Home Blog Page 486

તેલંગાણામાં બસ અને ટ્રક વચ્ચે ટક્કર થતાં ગોઝારો અકસ્માત, 20 લોકોના મોત

તેલંગાણાના રંગારેડ્ડી જિલ્લાના ચેવેલા મંડલમાં ખાનપુર ગેટ પાસે બસ અને ટ્રક વચ્ચે થયેલી ટક્કરમાં 19 લોકોના મોત થયા છે અને 20 લોકો ઘાયલ થયા છે. આ દુર્ઘટના મામલે પરિવહન મંત્રી પોન્નમ પ્રભાકર અને કેટીઆરએ શોક વ્યક્ત કર્યો હતો અને ઘાયલોને સારી સારવાર આપવાના નિર્દેશ આપ્યા હતા.

તેલંગાણાના રંગારેડ્ડી જિલ્લામાં રવિવારે સવારે થયેલા એક દુ:ખદ માર્ગ અકસ્માતમાં ઓગણીસ લોકોના મોત થયા. જ્યારે આ ઘટનામાં અન્ય 20 લોકોને હોસ્પિટલમાં દાખલ કરવામાં આવ્યા છે, જેમાં ત્રણ ગંભીર રીતે ઘાયલ છે. ચેવેલ્લા મંડલમાં ખાનપુર ગેટ પાસે આ અકસ્માત થયો હતો જ્યારે એક TGSRTC બસ અને એક ટિપર ટ્રક સામસામે અથડાયા હતા. પોલીસના જણાવ્યા અનુસાર, સવારે આ અકસ્માત ત્યારે થયો જ્યારે ખોટી દિશામાંથી આવી રહેલ ટિપર ટ્રક બસ સાથે અથડાઈ.

પોલીસના જણાવ્યા અનુસાર, ચેવેલા નજીક કાંકરી ભરેલી એક ટિપર ટ્રક રાજ્ય પરિવહન નિગમની બસ સાથે સામસામે અથડાઈ હતી. ટક્કર એટલી ગંભીર હતી કે ટ્રકનો માલ બસ પર પડી ગયો. સ્થાનિક રહેવાસીઓની મદદથી, ઘાયલોને તાત્કાલિક હોસ્પિટલમાં ખસેડવામાં આવ્યા. પોલીસ ઘટનાસ્થળે પહોંચી અને બચાવ અને રાહત કામગીરી શરૂ કરી. પોલીસે જણાવ્યું કે અકસ્માતનું પ્રાથમિક કારણ ટ્રક ચાલક ખોટી દિશામાં વાહન ચલાવી રહ્યો હોવાનું જણાય છે. હાલમાં ડ્રાઇવરની ઓળખ કરવામાં આવી રહી છે, અને કેસ નોંધવામાં આવ્યો છે અને તપાસ શરૂ કરવામાં આવી છે.

19 લોકોમાં 10 મહિલાઓ અને એક ત્રણ મહિનાનું બાળક શામેલ

ઘટનાસ્થળે પહોંચેલા એડમિનિસ્ટ્રેશન ડિરેક્ટર જનરલ મહેશ ભાગવતે જણાવ્યું હતું કે આજે સવારે, જ્યારે વિકારાબાદ ડેપો બસ હૈદરાબાદ તરફ જઈ રહી હતી, ત્યારે એક ટીપર ટ્રક હૈદરાબાદથી વિકારાબાદ તરફ ચેવેલા થઈને આવી રહી હતી, એવામાં સામસામે ટક્કર થઈ. ટીપર ખૂબ જ ઝડપથી જઈ રહ્યું હતું અને બસને ટક્કર મારી હતી એવું કહેવામાં આવી રહ્યું છે. અત્યાર સુધીમાં કુલ 19 લોકોના મોત થયા છે, 10 મહિલાઓ, 8 પુરુષો અને એક 3 મહિનાનું બાળક. નાની ઈજાઓ ધરાવતા લોકો ચેવેલા સરકારી હોસ્પિટલમાં છે. ગંભીર રીતે ઘાયલ લોકો ચેવેલા નજીકની બીજી હોસ્પિટલમાં છે. કેટલાક અન્ય લોકો પહેલાથી જ ઘરે ગયા છે અને અમે તેમને શોધી રહ્યા છીએ. કંડક્ટરના નિવેદન મુજબ, બસમાં અંદાજે 72 લોકો હતા. અમે આ વાતની પુષ્ટિ કરી રહ્યા છીએ.

અકસ્માતમાં ઘાયલોની હાલત સ્થિર

પીએમઆર હોસ્પિટલના મેડિકલ સુપરિન્ટેન્ડેન્ટ ડૉ. રામકૃષ્ણ રેડ્ડીએ જણાવ્યું હતું કે, “અમને સવારે લગભગ 8:30 વાગ્યે આ મોટા અકસ્માતના સમાચાર મળ્યા હતા. અત્યાર સુધીમાં અમને 14 દર્દીઓ મળ્યા છે. તેમાંથી પાંચ દર્દીઓને ફ્રેક્ચર છે, જેમાં પાંસળી અને હિપ ફ્રેક્ચરનો સમાવેશ થાય છે. એક દર્દીના નાકમાંથી રક્તસ્ત્રાવ થતો હતો. અમે તાત્કાલિક તેમની સારવાર શરૂ કરી દીધી. લગભગ બધા જ હવે સ્થિર સ્થિતિમાં છે.

પીએમ મોદીએ દુઃખ વ્યક્ત કર્યું, વળતરની જાહેરાત કરી

વડાપ્રધાન નરેન્દ્ર મોદીએ તેલંગાણાના રંગા રેડ્ડી જિલ્લામાં થયેલા માર્ગ અકસ્માત પર ઊંડી સંવેદના વ્યક્ત કરી. આ દુ:ખદ અકસ્માતમાં અનેક લોકોના મોત થયા અને ઘણા લોકો ઘાયલ થયા. પ્રધાનમંત્રી કાર્યાલય દ્વારા જારી કરાયેલા એક નિવેદનમાં કહેવામાં આવ્યું છે કે, “તેલંગાણાના રંગા રેડ્ડી જિલ્લામાં થયેલા અકસ્માતમાં થયેલ જાનહાનિ ખૂબ જ દુઃખદ છે. આ મુશ્કેલ સમયમાં મારી સંવેદના પીડિતોના પરિવારો સાથે છે. હું ઘાયલોના ઝડપી સ્વસ્થ થવા માટે પ્રાર્થના કરું છું.”

પીએમ મોદીએ મૃતકોના નજીકના સંબંધીઓને પ્રધાનમંત્રી રાષ્ટ્રીય રાહત ભંડોળમાંથી 2 લાખ રૂપિયા અને ઘાયલોને 50,000 રૂપિયાની આર્થિક સહાયની જાહેરાત કરી છે.

ડમ્પરે કારને ટક્કર મારી, પછી 5 વાહનો સાથે અથડાયા: 14ના મોત

જયપુર: ડમ્પરે અનેક ગાડીઓને ટક્કર મારતા 14 લોકોના મોત થયા, જ્યારે અંદાજિત 40 લોકો ઈજાગ્રસ્ત છે. ઈજાગ્રસ્તોને સારવાર માટે હોસ્પિટલમાં દાખલ કરવામાં આવ્યા છે. ગંભીર ઈજાના કારણે મોતનો આંકડો હજુ પણ વધે તેવી આશંકા છે. સ્થાનિકોનો દાવો છે કે બેફામ ડમ્પર ચાલકે સૌથી પહેલા એક કારને ટક્કર મારી અને પછી અન્ય ગાડીઓને કચડતો ગયો. અકસ્માત એટલો ભીષણ હતો કે ડમ્પરના 30થી 40 ગાડીઓની એક બીજામાં ટક્કર થઈ. ડમ્પરની સામે જે આવ્યું તેને ટક્કર મારી અને આશરે 50 લોકોને કચડી નાંખ્યા. ડ્રાઈવરે ચિક્કાર દારૂ પીધો હોવાનો પણ દાવો છે. અકસ્માત બાદ હોસ્પિટલમાં અફરાતફરીનો માહોલ સર્જાયો હતો. પ્રાથમિક ધોરણે પોલીસે કહ્યું છે કે ડમ્પર ચાલકે 5થી વધુ ગાડીઓને ટક્કર મારી 50 લોકોને કચડ્યાં છે, જેના કારણે 10થી વધુ લોકોના મોત થયા છે. કેટલાક લોકો ગાડીઓની નીચે દબાઈ ગયા હતા.

પોલીસે શું કહ્યું?

પોલીસે અહેવાલ આપ્યો છે કે એક ડમ્પ ટ્રક ચાલકે પાંચ કારને ટક્કર મારી હતી, જેમાં ૫૦ લોકો કચડી નાખ્યા હતા. દસ લોકોના મોત થયા હતા અને લગભગ ૪૦ ઘાયલ થયા હતા. ઘાયલોને સારવાર માટે હોસ્પિટલમાં દાખલ કરવામાં આવ્યા છે. ડમ્પ ટ્રક ચાલક દારૂના નશામાં હતો. કેટલાક લોકો હજુ પણ કાર નીચે ફસાયેલા હોવાની આશંકા છે, અને તેમને બચાવવાના પ્રયાસો ચાલુ છે.

આ ઘટનાથી સ્થાનિક રહેવાસીઓ ખૂબ જ ગુસ્સે છે અને ડમ્પ ટ્રક ચાલક અને માલિક બંને સામે કડક કાર્યવાહીની માંગ કરી રહ્યા છે. પરિવારના સભ્યો તેમના પ્રિયજનોના મૃત્યુના સમાચાર સાંભળીને ભાંગી પડ્યા હતા. પોલીસે હવે મૃતકોના મૃતદેહને પોસ્ટમોર્ટમ માટે મોકલી દીધા છે.

કાવ્યા જૈન-હીરવા ગોસ્વામીનું અરંગેત્ત્રમ – ભક્તિ અને સૌંદર્યનો ઉત્સવ

ગાંધીનગર: ઝંકાર સ્કૂલ ઑફ ક્લાસિકલ ડાન્સેસ દ્વારા ગુરુ પ્રતિભા વર્મા (સ્થાપક અને કલાત્મક નિદેશક)ના માર્ગદર્શન હેઠળ બે યુવ શિષ્યાઓ — કુમારી કાવ્યા જૈન અને કુમારી હીરવા ગોસ્વામીનું ભવ્ય અરંગેત્ત્રમ આયોજિત કરવામાં આવ્યું હતું. મુખ્ય અતિથિ તરીકે ગાંધીનગર મહાનગરપાલિકાના મેયર મીરાબેન પટેલ ઉપસ્થિત રહ્યા હતા. વિશિષ્ટ અતિથિ તરીકે આશિષ દવે (પ્રમુખ, ભાજપ ગાંધીનગર શહેર) અને રિટાબેન પટેલ (વિધાનસભ્ય, ગાંધીનગર ઉત્તર) ઉપસ્થિત રહ્યા હતા.ગુરુ પ્રતિભા વર્મા, સુમા મોહનની સમર્પિત શિષ્યા છે. તેમણે વર્ષ 2004માં ગાંધીનગરમાં ઝંકાર સ્કૂલ ઑફ ક્લાસિકલ ડાન્સિસની સ્થાપના કરી હતી. છેલ્લા બે દાયકામાં તેમણે ભરતનાટ્યમ, મોહિનીયાટ્ટમ, કથક, કેરળ નટનમ તેમજ લોક અને અર્ધ-શાસ્ત્રીય નૃત્ય શૈલીઓમાં અનેક વિદ્યાર્થીઓને તાલીમ આપી છે. ભારતીય શાસ્ત્રીય નૃત્ય પરંપરાના સંવર્ધન અને પ્રસાર માટેનો તેમનો અવિરત પ્રયાસ તેમને એક પ્રતિષ્ઠિત ન્યાયાધીશ, માર્ગદર્શક અને વિવિધ સાંસ્કૃતિક મંચો પર આદરણીય અતિથિ તરીકે સ્થાપિત કરે છે. તેમના ગુરુ સુમા મોહન — નાટ્યાલય સ્કૂલ ઑફ ક્લાસિકલ ડાન્સિસ, ગાંધીધામ (સ્થાપના વર્ષ 1990)ની સ્થાપક અને નિદેશક — તેમની અગ્રણી કલા-દ્રષ્ટિ અને શિક્ષણ દ્વારા નૃત્યજગતમાં પેઢી દર પેઢી પ્રેરણા આપતી રહી છે.

યુવા નૃત્યાંગનાઓની ઓળખાણ

કાવ્યા જૈન અને હીરવા ગોસ્વામી બંને ગાંધીનગરની હિલવુડ્સ સ્કૂલની 14 વર્ષની વિદ્યાર્થીિનીઓ છે, જે પોતાની સર્જનાત્મકતા, શિસ્ત અને આનંદમય વ્યક્તિત્વ માટે જાણીતી છે.

* કાવ્યા:  રમત-ગમત (ખાસ કરીને બેડમિન્ટન) અને સંગીતમાં રસ ધરાવે છે, જે તેના ઉત્સાહી અને સંતુલિત સ્વભાવને દર્શાવે છે. તેનું પ્રેમાળ વર્તન અને વિનમ્રતા તેને શિક્ષકો અને મિત્રો વચ્ચે ખૂબ જ પ્રિય બનાવે છે.

* હીરવા: નૃત્ય સાથે-સાથે ઇતિહાસમાં ખાસ રસ ધરાવે છે, જે તેના વિચારીશીલ અને જિજ્ઞાસુ સ્વભાવનું પ્રતિબિંબ છે. તેની શાંતિપૂર્ણ હાજરી અને સૌમ્યતા અન્ય વિદ્યાર્થીઓ માટે પ્રેરણારૂપ છે.

તેમના માતા-પિતા — નેહા અને સંજીવ જૈન તથા ડૉ. ધર્મિષ્ઠા અને ડૉ. કલ્પેશ ગોસ્વામીના સતત ઉત્સાહ અને પ્રોત્સાહનથી બંને નૃત્યાંગનાઓ આત્મવિશ્વાસી અને અભિવ્યક્તિશીલ કલાકાર તરીકે ખીલી ઉઠી છે.સમર્પણ અને શિસ્તની સફર

અરંગેત્ત્રમ, કાવ્યા અને હીરવા માટે એક ઔપચારિક ડેબ્યુ હતું. જે વર્ષો સુધીની મહેનત, સમર્પણ અને અભ્યાસનું પરિણામ હતું. તેમની નૃત્યયાત્રા આઠ વર્ષની નાની ઉંમરે શરૂ થઈ હતી અને ગુરુ પ્રતિભા વર્માના માર્ગદર્શન હેઠળ તેમની કળામાં કળાતમકતા અને શિસ્ત બંને વિકસ્યા હતા.

કાર્યક્રમની શરૂઆત પુષ્પાંજલિ અને ગણેશ સ્તુતિથી થઈ હતી. ત્યાર બાદ પરંપરાગત ભરતનાટ્યમ પ્રસ્તુતિઓ — અલારિપ્પુ, જાતિસ્વરમ, શબદમ, પડમ, વર્ણમ, કીર્તનમ, શ્લોકમ, તિલ્લાના અને મંગલમ — રજૂ કરવામાં આવી હતી. જેમાં વિદ્યાર્થીનીઓએ લય, અભિવ્યક્તિ અને ભાવના પર પોતાની કુશળતા દેખાડી.

મહિલા ક્રિકેટ ટીમને ચેમ્પિયન બનાવનારા અમોલ મજૂમદાર કોણ છે?

નવી મુંબઈ: 2જી નવેમ્બર, 2025નો દિવસ ભારતીય મહિલા ક્રિકેટ ટીમના ઈતિહાસમાં સુર્વણ અક્ષરે લખાઈ ગયો. ભારતીય મહિલા ખેલાડીઓએ આ દિવસે વિશ્વ વિજેતા બનીને સમગ્ર દુનિયામાં પોતાનો ડંકો વગાડી દીધો છે.  હરમનપ્રીત કૌરની આગેવાની હેઠળ ભારતીય મહિલા ક્રિકેટ ટીમ પહેલીવાર વિશ્વ વિજેતા બની… બે વખત ફાઇનલમાં પહોંચીને અધૂરું રહેલું સપનું આખરે પૂર્ણ થયું. આ જીતનો શ્રેય કેપ્ટન અને સમગ્ર ટીમને તો જાય જ છે, સાથે-સાથે કોચ અમોલ મજૂમદારને પણ એટલો જ જાય છે. કોચ અમોલ મજૂમદાર ક્યારેય ભારત ટીમ માટે રમી શક્યા નથી, છતાં ફર્સ્ટ ક્લાસ ક્રિકેટમાં 11 હજારથી વધુ રન પૂર્ણ કર્યા છે. તેમણે મહિલા ટીમને વર્લ્ડ ચેમ્પિયન બનાવીને ક્રિકેટના ઈતિહાસમાં તેમનું નામ નોંધાવી દીધું છે.

હરમનપ્રીત કોચના પગે લાગી

મહિલા વિશ્વ કપની ફાઇનલમાં દક્ષિણ આફ્રિકાને 52 રને હરાવીને ભારતીય ટીમ પ્રથમ વખત વિશ્વ વિજેતા બની. જીતનો ઝંડો લહેરાવ્યા બાદ કેપ્ટન હરમનપ્રીત કૌર કોચ અમોલ મજૂમદારના પગે લાગી અને આશીર્વાદ લીધા. તેમણે એ વ્યક્તિને પ્રણામ કર્યા, જે પડદા પાછળ રહીને ટીમને ઘડી રહ્યા હતા.

કોણ છે અમોલ મજૂમદાર?

અમોલ મજૂમદારે બે દાયકા સુધી ઘરેલુ ક્રિકેટમાં બેટિંગનો જલવો દેખાડ્યો છે. જેમાં તેમના નામે ફર્સ્ટ ક્લાસ ક્રિકેટમાં 11,167 રન નોંધાયેલા છે. તેઓ સચિન તેંડુલકર અને વિનોદ કાંબલી જેવા દિગ્ગજો સાથે રમ્યા હતા.અમોલ મજૂમદાર 1994માં ભારતની અંડર-19 ટીમના વાઈસ કેપ્ટન અને ઇન્ડિયા ‘એ’ માટે રાહુલ દ્રવિડ-સૌરવ ગાંગુલી સાથે પણ રમ્યા. 1993માં મુંબઈ માટે પોતાની રણજી ડેબ્યૂ મેચમાં 260 રનની શાનદાર ઇનિંગ્સ (જે ફર્સ્ટ ક્લાસ ક્રિકેટની ડેબ્યૂ મેચમાં કોઈ ભારતીયનો સર્વોચ્ચ સ્કોર હતો) રમી હોવા છતાં, તેમને ક્યારેય ટીમ ઇન્ડિયાનું પ્રતિનિધિત્વ કરવાની તક મળી નહીં. 2006માં તેમણે મુંબઈની ટીમને રણજી ટ્રોફી જિતાડી. આ જ દરમિયાન તેમણે એક યુવા ખેલાડી રોહિત શર્માને પહેલીવાર ફર્સ્ટ-ક્લાસ ક્રિકેટમાં તક આપી હતી.

તેના માટેનું એક સંભવિત કારણ એ હતું કે, તે સમયે ભારતનો મિડલ ઓર્ડર સચિન, દ્રવિડ, લક્ષ્મણ અને ગાંગુલી જેવા મહાન બેટ્સમેનોથી સજ્જ હતો. મજૂમદારે 2014માં સંન્યાસ લીધો, જેનાથી તેમની 21 વર્ષની ક્રિકેટ કારકિર્દીનો અંત આવ્યો.2014માં ક્રિકેટને અલવિદા કહ્યા પછી તેમણે કોચિંગનો રસ્તો પસંદ કર્યો. તેમણે નેધરલેન્ડ્સ, સાઉથ આફ્રિકા અને રાજસ્થાન રોયલ્સ જેવી ટીમ સાથે કામ કર્યું. તેમની ઓળખ એક એવા કોચ તરીકે બની જે ઓછું બોલે છે, પરંતુ ખૂબ ઊંડાણથી દરેક વસ્તુને સમજે છે.

2 વર્ષમાં સપનું સાકાર કર્યું

BCCIએ અમોલ મજૂમદારને ઓક્ટોબર 2023માં ભારતીય મહિલા ક્રિકેટ ટીમના કોચ તરીકે નિયુક્ત કર્યા. બે વર્ષમાં તેમણે ટીમને ઘડી, તેમનામાં એ વિશ્વાસ પેદા કર્યો કે તેઓ ICC ખિતાબનો દુષ્કાળ સમાપ્ત કરી શકે છે. 2005 અને 2017માં જે ન થઈ શક્યું, તે 2025માં થઈ શકે છે.

11 નવેમ્બરના રોજ અમોલ મજૂમદાર પોતાનો 51મો જન્મદિવસ ઉજવશે. ભારતીય ટીમ તરફથી તેમના માટે વિશ્વ કપની ટ્રોફી કરતાં બીજી કોઈ વધુ સારી ભેટ હોઈ શકે નહીં.

હરમનપ્રીત કૌરની બ્રિગેડની ઐતિહાસિક સફળતા બાદ તેમણે કહ્યું, ‘મારી પાસે શબ્દો નથી. આ ખૂબ જ ગર્વની ક્ષણ છે.  ટીમે સખત મહેનત અને વિશ્વાસથી દરેક ભારતીયને ગર્વની તક આપી છે… આ એક વોટરશેડ મોમેન્ટ છે.’

મળો એ વિજયી નાયિકાઓને જે ક્રિકેટના ઈતિહાસમાં બની ગઈ અમર

ભારતની 11 દીકરીઓ છે ક્રિકટની ઈતિહાસમાં હંમેશ માટે પોતાનું સ્થાન બનાવી લીધુ છે. તેમણે ફાઇનલ જીતીને ઇતિહાસ રચી દીધો છે. પ્રતિકા રાવલે ભલે બે મેચ રમી ન હોય, પરંતુ તેમણે પણ ભારતની જીતમાં મહત્વપૂર્ણ ભૂમિકા ભજવી હતી.

ભારતીય મહિલા ટીમે ક્રિકેટ જગતમાં ડંકો વગાડ્યો છે. ટીમ ઇન્ડિયાએ મહિલા ODI વર્લ્ડ કપ 2025ની ફાઇનલમાં દક્ષિણ આફ્રિકાને 52 રનથી હરાવ્યું, મહિલા ODI વર્લ્ડ કપના 52 વર્ષના ઇતિહાસમાં પ્રથમ વખત ટાઇટલ જીત્યું. સખત મહેનત, જુસ્સો અને વિશ્વાસ દ્વારા આ ટીમ લાખો ભારતીયોના સપના પર ખરી ઉતરી છે. મંધાનાની પ્રતિભાથી લઈને રેણુકાની ગતિ સુધી, દરેક ખેલાડીની પોતાની વાર્તા છે, જે સંઘર્ષ, હિંમત અને આશાથી ભરેલી છે. ચાલો જાણીએ તે 11 ખેલાડીઓ વિશે જે વિજયની નાયિકાઓ હતી…

સ્મૃતિ મંધાના: મહિલા ક્રિકેટની ગ્લોબલ આઇકોન

મહારાષ્ટ્રના સાંગલીની વતની સ્મૃતિ મંધાના બાળપણથી જ છોકરાઓ સાથે રમતી હતી. તેના પિતા અને ભાઈ બંને ક્લબ ક્રિકેટર હતા. તેના સમય અને શોટ પસંદગીએ તેને ભારતીય ટીમની સૌથી વિશ્વસનીય ખેલાડીઓમાંની એક બનાવી છે. મંધાનાએ ઘણી વખત ટીમને મુશ્કેલ પરિસ્થિતિઓમાંથી બચાવી છે અને હવે તે મહિલા ક્રિકેટની ગ્લોબલ આઇકોન છે.

શેફાલી વર્મા: નિર્ભયતાનું પ્રતિક

હરિયાણાના રોહતકની શેફાલી વર્મા જ્યારે શેરી ક્રિકેટ રમતી ત્યારે તેને “છોકરાઓ માટેની રમત” હોવાનું કહી રોકવામાં આવતી હતી. પરંતુ શેફાલી અટકી નહીં. તેણીએ 15 વર્ષની ઉંમરે ભારત માટે ડેબ્યૂ કર્યું હતું, અને હવે તેની આક્રમક બેટિંગ દરેક બોલરની કસોટી કરે છે.

જેમીમા રોડ્રિગ્સ: મુંબઈ સ્ટ્રીટ ક્રિકેટરથી વર્લ્ડ કપ સ્ટાર સુધી

જેમીમા રોડ્રિગ્સ ચર્ચ સંગીતકારોના પરિવારમાંથી આવે છે. તેના પિતા એક સ્કૂલ કોચ છે. શિક્ષણ, સંગીત અને ક્રિકેટમાં પારંગત, જેમીમાનું સ્મિત જેટલું મીઠું છે તેટલું જ તેની બેટિંગ ઘાતક છે. સેમિફાઇનલમાં તેની સદી ભારતની યાદગાર જીત તરફ દોરી ગઈ.

હરમનપ્રીત કૌર: કેપ્ટન, યોદ્ધા અને પ્રેરણા

મોગા (પંજાબ) ની હરમનપ્રીત કૌર, ભારતીય મહિલા ક્રિકેટનો જીવ છે. 2017 ના વર્લ્ડ કપમાં ઓસ્ટ્રેલિયા સામેની તેની 171* ઇનિંગ્સને કારણે તેણીને “લેડી ધોની” ઉપનામ મળ્યું. તે મેદાન પર આક્રમક છે, પરંતુ ટીમ માટે માતા જેવી પણ ભૂમિકા ભજવે છે. તેના નેતૃત્વમાં ટીમ વર્લ્ડ કપ ચેમ્પિયન બની છે. હરમનપ્રીત વર્લ્ડ કપ જીતનાર પ્રથમ ભારતીય કેપ્ટન છે.

અમનજોત કૌર: નાના શહેરનું એક મોટું સ્વપ્ન

મોહાલીની રહેવાસી અમનજોતે પંજાબના સંગરુર જિલ્લામાંથી પોતાની ક્રિકેટ સફર શરૂ કરી હતી. તેના પરિવારની આર્થિક પરિસ્થિતિ નબળી હતી, પરંતુ તેના પિતાની હિંમતે તેને આગળ વધવામાં મદદ કરી. તેના ચોક્કસ સ્ટ્રોકથી રમત બદલવામાં તે સક્ષમ છે.

દીપ્તિ શર્મા: શાંત, ઘાતક ઓલરાઉન્ડર

ઉત્તર પ્રદેશના સહારનપુરની દીપ્તિ શર્મા ટીમની સૌથી વિશ્વસનીય ઓલરાઉન્ડર છે. તેણીએ તેના ભાઈ સાથે પ્રેક્ટિસ કરીને ક્રિકેટ શીખી. બોલિંગમાં તેણીની ધીરજ અને નિયંત્રણ ભારતની જીતમાં મુખ્ય પરિબળો હતા. તેણીએ ફાઇનલમાં પાંચ વિકેટ લીધી, મેચનું પાસું ફેરવી દીધું અને ટીમ ઇન્ડિયાને ચેમ્પિયન બનાવી.

રિચા ઘોષ: આક્રમક વિકેટકીપર-બેટર

પશ્ચિમ બંગાળની રિચા ઘોષ મેદાન પર જુસ્સાનું પ્રતિક છે. તેના પિતા ક્રિકેટ કોચ છે. તેણીએ 16 વર્ષની ઉંમરે ભારત માટે રમવાનું શરૂ કર્યું હતું. સ્ટમ્પ પાછળ તેની હિટિંગ ક્ષમતા અને ચપળતાએ તેણીને ટીમનો અનિવાર્ય ભાગ બનાવી દીધી છે.

રાધા યાદવ: મુંબઈની શેરીઓથી વિશ્વ મંચ સુધી

મુંબઈના ધારાવીની ઝૂંપડપટ્ટીથી, રાધા યાદવે એક એવી સફર શરૂ કરી છે જે પ્રેરણા બની ગઈ છે. આ ડાબોડી સ્પિનર ​​કોઈપણ બેટ્સમેનને તેની વિવિધતાઓથી મૂંઝવી શકે છે. બાળપણમાં દૂધ વેચતા પરિવારની પુત્રી, તે હવે લાખો લોકો માટે પ્રેરણા છે.

ક્રાંતિ ગૌર: ખંતનું ઉદાહરણ

મધ્યપ્રદેશની ક્રાંતિ ગૌર એક સમયે નેટ બોલર હતી. તેના પિતાની નોકરી ગયા પછી, ઘર ચલાવવું મુશ્કેલ બન્યું, પરંતુ તેણીએ ક્યારેય હાર માની નહીં. આજે, ક્રાંતિ ભારતના ઝડપી બોલિંગનો નવો ચહેરો છે અને એક ગરીબ પરિવાર માટે આશાનું ઉદાહરણ છે.

શ્રી ચરણી: આંધ્રપ્રદેશની ઉભરતી સંવેદના

આંધ્રપ્રદેશના કડપા જિલ્લાની રહેવાસી શ્રી ચરણીએ ખો-ખો અને બેડમિન્ટન રમ્યા પછી ક્રિકેટનો માર્ગ અપનાવ્યો. ધૂળિયા ગામડાના મેદાનોથી લઈને વર્લ્ડ કપ ફાઇનલ સુધીની તેમની સફર નોંધપાત્ર રહી છે. તેમણે WPLમાં પોતાની પ્રતિભાથી બધાને આશ્ચર્યચકિત કર્યા અને હવે તેઓ દેશ માટે રમી રહ્યા છે.

રેણુકા ઠાકુર: હિમાચલની નાયિકા

હિમાચલના નાના ગામ પારસાની રેણુકા ઠાકુરની વાર્તા સંઘર્ષ અને સમર્પણનું ઉદાહરણ છે. પિતાના મૃત્યુ પછી તેની માતાએ એકલા હાથે તેનો ઉછેર કર્યો. HPCA એકેડેમીમાં તાલીમ લઈને, તેણીએ પોતાની ઝડપી બોલિંગ કુશળતાને નિખારી અને હવે તે ભારતના પેસ આક્રમણની કરોડરજ્જુ છે.

ભારતની આ 11 દીકરીઓએ સખત મહેનત દ્વારા પોતાનું ભાગ્ય ઘડ્યું છે. તેમણે ઇતિહાસ રચ્યો છે અને સાબિત કર્યું છે કે જ્યારે દીકરીઓ રમે છે ત્યારે દેશ જીતે છે. આ યાદીમાં પ્રતિકા રાવલનો સમાવેશ ન કરવો એ અન્યાય હશે. ભારતીય ટીમના સેમિફાઇનલ દોડમાં તેણીએ મહત્વપૂર્ણ ભૂમિકા ભજવી હતી. તેણીનું કામ ઉત્તમ હતું.

૦૩ નવેમ્બર ૨૦૨૫

ભારત પહેલી વાર વર્લ્ડ ચેમ્પિયન બન્યું, ફાઇનલમાં આફ્રિકાને હરાવ્યું

ભારતની દીકરીઓએ તે પ્રાપ્ત કર્યું છે જેની 1.5 અબજ ભારતીયો રાહ જોઈ રહ્યા હતા. હરમનપ્રીત કૌરની કેપ્ટનશીપ હેઠળ, ભારતે મહિલા વર્લ્ડ કપ જીત્યો છે. નવી મુંબઈના ડીવાય પાટિલ સ્ટેડિયમ ખાતે રમાયેલી ફાઇનલ મેચમાં ભારતે દક્ષિણ આફ્રિકાને હરાવ્યું. ભારતે પહેલા બેટિંગ કરીને 298 રન બનાવ્યા, પરંતુ જવાબમાં, ભારતીય બોલિંગ અને ફાઇનલના દબાણમાં દક્ષિણ આફ્રિકા તૂટી પડ્યું. દક્ષિણ આફ્રિકાની ટીમ ફક્ત 246 રન જ બનાવી શકી. દક્ષિણ આફ્રિકાની કેપ્ટન લૌરા વૂલફાર્ટે સદી ફટકારી હતી, પરંતુ તેના આઉટ થવાથી આખી મેચ બદલાઈ ગઈ.

શેફાલી અને દીપ્તિએ પોતાની તાકાત બતાવી

શેફાલી વર્મા અને દીપ્તિ શર્માએ ભારતની જીતનું કારણ બન્યું. શેફાલીએ ફાઇનલ મેચમાં 87 રન બનાવ્યા અને બે વિકેટ લીધી, જ્યારે દીપ્તિએ પણ 58 રન બનાવ્યા, પાંચ વિકેટ લીધી અને એક ખેલાડીને રન આઉટ પણ કરી. આ મેચમાં પણ ભારતીય ટીમ ટોસ હારી ગઈ હતી, અને આ તેમના માટે નસીબદાર બ્રેક સાબિત થયો. પહેલા બેટિંગ કરતા, ભારતે ઓપનર શેફાલી વર્મા અને સ્મૃતિ મંધાનાના કારણે મજબૂત શરૂઆત કરી. બંને બેટ્સમેનોએ પ્રથમ વિકેટ માટે 104 રન ઉમેર્યા. સ્મૃતિ મંધાના 45 રન બનાવીને આઉટ થઈ ગઈ હોવા છતાં, શેફાલી વર્મા ક્રીઝ પર રહી, 87 રન બનાવીને ભારતને સારી સ્થિતિમાં પહોંચાડ્યું. શેફાલી ઉપરાંત, દીપ્તિ શર્માએ મધ્યમ ક્રમમાં શાનદાર બેટિંગ કરી, 100 ના સ્ટ્રાઇક રેટથી 58 રન બનાવ્યા. વિકેટકીપર રિચા ઘોષે પણ 24 બોલમાં 34 રનની ઇનિંગ રમી, જેનાથી ટીમ ઇન્ડિયા 298 સુધી પહોંચી શકી.

પછી બોલરોએ પોતાની તાકાત બતાવી

બેટ્સમેન પછી, બોલરોનો વારો આવ્યો, અને બધા બોલરોએ સારું પ્રદર્શન કર્યું. ખાસ કરીને દીપ્તિ શર્મા, શેફાલી વર્મા અને શ્રી ચારાનીએ તેમના સ્પિનથી દક્ષિણ આફ્રિકાના બેટ્સમેનોને ફસાવી દીધા. દીપ્તિ શર્માએ 9.3 ઓવરમાં 39 રન આપીને 5 વિકેટ લીધી. શ્રી ચર્નીએ 48 રન આપીને 1 વિકેટ લીધી. શેફાલી વર્માએ 36 રન આપીને 2 વિકેટ લીધી.

12 હાર પછી એક ચમત્કાર

આ જીત કેપ્ટન હરમનપ્રીત કૌર માટે ખાસ છે, કારણ કે તે આ પહેલા 12 ICC ટુર્નામેન્ટમાં રમી ચૂકી છે, અને દરેક વખતે નિષ્ફળ રહી છે. તે 2009, 2013, 2017 અને 2022 માં ODI વર્લ્ડ કપમાં રમી હતી. તે 2009, 2010, 2012, 2014, 2016, 2018, 2020 અને 2023 માં T20 વર્લ્ડ કપમાં પણ રમી હતી, પરંતુ નિષ્ફળ રહી હતી. હવે, 2025 માં, તેણીએ આખરે વર્લ્ડ ચેમ્પિયન બનવાનું ગૌરવ પ્રાપ્ત કર્યું છે.

IND vs AUS: ટીમ ઈન્ડિયાએ હોબાર્ટમાં શાનદાર વિજય મેળવ્યો

ટીમ ઈન્ડિયાએ T20 શ્રેણીમાં જોરદાર વાપસી કરી, ઓસ્ટ્રેલિયાને 5 વિકેટથી હરાવ્યું. હોબાર્ટમાં રમાયેલી ત્રીજી T20 મેચમાં, ટીમ ઈન્ડિયાએ અર્શદીપ સિંહની ઉત્તમ બોલિંગ અને પછી વોશિંગ્ટન સુંદરની વિસ્ફોટક ઇનિંગ્સને કારણે ટોસ જીતીને પાંચ મેચની શ્રેણી 1-1થી બરાબર કરી. ટીમ ઈન્ડિયાએ આ શ્રેણીમાં પહેલી વાર ટોસ જીત્યો, અને તેનો ફાયદો જીત સાથે થયો. ઓસ્ટ્રેલિયાએ પહેલા બેટિંગ કરતા 186 રનનો મજબૂત સ્કોર બનાવ્યો, પરંતુ ટીમ ઈન્ડિયાએ 19મી ઓવરમાં 5 વિકેટ ગુમાવ્યા બાદ કુલ સ્કોરનો પીછો કર્યો.

ટી20 શ્રેણીની પહેલી મેચ વરસાદને કારણે રદ કરવામાં આવી હતી, જ્યારે બીજી મેચમાં ભારતીય બેટ્સમેન ખરાબ રીતે નિષ્ફળ ગયા હતા. જોકે, આ મેચમાં, ભારતીય ટીમે લક્ષ્યનો પીછો કરતી વખતે પોતાના બેટિંગ પ્રદર્શનનો લાભ ઉઠાવ્યો અને હોબાર્ટ મેદાન પર પોતાની પહેલી T20 મેચ જીતી. શ્રેણીની ચોથી મેચ 6 નવેમ્બર, ગુરુવારના રોજ ગોલ્ડ કોસ્ટમાં રમાશે અને ટીમ ઈન્ડિયા પાસે શ્રેણીમાં લીડ મેળવવાની તક હશે.

અર્શદીપ અને વરુણની ઉત્તમ બોલિંગ
આ મેચમાં ઓસ્ટ્રેલિયાએ પહેલા બેટિંગ કરી હતી, પરંતુ પરત ફરતા અર્શદીપ સિંહ (3/35) એ તેમની શરૂઆત બગાડી દીધી હતી. ભારતીય ઝડપી બોલરે ત્રીજી ઓવરમાં બે વિકેટ લીધી. ત્યારબાદ ટિમ ડેવિડ (74) વિસ્ફોટક બેટિંગ સાથે મેદાનમાં આવ્યો, તેણે માત્ર 23 બોલમાં પોતાની અડધી સદી પૂરી કરી. જોકે, વરુણ ચક્રવર્તી (2/33) એ એક જ ઓવરમાં બે વિકેટ લઈને ઓસ્ટ્રેલિયન ઇનિંગ્સ પર બ્રેક લગાવવાનો પ્રયાસ કર્યો. જોકે, ડેવિડ અને માર્કસ સ્ટોઇનિસે આક્રમણ ચાલુ રાખ્યું. ડેવિડના આઉટ થયા પછી, સ્ટોઇનિસ (64) એ પોતાની અડધી સદી ફટકારી અને મેથ્યુ શોર્ટ (26 અણનમ) સાથે મળીને ટીમને 186 રનના સ્કોર સુધી પહોંચાડી.

સુંદરની વિસ્ફોટક ઇનિંગ
ટીમ ઇન્ડિયા માટે, અભિષેક શર્મા (25) એ ફરી એકવાર વિસ્ફોટક શરૂઆત કરી, પરંતુ આ વખતે તે પોતાની ઇનિંગને મોટા સ્કોરમાં રૂપાંતરિત કરી શક્યો નહીં, જ્યારે શુભમન ગિલ (15) નું ખરાબ ફોર્મ ચાલુ રહ્યું. કેપ્ટન સૂર્યકુમાર યાદવ (24) એ તેના આગમન પર છગ્ગા અને ચોગ્ગાની ધમાકેદાર મદદથી ટીમની ગતિ જાળવી રાખી, પરંતુ તે પણ લાંબો સમય ટકી શક્યો નહીં. ત્યાંથી, તિલક વર્મા (29) એ જવાબદારી સંભાળી અને ટીમને 145 રન સુધી પહોંચાડી. દરમિયાન, ક્રીઝ પર પહોંચેલા સુંદરે ઓસ્ટ્રેલિયન બોલરોને ફટકારવાનું શરૂ કર્યું. પછી, જીતેશ શર્મા (22 અણનમ) સાથે, સુંદરે 19મી ઓવરમાં ટીમને વિજય તરફ દોરી ગયો. જોકે, સુંદર તેની પહેલી અડધી સદી સુધી પહોંચી શક્યો નહીં, 49 રન બનાવીને અણનમ રહ્યો.

226મી જલારામ જયંતિ મહોત્સવ ધામધૂમથી ઉજવાયો

કેરળ રાજ્યના કોચીન શહેરના મટ્ટાંચેરી વિસ્તારમાં સ્થિત સંત શિરોમણી જલારામ બાપાના ધામ ખાતે 226મી જન્મજયંતિનો મહોત્સવ બુધવારે ભક્તિભાવપૂર્વક ઉજવાયો હતો. વર્ષ 2012માં નવેસરથી નિર્માણ કરાયેલ આ ધામ, જ્યાં નિત્ય સેવા અને સદ્ભાવે માનવ કલ્યાણના કાર્યો ચાલી રહ્યા છે, ત્યાં મોટી સંખ્યામાં ભક્તોએ હાજરી આપી હતી.

ઉત્સવની શરૂઆત વહેલી સવારે સમાજસેવાનો સંદેશ જન માનસ સુધી પહોંચાડતી વિશેષ સેવા સાથે થઈ. રાબેતા મુજબ ધામના ટ્રસ્ટ દ્વારા કોચીનના પાંચ અનાથાશ્રમમાં નાસ્તાનું વિતરણ કરવામાં આવ્યું, જે જલારામ બાપાના “માનવ સેવા એજ પરમ ધર્મ”ના સિદ્ધાંતને વધુ પ્રગટ કરે છે. ત્યારબાદ સવારે 8:15 કલાકે બાપાની આરતી અને 11:00 કલાકે ગામની બહેનો દ્વારા રોટલા બનાવવા જેવી સેવા યોજાઈ.

સાંજના કાર્યક્રમોમાં જલારામ ભજન મંડળ અને ગાયત્રી મંડળની બહેનો દ્વારા ભાવભરી ભજન-કીર્તન સેવા યોજાઈ. સાંજે 7:30 કલાકે મહા આરતી મનોરથી માનવતાભરી સેવાને અનુસરી કોચીનના લાખાણી પરિવારના હસ્તે ઉતારવામાં આવી. મહાપ્રસાદના મનોરથ શ્રી મણિલાલ દામજી કોટેચા પરિવાર દ્વારા રાખવામાં આવ્યા હતાં, જેમાં નિર્મલ કોટેચાએ સેવા નિભાવી. રાત્રે 8:00 વાગ્યે ભક્તોએ પ્રસાદનો લાભ લીધો અને ઉત્સવની પૂર્ણાહુતિ ભક્તિના માહોલમાં થઈ.

શ્રી જલારામ ધામ, કોચીન દ્વારા નિયમિત રીતે અનેક માનવ સેવા કાર્યો કરવામાં આવે છે. દર ગુરુવારે 400 પરિવારોને અનાજ વિતરણ, દર મહિનાના પ્રથમ ગુરુવારે અનક્ષેત્ર સેવા અને દર વર્ષે વિદ્યાર્થીગણને શાળા યુનિફોર્મનું વિતરણ કરવામાં આવે છે. ગુજરાતીઓની ઓછી વસ્તી ધરાવતા આ વિસ્તારમાં પણ ભક્તો ઉત્સાહ અને ભરોસાથી પૂજય બાપાના દર્શાવેલા માર્ગે ચાલીને ઉત્સવ ઉજવે છે.

ધામના કાર્યકારીઓને વિશ્વાસ છે કે બાપાના આશીર્વાદથી આ સેવાકાર્યો ભવિષ્યમાં વધુ પ્રબળ થશે. ભક્તો માટે ડોનેશન પણ સ્વીકારવામાં આવે છે અને આ સહાય રકમ આવકવેરાના કલમ 80G હેઠળ માન્ય છે.

સ્વામિનારાયણ મંદિરે પ્રબોધિની એકાદશી પર ભવ્ય શાકોત્સવ ઉજવાયો

અમદાવાદના શાહીબાગ સ્થિત બી.એ.પી.એસ. સ્વામિનારાયણ મંદિરમાં આજે, ૨ નવેમ્બર ૨૦૨૫ના રોજ પ્રબોધિની એકાદશી નિમિત્તે ભવ્ય શાકોત્સવનું આયોજન કરવામાં આવ્યું હતું. ચાતુર્માસના અંતને શુભ કરતી આ એકાદશી એટલે વૈષ્ણવો અને સ્વામિનારાયણ સંપ્રદાય માટે વિશેષ મહત્ત્વનો દિવસ.

પ્રકૃતિના વર્દાનરૂપ અનેક શાકભાજી અને ફળોથી પૃથ્વીને સમૃદ્ધ બનાવનાર પરમાત્મા પ્રત્યેની આભારભાવના વ્યક્ત કરવા દર વર્ષે દેશ-વિદેશના તમામ બી.એ.પી.એસ. મંદિરોમાં આ ઉત્સવ ધામધૂમથી ઉજવવામાં આવે છે.

આજે શાહીબાગ મંદિર ખાતે સેંકડો હરિભક્તોની હાજરી વચ્ચે ૮૦થી વધુ જાતના શાકભાજી અને ૨૦થી વધુ પ્રકારના ફળોથી સુંદર અને કલાત્મક રીતે ભગવાન સમક્ષ હાટડી સમર્પિત કરવામાં આવી હતી. ભગવાનના આ શાકોત્સવ દર્શન માટે વહેલી સવારથી જ ભક્તોની ભાવભીની ભીડ ઉમટી પડી હતી.

સાંજ સમયે વિશેષ આરતી અને ધાર્મિક કાર્યક્રમો યોજાઈ ભક્તોએ શુભ દિવસનો લાભ લીધો હતો. ભાવનાથી ભરપૂર આ શાકોત્સવની ઉજવણી ભક્તોના મનમાં આధ్యાત્મિક આનંદ અને પોષણસભર જીવનપ્રત્યેની કૃતજ્ઞતા વધારતી હતી.

1...485486487...5,137Page 486 of 5,137