બટેટા અને ઘઉંના લોટના ઢોસા પણ દાળ-ચોખાના ઢોસા જેટલાં જ સ્વાદીષ્ટ લાગે છે. ઉપરાંત ઈન્સ્ટન્ટ બની પણ જાય છે!
સામગ્રીઃ
- મોટી સાઈઝનો બટેટો 1
- ઘઉંનો લોટ 1 કપ
- રવો ½ કપ
- આદુનો ટુકડો 1 ઈંચ
- લીલા મરચાં 3
- જીરુ 1 ટી.સ્પૂન
- 1 લીંબુનો રસ
- મીઠું સ્વાદ મુજબ
- કોથમીર ધોઈને સમારેલી 1 કપ
- પાણી 3 કપ
- ચાટ મસાલો ½ ટી.સ્પૂન
- તલ 1 ટી.સ્પૂન
ચટણીઃ
- નાળિયેરનું ખમણ 2 ટે.સ્પૂન
- દહીં 2 ટે.સ્પૂન
- આદુનો ટુકડો 1 ઈંચ
- લીલા મરચાં 3
- કોથમીર ધોઈને સમારેલી 1 કપ
- રાઈ ½ ટી.સ્પૂન
- લાલ મરચું 1
- કળીપતાના પાન 7-8
રીતઃ બટેટાનો છોલીને ધોઈને મધ્યમ સાઈઝના કાણાંવાળી ખમણીમાં ખમણી લો. તેમાં રવો તથા ઘઉંનો લોટ મેળવી લો. તેમાં પહેલાં 1 કપ પાણી મેળવીને એકસરખું મિક્સ કરી લો. ફરીથી તેમાં બીજો 1 કપ પાણી મેળવીને મિક્સ કરીને હજુ 1 કપ પાણી મેળવીને પાતળું ખીરું તૈયાર કરી લો.
આ ખીરામાં જીરુ, આદુ ખમણેલું, કોથમીર ધોઈને સમારેલી, લીલા મરચાં સમારેલાં, મીઠું સ્વાદ મુજબ તેમજ લીંબુ અને ચાટ મસાલો મેળવી લો.
10 મિનિટ બાદ ગેસ પર નોનસ્ટીક તવો ગરમ કરી લો. તવા ઉપર થોડું તેલ ફેલાવીને એક મોટી કડછી વડે ઢોસાનું ખીરું તવા પર ફરતે ગોળ રેડી દો. મધ્યમ આંચ પર થવા દો. ઢોસો ઉપરથી બ્રાઉન થવા લાગે એટલે લગભગ 4-5 મિનિટમાં તૈયાર થઈ જાય એટલે નીચે ઉતારી લો.
ચટણીની સામગ્રી મિક્સીમાં ભેગી કરીને તેમાં થોડું પાણી નાખીને ચટણી બનાવી લો. એક વઘારીયામાં 1 ટી.સ્પૂન તેલ ગરમ કરી રાઈ તતડાવી એક લાલ મરચું તેમજ કળીપતાના પાન સાંતડી ચટણી વઘારી લો.
આ ક્રિસ્પી ઢોસા ચટણી સાથે પીરસો.
