શુભમન ગિલે અમદાવાદના નરેન્દ્ર મોદી સ્ટેડિયમમાં ઇંગ્લેન્ડ સામે સદી ફટકારી છે. શુભમન ગિલની વનડે કારકિર્દીની આ 7મી સદી છે. ભારતીય ઓપનરે 95 બોલમાં પોતાની સદી પૂર્ણ કરી. ઉપરાંત, અત્યાર સુધીમાં તેણે પોતાની ઇનિંગમાં 14 ચોગ્ગા અને 2 છગ્ગા ફટકાર્યા છે.
ગિલ અને વિરાટે સંભાળી જવાબદારી
અગાઉ, ઇંગ્લેન્ડના કેપ્ટન જોસ બટલરે ટોસ જીતીને બોલિંગ કરવાનો નિર્ણય લીધો હતો. પહેલા બેટિંગ કરવા આવેલી ટીમ ઈન્ડિયાની શરૂઆત સારી રહી ન હતી. ભારતીય કેપ્ટન રોહિત શર્મા વહેલા પેવેલિયન પરત ફર્યા, પરંતુ આ પછી શુભમન ગિલ અને વિરાટ કોહલી વચ્ચે 116 રનની શાનદાર ભાગીદારી થઈ. ૫૫ બોલમાં ૫૨ રન બનાવીને વિરાટ કોહલી પેવેલિયન પાછા ફર્યા, પરંતુ શુભમન ગિલે પોતાની મજબૂત બેટિંગ ચાલુ રાખી.
શુભમન ગિલ આ ખાસ યાદીનો ભાગ બન્યા
આ ઉપરાંત શુભમન ગિલનું નામ ખૂબ જ ખાસ યાદીમાં સામેલ કરવામાં આવ્યું છે. શુભમન ગિલ એવા બેટ્સમેનોની યાદીમાં જોડાઈ ગયો છે જેમણે એક જ મેદાન પર ત્રણેય ફોર્મેટમાં સદી ફટકારવાની સિદ્ધિ હાંસલ કરી છે. ટેસ્ટ ઉપરાંત, શુભમન ગિલે નરેન્દ્ર મોદી સ્ટેડિયમમાં ODI અને T20 ફોર્મેટમાં સદી ફટકારી છે. જયારે દક્ષિણ આફ્રિકાના ભૂતપૂર્વ દિગ્ગજ ફાફ ડુ પ્લેસિસનું નામ આ યાદીમાં સામેલ છે. ફાફ ડુ પ્લેસિસે જોહાનિસબર્ગના મેદાન પર ત્રણેય ફોર્મેટમાં સદી ફટકારી છે. જ્યારે ડેવિડ વોર્નરે એડિલેડ ઓવલના મેદાન પર આ સિદ્ધિ મેળવી છે. પાકિસ્તાનના ભૂતપૂર્વ કેપ્ટન બાબર આઝમે કરાચીના નેશનલ સ્ટેડિયમમાં ટેસ્ટ ઉપરાંત ODI અને T20 ફોર્મેટમાં સદી ફટકારી છે. ઉપરાંત, ક્વિન્ટન ડી કોકે સેન્ચુરિયનમાં આ સિદ્ધિ મેળવી છે.
