બરેલી: ઉત્તર પ્રદેશનાં બરેલીમાં દેશના અત્યાર સુધીની સૌથી મોટી સાયબર છેતરપિંડીનો કેસ સામે આવ્યો છે. આ સાયબર ઠગોએ દેશવાસીઓ સાથે રૂ. 3000 કરોડથી વધુની છેતરપિંડી કરી છે. બરેલીની સાયબર ઓફિસની પોલીસે આ ખુલાસો કરતાં પશ્ચિમ બંગાળના રહેવાસી સાઇબર ઠગ મંજરુલ ઇસ્લામની ધરપકડ કરી છે. પોલીસે ધરપકડ કરેલા મંજરુલ ઇસ્લામની ગેંગમાં સેંકડો ઠગો સામેલ છે. જેમને પકડવા માટે પોલીસ રાત-દિવસ એક કરી રહી છે.
વાસ્તવમાં દેશમાં લોકો કોરોના રોગચાળાનો સામનો કરી રહ્યા હતા, એ સમયે અનેક લોકોએ નોકરી ગુમાવી હતી એનો લાભ સાઇબર ઠગોએ ઉઠાવીને એમેઝોન, ફ્લિપકાર્ટ અને ઈ-વોલેટને નામે ઘેરબેઠા લોકોને રોજગારી આપવાનો ધંધો શરૂ કર્યો હતો. જેથી અનેક લોકો તેમની જાળમાં ફસાયા અને તેમના ખાતાની તમામ વિગતો ખૂબ જ સરળતાથી આપી દીધી. એના પરિણામે અત્યાર સુધીમાં હજારો લોકો આ ગેંગની છેતરપિંડીનો શિકાર બની ચૂક્યા છે, એમ પોલીસે જણાવ્યું હતું.
બહેડીના રહેવાસી એક શિક્ષકે ઓક્ટોબર, 2021માં FIR નોંધાવ્યો હતો, જેમાં તેણે જણાવ્યું હતું કે સાઇબર ઠગ્સે તેના ખાતામાંથી રૂ. બે લાખથી વધુની ઉઠાંતરી કરી હતી. ત્યાર બાદ પોલીસે તપાસ શરૂ કરી તો સાયબર છેતરપિંડી ચીન સાથે સંબંધિત હોવાનું જાણવા મળ્યું હતું. આ ઠગ ટોળકીમાં ચીનના રેયાન નામના યુવકનું નામ પણ સામે આવ્યું છે.
પોલીસે આ કેસમાં સૌથી પહેલા એક આરોપીની ધરપકડ કરી હતી, જેના ખાતામાં એક મહિનામાં રૂ. 201 કરોડનું ટ્રાન્ઝેક્શન થયું હતું. તેના ખાતાની વિગતો લેવામાં આવે તો 2000થી વધુ પાનાંની વિગતો બહાર આવી છે. તે આરોપી જયદેવ મહારાષ્ટ્રની જેલમાં બંધ છે. જ્યારે પોલીસને મહિલાએ આપેલા એકાઉન્ટની વિગતો મેળવી તો ખબર પડી કે તેમાં મંજરુલ ઇસ્લામ સામેલ છે. મંજરુલ ગુરુગ્રામ હરિયાણાથી ડોલ્ફિન કન્સલ્ટન્ટ સર્વિસ પ્રા. લિમિટેડનો ડિરેક્ટર બનીને સાયબર ફ્રોડના પૈસા પોતાના બિઝનેસ એકાઉન્ટમાં ટ્રાન્સફર કરતો હતો.
