દેશમાં રાજકિય હલચલો હવે થોડી ઓછી થઈ છે. જ્યારે દેશમાં ફરી NDA સરકારે સત્તા બનાવી છે. અને તમામ વિધાનસભા ચૂંટણી પૂરી થઈ છે. આ ઉપરાંત શપથ ગ્રહણ સમારોહ પણ પૂર્ણ થયા છે. ત્યારે કેન્દ્રની સરકાર ફરી મોટા મુદ્દા પર પોતાનું ધ્યાન કેન્દ્રીત કરી રહી છે. આ સંદર્ભમાં વડાપ્રધાન નરેન્દ્ર મોદી આવતીકાલે ઈટાલીના પ્રવાસે જઈ રહ્યા છે.
G-7 સમિટનું PM મોદીને આમંત્રણ
ઈટલીના વડાપ્રધાન જ્યોર્જિયા મેલોનીએ PM મોદીને G-7 કોન્ફરન્સમાં ભાગ લેવા આમંત્રણ આપ્યું છે. PM મોદીએ પણ મેલોનીનું આમંત્રણ સ્વીકારી લીધું છે. 9 જૂને ત્રીજી વખત શપથ લીધા બાદ PM મોદીનો આ પહેલો વિદેશ પ્રવાસ હશે. વિદેશ સચિવ વિનય મોહને PM મોદીની ઈટલી મુલાકાતની પુષ્ટિ કરતા જણાવ્યું કે, પ્રધાનમંત્રી મોદી ઈટલીના વડાપ્રધાનના આમંત્રણ પર અપુલિયા જઈ રહ્યા છે. PM મોદી G-7ની 50મી કોન્ફરન્સમાં ભાગ લેશે. આ સમિટ 14 જૂને ઈટાલીમાં યોજાશે. ઉલ્લેખનીય છે કે ભારત G-7 જૂથનો ભાગ નથી. પરંતુ ઈટાલીએ ભારતને મહેમાન તરીકે આમંત્રણ મોકલ્યું છે. વિનય મોહને માહિતી શેર કરતા કહ્યું કે પીએમ મોદીનો તેમના ત્રીજા કાર્યકાળમાં આ પ્રથમ વિદેશ પ્રવાસ છે. G-7 દેશો વચ્ચે ભારત અને ગ્લોબલ સાઉથના મુદ્દા ઉઠાવવાની આ સારી તક છે.
G-7 દેશોની યાદીમાં અમેરિકા, કેનેડા, જાપાન, ફ્રાન્સ, બ્રિટન, જર્મની અને ઈટાલીના નામ સામેલ છે. જોકે પહેલા આ જૂથને G-8 કહેવામાં આવતું હતું. રશિયા પણ આ જૂથનો ભાગ હતો. પરંતુ 2014માં રશિયાએ ક્રિમિયા પર કબજો કરી લીધો હતો. આવી સ્થિતિમાં રશિયા વિરૂદ્ધ કાર્યવાહી કરીને તેને ગ્રૂપમાંથી બહાર કરી દેવામાં આવ્યો હતો. ત્યારથી તેને G-7 કહેવામાં આવે છે.
