નવી દિલ્હીઃ બોલીવુડ એક્ટર શાહરૂખ ખાનની આગામી હિન્દી ફિલ્મ ‘જવાન’ની અમુક વિડિયો ક્લિપ્સ લીક થઈ ગઈ છે અને તે સોશિયલ મિડિયા પર ફરવા માંડી છે. આ વિશે ફરિયાદ કરાયા બાદ દિલ્હી હાઈકોર્ટે યૂટ્યૂબ, ગૂગલ, ટ્વિટર અને રેડિટ જેવા સોશિયલ મિડિયા પ્લેટફોર્મ્સને આદેશ આપ્યો છે કે તેઓ આ ક્લિપ્સને તાત્કાલિક રીતે દૂર કરે અને એનું સર્ક્યૂલેશન પણ રોકી દે.
આ કેસ શાહરૂખ અને એની પત્ની ગૌરી ખાનની માલિકીની પ્રોડક્શન કંપની રેડ ચિલીઝ એન્ટરટેનમેન્ટ પ્રાઈવેટ લિમિટેડે કર્યો છે. કોર્ટે અનેક ઈન્ટરનેટ સર્વિસ પ્રોવાઈડર્સને પણ આદેશ આપ્યો છે કે વેબસાઈટ્સ પર આ ક્લિપ્સના એક્સેસ પર પ્રતિબંધ મૂકી દો. ખાન દંપતીનો આરોપ છે કે ‘જવાન’ ફિલ્મના નિર્માણના ફૂટેજની બે વિડિયો ક્લિપ્સ લીક થઈ છે અને તે સોશિયલ મિડિયા પર મૂકવામાં આવી છે. આ ક્લિપ્સ લોકોને જોવા તથા ડાઉનલોડ કરવા ઉપલબ્ધ કરાઈ છે. એક ક્લિપમાં શાહરૂખને એક ફાઈટ સીક્વેન્સમાં દર્શાવવામાં આવ્યો છે જ્યારે બીજી એક ડાન્સ સીક્વેન્સ છે. ખાન દંપતીનો બીજો આરોપ એ છે કે ફિલ્મનું એક સ્ટુડિયોમાં બંધબારણે શૂટિંગ કરવામાં આવી રહ્યું છે. પરંતુ પ્રતિવાદીઓએ સેટ પરની ચોક્કસ તસવીરોને લીક કરી દીધી છે. આ કોપીરાઈટના ભંગ સમાન છે.
દક્ષિણી ફિલ્મોના દિગ્દર્શક અરૂણકુમાર ઉર્ફે એટલી દ્વારા દિગ્દર્શિત સસ્પેન્સ-થ્રિલર ફિલ્મ ‘જવાન’ તૈયાર થઈ ગઈ છે. તેનું ટીઝર અને ટ્રેલર રિલીઝ થવાની તૈયારીમાં છે. આ ફિલ્મમાં શાહરૂખ ડબલ રોલમાં જોવા મળશે. તેની સાથે દક્ષિણી ફિલ્મોનાં બે કલાકાર – વિજય સેતુપતિ અને નયનતારા પણ મહત્ત્વની ભૂમિકામાં છે. ફિલ્મ આ વર્ષની 2 જૂને થિયેટરોમાં રિલીઝ કરાય એવી ધારણા છે.
