Cooking Tips

ફરાળી શક્કરિયા ચાટ

0

નવરાત્રિમાં ઘરની રસોઈ ઉપરાંત ગરબા રમવા તૈયાર થવું હોય તો સમય તો જોઈએ જ. એમાં ઉપવાસ પણ કર્યો હોય તો ફરાળ પણ બનાવવાનો હોય. પણ જો ફરાળ ઝટપટ બની જાય અને હેલ્ધી પણ હોય તો? એવી ઝટપટ બનતી ફરાળી વાનગી છે શક્કરિયા ચાટ.

શક્કરિયામાં ફાઈબર ભરપૂર હોય છે. તેમજ તે આયર્ન, કેલ્શિયમ, મિનરલ્સ, પોટેશિયમ, મેગ્નેશિયમ, વિટામિન-A તેમજ C થી સમૃદ્ધ છે. શક્કરિયા હાડકાં, ડાયાબિટીસ તેમજ હૃદય માટે પણ સારાં છે.

 

સામગ્રીઃ

  • 2 કપ શક્કરિયા બાફીને ચોરસ ટુકડામાં સુધારેલા
  • ¼ ચમચી મરી પાવડર
  • ½ ચમચી શેકેલો જીરા પાવડર
  • સિંધવ મીઠું (ઉપવાસનું મીઠું – Rock Salt) સ્વાદ મુજબ
  • 1 ટી.સ્પૂન આમચૂર પાવડર (optional)
  • 1 ટે.સ્પૂન લીંબુનો રસ
  • 1 ટે.સ્પૂન ઝીણી સમારેલી કોથમીર

 

રીતઃ શક્કરિયાને સારી રીતે ધોઈને બાફી લો. ત્યારબાદ છોલીને એને ચોરસ ટુકડામાં સુધારી લો. એક બાઉલમાં શક્કરિયાના સુધારેલાં ટુકડા ગોઠવી દો. એની ઉપર લીંબુનો રસ તેમજ સિંધવ મીઠું, શેકેલો જીરા પાવડર, મરી પાવડર, આમચૂર પાવડર (optional), ઝીણી સમારેલી કોથમીર નાખીને ચમચા વડે મિક્સ કરીને પીરસો.

શક્કરિયા ચાટ દહીં તેમજ લીલી ફરાળી ચટણી સાથે પીરસો.

ઉપવાસ ન હોય તો એમાં તમે લાલ મરચાં પાવડર તેમજ અન્ય તમને ભાવતાં મસાલો ઉમેરી શકો છો.

 

ફરાળી બટેટા વડા – ચટણી

0

નવરાત્રિ આવે છે. જો વ્રત કરો છો, તો ગરબાં રમવા માટે ઉત્સાહ વધારવા ફરાળ પણ કરવો જરૂરી છે. ફરાળ હેલ્ધી અને ટેસ્ટી પણ હોવો જરૂરી છે. ચાલો બનાવીએ ફરાળી બટેટા વડા અને સાથે ચટણી!!

વડા માટે સામગ્રીઃ

  • બે બટેટા બાફીને મેશ કરેલા
  • 1-2 લીલાં મરચાં
  • 3 ટે.સ્પૂન ઝીણી સમારેલી કોથમીર
  • 1 ટે.સ્પૂન ખમણેલું આદુ
  • 1 કપ રાજગરાનો લોટ
  • 1 ટી.સ્પૂન જીરૂં
  • ¼ ટી.સ્પૂન મરી પાવડર
  • સિંધવ મીઠું (ઉપવાસનું મીઠું – Rock Salt) સ્વાદ મુજબ
  • 1 ટે.સ્પૂન લીંબુનો રસ (optional)

ફરાળી ચટણી માટે સામગ્રીઃ

  • 1 કપ કોથમીર
  • 1 કપ શીંગદાણા
  • 1 ટી.સ્પૂન બારીક સુધારેલું આદુ
  • સિંધવ મીઠું સ્વાદ પ્રમાણે
  • 1 ટે.સ્પૂન લીંબુનો રસ

રીતઃ એક કઢાઈમાં 1 ટે.સ્પૂન તેલ ગરમ કરો. એમાં જીરૂ નાખીને તતડાવો. મીઠું સ્વાદ મુજબ ઉમેરો. ત્યારબાદ આદુની પેસ્ટ ઉમેરી દો. થોડીવાર સાંતડીને બટેટાનો માવો તેમજ કોથમીર અને લીલાં મરચાં સુધારીને ઉમેરી દો. 2-3 મિનિટ સાંતડીને મિશ્રણને એક થાળીમાં કાઢી લો. મિશ્રણ ઠંડું થાય એટલે વડા માટે ગોળા વાળી લો.

એક બાઉલમાં રાજગરાનો લોટ લો. એમાં સ્વાદ મુજબ મીઠું તેમજ મરી પાવડર ઉમેરો. પાણી નાખીને ઘટ્ટ ખીરૂં બનાવો.

વડા તળવા માટે કઢાઈમાં તેલ ગરમ કરવા મૂકો. તેલ ગરમ થાય એટલે 1 ટે.સ્પૂન તેલ ખીરામાં નાખીને મિક્સ કરી લો. વડા માટેના ગોળા થોડાં નાખીને વડા તળી લો. વડા તેલમાં નાખ્યા બાદ થોડીવાર બાદ, નીચેથી ગોલ્ડન થયા બાદ હળવેથી ઉથલાવો. બીજી સાઈડ પણ ગોલ્ડન થાય એટલે તેલ નિતારીને ઉતારી લો.

આ વડા ફરાળી લીલી ચટણી સાથે પીરસો.

ચટણી માટે કોથમીર ધોઈને સુધારી લો. એમાં બાકીની સામગ્રી ઉમેરીને મિક્સીમાં ચટણી પીસી લો.

સમોસા પિનવ્હીલ્સ્

0

સમોસા બનાવવા છે... પણ સમોસાની પટ્ટી વાળવાનો કંટાળો આવે છે. તો એ જ સમોસાનો ટેસ્ટ મેળવો! જરા જુદી રીતે…પણ સહેલાઈથી અને ઝડપથી પિનવ્હીલ્સ્ બનાવીને!!!  આ રોલ બનાવીને રાખો તો બે દિવસ સુધી સારાં રહે છે.

સામગ્રીઃ 4 નાની સાઈઝના બટેટા, મીઠું સ્વાદાનુસાર, ½ ટે.સ્પૂન મરચાં પાવડર, ¼ ટી.સ્પૂન હળદર, ½ ટી.સ્પૂન જીરૂ, ચપટી હિંગ, ½ ટે.સ્પૂન ધાણા પાવડર ½ ટી.સ્પૂન જીરૂ પાવડર શેકેલો, ½ ટી.સ્પૂન ગરમ મસાલો, 1 ટે.સ્પૂન આદુ-મરચાંની પેસ્ટ, 2 ટે.સ્પૂન કોથમીર ઝીણી સમારેલી, 3 ટે.સ્પૂન મેંદો, ½ ટી.સ્પૂન આમચૂર પાવડર

પડ માટેઃ 1 કપ મેંદો, મીઠું સ્વાદાનુસાર, ¼ ટી.સ્પૂન અજમો, મોણ માટે 3 ટે.સ્પૂન તેલ

રીતઃ મેંદામાં તેલ, મીઠું, તેમજ અજમો હાથેથી મસળીને નાખવો જેથી સુગંધ સરસ આવશે. બધી સામગ્રી મિક્સ કરીને. થોડું થોડું પાણી ઉમેરીને બહુ કડક નહીં કે બહુ ઢીલો નહીં એવો લોટ બાંધી દો. આ લોટને ઢાંકીને 15 મિનિટ માટે એકબાજુએ મૂકી દો.

બટેટાને ધોઈને કુકરમાં પાણી નાખીને વાસણમાં બાફવા મૂકો. કુકરની ત્રણ સિટી થવા દેવી. ત્યારબાદ કુકર અડધો કલાક પછી ખોલવું. એક વાસણમાં બટેટાને છોલીને બારીક છૂંદો કરી લો. એમાં સ્વાદ મુજબ મીઠું ઉમેરી દો. તેમજ બાકીની સામગ્રી (3 ટે.સ્પૂન મેંદા સિવાયની) ઉમેરીને મિક્સ કરીને એકબાજુએ મૂકી દો.

એક નાના બાઉલમાં 3 ટે.સ્પૂન મેંદો તેમજ ચપટી મીઠું ઉમેરી દો. અને થોડું થોડું પાણી ઉમેરીને પાતળી પેસ્ટ બનાવી લો.

પડ માટે બાંધેલો લોટ ફરી એકવાર થોડો કુણી લો. લોટના બે ભાગ કરો. તેમજ બટેટાના મિશ્રણના પણ બે ભાગ કરી લો. લોટનો એક ભાગ લઈ એને વેલણથી ગોળ અથવા લંબચોરસ રોટલો વણી લો. રોટલી જેટલી જાડાઈ રાખવી. મેંદાની વણેલી રોટલી ઉપર બટેટાના પુરણમાંથી એક ભાગ લઈ એકસરખું થાપીને, ફેલાવીને લગાડી દો. એક છેડેથી રોટલીને બટેટાના પૂરણ સાથે રોલ વાળો (પાતરા વાળીએ એ રીતે). અને છેડા ઉપર મેંદાની પેસ્ટ લગાડી રોલને પેક કરી લો.

આ રોલના અડધા ઈંચના કટકા કરી લો. બધા રોલ તૈયાર થાય એટલે કઢાઈમાં તેલ ગરમ કરવા મૂકો. અને રોલને મેંદાની પેસ્ટમાં બોળીને તેલમાં તળી લો. પહેલાં ગેસની આંચ ફાસ્ટ રાખવી. રોલ નાખ્યા બાદ મધ્યમ ધીમી કરવી. રોલ ગોલ્ડન ક્રિસ્પી થાય એટલે કાઢી લેવા.

ખાટી-મીઠી ચટણી, કોથમીરની ચટણી અથવા ટોમેટો કેચ-અપ સાથે આ રોલ પીરસવા

 

ભગત મુઠીયાનું શાક

0

ભગત મુઠીયાનું શાક રોટલી, પુરી અથવા ભાત સાથે ખાઈ શકાય છે. પણ, ચોખાના લોટના પૂડલા (સાદા) સાથે આ શાક બહુ સ્વાદિષ્ટ લાગે છે. ચોખાના લોટના પૂડલાની રીત જાણવા માટેની લિન્કઃ https://chitralekha.com/variety/cooking-tips/rice-flour-pudla/

સામગ્રીઃ 

  • 1 કપ  ચણા દાળ
  • 2 બટેટા
  • 2-3 ટમેટાં
  • 1½ ટે.સ્પૂન આદુ-મરચાંની પેસ્ટ
  • 1 ટી.સ્પૂન જીરૂ પાવડર
  • 1 ટી.સ્પૂન ધાણા-જીરૂ પાવડર
  • 1 ટી.સ્પૂન મરચાં પાવડર
  • ¼ ટી.સ્પૂન હળદર પાવડર
  • 1  ટી.સ્પૂન ગરમ મસાલો
  • સ્વાદાનુસાર મીઠું
  • વઘાર તેમજ તળવા માટે તેલ
  • 1  ટી.સ્પૂન જીરૂં
  • 3 ટે.સ્પૂન ઝીણી સમારેલી કોથમીર
  • 2 ઝીણાં સમારેલા કાંદા (optional)
  • હિંગ ચપટી

રીતઃ ચણા દાળને ધોઈને 4-5 કલાક અથવા આખી રાત પાણીમાં પલાળી રાખો. સવારે દાળને મિક્સરમાં કરકરી પીસી લો. અને એમાં આદુ-મરચાંની પેસ્ટ, જીરૂ પાવડર, સ્વાદ પ્રમાણે મીઠું, 2 ટે.સ્પૂન ઝીણી સમારેલી કોથમીર, ચપટી હળદર, ચપટી હીંગ, 1 ઝીણો સમારેલો કાંદો (optional) ઉમેરીને એના ગોલ્ડન બ્રાઉન ભજીયા તળી લો.

વઘાર માટે એક કઢાઈમાં 2 ટે.સ્પૂન તેલ ઉમેરી ગેસ ઉપર મૂકો. જીરૂં તતડાવીને હિંગ છાંટો. અને 1 ઝીણો સમારેલો કાંદો ઉમેરીને સાંતડવા મૂકો. કાંદો નહીં નાખવો હોય તો ટમેટાં ઝીણા સમારીને વઘારમાં નાખો. થોડીવાર સાંતડીને હળદર, ગરમ મસાલો, ધાણા-જીરૂ તેમજ મરચાં પાવડર ઉમેરીને સાંતડો. બટેટાના ચોરસ ટુકડા કરીને નાખો. ધીમે તાપે વાસણ ઢાંકીને થવા દો. બટેટા થોડા ચઢી જાય એટલે થોડું પાણી ઉમેરો. શાક ઉકળે અને બટેટા ચઢી જાય એટલે ભગત મુઠીયા ઉમેરો. મુઠીયામાંથી 2 થી 3 મુઠીયા તોડીને ગ્રેવીમાં નાખો, એનાથી સ્વાદ વધી જશે. 5-10 મિનિટ શાક ઉકળવા દો. ઝીણી સમારેલી કોથમીર ઉમેરીને ગેસ બંધ કરીને શાક ઉતારી લો.

ચોખાના લોટના પૂડલા

0

ઓછા તેલમાં ઝટપટ બનતાં આ પૂડલા ચટણી સાથે તો સારાં લાગે જ છે. પણ ગ્રેવીવાળા શાક અથવા દાલ ફ્રાય સાથે પણ બહુ જ સ્વાદિષ્ટ લાગે છે.

સામગ્રીઃ 1 કપ ચોખાનો ઝીણો લોટ, 2 કપ પાણી, મીઠું સ્વાદ પ્રમાણે, પૂડલા સાંતડવા માટે તેલ

રીતઃ એક વાસણમાં ચોખાનો લોટ, 1 ટે.સ્પૂન તેલ તેમજ મીઠું સ્વાદ પ્રમાણે ઉમેરી ધીરે ધીરે પાણી ઉમેરીને લોટમાં ગઠ્ઠાં ના પડે એ રીતે લોટ મિક્સ કરી લો. ખીરૂં ઢોસાના ખીરા કરતાં પાતળું હોવું જોઈએ. ખીરાને 15 મિનિટ રહેવા દો. અને ત્યારબાદ પૂડલા ઉતારો.

એક નોન-સ્ટીક તવો ગેસ ઉપર ગરમ થાય એટલે 1 ટી.સ્પૂન તેલ નાખીને ટીશ્યૂ અથવા અડધા કાપેલા કાંદાથી તેલ આખા તવામાં ચોપડી દો. એક ધારવાળી વાટકીમાં 1 ચમચા જેટલું ખીરૂં લો. અને તવામાં ગોળ ધાર પાડતાં જઈ પૂડલાના આકારમાં રેડી દો. (અથવા દાળ માટેની કળછીમાં ખીરૂં લઈ તવામાં રેડો). 5 મિનિટ બાદ ચેક કરી જુઓ. નીચેથી પૂડલો ગોલ્ડન બ્રાઉન શેકાય જાય અને ઉપરની બાજુએથી થવા આવે એટલે એની ઉપર  ¼ ટી.સ્પૂન તેલ રેડી દો. પૂડલાને ઉથલાવીને ફરીથી ગોલ્ડન બ્રાઉન થવા દો. અને પૂડલો શેકાઈ જાય એટલે હળવેથી ઉતારીને થાળીમાં ગોઠવી લો.

આ પૂડલા પાતળાં અને જાળીદાર બને છે.

આ પૂડલાના ખીરામાં ઝીણી સમારેલી કોથમીર, ટમેટાં તેમજ લીલાં મરચાં સુધારીને નાખો તોય સ્વાદ વધી જશે.

મોદકઃ ગણપતિ બાપાનો ફેવરિટ પ્રસાદ

0

ચોખાના લોટનું ગરમાગરમ પડ એની અંદર નાળિયેર અને ગોળનું મિશ્રણ. આવી રીતે તૈયાર કરેલો મોદકનો પ્રસાદ ગણપતિ બાપાને બહુ ભાવે! તો પ્રસન્ન કરી લો ગણપતિ બાપાને  એમનો ભાવતો પ્રસાદ બનાવીને!

સામગ્રીઃ

  • 1 તાજા નાળિયેરનું છીણ
  • 1 કપ ઝીણો સમારેલો ગોળ
  • 2 કપ ચોખાનો લોટ
  • 2 કપ પાણી
  • 1 ટી.સ્પૂન ખસખસ
  • ¼ ચમચી એલચી પાવડર
  • જરૂર મુજબ ઘી
  • 1 ટી.સ્પૂન ડ્રાયફ્રુટની કતરણ
  • કેસરના તાંતણા
  • કેળાનું પાન

રીતઃ એક કઢાઈમાં એક ચમચી ઘી ઉમેરી ગેસની ધીમી આંચ રાખી ખસખસ શેકો. ખસખસ શેકાયને તતડે એટલે નાળિયેરનું છીણ, ગોળ તેમજ ડ્રાયફ્રુટની કતરણ મિક્સ કરો. ગોળ ઓગળી જાય અને મિશ્રણ એકરસ થાય એટલે એમાં એલચી પાવડર મિક્સ કરીને ગેસ બંધ કરી દો. આ મિશ્રણને એક બાઉલમાં કાઢીને ઠંડું થવા દો.

એક મોટી તપેલીમાં 2 કપ પાણી ઉકળવા મૂકો. એમાં 1 ટી.સ્પૂન ઘી ઉમેરો. પાણી ઉકળે એટલે ગેસની આંચ ધીમી કરી દો. એમાં ચોખાનો લોટ ઉમેરીને સતત હલાવતાં રહો જેથી લોટમાં ગઠ્ઠા ન પડે. હવે ગેસ બંધ કરીને વાસણ ઢાંકીને પાંચ મિનિટ સુધી લોટને બફાવા દો. ત્યારબાદ લોટને એક મોટી થાળીમાં કાઢી લો. સહેજ ઠંડો થાય એટલે મસળીને લીસો લોટ બાંધી દો. લોટ કઠણ લાગે તો થોડું ગરમ પાણી ઉમેરીને લોટ બાંધો. લોટ લીસો હોવો જોઈએ.

આ લોટમાંથી એક લૂવો લઈ એમાં વચ્ચે અંગૂઠો મૂકીને બીજી આંગળીઓ વડે બાઉલ જેવો આકાર આપો. અને એની કિનારીની પ્લીટ્સ વાળી લો. વાટકી જેવો આકાર થાય એટલે એમાં 1 ચમચી જેટલું નાળિયેરનું મિશ્રણ નાખીને ઉપરના ભાગને મોદકનો આકાર આપીને બંધ કરી દો.

આવી જ રીતે બધાં મોદક તૈયાર થાય એટલે ઈડલી અથવા પાતરાના સાંચામાં પાણી ગરમ કરવા મૂકો. કાંઠા ઉપર ચાળણીમાં કેળાનું પાન ધોઈને ગોઠવો, એની ઉપર ઘી ચોપડી દો. અને જેટલા મોદક આવે એટલા ગોઠવી દો. દરેક મોદક ઉપર કેસરનો એક એક તાંતણો મૂકી દો. વાસણ ઢાંકીને 10-12 મિનિટ સુધી મોદક બફાવા દો. મોદક તૈયાર થાય એટલે નીચે ઉતારીને એની ઉપર થોડાં ટીપાં ઘીના રેડો.

લો તૈયાર છે મોદકનો પ્રસાદ, બાપાને ધરાવવા માટે!

ચુરમાના લાડુ

0

ગણેશ ચતુર્થીમાં ગણપતિ બાપાની પધરામણી થઈ છે. તો ગણપતિ બાપાના સ્વાગત માટે બનાવો ચુરમાના લાડુ!

સામગ્રીઃ 250 ગ્રામ ઘઉંનો જાડો લોટ, 200 ગ્રામ ગોળ, 50 ગ્રામ બુરૂ ખાંડ (દળેલી ખાંડ), મુઠીયામાં મોણ માટે તેમજ લાડુ વાળવા માટે ઘી, 1 ટી.સ્પૂન એલચી પાવડર, 1 ટી.સ્પૂન જાયફળ પાવડર, 1 કપ ખસખસ, મુઠીયા તળવા માટે ઘી

રીતઃ મોણ માટેનું 4 ટે.સ્પૂન ઘી ગરમ કરી ઘઉંના લોટમાં મિક્સ કરો અને થોડું હુંફાળું પાણી ઉમેરી લોટને મિક્સ કરો. જો લોટ મુઠ્ઠીમાં વાળતા મુઠીયાની જેમ વળે તો એના મુઠીયા વાળી લો. અને મુઠીયું તૂટી જતું હોય તો થોડું પાણી ફરીથી ઉમેરો. અને લોટના મુઠીયા વાળી લો. બીજી બાજુ કઢાઈમાં ઘી ગરમ કરવા મૂકો.

 

લોટમાંથી મુઠીયા વાળી લીધા બાદ એને ગરમ ઘીમાં તળી લો. મુઠીયા નાખતી વખતે ગેસની આંચ તેજ રાખો. અને મુઠીયા તેલમાં ઉપર તરવા લાગે એટલે ગેસની આંચ મધ્યમ ધીમી કરી દો. મુઠીયા સોનેરી રંગના તળી લો.

મુઠીયા ઠંડા થાય એટલે ખાંડણી દસ્તાથી એનો ભૂકો કરી લો. અને મિક્સરમાં બારીક પીસીને ચાળણીમાં ચાળી લો.

લાડુ વાળવા માટે ઘી ગરમ કરી ચાળેલા લોટમાં ઉમેરો. સાથે એલચી-જાયફળ પાવડર તેમજ બુરૂ ખાંડ અને ઝીણો સમારેલો ગોળ ઉમેરી દો. અને લાડુ વાળી દો. એક થાળીમાં ખસખસ પાથરીને એમાં દરેક લાડુ રગદોળીને ડબામાં ભરી લો.

વેજ. ક્રન્ચી ઓનિયન રીંગ્સ

0

બાળકોને હંમેશા નાસ્તામાં કોઈ નવીનતા જોઈતી હોય છે. અને ક્રન્ચી ખાવાનું એમને ભાવતું હોય છે. તો બનાવી લો વેરાયટી નાસ્તામાં… વેજ. ક્રન્ચી ઓનિયન રીંગ્સ!!

સામગ્રીઃ 2-3 મિડિયમ સાઈઝના કાંદા, 5-6 ટે.સ્પૂન ચોખાનો લોટ અથવા કોર્ન ફ્લોર, 4 ટે.સ્પૂન મેંદો, 1  ટી.સ્પૂન લસણની પેસ્ટ, 2  ટી.સ્પૂન મરચાં પાવડર, મીઠું સ્વાદ પ્રમાણે, ચપટી હીંગ, તળવા માટે તેલ, 1 કપ બ્રેડ ક્રમ્સ

ગાર્નિશ માટેઃ મિક્સ હર્બસ્, ઝીણી સમારેલી કોથમીર

રીતઃ કાંદાને છોલીને ધોઈને 1 સેં.મી. જાડાઈની રીંગમાં કટ કરી લો. બધી રીંગ છૂટ્ટી કરીને એકબાજુએ મૂકી દો. બ્રેડ ક્રમ્સ એક બાઉલમાં એકબાજુ મૂકી દો.

એક બાઉલમાં બંને લોટ, મસાલા તેમજ લસણની પેસ્ટ લઈ થોડું થોડું પાણી ઉમેરીને ખીરૂં બનાવી લો. કાંદાની રીંગ જો તમને કડક જોઈતી હોય તો ખીરૂં થોડું ઘટ્ટ રાખવું. અને સપ્રમાણ ક્રિસ્પી જોઈએ તો બટેટાના ભજીયાના ખીરા જેવું રાખવું.

કાંદાની એક-એક રીંગ ખીરામાં બોળીને તરત કાઢીને બ્રેડ ક્રમ્સમાં રગદોળીને એક પ્લેટમાં ગોઠવતાં જાવ. આ તૈયાર રીંગ્સને અડધો કલાક માટે ફ્રીઝરમાં રાખો.

હવે એક કઢાઈમાં તેલ ગરમ કરી લો. અને મધ્યમ આંચે કાંદાની રીંગ એકબીજાને ચોંટે નહીં એ રીતે થોડી થોડી છૂટ્ટી નાખીને તળતા જાવ.  બધી રીંગ તળાઈ જાય એટલે સર્વિંગ પ્લેટમાં મૂકીને ઉપર મિક્સ હર્બસ્ છાંટીને કોથમીર ભભરાવી દો.

પૌંઆના કુરકુરા ભજીયા

0

પચવામાં એકદમ હલકા…અને ખાવામાં તો વાહ શું ચટાકેદાર અને ક્રિસ્પી બને છે! એ તો તમે બનાવો તો ખબર પડે. સાંજના નાસ્તામાં તો બધાને ખાવામાં મઝા આવી જાય!

સામગ્રીઃ 1-1/2 કપ પૌંઆ, 2 બાફેલાં બટેટા,  ½ કપ ઝીણી સમારેલી કોથમીર, 2-3 લીલાં મરચાં, 1 ટી.સ્પૂન આખું જીરૂ, ¼  ટી.સ્પૂન મરી પાવડર, મીઠું સ્વાદ પ્રમાણે, 1 ટી.સ્પૂન મરચાં પાવડર, 1 ટી.સ્પૂન ધાણાજીરૂ પાવડર, ½ ટી.સ્પૂન ગરમ મસાલો, ¼  ટી.સ્પૂન ખાંડ, 1 ટી.સ્પૂન લીંબુનો રસ

રીતઃ પૌંઆને પાણીથી ધોઈને ફરીથી થોડા હુંફાળા પાણીમાં 2 મિનિટ માટે પલાળી રાખો. પૌંઆમાંથી પાણી નિતારી લો. એક પ્લેટમાં નિતારેલાં પૌંઆ સૂકાવા માટે પાથરી દો. 5 મિનિટ બાદ પૌંઆને હાથેથી મેશ કરી લો. જેથી એ લોટની જેમ મુલાયમ થાય.

હવે એમાં બાફેલા બટેટાને મેશ કરીને નાખો. ત્યારબાદ બાકીની બધી સામગ્રી પણ ઉમેરીને મિક્સ કરી દો. એમાંથી નાના નાના ગોળા વાળીને મધ્યમ આંચે તળી લો. આ પૌંઆના ભજીયા ટમેટો સોસ સાથે પીરસો.

ફરાળી હાંડવો

0

શ્રાવણ મહિનાના ઉપવાસમાં ફરાળમાં કાં તો સામો અથવા સાબુદાણાની ખિચડી આપણે બનાવીએ. અથવા પેટીસ કે સાબુદાણા વડાં બનાવીએ. એકંદરે, બધી ફરાળી વાનગી ભાવે એવી હોય. પણ કોઈવાર એકસરખો સ્વાદ, તો કોઈવાર તેલમાં તળેલી વાનગીથી કંટાળો આવી જાય. તો આજે તમારી સમક્ષ રજૂ કરીએ છીએ પૌષ્ટિક ફરાળી હાંડવો!

સામગ્રીઃ 1 કપ સામો, ¼ કપ સાબુદાણા, ¼ કપ રાજગરાનો લોટ, 1 કપ દહીં, 1 ટે.સ્પૂન આદુ-મરચાંની પેસ્ટ, સિંધવ મીઠું સ્વાદ મુજબ, 1 કપ છીણેલી દૂધી (optional), 1 બાફીને છીણેલું બટેટું (optional), 1 કપ ધોઈને ઝીણી સમારેલી કોથમીર

વઘાર માટેઃ તલ 2 ટે.સ્પૂન, 1 ટે.સ્પૂન જીરૂં, 6-7 કઢીપતાં, તેલ

ચટણી માટેઃ ½ કપ મગફળી અથવા લીલું નાળિયેર, દહીં અથવા લીંબુ, ½ કપ ધોઈને સમારેલી કોથમીર, 2-3 લીલાં મરચાં, સિંધવ મીઠું સ્વાદ મુજબ

રીતઃ સામો તેમજ સાબુદાણાને મિક્સરમાં કરકરા દળી લો. એમાં રાજગરાનો લોટ, દહીં તેમજ આદુ-મરચાંની પેસ્ટ, કોથમીર, મીઠું સ્વાદ પ્રમાણે ઉમેરી દો. જો તમે ખાતાં હોવ તો છીણેલી દૂધી તેમજ બટેટું ઉમેરી દો. મિશ્રણ એકરસ કરી દો. એ ઢોકળાના ખીરા જેવું હોવું જોઈએ.

સહુ પ્રથમ વઘારીયામાં 2 ટે.સ્પૂન તેલ લઈ ગરમ કરો. અને એમાં જીરૂં તેમજ તલનો વઘાર કરો. સાથે કઢીપતાં ઉમેરી દો. આમાંથી અડધા વઘારને લોખંડની એક જાડી કઢાઈમાં રેડી દો. હવે એમાં ખીરૂં રેડી દો અને ઉપર બાકી રાખેલો વઘાર રેડીને ચારેબાજુએ ફેલાવી દો.

ગેસ ચાલુ કરીને મધ્યમ ધીમી આંચે હાંડવાની કઢાઈ ઢાંકીને ગરમ કરવા મૂકો. 5-10 મિનિટ બાદ ચેક કરો. નીચેથી હલકું ગુલાબી થયું હોય તો એને ધીમેથી ઉથલાવી દો. અને ફરીથી 5-10 મિનિટ થવા દો.

હાંડવામાં છરી નાખીને, બહાર કાઢીને જોઈ લો. છરી લીસી બહાર આવે તો હાંડવો તૈયાર છે. નહીં તો ફરીથી 5 મિનિટ માટે કઢાઈ ગરમ કરવા મૂકો. હાંડવાને એક પ્લેટમાં કાઢીને ટુકડા કરી લો. અને કોથમીરની ચટણી સાથે પિરસો.

ચટણી માટે ઉપર આપેલી સામગ્રી મિક્સરમાં પીસીને ચટણી તૈયાર કરી લો.

હાંડવાના મિશ્રણને તમે નોન-સ્ટીક ફ્રાઈપેનમાં પેનકેકની જેમ પણ બનાવી શકો છો!