મહારાષ્ટ્ર: પુણેમાં હિટ એન્ડ રનનો એક નવો મામલો સામે આવ્યો છે. મુંધવા વિસ્તારના તાડીગુટ્ટા પાસે ઓડી કારે ફૂડ ડિલિવરી બોયને ટક્કર મારી, કાર દ્વારા કચડીને ભાગી ગયો હતો. ઇજાગ્રસ્ત બાઇક સવારને હોસ્પિટલમાં દાખલ કરવામાં આવ્યો હતો. જ્યાં તેનું મોત નીપજ્યું હતું. મૃતકની ઓળખ રઉફ અકબર શેખ તરીકે થઈ હતી. પોલીસે જણાવ્યું કે, આ પહેલાં કાર સવારે એક સ્કૂટરને પણ ટક્કર મારી હતી, જેમાં ત્રણ લોકો ઘાયલ થયા હતા. સીસીટીવી ફૂટેજના આધારે પોલીસે આરોપીને ઝડપી લીધો છે. તેની ઓળખ 34 વર્ષીય આયુષ તાયલ તરીકે થઈ હતી. તે એક ખાનગી કંપનીમાં સિનિયર ઓફિસર છે. પોલીસે તેના ઘરેથી ધરપકડ કરી હતી.
પુણે પોલીસના જણાવ્યા અનુસાર આ ઘટના 10 ઓક્ટોબરની મધરાત્રે લગભગ 1.35 વાગ્યે બની હતી. ઓડી કારમાં આવેલા આરોપીએ પહેલાં મુંધવા વિસ્તારમાં ગૂગલ ઓફિસની બહાર સ્કૂટરને ટક્કર મારી હતી. ત્યાર બાદ તેણે ફૂડ ડિલિવરી બોયની બાઇક પર કાર ચડાવી દીધી હતી. કાર ચાલક દારૂના નશામાં હોવાનું પ્રાથમિક માહિતીમાં બહાર આવ્યું છે.
આરોપીએ બાઇક સવારને ટક્કર માર્યા બાદ પણ કાર રોકી ન હતી. તેણે ઘાયલ વ્યક્તિને કાર નીચે કચડી નાખ્યો અને ઝડપથી ભાગી ગયો. પોલીસે પહેલા નજીકમાં લગાવેલા સીસીટીવી કેમેરાથી કારની ઓળખ કરી હતી. પછી તેના માલિકને શોધી કાઢ્યો. આરોપીની હડપસર વિસ્તારમાં આવેલા તેના ઘરેથી ધરપકડ કરવામાં આવી હતી.
