બાળકોની વાત આવે એટલે હેલ્થનો વિચાર જરા વધુ કરવો પડે!

સામગ્રીઃ

  • બે બાફેલાં બટેટા મેશ કરેલા
  • 1 નાનો કાંદો ઝીણો સમારેલો
  • ½ કપ બાફીને ક્રશ કરેલાં કોર્ન
  • 1 નાનું ગાજર ખમણેલું
  • અડધું સિમલા મરચું ઝીણાં ચોરસ ટુકડામાં સુધારેલું
  • ½ કપ તાજા લીલા વટાણા બાફેલાં
  • 1 ટે.સ્પૂન આદુ-મરચાં પેસ્ટ
  • 2 લીલાં મરચાં ઝીણાં સમારેલાં
  • ½ કપ કોથમીર ઝીણી સમારેલી
  • 4 સ્લાઈસ બ્રેડની (બ્રાઉન બ્રેડ લઈ શકો છો)
  • મીઠું સ્વાદ મુજબ
  • 1 ટે.સ્પૂન સોયા સોસ
  • 3 ટે.સ્પૂન તલ
  • તળવા માટે તેલ

રીતઃ એક બાઉલમાં મેશ કરેલા બટેટા તેમજ કોર્ન, ગાજર, વટાણા, કાંદો, સિમલા મરચું, આદુ-મરચાં પેસ્ટ, કોથમીર લઈ લો. એમાં સ્વાદ મુજબ મીઠું ઉમેરી દો. તેમજ સોયા સોસ ઉમેરીને મિક્સ કરી લો.

રાઉન્ડ કૂકી કટર લઈ દરેક બ્રેડમાંથી ગોળાકાર કટ કરી લો. (ગોળાકારને બદલે સ્ક્વેર કટ પણ કરી શકો છો.) 1 ટે.સ્પૂન જેટલું પુરણ લઈ બ્રેડના રાઉન્ડ પીસ ઉપર એક સાઈડ ઉપર સરખું લગાડી દો. તલને એક થાળીમાં કાઢી લો. બ્રેડના પુરણ લગાડેલા ભાગને તલમાં રગદોળી લો. આ રીતે બધાં પીસ તૈયાર કરતાં જાઓ. અને એક નોન-સ્ટીક પેનમાં તેલ ગરમ થાય એટલે એમાં આવે એટલા બ્રેડના પીસ શેલો-ફ્રાય કરવા મૂકી દો. ગેસની આંચ મધ્યમ ધીમી રાખવી. કોઈનને બંને બાજુએથી ગોલ્ડન ક્રિસ્પી તળી લો.

આ ગોલ્ડ કોઈન ટોમેટો સોસ અથવા લીલી ચટણી સાથે પિરસો.

બ્રેડને ગોળાકારને બદલે સ્ક્વેર કટ પણ કરી શકો છો.

રામ લડ્ડુ ચાટ

0

દિલ્હીની પ્રખ્યાત ચાટ ‘રામ લડ્ડુ’ ખાવા માટે દિલ્હી જો દૂર હોય તો ઘરે જ બનાવી લો ‘રામ લડ્ડુ’!

સામગ્રીઃ

  • મોગર (મગની ફોતરા વગરની દાળ) – 2 કપ
  • ચણા દાળ ½ કપ
  • મીઠું સ્વાદ પ્રમાણે, ચપટી હીંગ
  • 1 ઈંચ આદુનો ટુકડો
  • 2-3 લીલાં મરચાં
  • 1 ટી.સ્પૂન મરચાં પાવડર
  • 3 ટે.સ્પૂન ખમણેલો મૂળો (optional) (મૂળાને બદલે કાકડી લઈ શકો છો.)
  • ½ કપ ઝીણી સમારેલી કોથમીર
  • તળવા માટે તેલ
  • કોથમીરની તીખી ચટણી
  • ખજુરની મીઠી ચટણી (optional)

રીતઃ મોગર તેમજ ચણા દાળને 2-3 પાણીએથી ધોઈને 3-4 કલાક માટે પલાળી દો. ત્યારબાદ દાળમાંથી પાણી નિતારીને મિક્સીમાં દાળ તેમજ આદુ-મરચાં નાખીને પીસી લો. ખીરૂં બહુ જાડું પણ નહિં અને પાતળું પણ ના હોવું જોઈએ. એમાં મીઠું સ્વાદ પ્રમાણે તેમજ હીંગ તેમજ મરચાં પાવડર ઉમેરી દો.

એક કઢાઈમાં તેલ ગરમ થાય એટલે ખીરામાંથી ડબકાં મૂકીને વડા તળી લો. ચમચી વડે પણ ડબકાં મૂકી શકો છો. આ વડા ગોલ્ડન બ્રાઉન તળી લો.

એક ડીશમાં વડા ગોઠવી લો. એની ઉપર ખમણેલો મૂળો નાખો. તેમજ તીખી તેમજ મીઠી ચટણી નાખીને દિલ્હી રામ લડ્ડુ ચાટ પિરસો.

ચણાનો લોટ અને બટેટાની વડી

0

આ નાસ્તાનો ટેસ્ટ કંઈક અનોખો છે. આ વડી (cubes)ને તમે શેલો-ફ્રાઈ પણ કરી શકો છો. ચાહો તો ડીપ-ફ્રાઈ પણ કરી શકો છો. આ વડી ક્રિસ્પી પણ બને છે.

ક્રિસ્પી પોટેટો વડી

સામગ્રીઃ

  • 100 ગ્રામ ચણાનો લોટ
  • ¼ ટી.સ્પૂન લાલ મરચાં પાવડર
  • ¼ ટી.સ્પૂન હળદર
  • મીઠું સ્વાદ મુજબ
  • 1 ટી.સ્પૂન જીરૂં
  • ½ ટી.સ્પૂન અજમો
  • ચપટી હીંગ
  • 4 કપ પાણી
  • વઘાર માટે તેમજ તળવા માટે તેલ
  • બે બટેટા બાફેલા
  • ½ કપ કોથમીર ઝીણી સમારેલી

રીતઃ એક બાઉલમાં ચણાનો લોટ તેમજ જીરૂં, અજમો તેમજ બાકીનો મસાલો ઉમેરીને 4 કપ પાણીમાંથી થોડું થોડું પાણી ઉમેરો. અને ગાંગડા ના થાય એ રીતે પાતળું ખીરૂં બનાવો.

હવે એક નોન-સ્ટીક કઢાઈમાં 2 ટે.સ્પૂન તેલ ગરમ કરો. એમાં ચપટી હીંગનો વઘાર કરીને આ ખીરૂં રેડી દો અને ગેસની આંચ મધ્યમ કરી દો. પણ એક ચમચા વડે ખીરાને સતત હલાવતાં રહો. જેવું ખીરૂં ઘટ્ટ થાય એટલે ગેસ બંધ કરીને કઢાઈ નીચે ઉતારી લો.

તેલ ચોપડેલી થાળીમાં પુરણને થાપી દો

આ પુરણને હાથેથી બાંધી શકાય એવું ઠંડું થવા દો. ઠંડું થાય એટલે એમાં 2 બાફેલાં બટેટાને છીણીને ઉમેરી દો અને કોથમીર પણ મિક્સ કરી દો. એક તેલ ચોપડેલી થાળી લઈ એમાં પુરણને પાથરી દો.

વડીના ચોસલાને શેલો-ફ્રાઈ કરી લો

આ પુરણને ફ્રીઝરમાં 10 મિનિટ માટે ઠંડું થવા દો. ત્યારબાદ એના ચોસલા પાડી લો. અને ડીપ-ફ્રાઈ અથવા ગોલ્ડન બ્રાઉન શેલો-ફ્રાઈ કરી લો.

આ વડી ચટણી અથવા ટોમટો કેચ-અપ સાથે ખાઈ શકો છો.

 

સેવ બરફી

0

‘સેવ બરફી’ એક સિંધી મિઠાઈ છે. સિંધીમાં એને ‘સિંઘાર જી મિઠાઈ’ કહેવામાં આવે છે. આ બરફી ઘણી જ સ્વાદિષ્ટ છે. હાલમાં બોલિવુડ સેલિબ્રિટી દિપિકા પદુકોણ તેમજ રણવીર સિંહ પરણી ગયા. તેમના લગ્નના મેનૂમાં આ બરફીનું નામ ગુંજ્યૂં છે. તો ચાલો જાણીએ, કઈ રીતે આ બરફી બનાવાય છે.

સામગ્રીઃ

  • નમક વિનાની ચણાના લોટની જાડી સેવ 250 ગ્રામ
  • દૂધ 2 કપ
  • સાકર 250 ગ્રામ
  • મોળો દૂધનો માવો 250 ગ્રામ
  • એલચી પાવડર 1 ટી.સ્પૂન
  • 7-8 કેસરના તાંતણા
  • 2-3 ટે.સ્પૂન ઘી
  • રોઝ એસેન્સ 4-5 ટીપાં
  • કાજૂ-બદામ-પિસ્તાની કાતરી 2 ટે.સ્પૂન

રીતઃ એક જાડા તળિયાની કઢાઈમાં દૂધને ગરમ કરવા મૂકો. એમાંથી 2 ટે.સ્પૂન દૂધને એક વાટકીમાં લઈ એમાં કેસર પલાળી દો અને એક બાજુએ મૂકી દો.

 

દૂધનું પ્રમાણ અડધું થાય ત્યાં સુધી એક લાંબા ઝારા વડે દૂધને હલાવતાં રહો. ત્યાર બાદ સાકર ઉમેરો. સાકર ઓગળી જાય એટલે માવો ખમણીને ઉમેરી દો. સાથે ઘી પણ ઉમેરી દો. એમાં પલાળેલું કેસર અને એલચી પાવડર ઉમેરી દો. મિશ્રણને હલાવતાં રહો. હવે એમાં સેવ ઉમેરી દો અને ગેસની આંચ ધીમી કરી દો. હળવેથી મિશ્રણને હલાવો, સેવ તૂટવી ના જોઈએ. મિશ્રણ ઘટ્ટ થાય એટલે એમાં રોઝ એસેન્સ મિક્સ કરી દો.

ઘી ચોપડેલી એક થાળીમાં મિશ્રણ પાથરી દો. ચપટા તળિયાવાળી એક વાટકી વડે મિશ્રણને હળવેથી ઉપરથી દાબી દો. અને ઉપર સૂકા મેવાની કાતરી ભભરાવી દો. 1-2 કલાક બાદ મિશ્રણ ઠંડું થાય અને સૂકું થાય એટલે ચપ્પૂ વડે બરફીના કટકા કરી લો.

ફરસી પુરી

0

દિવાળીમાં કંઈ કેટલાય પકવાન કે ફરસાણ બનાવો. પણ ઘરમાં જો સૌથી વધુ ખવાતું હોય તો એ ફરસાણ છે ફરસી પુરી. જે નાનાં-મોટાં સહુને ભાવે છે. તો બનાવી લો દિવાળીમાં ફરસી પુરી!

સામગ્રીઃ

  • 500 ગ્રામ મેંદો
  • 200 ગ્રામ રવો
  • 1½ ટી.સ્પૂન અજમો
  • 1 ટી.સ્પૂન અધકચરા વાટેલા કાળા મરી
  • 1 ટી.સ્પૂન જીરૂ
  • ½ ટી.સ્પૂન બેકિંગ પાવડર
  • મોણ માટે 2 ટે.સ્પૂન ઘી
  • તળવા માટે તેલ

રીતઃ મોણ માટેનું ઘી એક કઢાઈમાં ગરમ કરીને ઠંડું કરી લો. રવો અને મેંદો ચાળીને એક વાસણમાં ભેગા કરી લો. હવે એમાં અજમો, કાળાં મરી, બેકિંગ પાવડર તેમજ મોણ માટેનું ઘી ઉમેરી લોટ મિક્સ કરો. એમાં નવશેકું પાણી થોડું થોડું ઉમેરીને કઠણ લોટ બાંધી લો.

એમાંથી એક મોટો લુઓ લઈ જાડી પુરી વણીને ઉપર તેલ ચોપડો. ત્યારબાદ એનો રોલ વાળીને નાનાં નાનાં પુરી માટેના લુઆ બનાવી લો. હવે આ નાના લુઆમાંથી એક લુઓ લઈને પુરી વણો અને એક કાંટા ચમચી વડે એની ઉપર કાણા પાડો. જેથી પુરી ફૂલે નહીં.

આ રીતે બધી પુરી વણાઈ જાય. એટલે કઢાઈમાં તેલ ગરમ કરવા મૂકો. તેલ ગરમ થયા બાદ 4-5 પુરી તળવા માટે કઢાઈમાં હળવેથી નાખો. અને ગેસની આંચ મધ્યમ કરીને પુરી બંને બાજુએથી ગોલ્ડન થાય એવી તળી લો. ફરીથી બીજી 4-5 પુરી નાખતી વખતે ગેસની આંચ તેજ કરવી. અને પુરી નાખ્યા બાદ મધ્યમ આંચે પુરી તળવી.

કોપરાની બરફી (કોકોનટ બરફી)

0

દિવાળીમાં મોહનથાળ તો બનાવી જ લઈએ છીએ. પણ, બીજી એક એવી મિઠાઈ છે, જે જલ્દી બની જાય છે અને ડીશની વેરાયટીમાં ઉમેરો પણ થાય. તો ચાલો બનાવીએ નાળિયેરના કોપરાની બરફી…જે મોઢામાં મૂકતાં જ મહેમાન બોલી ઉઠશે.. વાહ શું સ્વાદ છે!’

સામગ્રીઃ

  • 3 કપ તાજું ખમણેલું કોપરું
  • 100 ગ્રામ માવો
  • 400 ગ્રામ દૂધ
  • ½ કપ ખાંડ
  • 1 ચમચી એલચી પાવડર
  • 5 ટી.સ્પૂન ઘી
  • 5-6 બદામની કાતરી

રીતઃ એક મોટી કઢાઈમાં નાળિયેરનું તાજું કોપરું, દૂધ તેમજ ખાંડ મિક્સ કરી ગેસ ઉપર ગરમ કરવા મૂકો. અને સતત હલાવતાં રહો, જ્યાં સુધી દૂધનું પ્રમાણ અડધું ન થાય. હવે એમાં માવો મિક્સીમાં ક્રશ કરીને ઉમેરો. 5-10 મિનિટ સુધી મિશ્રણને હલાવો અને ત્યારબાદ ઘી ઉમેરો. ઘી ઉમેરીને ફરીથી સાંતડો. જેવું ઘી છૂટ્ટું પડવા માંડે એટલે એમાં એલચી પાવડર ઉમેરીને ગેસ બંધ કરી દો.

ઘી ચોપડેલી એક થાળીમાં આ મિશ્રણ પાથરી દો. અને ઉપર બદામની કાતરી ભભરાવીને દબાવી દો. મિશ્રણ ઠંડું થાય એટલે ચોરસ ટુકડામાં પીસ કટ કરી લો. અને ડબ્બામાં ભરી લો.

આ બરફી ફ્રિજમાં 7-8 દિવસ સુધી સારી રહે છે. અને ફ્રિજની બહાર 2-3 દિવસ સુધી સારી રહે છે.

ફરાળી ઈડલી

0

એકાદશીના ઉપવાસમાં બનાવી લો ફરાળી વાનગી, જે ઘરમાં બધાને ભાવશે! ટાબરિયાંને તો આમ પણ ઈડલીનું નામ લો તો મોઢાંમાં પાણી આવી જાય!

સામગ્રીઃ

  • 1 કપ સાબુદાણા
  • 2 ટી.સ્પૂન તેલ
  • 2 કપ છાશ
  • ½ ટી.સ્પૂન ખાવાનો સોડા
  • 2 ટે.સ્પૂન ઝીણી સમારેલી કોથમીર
  • 3-4 લીલાં મરચાં ઝીણાં સુધારેલાં
  • 1 કપ મોરૈયાનો લોટ (લોટ ન લેવો હોય તો આખો સામો પણ લઈ શકો છો)
  • સિંધવ મીઠું (ઉપવાસનું મીઠું-Rock Salt) સ્વાદ પ્રમાણે

 

ફરાળી ચટણી માટે સામગ્રીઃ

  • 1 કપ કોથમીર
  • 1 કપ શીંગદાણા અથવા 1 તાજું નાળિયેર
  • 1 ટી.સ્પૂન બારીક સુધારેલું આદુ
  • સિંધવ મીઠું સ્વાદ પ્રમાણે
  • 1 ટે.સ્પૂન લીંબુનો રસ

રીતઃ એક કઢાઈમાં 1 ટી.સ્પૂન તેલમાં સાબુદાણા 5 મિનિટ માટે સાંતડો. ત્યારબાદ સાબુદાણાને છાશમાં 5-6 કલાક માટે પલાળો. 6 કલાકમાં સાબુદાણા ફુલી જશે. હવે એને મિક્સીમાં ક્રશ કરી લો. અને સમારેલાં મરચાં, કોથમીર, સ્વાદ મુજબનું મીઠું મિક્સ કરી લો. સોડા નાખીને હલાવી લો.

ઈડલીના વાસણમાં તેલ ચોપડી, ખીરૂ રેડીને ગેસ ઉપર ગરમ કરવા મૂકો. ગરમાગરમ ઈડલી ઉતારી લો. અને ફરાળી ચટણી સાથે પીરસો.

ફરાળી ચટણી માટે ચટણી માટે આપેલી સામગ્રી લઈ મિક્સીમાં પિસી લો.

મોગર દાળની પુરી

0

રાજસ્થાની આ પુરી જરા અલગ છે. પણ છે હેલ્ધી અને બનાવ્યા બાદ 2-3 દિવસ સુધી રેફ્રિજરેટરમાં રાખ્યા વિના પણ સારી રહે છે.

સામગ્રીઃ

પુરી માટેઃ

  • 1 કપ ઘઉંનો લોટ
  • ¼ ટી.સ્પૂન અજમો
  • ¼ ટી.સ્પૂન જીરૂ
  • ¼ ટી.સ્પૂન હળદર
  • મીઠું સ્વાદ પ્રમાણે
  • ¼ ટી.સ્પૂન મરચાં પાવડર
  • 2 ટે.સ્પૂન તેલ મોણ માટે તેમજ
  • તળવા માટે તેલ

મસાલા માટેઃ

  • ½ કપ મોગર દાળ
  • ½ ટી.સ્પૂન જીરૂં
  • ½ ટી.સ્પૂન મરચાં પાવડર
  • 2-3 લીલાં મરચાં
  • મીઠું સ્વાદ પ્રમાણે
  • અડધો ઈંચ આદુ ધોઈને સુધારેલું
  • ચપટી હિંગ
  • એક કાંદો ઝીણો સુધારેલો
  • ½ ટી.સ્પૂન ધાણા અધકચરા વાટેલાં
  • ½ કપ કોથમીર ઝીણી સમારેલી

રીતઃ પુરી માટે આપેલી સામગ્રી મિક્સ કરી લો. થોડું પાણી ઉમેરી લોટ કઠણ બાંધીને 15 મિનિટ માટે રહેવા દો.

દાળને 2-3 પાણીએથી સરખી ધોઈને પાણીમાં 3 કલાક માટે પલાળી રાખો. ત્યારબાદ એક દાણો નખ વડે તોડી જુઓ. દાળ તૂટે તો એ સરખી પલળી ગઈ છે. આ દાળને મિક્સીમાં નાખો તેમજ પુરણ માટે આપેલી સામગ્રીમાં આપેલા મસાલા તેમજ આદુ-મરચાં પાણી નાખ્યા વિના ઉમેરી દો. દાળ પિસાતી ન હોય, તો થોડું પાણી ઉમેરી શકો છો. દાળનું મિશ્રણ ઘટ્ટ રહે એવી રીતે દાળને પિસી લો. દાળને એક બાઉલમાં કાઢીને ચપટી હિંગ નાખી દો. તેમજ અધકચરા વાટેલાં ધાણા અને ઝીણો સમારેલો કાંદો અને કોથમીર મિક્સ કરી દો.

પુરીનો લોટ લઈ પુરી વણો અને એમાં કાંટા ચમચી (Fork) વડે કાણાં પાડતાં જાઓ જેથી પુરી ફુલે નહીં. બધી પુરી આ રીતે વણીને મૂકી દો.

એક કઢાઈમાં તેલ ગરમ કરવા મૂકો. અને વણેલી એક-એક પુરી લઈ એની એક સાઈડ ઉપર દાળનું મિશ્રણ લગાડીને એક બાજુએ મૂકતાં જાઓ. તેલ ગરમ થાય એટલે દાળનું મિશ્રણ લગાડેલી સાઈડ તેલમાં આવે એ રીતે પુરી ઉંધી નાખતા જાઓ. 3-4 પુરી નાખવી. હવે ગેસની આંચ મધ્યમ કરી દો. પુરીને ઉથલાવી દો. લોટવાળી સાઈડ થોડી ગુલાબી થાય એટલે ફરી પુરીને ઉથલાવી દો. દાળનું મિશ્રણ બરાબર ચઢી જાય, હલકું ગુલાબી થાય એટલે પુરી તેલમાંથી કાઢી લો.

ફરાળી શક્કરિયા ચાટ

0

નવરાત્રિમાં ઘરની રસોઈ ઉપરાંત ગરબા રમવા તૈયાર થવું હોય તો સમય તો જોઈએ જ. એમાં ઉપવાસ પણ કર્યો હોય તો ફરાળ પણ બનાવવાનો હોય. પણ જો ફરાળ ઝટપટ બની જાય અને હેલ્ધી પણ હોય તો? એવી ઝટપટ બનતી ફરાળી વાનગી છે શક્કરિયા ચાટ.

શક્કરિયામાં ફાઈબર ભરપૂર હોય છે. તેમજ તે આયર્ન, કેલ્શિયમ, મિનરલ્સ, પોટેશિયમ, મેગ્નેશિયમ, વિટામિન-A તેમજ C થી સમૃદ્ધ છે. શક્કરિયા હાડકાં, ડાયાબિટીસ તેમજ હૃદય માટે પણ સારાં છે.

 

સામગ્રીઃ

  • 2 કપ શક્કરિયા બાફીને ચોરસ ટુકડામાં સુધારેલા
  • ¼ ચમચી મરી પાવડર
  • ½ ચમચી શેકેલો જીરા પાવડર
  • સિંધવ મીઠું (ઉપવાસનું મીઠું – Rock Salt) સ્વાદ મુજબ
  • 1 ટી.સ્પૂન આમચૂર પાવડર (optional)
  • 1 ટે.સ્પૂન લીંબુનો રસ
  • 1 ટે.સ્પૂન ઝીણી સમારેલી કોથમીર

 

રીતઃ શક્કરિયાને સારી રીતે ધોઈને બાફી લો. ત્યારબાદ છોલીને એને ચોરસ ટુકડામાં સુધારી લો. એક બાઉલમાં શક્કરિયાના સુધારેલાં ટુકડા ગોઠવી દો. એની ઉપર લીંબુનો રસ તેમજ સિંધવ મીઠું, શેકેલો જીરા પાવડર, મરી પાવડર, આમચૂર પાવડર (optional), ઝીણી સમારેલી કોથમીર નાખીને ચમચા વડે મિક્સ કરીને પીરસો.

શક્કરિયા ચાટ દહીં તેમજ લીલી ફરાળી ચટણી સાથે પીરસો.

ઉપવાસ ન હોય તો એમાં તમે લાલ મરચાં પાવડર તેમજ અન્ય તમને ભાવતાં મસાલો ઉમેરી શકો છો.

 

WAH BHAI WAH