રાજ્યમાં ફરી એક વખત વરસાદનું જોર વધવાની આગાહી વ્યક્ત કરવામાં આવી છે. ત્યારે આજે ખંભાતના અખાત પર સાઈક્લોનિક સર્ક્યુલેશન શક્રિય થવાની જાણકારી હવામાન વિભાગે આપી છે. રાજ્યના કેટલાક વિસ્તારમાં આગામી એક સપ્તાહ સુધી સામાન્યથી ભારે વરસાદની આગાહી વ્યક્ત કરવામાં આવી છે. આજે સૌરાષ્ટ્ર અને દક્ષિણ ગુજરાતમાં ભારે વરસાદની આગાહી કરાઈ છે. અત્રે ઉલ્લેખનીય છે કે સતત બે દિવસના બાફારા બાદ પવનની દિશા બદલાતા અદાવાદીઓને આજે ગરમીથી આંશિક રાગહ મળશે.
હવામાન વિભાગ દ્વારા આજે સૌરાષ્ટ્ર અને દક્ષિણ ગુજરાતના વિવિધ જિલ્લાઓમાં ભારે વરસાદની શક્યતા સાથે યલો એલર્ટ જાહેર કરવામાં આવ્યું છે. જેમાં અમરેલી, ભાવનગર, ગીર સોમનાથ, દીવ, દાહોદ, છોટાઉદેપુર, ભરૂચ, નર્મદા, તાપી, ડાંગ, નવસારી, વલસાડ, દમણ, દાદરા નગર-હવેલીમાં વરસાદનું યલો એલર્ટ જાહેર કરવામાં આવ્યું છે. હવામાન વિભાગની આગાહી મુજબ ઉત્તર-પૂર્વ અરબ સાગર તરફ, એટલે કે ખંભાતના અખાતની આસપાસ સાઇક્લોનિક સર્ક્યુલેશન સક્રિય થયું છે. હાલમાં આ સાઇક્લોનિક સર્ક્યુલેશન અરબ સાગર ઉપર છે, જેને કારણે સૌરાષ્ટ્ર તથા દક્ષિણ ગુજરાતના ભાગોમાં ભારે વરસાદ રહેશે, જેની અસર અમદાવાદ જિલ્લા સુધી પણ થઈ શકે છે, પરંતુ અમદાવાદ શહેર માટે હળવાં વરસાદી ઝાપટાં વરસી શકે એવી આગાહી હવામાન વિભાગે વ્યક્ત કરી છે.
આગામી 24 અને 25 ઓગસ્ટના રોજ દક્ષિણ ગુજરાતના દરિયાકાંઠાના વિસ્તારમાં 45થી 55 કિલોમીટર પ્રતિ કલાકની ઝડપે પવન ફૂંકાવાની સાથે ગાજવીજ સહિત ભારે વરસાદની શક્યતા છે, જેથી બે દિવસ માછીમારોને દરિયો ન ખેડવા સૂચના આપવામાં આવી છે.
