ઈસ્લામાબાદઃ પાકિસ્તાનમાં સરકારના દમનકારી વર્તન બાદ ઈમરાન ખાનની પાર્ટી પી.ટી.આઈ.એ પોતાનો વિરોધ પ્રદર્શન સમાપ્ત કરવાની જાહેરાત કરી છે. પી.ટી.આઈ.ના વિરોધને કારણે રાજધાની ઈસ્લામાબાદમાં ડી. ચોક અને તેની આસપાસના વિસ્તારોમાં ભારે હંગામો અને હિંસા બાદ અડધી રાત્રે સુરક્ષાકર્મીઓએ કડક કાર્યવાહી કરી હતી. જેના પગલે પૂર્વ વડાપ્રધાન ઈમરાન ખાનના સમર્થકોએ વિરોધ-પ્રદર્શન સમાપ્ત કરવાની જાહેરાત કરી હતી. જો કે આ પછી ઈમરાન ખાનની આગળની રણનીતિ શું હશે તે અંગે હજુ સુધી કોઈ ખુલાસો કરવામાં આવ્યો નથી.
ઈમરાન ખાનની પાર્ટી પી.ટી.આઈ.એ સુરક્ષા કર્મીઓની કાર્યવાહીને “ફાસીવાદી લશ્કરી શાસન” હેઠળ કરવામાં આવેલ “નરસંહાર”નો પ્રયાસ ગણાવ્યો છે. પોલીસ સૂત્રોએ જણાવ્યું કે લગભગ 450 પ્રદર્શનકારીઓની ધરપકડ કરવામાં આવી છે. પાકિસ્તાન તહરીક-એ-ઈન્સાફ (પી.ટી.આઈ.) એ કહ્યું કે સુરક્ષા દળોએ શક્ય તેટલા લોકોને મારવાના ઈરાદાથી પ્રદર્શનકારીઓ પર ગોળીબાર કર્યો. અગાઉ મંગળવારે સાંજે, પી.ટી.આઈ. સમર્થકોએ કાયદા અમલીકરણ એજન્સીઓના અધિકારીઓ સાથે અથડામણ કરી હતી, જેના પગલે તેઓ રવિવારે શરૂ થયેલી ઈસ્લામાબાદ કૂચના ભાગ રૂપે ડી-ચોક પર ધરણા કરવામાં સફળ થયા હતા. સમર્થકો અને પોલીસ વચ્ચેની અથડામણમાં છ સુરક્ષાકર્મીઓ માર્યા ગયા અને ડઝનબંધ ઘાયલ થયા.
PTIએ સરકાર પર ગંભીર આક્ષેપો કર્યા હતા
પી.ટી.આઈ.એ ટ્વિટર પર એક પોસ્ટમાં જણાવ્યું છે કે, શાહબાઝ-ઝરદારી-આસિમ ગઠબંધનની આગેવાની હેઠળના ક્રૂર, ફાંસીવાદી લશ્કરી શાસન હેઠળ સુરક્ષા દળોના હાથે પાકિસ્તાનમાં નરસંહારનો પ્રયાસ કર્યો છે. દેશમાં રક્તપાત થઈ રહ્યો છે.”
72 વર્ષીય ભૂતપૂર્વ વડાપ્રધાન ઇમરાન ખાન, જે ગયા વર્ષે ઓગસ્ટથી જેલમાં છે, તેમણે 24 નવેમ્બરના રોજ દેશવ્યાપી વિરોધ માટે “અંતિમ કૉલ” આપ્યો હતો. ઇમરાન ખાને કથિત રીતે જનાદેશની ચોરી, લોકોની અન્યાયી ધરપકડ અને બંધારણમાં 26મો સુધારો પસાર કરવાની નિંદા કરી હતી. બંધારણના 26મા સુધારા પર તેમણે કહ્યું હતું કે તેનાથી “સરમુખત્યારશાહી શાસન” મજબૂત બન્યું છે. ઇમરાન ખાન ગયા વર્ષથી રાવલપિંડીની અદિયાલા જેલમાં બંધ છે અને તેમના પક્ષના જણાવ્યા અનુસાર તેમની વિરુદ્ધ 200 થી વધુ કેસ નોંધાયેલા છે.
