વડનગર : વડાપ્રધાન નરેન્દ્ર મોદીના જન્મદિવસ અને જનસેવાથી રાષ્ટ્રસેવાના અવિરત ૨૫ વર્ષના ઐતિહાસિક ઉપલક્ષમાં વડનગર ખાતે ‘સેવા સંકલ્પ અભિયાન’નો પ્રારંભ કરવામાં આવ્યો હતો. વડનગરના સુપ્રસિદ્ધ શર્મિષ્ઠા તળાવના કિનારે આયોજિત આ વિશેષ કાર્યક્રમમાં કેન્દ્રીય ગૃહ અને સહકાર મંત્રી અમિત શાહ તથા ગુજરાતના મુખ્યમંત્રી ભૂપેન્દ્ર પટેલ વિશેષ રૂપે ઉપસ્થિત રહ્યા હતા. મહાનુભાવોએ શર્મિષ્ઠા તળાવ ખાતે આયોજિત મહાઆરતીમાં સહભાગી થઈ પ્રધાનમંત્રીના દીર્ઘાયુ અને સ્વસ્થ જીવન માટે પ્રાર્થના કરી હતી.
અમિત શાહનું સંબોધન: 25 વર્ષનો નિષ્કલંક જાહેર સેવા કાળ
કાર્યક્રમને સંબોધતા કેન્દ્રીય ગૃહ મંત્રી અમિત શાહે જણાવ્યું હતું કે, આઝાદી પછી અત્યાર સુધી કોઈપણ રાજનેતાએ સતત ૨૫ વર્ષ સુધી રાજ્ય અને દેશના વડા તરીકે સેવા આપવાનો વિક્રમ સ્થાપ્યો નથી. વડાપ્રધાને એક પણ દિવસની રજા લીધા વિના ૨૫ વર્ષ રાષ્ટ્રની સેવામાં વ્યતીત કર્યા છે અને આ જાહેર જીવનમાં તેમના પર ભ્રષ્ટાચારનો એક પણ ડાઘ લાગ્યો નથી. ૧૪૦ કરોડ ભારતીયોને પોતાનો પરિવાર માનીને તેમણે ‘ભારત પ્રથમ’ના મંત્ર સાથે દેશને નવી દિશા આપી છે.
તેમણે ઉમેર્યું કે વડાપ્રધાનના ૧૨ વર્ષના પ્રધાનમંત્રી તરીકેના કાર્યકાળને ‘ગરીબ કલ્યાણના સુવર્ણ યુગ’ તરીકે ઓળખવામાં આવશે. ૨૫ કરોડ લોકોને ગરીબી રેખામાંથી બહાર લાવવાનું ભગીરથ કાર્ય થયું છે. ૮૦ કરોડ ગરીબોને નિ:શુલ્ક અનાજ, આવાસ, શૌચાલય, વીજળી, ગેસ સિલિન્ડર અને ૫ લાખ સુધીની મફત સારવારની સુવિધા પૂરી પાડી છે. ભારતને ‘ફ્રેઝાઈલ ફાઈવ’માંથી બહાર કાઢીને વિશ્વની સૌથી ઝડપથી વિકસતી અર્થવ્યવસ્થા બનાવવાનો શ્રેય નરેન્દ્ર મોદીના નેતૃત્વને જાય છે.
જમ્મુ-કાશ્મીરમાંથી કલમ ૩૭૦ નાબૂદી, ટ્રિપલ તલાકની સમાપ્તિ, સર્જિકલ સ્ટ્રાઈક અને ડિજિટલ ઈન્ડિયા જેવા સાહસિક નિર્ણયોનો ઉલ્લેખ કરતા તેમણે જણાવ્યું કે ૨૦૪૭ સુધીમાં ‘વિકસિત ભારત’ના સંકલ્પને પૂર્ણ કરવામાં આ અભિયાન યુવાનો માટે પ્રેરણાસ્રોત બનશે.
મુખ્યમંત્રી ભૂપેન્દ્ર પટેલનું વક્તવ્ય: વડનગરની માટીનું સમર્પણ
ગુજરાતના મુખ્યમંત્રી ભૂપેન્દ્ર પટેલે જણાવ્યું કે, વડનગરની ભૂમિએ વડાપ્રધાનને દેશપ્રેમ, સેવા-સાદગી અને રાષ્ટ્રહિત પ્રથમના ભાવથી સમર્પિત થવાની પ્રેરણા આપી છે. એક સમયે તકો વિનાનું ગણાતું ભારત આજે મોટો ‘ટેલેન્ટ પૂલ’ બન્યું છે. ડિજિટલ પેમેન્ટથી લઈને સ્પેસ ટેક્નોલોજી સુધી આજે ભારતનો ડંકો વાગે છે. ૭.૮ ટકાના વિકાસ દર સાથે દેશ આગળ વધી રહ્યો છે અને ભારત ‘વિશ્વમિત્ર’ તરીકે ઉભરી આવ્યું છે.
અન્ય મહાનુભાવોની ઉપસ્થિતિ અને મંતવ્યો
મહારાષ્ટ્રના નાયબ મુખ્યમંત્રી એકનાથ શિંદેએ વડાપ્રધાનને જન્મદિવસની શુભેચ્છા આપતા કહ્યું કે, વડનગરની માટીમાંથી ઉઠેલો અવાજ આજે વૈશ્વિક સ્તરે ગુંજી રહ્યો છે. કેન્દ્રીય મંત્રી અનુપ્રિયા પટેલે વડાપ્રધાનની ‘લાસ્ટ માઈલ ડિલિવરી’ નીતિ અને ગરીબી ઉન્મૂલનના પ્રયાસોની સરાહના કરી હતી.
આ પ્રસંગે ગુજરાતના ગૃહ રાજ્ય મંત્રી હર્ષ સંઘવી, ઉર્જા મંત્રી ઋષિકેશ પટેલ, જગદીશ વિશ્વકર્મા, સાંસદો, ધારાસભ્યો, સંતો અને વિશાળ સંખ્યામાં નાગરિકો હાજર રહ્યા હતા.
વડનગરથી વારાણસી બાઇક યાત્રાનો પ્રારંભ
મહાનુભાવોએ શર્મિષ્ઠા ઘાટ પરથી કળશમાં પવિત્ર જળ ગ્રહણ કર્યું હતું. ત્યારબાદ શર્મિષ્ઠા તળાવથી સુપ્રસિદ્ધ હાટકેશ્વર મંદિર સુધી પદયાત્રા યોજી દર્શન-પૂજન કર્યા હતા. કેન્દ્રીય ગૃહમંત્રી અમિત શાહ અને મુખ્યમંત્રી ભૂપેન્દ્ર પટેલે વડનગરથી વારાણસી સુધીની ૨૫૦ બાઇકર્સની યાત્રાને ફ્લેગ ઓફ આપી પ્રસ્થાન કરાવ્યું હતું. આ બાઇકર્સ શર્મિષ્ઠા તળાવનું જળ લઈને કાશી વિશ્વનાથ મહાદેવને જલાભિષેક કરશે, જે બે આધ્યાત્મિક નગરો વચ્ચેના સંબંધને પ્રદર્શિત કરશે.
શ્રમદાન અને વૃક્ષારોપણ
કાર્યક્રમ બાદ કેન્દ્રીય ગૃહ મંત્રી અમિત શાહે વડનગર રેલવે સ્ટેશન ખાતે આયોજિત સ્વચ્છતા અભિયાનમાં શ્રમદાન કર્યું હતું અને સ્વચ્છતાનો સંદેશ આપ્યો હતો. સાથે જ, ‘એક પેડ મા કે નામ’ ઝુંબેશ અંતર્ગત રેલવે સ્ટેશન પરિસરમાં વૃક્ષારોપણ કરવામાં આવ્યું હતું.
