મહારાષ્ટ્ર: નાગપુરમાં ગયા સોમવારે થયેલી હિંસાના મુખ્ય સૂત્રધાર ફહીમ શમીમ ખાનના ઘર પર બુલડોઝર ચલાવવામાં આવ્યું છે. તેના ઘરનો ગેરકાયદેસર ભાગ બુલડોઝરનો ઉપયોગ કરીને તોડી પાડવામાં આવ્યો છે.
એવો આરોપ છે કે ફહીમે લોકોને ઉશ્કેર્યા હતા અને ભીડ એકઠી કરી હતી. કોર્ટે તેને 21 માર્ચ સુધી પોલીસ કસ્ટડીમાં મોકલી દીધો હતો. પોલીસે દાવો કર્યો છે કે મુખ્ય આરોપી, 38 વર્ષીય ફહીમ શમીમ ખાન, આ રમખાણ ભડકાવવા માટે જવાબદાર છે. શમીમ માઇનોરિટી ડેમોક્રેટિક પાર્ટી (MDP)ના નાગપુર શહેર પ્રમુખ છે.
ફહીમ ખાને 2024ની લોકસભા ચૂંટણીમાં કેન્દ્રીય મંત્રી નીતિન ગડકરી સામે ચૂંટણી લડી હતી. પોલીસ તપાસમાં એ પણ બહાર આવ્યું છે કે ફહીમે ભડકાઉ ભાષણો આપીને સમુદાયના લોકોને ઉશ્કેર્યા હતા. જેના કારણે નાગપુરમાં હિંસા ફાટી નીકળી હતી. તેનું નામ એફ.આઈ.આર.માં પણ નોંધાયેલું છે. મળતી માહિતી મુજબ, ફહીમ ખાન નાગપુરના સંજય બાગ કોલોનીના યશોધરા નગરનો રહેવાસી છે.
ઔરંગઝેબની કબરના વિવાદે ગત સોમવારે હિંસક વળાંક લીધો હતો. મહારાષ્ટ્રના નાગપુરના મહલમાં ગત સોમવારે રાત્રે બે જૂથો વચ્ચેના વિવાદ બાદ હિંસા ફાટી નીકળી હતી. મહલ પછી, મોડી રાત્રે હંસપુરીમાં હિંસા થઈ. અજાણ્યા લોકોએ દુકાનોમાં તોડફોડ કરી અને વાહનોને આગ ચાંપી દીધી. આ દરમિયાન ભારે પથ્થરમારો થયો. હિંસા બાદ ઘણા વિસ્તારોમાં કર્ફ્યુ લાદવામાં આવ્યો હતો. આ હિંસામાં ઘણા લોકો ઘાયલ થયા હતા. પોલીસે 60 થી વધુ તોફાનીઓની અટકાયત પણ કરી હતી.
