મુંબઈઃ કાંદિવલી એજ્યુકેશન સોસાયટી (KES) સંચાલિત ટી.પી. ભાટિયા કોલેજ ઓફ સાયન્સ, કાંદિવલી (વેસ્ટ) દ્વારા ગઈ 28 અને 29 નવેમ્બરે કોલેજના મેદાનમાં ઇન્ટર સ્કૂલ ફૂટબોલ ચેમ્પિયનશિપનું આયોજન કરવામાં આવ્યું હતું, એમાં શહેરની અનેક શાળાઓની છોકરીઓ તેમ જ છોકરાઓની 26 ટીમોએ ભાગ લીધો હતો.
આ સ્પર્ધાનું ઉદઘાટન ડિસ્ટ્રિક્ટ સ્પોર્ટ્સ અધિકારી, મુંબઈ સબર્બનનાં વર્ષા સાળવીએ કર્યું હતું. વિદ્યાર્થીઓને સંબોધિત કરતાં એમણે આ પ્રકારની ખેલકૂદ સ્પર્ધાનું આયોજન કરવા બદલ ટી.પી. ભાટિયા કોલેજને અભિનંદન આપ્યાં હતાં અને કહ્યું હતું કે આને લીધે વિદ્યાર્થીઓને અન્ય સ્કૂલોના વિદ્યાર્થીઓ સાથે સ્પર્ધામાં ભાગ લેવાની તક મળે છે.
પ્રોફેશનલ રેફરીઓના નિરીક્ષણ હેઠળ ટર્ફ ઉપર રમવાના રોમાંચનો વિદ્યાર્થીઓએ અનુભવ કર્યો હતો. સ્પર્ધાની સમાપ્તિ બાદ શિક્ષક હસન દ્વારા ટીમ લીડર્સનો ઇન્ટરવ્યુ લેવામાં આવ્યો હતો. નીલેશ અને મધુકર પિસળની આયોજન ટીમે ખેલાડીઓની તમામ જરૂરિયાતોની સંભાળ લીધી હતી. વિજેતા ટીમ, ફર્સ્ટ રનર્સ-અપ અને સેકન્ડ રનર્સ-અપ ટીમને આકર્ષક ટ્રોફીઓ આપવામાં આવી હતી. આ ઉપરાંત શ્રેષ્ઠ ખેલાડી, શ્રેષ્ઠ ગોલકીપર, શ્રેષ્ઠ ડીફેન્ડર અને શ્રેષ્ઠ સ્ટ્રાઇકર ખેલાડીઓને પણ એમના અસાધારણ દેખાવ માટે વિશેષ ટ્રોફીઓ આપવામાં આવી હતી.
પ્રિન્સિપાલ ડો. સંગીતા શ્રીવાસ્તવે હાર-જીતનો ખ્યાલ કર્યા વિના સાચી ખેલદિલીની ભાવના સાથે રમવા માટે વિદ્યાર્થીઓને પ્રોત્સાહિત કર્યાં હતાં. એમણે કહ્યું હતું કે આ પ્રકારની ખેલકૂદ સ્પર્ધાઓ વિદ્યાર્થીઓને સાચો આનંદ આપે છે અને એમનામાં શારીરિક તથા માનસિક શક્તિને વિક્સાવે છે.
