અમદાવાદ: કોલકાતાની મેડિકલ કોલેજમાં જુનિયર મહિલા ડોક્ટર પર દુષ્કર્મ અને હત્યાની ઘટનાના પડઘા સમગ્ર દેશમાં પડી રહ્યા છે. ઘટનાના વિરોધમાં આજે રાજ્યભરના ડોક્ટર્સ કામકાજથી અળગા રહ્યા હતા. સરકારી હોસ્પિટલોની સાથે ખાનગી હોસ્પિટલોએ પણ બંધને સમર્થન આપ્યું છે. હોસ્પિટલોમાં ઇમર્જન્સી સિવાયની તમામ સેવા બંધ રાખવામાં આવી છે. આથી દર્દીઓએ આજે પણ હાલાકીનો સામાનો કરવો પડી રહ્યો છે.
અમદાવાદ મેડિકલ એસોસિએશનના સભ્યોએ AMAથી ઇન્કમટેક્સ સુધી રેલી યોજી હતી. જેમાં 1000થી વધુ ડોક્ટર્સ વિવિધ લખાણવાળા બેનર સાથે જોડાયા હતા. મોટી સંખ્યામાં મહિલા ડોક્ટરો પણ રેલીમાં જોડાયા હતા. આયુર્વેદ ડોક્ટરોએ પણ IMAની હડતાળને સમર્થન કર્યું છે. બીજી તરફ રાજકોટ, વડોદરા અને સુરતમાં પણ ડોક્ટરોએ રેલી યોજી વિરોધ નોંધાવ્યો છે.
ઇન્ડિયન મેડિકલ એસોસિએશનના વડોદરાના વાઇસ પ્રેસિડેન્ટ મિતેશ શાહે કહ્યું, “આજે I.M.A. સહિતના વિવિધ એસોસિએશન હડતાળમાં જોડાયા છે. મારી માંગણી છે કે, કોઈપણ હોસ્પિટલ એરિયાને તમે સેફ ઝોન તરીકે જાહેર કરો. ડોક્ટર કે કર્મચારીઓ પર હુમલો થાય તો તેની સામે નોન બેલેબલ વોરંટ જાહેર કરો. હોસ્પિટલો અને ક્લિનિકમાં CCTV કેમેરા ફરજિયાત કરો. આ ઉપરાંત સરકાર એક્શનમાં આવે અને આ મામલે કડક કાર્યવાહી કરે. અમે વડાપ્રધાન મોદીને પણ આવેદનપત્ર આપવાના જ છીએ અને માગ કરીશું કે, આવા જઘન્ય અપરાધ કરતા લોકો સામે કડક કાર્યવાહી કરવામાં આવે અને એના માટે કડક નિયમો બનાવવામાં આવે અને ડોક્ટરોને સુરક્ષા પુરી પાડવામાં આવે.”
