મુંબઈઃ વૈશ્વિક ક્રીપ્ટોકરન્સી માર્કેટમાં સતત બીજા દિવસે વૃદ્ધિ થઈ હતી. 3.0 વર્સે લોન્ચ કરેલો વિશ્વનો સર્વપ્રથમ ક્રીપ્ટો ઇન્ડેક્સ – આઇસી15 શુક્રવારે બપોરે ચાર વાગ્યે પૂરા થયેલા ચોવીસ કલાકમાં 0.89 ટકા (426 પોઇન્ટ) વધીને 47,989 પોઇન્ટ બંધ રહ્યો હતો. ઇન્ડેક્સ 47,563 ખૂલીને 48,084ની ઉપલી અને 46,781 પોઇન્ટની નીચલી સપાટીએ ગયો હતો. ઇન્ડેક્સના સોલાના સિવાયના તમામ કોઇન વધીને ટ્રેડ થઈ રહ્યા હતા. ડોઝકોઇન, ઈથેરિયમ, કાર્ડાનો અને અવાલાંશમાં 1થી 3 ટકાની વૃદ્ધિ થઈ હતી.
એક નોંધનીય ઘટનામાં ભારતની સૌથી મોટી બેન્ક – સ્ટેટ બેન્ક ઓફ ઇન્ડિયાએ જણાવ્યું છે કે ગત ડિસેમ્બરથી અત્યાર સુધીમાં સેન્ટ્રલ બેન્ક ડિજિટલ કરન્સી (સીબીડીસી)ના નવ લાખ કરતાં વધુ વ્યવહારો થઈ ચૂક્યા છે. બેન્કે સીબીડીસીના એના પ્રાયોગિક ઉપયોગમાં આશરે 40,000 વેપારીઓને આવરી લીધા છે. બીજી બાજુ, મોનેટરી ઓથોરિટી ઓફ સિંગાપોરે ક્રીપ્ટોકરન્સી માટે વધુ ચુસ્ત ધારાધોરણો ઘડવાનું નક્કી કર્યું છે.
