Home Variety Cooking Tips

Cooking Tips

Cooking Tips

વડા-પાઉં ક્વેસાડિલા

વરસાદમાં બહારનું ખાવાનું આપણે ટાળતાં હોઈએ છીએ. પરંતુ વરસતા વરસાદમાં લારીના વડા-પાઉં તો યાદ આવે જ! જો કે, ચટપટા વડા-પાઉં ક્વેસાડિલા ઘરે બનાવીને વડા-પાઉંનો ટેસ્ટ માણી શકો છો!

સામગ્રીઃ

  • ઘઉંનો લોટ 1 કપ
  • મીઠું ¼ ટી.સ્પૂન
  • તેલ ¼ ટી.સ્પૂન
  • રોટલી શેકવા માટે ઘી

સૂકી ચટણીઃ

  • શીંગદાણા 1 કપ
  • સૂકા નાળિયેરની છીણ 2 ટે.સ્પૂન
  • સફેદ તલ 2 ટે.સ્પૂન
  • લાલ મરચાં પાવડર 3 ટે.સ્પૂન
  • લસણની કળી 7-8 (optional)

પૂરણઃ

  • બાફેલા બટેટા 4
  • આદુનો ટુકડો 1 ઈંચ
  • લસણની 6-7 કળી
  • લીલા મરચાં 4-5
  • હળદર પાવડર ¼ ટી.સ્પૂન
  • હીંગ ¼ ટી.સ્પૂન
  • કળીપત્તાના પાન 5-6
  • આમચૂર પાવડર ½ ટી.સ્પૂન
  • ધાણાજીરુ પાવડર 1 ટી.સ્પૂન
  • કોથમીર ધોઈને સમારેલી 1 કપ
  • તેલ વઘાર માટે 1 ટે.સ્પૂન
  • રાઈ 1 ટી.સ્પૂન
  • જીરૂ 1 ટી.સ્પૂન

લીલી ચટણીઃ

  • ધોઈને સમારેલી કોથમીર 1½ કપ
  • આદુ ટુકડો 1 ઈંચ
  • લસણની કળી 3 (optional)
  • લીલા તીખા મરચાં 3
  • કાચા શીંગદાણા 2 ટે.સ્પૂન
  • મીઠું સ્વાદ મુજબ
  • લીંબુનો રસ 1 ટે.સ્પૂન

રીતઃ ઘઉંનો લોટ રોટલીના લોટ જેવો બાંધીને 10 મિનિટ માટે ઢાંકીને રાખી મૂકો.

સૂકી ચટણી માટે એક પેનને ગેસ પર ગરમ કરવા મૂકી તેમાં શીંગદાણા 2 મિનિટ માટે શેકો. ત્યારબાદ તેમાં તલ અને સૂકા કોપરાની છીણ નાખીને ફરીથી 2 મિનિટ માટે શેકી લો. ત્યારબાદ તેમાં લસણની કળીઓ ઉમેરીને ગેસ બંધ કરી દો. આ મિશ્રણ ઠંડું થાય એટલે મિક્સીમાં નાખીને તેમાં મરચાં પાવડર તથા મીઠું સ્વાદાનુસાર ઉમેરીને કરકરું પીસી લો.

વડા-પાઉંનો મસાલો તૈયાર કરવા માટે મિક્સીમાં આદુનો ટુકડો, લસણની કળી, લીલા મરચાં લઈને પેસ્ટ બનાવી લો.

એક ફ્રાઈ પેનમાં તેલ ગરમ કરી તેમાં રાઈનો વઘાર કરો. રાઈ ફુટે એટલે તેમાં હીંગ, વડા-પાઉંનો મસાલો (આદુ-લસણ-મરચાંની પેસ્ટ) ઉમેરીને જીરૂ, હળદર પાવડર પણ ઉમેરો. હવે તેમાં બાફેલા બટેટાને હાથેથી મેશ કરીને નાખી દો. તેની ઉપર ધાણાજીરૂ પાવડર, આમચૂર પાવડર તેમજ મીઠું સ્વાદ મુજબ ઉમેરી દો. આ મિશ્રણને તવેથા વડે મિક્સ કરી 2-3 મિનિટ થવા દો. ત્યારબાદ ગેસ બંધ કરીને કોથમીર ઉમેરી દો.

ચટણી માટેની સામગ્રી પાણી નાખ્યા વગર મિક્સીમાં વાટી લો.

બાંધેલા લોટના નાના લૂવા કરી. તેમાંથી મિડિયમ સાઈઝની પાતળી 2 રોટલી વણી લો. બંને રોટલીની એક બાજુ સરખી શેકી લેવી. બીજી બાજુ કાચી-પાકી રાખવી. રોટલી નીચે ઉતારીને ગેસની આંચ ધીમી કરી લો. રોટલીની શેકેલી બાજુ પર લીલી ચટણી લગાડીને તેની ઉપર બટેટાનો મસાલો પાથરી દો.ત્યારબાદ તેની ઉપર સૂકી ચટણી ભભરાવી દો. બીજી રોટલીની શેકેલી બાજુ પર લીલી ચટણી લગાડીને એ ભાગ અંદરની તરફ આવે તે રીતે બટેટાના પૂરણને ઢાંકી દો. આ તૈયાર કરેલી રોટલીને તવા પર ધીમી આંચે શેકાવા દો. બંને બાજુએ ઘી લગાડીને ક્રિસ્પી શેકી લો.

શેકાયેલી રોટલીને તવેથા વડે હળવેથી એક પ્લેટમાં ઉતારીને તેના ચપ્પૂ વડે ચાર ટુકડા કરી લો. આ ક્વેસાડિલાને ટોમેટો કેચ-અપ અથવા આમલીની ચટણી સાથે પીરસો.

પૌઆના ઉત્તપમ

આ ઉત્તપમ ઈન્સ્ટન્ટ બની જાય છે. પૌઆને કારણે તે પોચા બને છે. બાળકોના ટિફિન માટે પૌઆના મિક્સ વેજીટેબલ ઉત્તપમ સારા રહેશે!

સામગ્રીઃ

  • પૌઆ 1 કપ
  • રવો 1 કપ
  • દહીં ½ કપ
  • મીઠું સ્વાદ મુજબ
  • કાળા મરી પાવડર 1 ટી.સ્પૂન
  • કોથમીર ધોઈને સમારેલી 1 કપ
  • આદુનો ટુકડો 1 ઈંચ
  • લીલા મરચાં 2
  • સિમલા મરચું 1
  • કાંદો 1
  • ગાજર 1 નાનું
  • કોબી ખમણેલી ½ કપ (optional)
  • મકાઈના બાફેલા દાણા ½ કપ
  • ઈનો પાવડર 1 ટી.સ્પૂન
  • તેલ ઉત્તપમ સાંતડવા માટે
  • ચીઝ ક્યૂબ 2-3 (optional)

વઘાર માટેઃ

  • તેલ 1 ટી.સ્પૂન
  • રાઈ 1 ટી.સ્પૂન
  • હીંગ ¼ ટી.સ્પૂન
  • કળીપત્તાના પાન 8-10

રીતઃ એક મોટા બાઉલમાં પૌઆ લઈ, તેને 2 પાણીએથી ધોઈને પૌઆ પલળે એટલું પાણી નાખીને 2-3 મિનિટ માટે એકબાજુએ રાખો. 3 મિનિટ બાદ પૌઆને હાથેથી સ્મેશ કરી લો. ત્યારબાદ તેમાં રવો અને દહીં જેરણી વડે મિક્સ કરી લો. તેમાં થોડું થોડું પાણી ઉમેરીને ઢોકળાના ખીરા જેવું પ્રવાહી થાય તેવું બનાવી લો અને 10 મિનિટ માટે ઢાંકીને રહેવા દો.

ત્યાબાદ ખીરામાં સિમલા મરચું, કાંદો ઝીણાં સમારીને મેળવી દો. ગાજર, કોબી તેમજ આદુનો ટુકડો ખમણીને મેળવો અને સમારેલી કોથમીર, મકાઈના દાણા, કાળા મરીનો પાવડર, સ્વાદ મુજબ મીઠું  પણ મેળવી દો. જો ખીરું ઘટ્ટ થાય તો પ્રમાણસર પાણી ઉમેરી દો.

વઘારીયામાં તેલ ગરમ કરીને રાઈ તતડાવીને હીંગ નાખી દો. ત્યારબાદ તેમાં કળીપત્તાના પાન ઉમેરીને આ વઘાર ખીરામાં મેળવી દો.

ખીરું તૈયાર થયા બાદ જ્યારે ઉત્તપમ ઉતારવા હોય તે સમયે ખીરામાં ઈનો પાવડર નાખી તેની ઉપર 1 ચમચી ગરમ પાણી રેડીને ચમચા વડે મિક્સ કરી લો.

ઉત્તપમ માટે પેન ગેસ પર ગરમ કરવા મૂકો. પેન ગરમ થાય એટલે થોડું ¼ ટી.સ્પૂન તેલ લગાડી ખીરું રેડીને ફેલાવો. જો બાળકો માટે બનાવતા હોવ તો તેની ઉપર થોડું ચીઝ ખમણીને તેને ઢાંકીને 2 મિનિટ માટે થવા દો. ત્યારબાદ તેને ઉથલાવીને ફરીથી 2-3 ટીપાં જેટલું તેલ ફરતે રેડીને 2 મિનિટ માટે ઢાંકી દો. ઉત્તપમ ગોલ્ડન રંગના શેકાય જાય એટલે ઉતારી લેવા.

તમને જોઈએ તે સાઈઝના ઉત્તપમ બનાવો. આ ઉત્તપમ ચટણી અથવા ટોમેટો કેચ-અપ સાથે પીરસી શકાય.

બારડોલીના પ્રખ્યાત ક્રિસ્પી પાતરા

આ ક્રિસ્પી પાતરાનું ફરસાણ બારડોલીની દેન છે. જે તળેલાં હોય છે, ખાવામાં ક્રિસ્પી મજેદાર લાગે છે! પાતરા બાફવાની કોઈ ઝંઝટ જ નથી!

સામગ્રીઃ

  • ચણાનો લોટ 2-3 કપ
  • ચોખાનો લોટ ½ કપ
  • અજમો ½ ટી.સ્પૂન
  • સફેદ તલ 1 ટી.સ્પૂન
  • હળદર પાવડર ¼ ટી.સ્પૂન
  • મરચાં પાવડર ½ ટી.સ્પૂન
  • સ્વાદ મુજબ મીઠું
  • ધાણાજીરુ પાવડર ½ ટી.સ્પૂન
  • ગરમ મસાલો ½ ટી.સ્પૂન
  • હીંગ ¼ ટી.સ્પૂન
  • પાપડ ખાર ¼ ટી.સ્પૂન અથવા (બેકીંગ સોડા)
  • આમલીનો પલ્પ 3 ટે.સ્પૂન (અથવા લીંબુનો રસ 3 ટે.સ્પૂન)
  • ગોળ 2-3 ટે.સ્પૂન
  • તેલ પાતરા તળવા માટે
  • અળવીના પાન 10-12

પાતરાનો મસાલોઃ

  • આખા ધાણા 1 ટી.સ્પૂન
  • વરિયાળી 1 ટી.સ્પૂન
  • જીરૂ 1 ટી.સ્પૂન
  • આદુનો ટુકડો 1 ઈંચ
  • લસણ 5-6 કળી (optional)
  • લીલા મરચાં 3
  • લવિંગ 2
  • કાળાં મરી 5-6
  • તજનો ટુકડો અડધો ઈંચ

રીતઃ

અળવીના પાન તૂટે નહીં એ રીતે ધોઈને પાણી નિતારવા મૂકી દો.

પાતરાનો મસાલોઃ ધાણા, વરિયાળી, જીરૂ, લવિંગ, કાળાં મરી, તજનો ટુકડો એક નાના પેન અથવા વઘારિયામાં 2 મિનિટ માટે શેકી લો. મસાલો થોડો ઠંડો થાય એટલે મિક્સીમાં મસાલો તેમજ આદુ, મરચાં, લસણ ઉમેરીને અધકચરો વાટી લો.

એક મોટા વાસણમાં ચણાનો લોટ, ચોખાનો લોટ લઈ તેમાં અજમો હાથેથી મસળીને નાખવો. ત્યારબાદ પાતરાનો મસાલો, 2 ટે.સ્પૂન લીંબુનો રસ અથવા આમલીનો પલ્પ, ગોળ ઝીણો ખમણેલો, હીંગ, હળદર, લાલ મરચાં પાવડર, 1 ટે.સ્પૂન તેલ તેમજ મીઠું સ્વાદ મુજબ મેળવી દો. આ ખીરું ઘટ્ટ બનવું જોઈએ. જેથી ½ કપ પાણી થોડું થોડું નાખતા જવું અને લોટ ચમચી વડે મિક્સ કરવો. ખીરું તૈયાર થાય એટલે બેકીંગ સોડા નાખી તેની ઉપર 1 ટે.સ્પૂન લીંબુનો રસ નાખી સોડા એક્ટિવેટ થાય એટલે હાથેથી મિશ્રણ ફેરવો. હવે મિશ્રણને ઢાંકીને 10મિનિટ માટે બાજુએ રાખી મૂકો.

પાતરાના પાનમાંથી એક પાન લઈ તેને ટેબલ પર ઉંધું મૂકી પાનની વચ્ચેની તેમજ ખૂણામાંની જાડી નસ ચપ્પૂ વડે કાઢી લો. આ જ રીતે બધાં પાન તૈયાર કરી લો.

હવે એક મોટું પાતરાનું પાન લઈ ટેબલ પર તેને ઉંધું મૂકી તેની પર લોટનું જાડું મિશ્રણ ચોપડી દો. ત્યારબાદ બીજું પાન થોડું નાનું લઈ તેને નીચેના પાનની ઉપર ઉંધી દિશામાં ઉલટું મૂકો અને તેની ઉપર પણ લોટ લગાડી દો. આ રીતે ચાર પાનને મિશ્રણ લગાડીને પાતરાને બંને સાઈડથી થોડું થોડું વાળી દો ત્યારબાદ તેનો રોલ કરીને બીડું વાળી લો. આ રીતે બીજા ત્રણ બીડાં પણ વાળી લો.

એક કઢાઈમાં તેલ લઈ ગેસ પર ગરમ કરવા મૂકો. તેલ ગરમ થાય એટલે ગેસની આંચ મધ્યમ કરી લો.

પાતરાનું એક બીડું લઈ ચપ્પૂ વડે તેના કટકા કરી લો. આ પાતરાને તેલમાં ગોલ્ડન બ્રાઉન તળી લો.

સેન્ડવિચ ખમણ

સાદા ખમણને ચટણી તો આપણે અવારનવાર ખાઈએ છીએ. જરા હટકે, સેન્ડવિચ ખમણ બનાવી જુઓ. આખા પરિવારને જલસો થઈ જશે!

 

સામગ્રીઃ

  • ચણાનો લોટ 1¼ કપ
  • મીઠું સ્વાદ મુજબ
  • દળેલી ખાંડ 1 ટી.સ્પૂન (optional)
  • હીંગ  ¼ ટી.સ્પૂન
  • હળદર  ¼ ટી.સ્પૂન
  • લીંબુનો રસ 2-3 ટે.સ્પૂન
  • ઈનો પાવડર 1 ટી.સ્પૂન
  • તેલ 2 ટી.સ્પૂન
  • ટમેટો કેચઅપ 2 ટે.સ્પૂન
  • કોથમીરના પાન ધોઈને ઝીણા સમારેલાં 1 ટે.સ્પૂન
  • દાડમના દાણાં 2 ટે.સ્પૂન (optional)
  • ખમણેલું નાળિયેર 1 ટે.સ્પૂન

વઘાર માટેઃ

  • તેલ 1 ટે.સ્પૂન
  • રાઈ 2 ટી.સ્પૂન
  • હીંગ ¼ ટી.સ્પૂન
  • પાણી ½ કપ
  • ખાંડ 1 ટી.સ્પૂન (optional)

ચટણી માટેઃ

  • કોથમીર ધોઈને સુધારેલી 1 કપ
  • આદુનો ટુકડો 1 ઈંચ
  • લીલા મરચાં 3-4
  • જીરુ 1 ટી.સ્પૂન
  • શીંગદાણા 2 ટે.સ્પૂન
  • લીંબુનો રસ 1 ટે.સ્પૂન
  • સ્વાદ મુજબ મીઠું
  • પાણી 1 ટે.સ્પૂન

રીતઃ એક બાઉલમાં ચણાનો લોટ, ખાંડ, હીંગ, હળદર પાવડર, લીંબુનો રસ તેમજ સ્વાદ મુજબ મીઠું ઉમેરી દો. હવે તેમાં  ¼ કપ જેટલું પાણી થોડું થોડું કરીને ઉમેરો તેમજ ગઠ્ઠા ના રહે એ રીતે મિક્સ કરવું. આ ખીરું બટેટા વડાના ખીરા જેવું પાતળું થવું જોઈએ. હવે આ ખીરાને 5 મિનિટ માટે ઢાંકીને  રાખી મૂકો.

ઢોકળા બાફીએ તે વાસણમાં પાણી ગરમ કરવા મૂકો. 2 થાળીમાં તેલ ચોપડી લો.

5 મિનિટ બાદ ખીરામાં 1 ટી.સ્પૂન તેલ મેળવી લો. એમાંથી 2 ડોયા જેટલું ખીરું બીજા એક નાના બાઉલમાં લઈ તેમાં ½ ટી.સ્પૂન ઈનો પાવડર મેળવીને ચમચા વડે એક જ દિશામાં હલાવો, જ્યાં સુધી ખીરું જરા ફુલીને તેમાં ફીણ જામવા માંડે. હવે આ ખીરાને ઢોકળાની એક થાળીમાં પાથરીને આ થાળી ગેસ પર ગરમ કરવા મૂકેલા વાસણમાં મૂકીને વાસણ ઢાંકી દો. થાળીને 15 મિનિટ સુધી થવા દો.

આ જ રીતે ઢોકળાની બીજી થાળી પણ બાફી લો.

ચટણીની સામગ્રી ભેગી કરીને મિક્સીમાં વાટી લો. ચટણી ઘટ્ટ રહેવી જોઈએ.

ઢોકળાની થાળી ઠંડી થાય એટલે હળવેથી ઢોકળાની ચારેકોર ચપ્પૂ ફેરવીને એક તવેથા વડે ઢોકળાની લેયરને નીચેથી ઘસીને થાળીથી અલગ કરી એક મોટી પ્લેટમાં ગોઠવી દો.

એક પેનમાં તેલ ગરમ કરીને રાઈ તેમાં નાખો, રાઈ ફુટે એટલે હીંગ નાખીને તરત અડધો કપ પાણી મિક્સ કરી દો. ત્યારબાદ ખાંડ નાખીને પાણી ઉકળે એટલે ગેસ બંધ કરીને પેનને નીચે ઉતારી લો.

તેલના વઘારને ઢોકળાની એક આખી લેયર પર ચમચી વડે નાખી દો તેમજ ચટણી પણ આ લેયર પર લગાડી દો. ઢોકળાની બીજી લેયર તેની ઉપર ગોઠવી દો. આ બીજી લેયર પર ટમેટો કેચઅપ ચોપડીને તેને કોથમીર, દાડમના દાણા, નાળિયેરની છીણ વડે સજાવી દો. ત્યારબાદ તેના ચોરસ કટકા કરીને લીલી ચટણી સાથે આ સેન્ડવીચ ખમણ પીરસો. લીલી ચટણીને બદલે કઢી પણ પીરસી શકાય છે.

 

 

 

દૂધીના ઈન્સ્ટન્ટ અપ્પે

બાળકોની શાળા ઉઘડી ગઈ છે. તો બાળકોના લંચબોક્સ માટે સ્વાસ્થ્યપ્રદ અને સ્વાદિષ્ટ એવા દૂધીના ઈન્સ્ટન્ટ અપ્પે બનાવી શકાય છે!

સામગ્રીઃ

અપ્પે માટેઃ

  • દૂધી 300 ગ્રામ
  • આદુ 1 ઈંચ
  • લીલા મરચાં 2
  • કોથમીર ધોઈને સમારેલી ½ કપ
  • રવો 1 કપ
  • દહીં ½ કપ
  • તેલ અપ્પમ સાંતળવા માટે
  • મકાઈના બાફેલા દાણા ½ કપ
  • ઈનો પાવડર ½ ટી.સ્પૂન

વધાર માટેઃ

  • ચણા દાળ 1 ટી.સ્પૂન
  • અડદ દાળ 1 ટી.સ્પૂન
  • કાજુના ટુકડા 7-8
  • રાઈ 1 ટી.સ્પૂન
  • વઘાર માટે તેલ 1 ટે.સ્પૂન
  • કળી પત્તાના પાન 10-12
  • હળદર પાવડર ¼ ટી.સ્પૂન
  • 2 ચપટી હીંગ

રીતઃ દૂધીને છોલીને ધોઈને 1 ઈંચ જેટલા ટુકડામાં કટ કરી લો. મિક્સર જારમાં દૂધીના ટુકડા, આદુના ટુકડા, લીલા મરચાંના ટુકડા તેમજ ધોઈને સમારેલી કોથમીર ઉમેરી દો. હવે તેમાં રવો તથા દહીં પણ મેળવી દો અને સ્વાદ મુજબ મીઠું ઉમેરીને મિક્સીમાં પીસી દો. એક બાઉલમાં આ ખીરું કાઢી લો.

એક ફ્રાઈ પેનમાં 1 ટે.સ્પૂન તેલ ગરમ કરી તેમાં ચણા તથા અડદની દાળ ગોલ્ડન સાંતળી લો. ત્યારબાદ કાજુના ટુકડા પણ ગોલ્ડન સાંતળી લો. ગેસની આંચ ધીમી કરીને રાઈ તેમાં ઉમેરી દો. રાઈ ફુટે એટલે ગેસ બંધ કરીને કળી પત્તાના પાન વઘારમાં નાખી દો તથા હળદર પાવડર તથા હીંગ પણ નાખી દો. આ વઘારને ખીરામાં મિક્સ કરી દો. હવે મકાઈના બાફેલા દાણા તેમાં મેળવી દો.

અપ્પે પેનને ગેસ પર ગરમ કરવા મૂકો. ત્યારબાદ અપ્પેના ખીરામાં ઈનો પાવડર નાખી તેની પર 1 ટી.સ્પૂન જેટલું પાણી છાંટીને મિક્સ કરો. અપ્પે પેન ગરમ થાય એટલે તેના દરેક મોલ્ડમાં 2-2 ટીપાં તેલ નાખીને થોડા થોડા તલ પણ ભભરાવી દો. ગેસની આંચ ધીમી કરી દો. હવે અપ્પેના ખીરામાંથી 1 ટે.સ્પૂન જેટલું ખીરું દરેક મોલ્ડમાં ભરીને દરેક ઉપર ફરીથી તલ ભભરાવી દો. પેનને ઢાંકીને 2 મિનિટ થવા દો. ત્યારબાદ ઢાંકણ ખોલીને ચમચી વડે દરેક અપ્પે પર થોડું તેલ છાંટીને ચમચી વડે અપ્પેન ઉથલાવીને ફરીથી ઢાંકીને થવા દો. 2 મિનિટ બાદ અપ્પે ગોલ્ડન ક્રિસ્પી થઈ ગયા હોય તો તપાસીને અપ્પેને એક ડીશમાં કાઢી લો.

અપ્પે સાથે ટોમેટો કેચઅપ અથવા લીલી ચટણી અલગ ડબ્બીમાં બાંધીને આપી શકાય.

મુઠિયા તળ્યા વગરના ચુરમાના લાડુ

ચુરમાના લાડુ એટલે મુઠિયા વાળો, તળો એનો ભૂકો કરીને મિક્સીમાં પીસો! ઓહો, કેટલી કળાકૂટ લાગે છે નહિં? અહીં ચુરમાના લાડુ બનાવવાની સહેલી રીત આપી છે. જેમાં લાડુ તો સ્વાદીષ્ટ જ બને છે!

સામગ્રીઃ

  • ઘઉંનો કરકરો લોટ 2 કપ
  • પાણી 1 કપ
  • તેલ 4 ટે.સ્પૂન
  • એલચી તેમજ જાયફળનો પાવડર 1 ટે.સ્પૂન
  • ગોળ ¾ કપ
  • ખસખસ 2 ટે.સ્પૂન
  • ઘી 1 ટે.સ્પૂન,

રીતઃ ઘઉંનો લોટ 2 કપ એક વાસણમાં કાઢીને એકબાજુએ મૂકી રાખો. ઘઉંનો લોટ જે કપથી માપીને લીધો હોય, તે જ કપ વડે 1 કપ પાણી એક તપેલીમાં ઉમેરો. તેમાં 4 ટે.સ્પૂન તેલ મેળવીને તપેલીને ગેસ પર ગરમ કરવા મૂકો. તેલ-પાણી ઉકળવા લાગે એટલે ગેસ બંધ કરીને તપેલી નીચે ઉતારી લો.

આ તેલવાળા પાણીમાં ઘઉંનો લોટ ગઠ્ઠા ના પડે તે રીતે એક ચમચી વડે મિક્સ કરી લો. આ મિશ્રણ થોડું લોટ જેવું બંધાયુ હોવું જોઈએ.

એક થાળીમાં તેલ ચોપડીને લોટવાળું મિશ્રણ પાથરી દો. ઢોકળા બાફીએ તે રીતે એક કઢાઈમાં પાણી નાખીને સ્ટેન્ડ મૂક્યા બાદ તેને ગેસ પર ગરમ કરવા મૂકો. હવે સ્ટેન્ડ ઉપર લોટ પાથરેલી થાળી મૂકો. થાળીને ઢાંકી દો, જેથી વરાળમાંથી પાણીના ટીપાં તેની ઉપર ના પડે. ત્યારબાદ કઢાઈને પણ ઢાંકીને 15-20 મિનિટ સુધી આ મિશ્રણને બાફવા મૂકો. 20 મિનિટ બાદ ગેસની આંચ એકદમ ધીમી કરીને થાળીમાંથી ચપ્પૂ વડે એક ચમચી જેટલું મિશ્રણ બહાર નાની ડીશમાં કાઢો. ½ મિનિટ બાદ તેને મસળીને જોતાં જો એનો પાવડરની જેમ ભૂકો થઈ જાય તો મિશ્રણ તૈયાર છે અને ભૂકો થાય તેનો અર્થ કે લોટ પણ ચઢી ગયો છે, કાચો નથી. હવે ગેસ બંધ કરી દો.

મિશ્રણ ઠંડું થાય એટલે તેને મોટા તાસ અથવા કોઈ વાસણમાં કાઢીને હાથેથી ભૂકો કરી લો. ત્યારબાદ તેમાં એલચી-જાયફળનો પાવડર મિક્સ કરી દો.

એક ફ્રાઈ પેનને ગેસ પર ગરમ કરવા મૂકો. તેમાં 1 ટે.સ્પૂન ઘી ગરમ થાય એટલે સુધારેલો ગોળ ઉમેરીને ગરમ થવા દો. જેવો ગોળ ઓગળે એટલે તરત જ ગેસ બંધ કરીને ઓગળેલો ગોળ લોટના મિશ્રણમાં રેડી દો. આ મિશ્રણને ચમચા અથવા તવેથા વડે મિક્સ કરો. જરા ઠંડું થાય એટલે તેના લાડવા વાળી લો. આ લાડવા પર ખસખસ લગાડી દો. ત્યારબાદ આ લાડુ ખાવા માટે લઈ શકાય છે.

પૌઆની ટિક્કી

ચટપટી, કુરકુરી અને ખાવામાં એકદમ લાઈટ. લાઈટ એટલે કે, તેમાં બટેટા નથી. તો પૌઆની આ ટિક્કી બનાવવામાં થોડી મહેનત જરૂર છે. પણ ચટણી સાથે (આપેલી રીત પ્રમાણે બનાવશો) પીરસશો તો ખાવામાં ઘણી સ્વાદિષ્ટ લાગશે!

સામગ્રીઃ

  • પાતળા પૌઆ 1 કપ
  • અજમો ½ ટી.સ્પૂન
  • કાંદો 1
  • સિમલા મરચું 1
  • લીલા મરચાં 2
  • કોથમીર ધોઈને સમારેલી 2 ટે.સ્પૂન
  • પૌઆ 1 કપ, જીરુ 1 ટી.સ્પૂન
  • ચાટ મસાલો ¼ ટી.સ્પૂન
  • ચિલી ફ્લેક્સ્ 1 ટી.સ્પૂન
  • કશ્મીરી લાલ મરચા પાવડર 1 ટી.સ્પૂન
  • હળદર પાવડર ¼ ટી.સ્પૂન
  • ગરમ મસાલો ¼ ટી.સ્પૂન
  • માખણ 1 ટે.સ્પૂન
  • ચપટી હીંગ
  • ચોખાનો લોટ 2 ટે.સ્પૂન
  • આમચૂર પાવડર ¼ ટી.સ્પૂન
  • જીરુ 1 ટી.સ્પૂન

ચટણી માટેઃ

  • કાંદો 1
  • ટામેટું 1
  • લસણની કળી 2-3, કાળા મરી 3 નંગ
  • કોથમીર ધોઈને સમારેલી 2 ટે.સ્પૂન
  • લીલા મરચાં 2
  • વરિયાળી ½ ટી.સ્પૂન
  • જીરુ 1 ટી.સ્પૂન
  • અજમો ¼ ટી.સ્પૂન
  • કળીપત્તાના પાન 4-5

ચટણીની રીતઃ કાંદા તેમજ ટામેટાંને ચાર ટુકડામાં સુધારી લઈ મિક્સીના નાના બાઉલમાં નાખો. લસણની કળી, કાળા મરી, કોથમીર, લીલા મરચાં, વરિયાળી નાખીને પાણી નાખ્યા વિના અધકચરું પીસી લો.

એક ફ્રાઈ પેનમાં 1 ટે. સ્પૂન તેલ ગરમ કરી તેમાં જીરૂનો વઘાર કરીને કળીપત્તાના પાન નાખીને વાટેલો મસાલો નાખીને સાંતડો. ત્યારબાદ તેમાં આમચૂર પાવડર, કશ્મીરી લાલ મરચા પાવડર, હળદર, ચપટી મીઠું તેમજ ગરમ મસાલો નાખી તેલ છૂટું થાય ત્યાં સુધી સાંતડીને ગેસ બંધ કરીને એક બાઉલમાં કાઢી લો.

ટીક્કીની રીતઃ પૌઆને 2-3 પાણીએથી ધોઈને ચાળણીમાં નિતરતા મૂકી દો. 5-10 મિનિટ બાદ તે નરમ લોટ જેવા થઈ જશે. ત્યારબાદ તેમાં 1 ટી.સ્પૂન જીરૂ, ચાટ મસાલો, ચિલી ફ્લેક્સ્, કશ્મીરી લાલ મરચા પાવડર, હળદર પાવડર, ગરમ મસાલો, સ્વાદ મુજબ મીઠું તેમજ ચપટી હીંગ તેમજ બાકીની સામગ્રી નાખી રાખો.

હવે ખાલી થયેલા ફ્રાઈ પેનમાં 1 ટે. સ્પૂન તેલ ગરમ કરી અજમો નાખ્યા બાદ તેમાં સુધારેલો કાંદો, લીલા મરચાં, સિમલા મરચું સમારીને 2-3 મિનિટ સાંતડો, જ્યાં સુધી તેમાંનું પાણી સૂકાય ન જાય. હવે આ મિશ્રણને ગેસ બંધ કરીને ઉતારીને પૌઆવાળા મિશ્રણમાં મેળવી દો અને ચોખાનો લોટ તથા માખણ 1 ટે.સ્પૂન મેળવીને લોટની જેમ બાંધી દો. આ મિશ્રણમાંથી નાના ગોલા લઈ તેને બે હાથ વડે ચપટા બનાવીને ફ્રાઈપેનમાં તેલ નાખીને શેલો ફ્રાય કરી લો. આ ગરમાગરમ ટિક્કી ચટણી સાથે પિરસો.

મિની બટેટા પીઝા

બટેટા પીઝાની રીત વાંચતાં જ મોંઢામાં પાણી આવી જાય છે. તો તૈયાર કરેલા પીઝા ખાવામાં કેટલા યમ્મી હશે નહિં! તો રાહ શેની જોવી, બનાવી લો બટેટા પીઝા, જે બહુ જ સહેલાઈથી અને ઈન્સ્ટન્ટ બની જાય છે હં…!

સામગ્રીઃ

  • નાના મિડિયમ સાઈઝના બટેટા 8
  • ચેરી ટામેટા 5-6
  • કોર્નફ્લોર 1 કપ
  • પિઝા શેકવા માટે જરૂરી તેલ
  • મોઝરેલા ચીઝ 300 ગ્રામ
  • ઓરેગેનો પાઉડર, ચિલી ફ્લેક્સ અથવા પિઝા મસાલા 2 ટે.સ્પૂન

રીતઃ બટેટાને બાફી લેવા. એક મોટી પ્લેટમાં બટર પેપર પાથરી દો અથવા કીચન ટેબલ પર બટર પેપર મૂકી તેની ઉપર કોર્નફ્લોર ભભરાવી દો. હવે તેની ઉપર બાફેલા બટેટા મૂકી દો. દરેક બટેટાને સપાટ તળિયાવાળી વાટકી વડે પ્રેસ કરો. જેથી બટેટા ચપટા પુરી જેવા (પરંતુ 1 સે.મી. જાડાઈના) થઈ જાય. ત્યારબાદ બધા બટેટા પર ફરીથી કોર્નફ્લોર ભભરાવી દો.

ટામેટાંની પાતળી સ્લાઈસ કરીને એક પ્લેટમાં ગોઠવી રાખો. ચીઝને નાના પીસમાં સમારી લેવું.

એક ફ્રાઈ પેનને ગેસ પર ગરમ કરવા મૂકો. તેમાં 1 ટે.સ્પૂન તેલ લઈને પેન ફરતે તવેથા વડે લગાડી લો. પેન ગરમ થાય એટલે બટેટાને તવેથા વડે હળવેથી ઉપાડીને ફ્રાઈ પેનમાં મૂકો. જેટલા બટેટા આવે તેટલા ગોઠવી દો. ફરતે જરૂર મુજબ તેલ થોડું થોડું રેડવું. બટેટા એકબાજુએથી ગોલ્ડન રંગના શેકાઈ જાય એટલે ઉથલાવીને બીજી બાજુએથી પણ ગોલ્ડન રંગના શેકી લેવા.

હવે દરેક બટેટા પર ચપટી મીઠું તેમજ કાળા મરી પાવડર ભભરાવો. ત્યારબાદ ચમચી વડે ટોમેટો કેચઅપ લગાડીને ટામેટાંની 2-3 સ્લાઈસ ગોઠવી દો તથા તેની ઉપર ચીઝના થોડા ટુકડા સજાવી દો.

આ રીતે દરેક બટેટા પિઝાની ટોપિંગ સજાવી લો અને તેને ઢાંકીને ગેસની ધીમી આંચ પર 3-4 મિનિટ થવા દો. તેમાંનું ચીઝ ઓગળી જાય એટલે દરેક બટેટા પર પિઝા મસાલા ભભરાવી દો. 2 મિનિટ બાદ ગેસ બંધ કરીને એક-એક પિઝા તવેથા વડે હળવેથી ઉંચકીને પ્લેટમાં ગોઠવી દો. 2 મિનિટ બાદ થોડા ઠંડા થાય એટલે ખાવા માટે પીરસો. કારણ કે, બટેટા અંદરથી ગરમ હશે.

 

પિઝાની ટોપિંગ્સ તમે તમારી પસંદ અનુસાર લઈ શકો છો.

એગલેસ વેનિલા સ્વિસ રોલ

બાળકોને વેકેશન હોય અને એમને ખાવાની વાનગી દેખાવે આકર્ષક હોય તેવી આપો તો તેઓ બહુ ખુશ થઈ જાય છે. આ એગલેસ વેનિલા સ્વિસ રોલ પણ દેખાવે મોઢામાં પાણી લાવે તેવા તેમજ ખાવામાં પણ બહુ જ સ્વાદીષ્ટ બને છે.

પ્રવાહી સામગ્રીઃ

  • દૂધ 3/4 કપ
  • લીંબુનો રસ 1 ટે.સ્પૂન
  • મીઠું 1 કપ
  • તેલ ¼ કપ
  • વેનિલા એસેન્સ ¼ ટી.સ્પૂન
  • સ્ટ્રોબેરી ક્રશ 1 કપ અથવા મિક્સ્ડ ફ્રુટ જામ (પાઈનેપલ ક્રશ પણ લઈ શકાય છે.)

સૂકી સામગ્રીઃ

  • મેંદો 3/4 કપ
  • દળેલી ખાંડ ½ કપ
  • બેકીંગ પાવડર ½ ટી.સ્પૂન
  • બેકીંગ સોડા ¼ ટી.સ્પૂન
  • ચપટી મીઠું

રીતઃ એક બાઉલમાં દૂધ લઈ તેમાં લીંબુનો રસ મેળવીને ચમચી વડે હલાવીને 5 મિનિટ માટે એકબાજુએ રાખો.  પાંચ મિનિટ બાદ બીજા એક મોટા બાઉલમાં ¼ કપ તેલ લો. તેમાં લીંબુના રસવાળું દૂધ મેળવો તેમજ વેનિલા એસેન્સ ઉમેરીને 5 મિનિટ સુધી જેરણી વડે એકસરખું આ મિશ્રણને હલાવો. હવે તેમાં મેંદો, દળેલી ખાંડ, બેકીંગ પાવડર, બેકીંગ સોડા તેમજ ચપટી મીઠું ચાળીને નાખો. એક ચમચા વડે આ મિશ્રણને હલાવતા રહો, જયાં સુધી તે એકરસ ન થાય. એક કેક ટીનમાં બટર પેપર પાથરીને આ મિશ્રણ રેડી દો.

ઢાંકણવાળી એક કઢાઈ લો. તેમાં 1 કપ મીઠું પાથરી તેના પર સ્ટીલનું નાનું સ્ટેન્ડ મૂકીને તેને ઢાંકીને ગેસ પર 10 મિનિટ માટે પ્રિહીટ થવા માટે મૂકો. 10 મિનિટ બાદ કેક ટીનને કઢાઈમાં સ્ટેન્ડ પર મૂકીને કઢાઈ ઢાંકી દો. ગેસની ધીમી મધ્યમ આંચે કેક થવા દો. 20 મિનિટ બાદ કઢાઈમાં એક ટૂથપિક અથવા ચપ્પૂ વડે કેક ચેક કરી લો. જો ચપ્પૂ ચોખ્ખું બહાર આવે તો ગેસ બંધ કરીને કેક નીચે ઉતારી લો.

એક પ્લેટમાં બટર પેપર પાથરીને તેની ઉપર ટીન ઉંધું વાળીને કેક બહાર કાઢી લો. હવે કેક ઉપર સ્ટ્રોબેરી ક્રશ અથવા મિક્સ્ડ ફ્રુટ જામમાં થોડું પાણી મેળવીને લિક્વિડ બનાવી લો. એને કેકની થોડી કિનારી છોડીને આખા કેક ઉપર ચોપડી લો. ત્યારબાદ વ્હિપ્ડ ક્રીમ પણ તે જ રીતે કિનારી છોડીને કેકની મધ્યમાં ચોપડી લો. હવે કેકને તેની નીચેના બટર પેપર સાથે પકડીને રોલ કરતા જાવ અને છેલ્લે બન્ને સાઈડથી પેક કરીને 30 મિનિટ માટે ફ્રીજમાં મૂકી દો.

30 મિનિટ બાદ એક પ્લેટમાં સ્ટ્રોબેરી ક્રશ લઈ તેને રોલની ફરતે લગાડો. ત્યારબાદ તેની ઉપર સૂકા નાળિયેરનું છીણ લગાડી લો. હવે ચપ્પૂ વડે રોલના ગોળ પીસ કરીને ખાવાના ઉપયોગમાં લો.

નાળિયેર લાડુ

વેકેશનમાં બાળકો માટે નાળિયેર લાડુ બનાવીને ફ્રીજમાં મૂકી દો. આ ઠંડા લાડુ બાળકોને ગરમીથી રાહત આપશે અને પૌષ્ટિકતા આપશે તે નફામાં!

સામગ્રીઃ

ચાસણી માટેઃ

  • સાકર ½ કપ
  • પાણી ¼  કપ
  • દૂધ 1 ટી.સ્પૂન
  • દેશી ઘી 1 ટી.સ્પૂન

લાડુ માટેઃ

  • ફૂલ ફેટ દૂધ 1½ કપ
  • નાળિયેરની છીણ 2 કપ
  • એલચી પાવડર 1 ટી.સ્પૂન

રીતઃ એક પેન અથવા કઢાઈમાં સાકર તેમજ પાણી મિક્સ કરી ગેસ પર ગરમ કરવા મૂકો. ચમચા વડે ચાસણીને હલાવતાં રહેવું. સાકર ઓગળીને ઉભરો આવે ત્યારે 1 ટી.સ્પૂન દૂધ ઉમેરવું. દૂધના ફીણમાં કચરો જમા થાય તે એક ચમચી વડે કાઢી લેવો જેથી ચાસણી ચોખ્ખી થઈ જાય. હવે તેમાં 1 ટી.સ્પૂન ઘી ઉમેરવું. ચમચા વડે ચાસણીને હલાવતાં રહેવું. ચાસણી ઘટ્ટ થાય એટલે ગેસ બંધ કરીને હજી ચમચા વડે હલાવતાં રહેવું. હવે આ ચાસણીની સાકર રવા જેવી દાણેદાર થવા માંડશે. જેને એક ચાળણી વડે ચાળી લેવી. જાડી સાકરને મિક્સીમાં એકવાર ફેરવીને ફરીથી ચાળી લેવી.

એક કઢાઈમાં 1½ કપ દૂધ ગેસની તેજ આંચે ગરમ કરવા મૂકીને એક તવેથા વડે 2-3 મિનિટ સુધી હલાવતાં રહો. હવે તેમાં નાળિયેરની છીણ ઉમેરીને ગેસની આંચ ધીમી કરીને દો 5-6 મિનિટ સુધી હલાવતાં રહો. ત્યારબાદ ગેસની આંચ તેજ કરી દો. મિશ્રણ સૂકું થાય એટલે ગેસ બંધ કરીને એક વાસણમાં આ છીણ કાઢી લો. તેમાં સાકર તથા એલચી પાવડર ઉમેરીને મિશ્રણ થોડું ઠંડું થાય એટલે લાડુ વાળી લો.

આ લાડુને ડબ્બામાં ભરીને ફ્રીજમાં ઠંડા કરવા મૂકી દો.