અમદાવાદ: ગૃહરાજ્ય મંત્રી હર્ષ સંઘવીએ અમદાવાદ ખાતે રાજ્યવ્યાપી ‘એન્ટી ડ્રગ કેમ્પઈન’ મુદ્દે એક પત્રકાર પરિષદને સંબોધિત કરી. જેમાં તેમણે જણાવ્યું કે, “ગુજરાત સરકાર અને ગુજરાત પોલીસે ડ્રગ્સ સામે અભિયાન નહિ જંગ છેડી છે. ભૂપેન્દ્ર પટેલે મુખ્યમંત્રી તરીકે શપથ લીધા બાદ સૌથી પહેલાં ડ્રગ્સના દુષણને ડામવા આરપારની લડાઈ લડવા ગૃહ વિભાગને આદેશ આપ્યા હતા.” હર્ષ સંઘવીએ હાકલ કરી કે, સંતો-મહંતો નેતાઓ-અભિનેતાઓ, સામાજિક અગ્રણીઓ, શિક્ષણવિદો, પત્રકારો સહિત તમામ નાગરિકોએ ‘એક પરિવાર’ બનીને ગુજરાતના યુવાનોને કેફી દ્રવ્યોની ચુંગાલથી દૂર રાખવા સહયોગ આપવો. “ડ્રગ્સ સામેની આ લડાઈ દાનવ સામે માનવની લડાઈ છે”, એમ તેમણે ઉમેર્યું હતું. 
હર્ષ સંઘવીએ વધુમાં કહ્યું, “ડ્રગ્સ સામે ઘૂંટણીયા ટેકવીને વિશ્વના અનેક દેશોએ તેને કાયદેસર કર્યું છે. ભારતના પાડોશી દેશો પણ ભારતમાં ડ્રગ્સ ઘૂસાડવા અને નાર્કોટેરેરિઝમને પ્રોત્સાહન આપવા પ્રયાસ કરી રહ્યા છે. કેફી દ્રવ્યોનો વેપાર ઓછી મહેનત અને ઓછા સમયમાં અનેકગણા વધો રૂપિયા કમાવી આપતો વેપાર છે. પરંતુ ગુજરાત પોલીસ આ કારોબારને જડમૂળથી ઉખાડી ફેંકવા તત્પર છે. જેના પરિણામે ડ્રગ્સ પકડવામાં ગુજરાત પોલીસ દેશમાં અવ્વલ છે.”
રાજ્ય પોલીસ વડા વિકાસ સહાયે પત્રકારોને સંબોધન કરતા કહ્યું, “નાર્કોટિક્સ એકટ અંગે જે પગલાં લેવાઈ રહ્યા છે તેની જાણકારી મીડિયાના માધ્યમથી નાગરિકો સુધી પહોંચે અને જાગતૃતા વધે તે મુખ્ય ઉદ્દેશ્ય છે. ગુજરાત સરકારનું ગૃહ વિભાગ કેફી દ્રવ્યોના દુષણને ડામવા કટિબદ્ધ છે. જેની પ્રતીતિ મીડિયાના માધ્યમથી લોકોને થવી જોઈએ.”
ગુજરાત ATSના વડા દીપેન ભદ્રન તેમજ અમદાવાદ શહરે પોલીસ કમિશનર જી.એસ.મલિક અને સુરત શહેર પોલીસ કમિશનર અનુપમસિંહ ગહેલોતે આ પ્રસંગે પ્રેઝન્ટેશન આપી, પોલીસની ડ્રગ્સ વિરોધી કામગીરીનો ચિતાર રજૂ કર્યો હતો. આજના કાર્યક્રમમાં પોલીસ મહાનિર્દેશક-લૉ અને ઓર્ડર ડૉ. શમશેરસિંહ, અધિક પોલીસ મહાનિર્દેશક આર. બી. બ્રહ્મભટ્ટ, અધિક પોલીસ મહાનિર્દેશક CID ક્રાઇમ અને રેલવે રાજકુમાર પાંડિયન તથા અન્ય ઉચ્ચ પોલીસ અધિકારીઓ હાજર રહ્યા હતા.
