મુંબઈઃ ગઈ કાલે રાતે મુંબઈ-પુણે હાઈવે પર કાર અકસ્માતમાં ઈજા પામેલી બોલીવુડ અભિનેત્રી મલાઈકા અરોરાને આજે નવી મુંબઈની એપોલો હોસ્પિટલમાંથી રજા આપવામાં આવી છે. તે એનાં બોયફ્રેન્ડ-અભિનેતા અર્જુન કપૂરની સાથે બપોરે મુંબઈ ઘેર પાછી ફરી હતી. મલાઈકા ગઈ કાલે પુણેમાં એક ફેશન કાર્યક્રમમાં હાજરી આપીને મુંબઈ પાછી ફરી રહી હતી ત્યારે એની રેન્જ રોવર કાર બીજા બે વાહન સાથે અથડાઈ પડી હતી. અન્ય બે કાર ટૂરિસ્ટ વેહિકલ હતી.
અકસ્માતમાં મલાઈકાને નજીવી ઈજા થઈ હતી અને તેને એપોલો હોસ્પિટલમાં લઈ જવામાં આવી હતી. ત્યાં એને અમુક ટાંકા લેવા પડ્યા હતા. આજે તેની તબિયત સારી થયાં બાદ હોસ્પિટલમાંથી રજા આપવામાં આવી હતી. એને માથામાં કોઈ મોટી ઈજા થઈ નથી. અર્જુન કપૂર મુંબઈથી આવીને તેને તેડી ગયો હતો.
