મુંબઈઃ બોલીવુડ અભિનેતા વિવેક ઓબેરોય સાથે કથિતપણે ત્રણ વ્યક્તિએ 1 કરોડ 55 લાખ રૂપિયાની છેતરપિંડી કરી છે. તે વ્યક્તિઓએ વિવેકને એક કાર્યક્રમમાં ઈન્વેસ્ટમેન્ટ કરવાનું કહ્યું હતું અને એનું માતબર વળતર મળવાનું ફિલ્મ નિર્માણ કંપનીએ એને વચન આપ્યું હતું, પરંતુ એને બદલે તે વ્યક્તિઓએ નાણાં પોતાને માટે વાપરી નાખ્યા હતા, એમ પોલીસનું કહેવું છે.
વિવેકના ચાર્ટર્ડ એકાઉન્ટન્ટે અંધેરી (પૂર્વ)માં એમઆઈડીસી પોલીસ સ્ટેશનમાં ત્રણ વ્યક્તિ સામે ફરિયાદ નોંધાવતા ઠગાઈની આ ઘટનાની જાણ થઈ છે. ફરિયાદીના જણાવ્યા મુજબ, ત્રણ આરોપીમાં એક ફિલ્મ નિર્માતા છે. તેઓ વિવેકના બિઝનેસ ભાગીદારો હતા અને તેમણે વિવેકને કહ્યું હતું કે તે એક કાર્યક્રમના આયોજન માટે અન ફિલ્મ નિર્માણ કંપનીમાં પૈસાનું રોકાણ કરે. વિવેકે પ્રોજેક્ટમાં રૂ. 1.55 કરોડનું ઈન્વેસ્ટમેન્ટ કર્યું હતું. પરંતુ આરોપી વ્યક્તિઓએ ઈન્વેસ્ટ કરેલા તે પૈસા એમના પોતાની રીતે વાપરી નાખ્યા હતા. વિવેકની પત્ની પણ તે કંપનીમાં ભાગીદાર છે. પોલીસે આ કેસમાં તપાસ હાથ ધરી છે.
