મુંબઈઃ કોરોનાવાઈરસના દર્દીઓની સંખ્યામાં હાલ ઘટાડો જોવા મળી રહ્યો છે, પરંતુ ઓગસ્ટ મહિના પછી કોરોનાની ત્રીજી લહેર આવવાની સંભાવના વ્યક્ત કરવામાં આવી છે. તેથી બંધ થઈ ગયેલા જમ્બો કોવિડ-19 કેર સેન્ટરોને ફરીથી ખોલવાનો મુંબઈ મહાનગરપાલિકા વહીવટીતંત્રએ આદેશ આપ્યો છે.
બાન્દ્રા-કુર્લા કોમ્પલેક્સ, મુલુંડ અને દહિસર સ્થિત ત્રણ જમ્બો કોવિડ સેન્ટરોને ઓગસ્ટ મહિનાથી જ તબક્કાવાર ફરી શરૂ કરવામાં આવનાર છે. સમારકામ તથા અપગ્રેડેશન માટે ગયા મે મહિનાથી આ સેન્ટરોને બંધ કરવામાં આવ્યા છે. આ કેન્દ્રોની દેખભાળ માટે પાલિકા તંત્ર બેથી પાંચ કરોડ રૂપિયાનો ખર્ચ કરી રહ્યું છે. આવનારા અઠવાડિયાઓમાં આ કેન્દ્રોમાં આશરે 20-25 ટકા પથારીઓની વ્યવસ્થા કરવામાં આવશે.
