Home Blog Page 2039

લોકસભા ચૂંટણી પહેલાં કોંગ્રેસમાં બળવો

નવી દિલ્હીઃ હાલના સમયે સિમલામાં જબરદસ્ત રાજકીય હલચલ છે. કોંગ્રેસ સરકાર બચાવવા માટે હવાતિયાં મારી રહી છે. ભાજપ હાલ થોભો અને રાહ જુઓની મુદ્રામાં છે. ભાજપ પાસે હિમાચલમાં 25 જ વિધાનસભ્યો છે, તેમ છતાં રાજ્યસભા ચૂંટણીમાં ભાજપ ઉમેદવાર હર્ષ મહાજનને જિતાડવામાં સફળ રહ્યો છે. કોંગ્રેસના છ વિધાનસભ્યોએ ક્રોસ મતદાન કર્યું છે.

ઉત્તર પ્રદેશની રાજ્યસભાની ચૂંટણીમાં ભાજપે તેના બધા આઠે ઉમેદવારોને જિતાડ્યા છે. ભાજપને આઠમા ઉમેદવારને જિતાડવા માટે નવ મતોની જરૂર હતી. એ પછી પણ ભાજપે 10 મતોના અંતરથી સમાજવાદી પાર્ટીના ઉમેદવારને હરાવ્યો હતો. SPના છ બળવાખોર વિધાનસભ્યો ઉપ મુખ્ય મંત્રી બ્રજેશ પાઠકની સાથે વિધાનસભામાં મત આપવા પહોંચ્યા હતા. યોગી આદિત્યનાથના ચક્રવ્યૂહમાં અખિલેશ યાદવની સાઇકલ ખરાબ રીતે ફસાઈ ગઈ.

ક્રોસ વોટિંગ તો કર્ણાટકમાં પણ થયું, પરંતુ એનાથી ચૂંટણીનાં પરિણામો પર ફોઈ ફરક ના પડ્યો.કર્ણાટકમાં રાજ્યસભાની ચાર સીટો પર મતદાન થયું, એમાં કોંગ્રેસના ત્રણ અને ભાજપને એક સીટ મળી. જનતા દળ-એસનો ઉમેદવાર હારી ગયો હતો.

બિહારમાં RJD વિધાનસભ્ય સંગીતા કુમારી અને કોંગ્રેસના બે વિધાનસભ્યો મુરારી પ્રસાદ ગૌતમ અને સિદ્ધાર્થ સૌરવ ભાજપમાં સામેલ થયા. બિહારમાં કોંગ્રેસના કુલ 19 વિધાનસભ્યો છે અને લોકસભા ચૂંટણી પહેલાં 19માંથી 12 વિધાનસભ્યો કોંગ્રેસ છોડે એવી શક્યતા છે.

બિહાર સિવાય મહારાષ્ટ્રમાં પ્રદેશ કોંગ્રેસના કાર્યકારી અધ્યક્ષ બસવરાજ પાટિલ પણ પાર્ટી છોડી ભાજપમાં સામેલ થયા છે. તેઓ મંત્રી રહી ચૂક્યા છે. આ પહેલાં ભૂતપૂર્વ CM અશોક ચવ્હાણ અને મિલિંદ દેવડા કોંગ્રેસ છોડીને ભાજપમાં અને શિવસેનામાં સામેલ થયા છે. આ સિવાય ગુજરાત કોંગ્રેસના રાજ્યસભાના સાંસદ અને કેન્દ્રીય મંત્રી નારણભાઈ રાઠવા પણ કોંગ્રેસ છોડીને ભાજપમાં સામેલ થયા છે.

 

 

 

 

દિલ્હીમાં પાણી પર રાજકીય જંગઃ AAP વિ LG

નવી દિલ્હીઃ દિલ્હીમાં હાલમાં પાણીનાં બિલોની વન ટાઇમ સેટલમેન્ટ (OTS) સ્કીમને લઈને રાજકીય જંગ છેડાયો છે. આપ સરકારનું કહેવું છે કે OTSને LG તરફથી મંજૂરી નથી મળી રહી. ભાજપનું કહેવું છે કે વધેલાં બિલ જળ બોર્ડનાં નવા મીટરોને કારણે આવી રહ્યાં છે.

દિલ્હીમાં કુલ પાણીના ઘરેલુ વપરાશકર્તા 27.69 લાખ છે, જેમાં 21.82 લાખ પાણીના મીટરવાળા ઉપભોક્તા છે, જ્યારે 5.87 લાખ ઘરેલુ ઉપભોક્તા પાસે મીટર નથી, જ્યારે ગેરકાયદે કોલોનીઓમાં 6.59 લાખ મીટર ગેરકાયદે છે. શહેરમાં 58.28 ટકા પાણીની ચોરી થાય છે અથવા પાણી વેડફાઈ જાય છે.

દિલ્હીમાં બાકી બિલોનાં સેટલમેન્ટ માટે વન ટાઇમ સેટલમેન્ટની યોજના લાઇમલાઇટમાં છે. સરકાર અને અધિકારીઓ ઉપ રાજ્યપાલ પર આ યોજના અટકાવવાનો આરોપ લગાવી રહી છે. બીજી બાજુ મફત પાણી યોજનાથી દિલ્હી જળ બોર્ડની આર્થિક સ્થિતિ સારી નથી. જો જળ બોર્ડ અને સરકાર સેટલમેન્ટની યોજના લાવવા ઇચ્છે તો જળ બોર્ડે પાણીનાં મીટર બદલવા જોઈએ અને એમાં કોઈ અડચણ નથી, પણ હવે આ મુદ્દાએ રાજકીય સ્વરૂપ ધારણ કર્યું છે.

તેમણે કહ્યું હતું કે મત બેન્કના રાજકારણમાં યોજના લટકી રહી છે. જોકે બાકી બિલોની ચુકવણી માટે વન ટાઇમ સેટલમેન્ટ સમસ્યાનું નિદાન નથી, કેમ કે એનાથી જળ બોર્ડનું આર્થિક નુકસાન વધશે. એનાથી ભવિષ્યમાં સમસ્યો પણ વધે એવી સંભાવના છે.

સિટીજન્સ ફ્રંટ ફોર વોટર ડેમોક્રસીના સંયોજક એસએ નકવીએ જણાવ્યું હતું કે વર્ષ 2013માં ઉપભોક્તાઓને મોકલવામાં આવેલાં ખોટાં બિલ, ખોટાં રીડિંગ રાજકીય મુદ્દો બન્યો હતો અને આપ પાર્ટી એ મુદ્દો ઉઠાવીને સત્તા સુધી પહોંચી હતી. આ સમસ્યાઓનું સમાધાન કરવું એની ફરજ છે, પણ સ્થિતિ સુધરી નથી.

 

 

 

કૃષિમંત્રી રાઘવજીને હોસ્પિટલમાંથી રજા આપવામાં આવી

ગુજરાતના કૃષિ મંત્રી રાઘવજી પટેલને બ્રેઈન સ્ટ્રોક આવતા રાજકોટની એક હોસ્પિટલમાં 19 દિવસ સારવાર ચાલી રહી હતી. તેઓ સ્વસ્થ થઇ જતા આજે તેમને હોસ્પિટલમાંથી રજા આપવામાં આવી છે. રાઘવજી પટેલને બ્રેન સ્ટ્રોક આવતા તેઓને તાત્કાલીક પહેલા જામનગરની જીજી હોસ્પિટલ ખાતે સારવાર માટે ખસેડવામાં આવ્યા હતા. જ્યાં પ્રાથમિક સારવાર આપ્યા બાદ રાજકોટની સીનર્જી હોસ્પિટલમાં સારવાર માટે ખસેડાયા હતા.

જામનગરમાં કાર્યક્રમ દરમિયાન સ્ટ્રોક આવ્યો હતો

ડોક્ટરોના જણાવ્યા પ્રમાણે, કૃષી મંત્રી રાઘવજીને 10મી તારીખે રાતે જામનગરમાં એક કાર્યક્રમમાં હતા તે દરમિયાન સ્ટ્રોક આવ્યો હતો. જેથી તેમને જામનગરની જીજી હોસ્પિટલ ખાતે સારવાર માટે ખસેડવામાં આવ્યા હતા. જ્યાં પ્રાથમિક સારવાર આપ્યા બાદ રાજકોટની સીનર્જી હોસ્પિટલમાં સારવાર માટે લાવવામાં આવ્યા હતા. ડોક્ટરે વધુમાં જણાવ્યુ કે, તેમને મેજર બ્રેઇન સ્ટ્રોક હતો. જેથી તેની અસર હતી. આઇસીયુમાં તેમને દાખલ કરવામાં આવ્યા હતા. જ્યાં વિવિધ ડોક્ટરોની ટીમની દેખરેખ હેઠળ તેમની સારવાર કરવામાં આવી.

તબિયત સ્થિર થતા ડિસચાર્જ કરવામાં આવ્યા

હવે તેમની તબિયત સ્થિર થતા તેમને ડિસચાર્જ કરવામાં આવ્યા છે.રાઘવજી પટેલને દાખલ કર્યા બાદ રાજ્ય ગૃહમંત્રી હર્ષ સંઘવીએ નિવેદન આપ્યું હતુ કે, રાઘવજી પટેલ હાલ સ્વસ્થ છે. મુખ્યમંત્રી ભુપેન્દ્રભાઈ પટેલે પણ સવારે ડોક્ટર જોડે વાત કરી હતી. રાઘવજીભાઈ એક લડાયક નેતા છે. લાખો લોકોના આશીર્વાદ તેમના ઉપર છે. ગુજરાતના ખૂણે ખૂણેથી તેમના સ્વસ્થ માટે પ્રાર્થના કરવામાં આવી રહી છે.

હારીજમાં કોમ્યુનિટી સાયન્સ સેન્ટરનું ઉદ્ઘાટન કરાયું

રાષ્ટ્રીય વિજ્ઞાન દિવસ નિમિત્તે વીઆર ઓલ હ્યુમન (WAAH) ફાઉન્ડેશન અને વિક્રમ સારાભાઈ કોમ્યુનિટી સાયન્સ સેન્ટર (VASCSC)ના સહયોગ દ્વારા પાટણ જિલ્લાના હારીજ માં શ્રી સરસ્વતી શીશુ મંદિર ખાતે 19 માં WAAH કોમ્યુનિટી સાયન્સ સેન્ટરનું ઉદ્ઘાટન કરવામાં આવ્યું છે. WAAH CSC એ STEM અને આધુનિક ટેકનોલોજી થી તૈયાર કરવામાં આવેલી શૈક્ષણિક સેન્ટર છે. જેમાં 150 થી વધારે ટીચિગ અને લર્નિંગ મટીરીયલનો TML સમાવેશ થાય છે.

આ સંસાધનોમાં મોડેલ્સ, શિક્ષણ સહાયક વિવિધ કદના ઈન્ટરેક્ટિવ પ્રદર્શન, પ્રયોગ કીટ, સાધનો, કોયડાઓ, પેનલ્સ, ચાર્ટસ નમૂનાઓ, પ્રકાશનો જેવી વિજ્ઞાનની ચીજવસ્તુઓનો સમાવેશ થાય છે. આ તમામ ચીજવસ્તુઓ વિદ્યાર્થીઓ માટે વિનામૂલ્યે છે.

વિજ્ઞાન લોકો સુધી પહોંચે અને લોકોને ઉપયોગી બને એ માટે વિક્રમ સારાભાઈ એ અથાગ પ્રયત્નો કર્યા છે. WAAH ફાઉન્ડેશનના પ્રમુખ પ્રફુલ્લભાઈ કહે છે વિજ્ઞાન, પ્રયોગોના સાધનો જેટલા પ્રમાણમાં વિદ્યાર્થીઓ અને શિક્ષકોને પૂરા પાડવામાં આવશે એટલું શોધ સંશોધન વધશે. વિકસિત ભારત માટે આ પ્રતિબધ્ધતા ખૂબ જ જરૂરી છે.

વિક્રમ સારાભાઈ કોમ્યુનિટી સાયન્સ સેન્ટરના એક્ઝિક્યુટિવ ડાયરેક્ટર દિલીપ સુરપુરે કહે છે WAAH કોમ્યુનિટી સાયન્સ સેન્ટર નવા NEP 2020 ની માર્ગદર્શિકા અનુસાર બનાવવામાં આવ્યા છે. વિજ્ઞાનના સેન્ટર ગામે ગામ પહોંચે અને સૌથી વધારે વિદ્યાર્થીઓ લાભ લેવા પ્રયત્ન કરે એવા પ્રયાસ થઇ રહ્યા છે. હારીજ જેવા અનેક વિજ્ઞાનના સેન્ટર પ્રયોગ શાળાઓ શોધ સંશોધન માટે વિધાર્થીઓ અને શિક્ષકોને ઉપયોગી થશે.

ઇન્ડિયા ગઠબંધનની સરકાર બની તો જૂની સંસદથી થશે બધાં કામ

નવી દિલ્હીઃ નવું સંસદ ભવન ફાઇવસ્ટાર જેલ જેવું છે, જ્યાં તમે કામ જ નથી કરી શકતા. જો વિરોધ પક્ષોનું  ઇન્ડિયા ગઠબંધન કેન્દ્રમાં સત્તામાં આવશે તો સંસદીય સત્રોનું આયોજન જૂના સંસદ ભવનમાંથી થશે, એમ શિવસેના (UBT)ના નેતા સંજય રાઉતે નવા સંસદની ભવનની ટીકા કરતાં કહ્યું હતું.

અમારી પાર્ટી ઇચ્છે છે કે જો લોકસભાની ચૂંટણી પછી અમે સરકાર બનાવીશું તો એ નક્કી છે કે અમે ઐતિહાસિક સંસદમાં સંસદીય સત્રોનું આયોજન ફરી શરૂ કરીશું. વડા પ્રધાન મોદીએ મે, 2023માં દિલ્હીમાં દેશના નવા સંસદ ભવનનું ઉદઘાટન કર્યું હતું.આ ઐતિહાસિક ઇમારત બનાવવામાં રૂ. 971 કરોડનૌ ખર્ચ થયો છે અને એમાં લોકસભામાં 888 સભ્યો અને રાજ્યસભામાં 300 સભ્યો માટે સુરક્ષિત છે.

સપ્ટેમ્બરમાં સંસદના વિશેષ સત્ર દરમ્યાન કાર્યવાહી નવા ભવનમાં સ્થાનાંતરિત થયા પછી કેટલાય વિરોધ પક્ષના સાંસદોએ ફરિયાદ કરી હતી કે ભવનમાં એકમેકને જોવા માટે દૂરબીનની જરૂર પડે છે.

નવી સંસદની ટીકા કરતાં તેમણે ભાજપના 400થી વધુ સીટો જીતવાના દાવાની મજાક ઉડાડી હતી. તેમણે કટાક્ષમાં કહ્યું હતું કે જો મહારાષ્ટ્રના લોકો 543 સભ્યો લોકસભામાં 600 સીટો જીતવાના દાવા કરતા તો તેઓ તાળીઓ વગાડતા. વડા પ્રધાન મોદીએ ચૂંટણી માટે 400ની જગ્યાએ 600નું લક્ષ્ય રાખવું જોઈએ. મહારાષ્ટ્રમાં મહાવિકાસ અઘાડી (MVA) ગઠબંધનના સભ્યો માટે લોકસભાની ચૂંટણીમાં સીટ વહેંચણી પર સહમતી સધાઈ છે અને એની ઘોષણા ટૂંક સમયમાં કરવામાં આવશે.

 

 

 

 

IND vs ENG: KL રાહુલ પાંચમી ટેસ્ટમાંથી બહાર, બુમરાહ પરત ફર્યો

ભારતનો સ્ટાર બેટ્સમેન કેએલ રાહુલ પણ ઈંગ્લેન્ડ સામેની પાંચમી ટેસ્ટમાંથી બહાર થઈ ગયો છે. બીસીસીઆઈએ ગુરુવારે આ વાતની પુષ્ટિ કરી. એવી અટકળો હતી કે રાહુલ છેલ્લી ટેસ્ટમાં વાપસી કરી શકે છે. રાહુલ ઈજાના કારણે પ્રથમ ટેસ્ટ રમ્યા બાદથી ટીમની બહાર છે. આ સાથે જ જસપ્રીત બુમરાહની ટીમમાં વાપસી થઈ છે. તેને ચોથી ટેસ્ટ માટે આરામ આપવામાં આવ્યો હતો. તેની જગ્યાએ આકાશ દીપ રમ્યો હતો. હવે બુમરાહની વાપસીથી ટીમ મજબૂત બની છે. આ સિવાય બીસીસીઆઈએ પણ મોહમ્મદ શમીની ઈજાને લઈને અપડેટ આપી છે.

ગુરુવારે એક પ્રેસ રિલીઝ દ્વારા, BCCIએ કહ્યું – કેએલ રાહુલ, જેને ફિટનેસના આધારે છેલ્લી ટેસ્ટમાં તક આપવામાં આવી હતી, તે ધર્મશાલામાં રમાનારી પાંચમી અને અંતિમ ટેસ્ટમાંથી બહાર થઈ ગયો છે. બીસીસીઆઈની મેડિકલ ટીમ તેની નજીકથી દેખરેખ રાખી રહી છે અને તેની સંભાળ માટે લંડનમાં નિષ્ણાતો સાથે પરામર્શ કરી રહી છે. બોર્ડે કહ્યું કે ચોથી ટેસ્ટ માટે ટીમમાંથી બહાર કરાયેલા જસપ્રીત બુમરાહ ધર્મશાલામાં રમાનારી પાંચમી ટેસ્ટ માટે ટીમ સાથે જોડાશે.

BCCIએ કહ્યું- વોશિંગ્ટન સુંદરને પણ ટીમમાંથી બહાર કરી દેવામાં આવ્યો છે. તે 2 માર્ચથી મુંબઈ સામે શરૂ થનારી રણજી ટ્રોફી સેમિફાઈનલમાં તમિલનાડુ સાથે જોડાશે. જો જરૂર પડશે તો તે ઘરેલું મેચો પૂર્ણ થયા બાદ પાંચમી ટેસ્ટ માટે ભારતીય ટીમ સાથે જોડાશે. બોર્ડે કહ્યું- મોહમ્મદ. 26 ફેબ્રુઆરીએ શમીની સર્જરી સફળ રહી હતી. તેને તેની જમણી એડીમાં સમસ્યા હતી. તે સ્વસ્થ થઈ રહ્યો છે અને ટૂંક સમયમાં તેની પુનર્વસન પ્રક્રિયા શરૂ કરવા બેંગલુરુમાં નેશનલ ક્રિકેટ એકેડમી (NCA) માં જોડાશે.

પાંચમી ટેસ્ટ માટે ભારતની ટીમઃ

રોહિત શર્મા (કેપ્ટન), જસપ્રિત બુમરાહ (વાઈસ-કેપ્ટન), યશસ્વી જયસ્વાલ, શુભમન ગિલ, રજત પાટીદાર, સરફરાઝ ખાન, ધ્રુવ જુરેલ (વિકેટકેટર), કેએસ ભરત (વિકેટકીન), દેવદત્ત પડિકલ, આર. અશ્વિન., રવિન્દ્ર જાડેજા, અક્ષર પટેલ, કુલદીપ યાદવ, મોહમ્મદ શમી, નવદીપ સૈની, શાર્દુલ ઠાકુર, સિરાજ, મુકેશ કુમાર, આકાશ દીપ.

ગુજરાતના સરકારી કર્મચારીઓના મોંઘવારી ભથ્થામાં 4 % વધારો જાહેર

મુખ્યમંત્રીએ રાજ્ય સરકારના કર્મચારીઓ કેન્દ્રના ધોરણે મોંઘવારી ભથ્થામાં 4 ટકા વધારાનો લાભ 1 જુલાઈ 2023થી આપવાની જાહેરાત કરી છે. આ મોંઘવારી ભથ્થાના વધારાનો લાભ રાજ્ય સરકારના, પંચાયત સેવાના તથા અન્ય એમ કુલ 4.45 લાખ કર્મયોગીઓ અને અંદાજે 4.63 લાખ જેટલા નિવૃત્ત કર્મચારીઓ એટલે કે પેન્શનર્સને મળવાપાત્ર થશે.

મોંઘવારી ભથ્થાની 8 માસની એટલે કે 1 જુલાઈ 2023થી ફેબ્રુઆરી-2024 સુધીની તફાવતની રકમ ત્રણ હપ્તામાં પગાર સાથે ચૂકવવામાં આવશે.જુલાઈ-2023થી સપ્ટેમ્બર-2023 સુધીની તફાવત રકમ માર્ચ-2024ના પગાર સાથે, ઓક્ટોબરથી ડિસેમ્બર 2023ની એરિયર્સની રકમ એપ્રિલ-2024ના પગાર સાથે તેમ જ જાન્યુઆરી અને ફેબ્રુઆરી-2024ના મોંઘવારી ભથ્થાની એરિયર્સની રકમ મે-2024ના પગાર સાથે કર્મયોગીઓને ચુકવાશે.મુખ્યમંત્રીએ નવી વર્ધિત-પેન્શન યોજના એન.પી.એસ.માં કર્મચારી અને રાજ્ય સરકારના ફાળા અંગે પણ એક મહત્વપૂર્ણ નિર્ણય કર્મચારીઓની માંગણીઓને પ્રતિસાદ આપતા કર્યો છે.

હવે એન.પી.એસ. અન્વયે કર્મચારીએ 10 ટકા ફાળો ભરવાનો રહેશે અને રાજ્ય સરકાર તેની સામે 14 ટકા ફાળો આપશે.મુખ્યમંત્રી ભૂપેન્દ્ર પટેલે આ બે મહત્વપૂર્ણ નિર્ણયો ઉપરાંત કર્મચારીઓને એલ.ટી.સી. માટે 10 પ્રાપ્ત રજાની રોકડ રૂપાંતરણ ચૂકવણી અગાઉ 6ઠ્ઠા પગાર પંચના પગાર ધોરણ અનુસાર થતી હતી, તે હવેથી સાતમા પગાર પંચના સુધારેલા પગાર મુજબ ચૂકવવાનો પણ અગત્યનો નિર્ણય જાહેર કર્યો છે.મુખ્યમંત્રી ભૂપેન્દ્ર પટેલના આ કર્મચારી હિતકારી નિર્ણયોના અમલ અંગે નાણાં વિભાગ દ્વારા જરૂરી આદેશો કરવા અંગેની પણ સૂચનાઓ આપવામાં આવી છે.

રિલાયન્સ, ડિઝનીની દેશમાં રૂ. 70,000 કરોડના સંયુક્ત સાહસની જાહેરાત

મુંબઈઃ  રિલાયન્સ ઇન્ડ. લિમિટેડ (RIL), વાયાકોમ18 મિડિયા પ્રા. લિમિટેડ (Viacom18) અને ધ વોલ્ટ ડિઝની કંપની  (Disney)એ વાયાકોમ18 અને સ્ટાર ઈન્ડિયાના વ્યવસાયોને જોડતા સંયુક્ત સાહસની રચના કરવા માટે સમજૂતી કરારો પર હસ્તાક્ષર કર્યા છે. આ ટ્રાન્ઝેક્શનના ભાગરૂપે Viacom18ના મિડિયાને કોર્ટ દ્વારા મંજૂર કરાયેલી સ્કીમ ઓફ એરેન્જમેન્ટના અન્વયે સ્ટાર ઇન્ડિયા પ્રાઇવેટ લિમિટેડ (SIPL)માં મર્જ કરવામાં આવશે.

કંપની (RIL) આ સંયુક્ત સાહસમાં રૂ. 11,500 કરોડ (US $ 1.4 બિલિયન)નું રોકાણ કરશે. આ ટ્રાન્ઝેક્શનમાં પોસ્ટ-મની બેસીસ પર (રોકાણનું મૂલ્ય ગણતરીમાં લીધા બાદ) સંયુક્ત સાહસનું મૂલ્ય રૂ. 70,352 કરોડ (US $ 8.5 બિલિયન) આંકવામાં આવ્યું છે. આ  સંયુક્ત સાહસ RIL દ્વારા નિયંત્રિત થશે અને તેમાં RIL 16.34 ટકા, Viacom18 46.82 ટકા અને ડિઝની 36.84 ટકા હિસ્સાની માલિકી પ્રાપ્ત કરશે.

ડિઝની આ સંયુક્ત સાહસમાં અમુક વધારાની મિડિયા સંપત્તિઓનું યોગદાન પણ આપી શકે છે, જે નિયમનકારી અને થર્ડ-પાર્ટી મંજૂરીઓને આધીન રહેશે. નીતા એમ. અંબાણી સંયુક્ત સાહસના અધ્યક્ષ હશે તેમ જ  ઉદય શંકર ઉપાધ્યક્ષ તરીકે સંયુક્ત સાહસને વ્યૂહાત્મક માર્ગદર્શન પૂરું પાડશે.

આ સંયુક્ત સાહસ ભારતમાં એન્ટરટેઇનમેન્ટ અને સ્પોર્ટ્સ કન્ટેન્ટના અગ્રણી ટીવી અને ડિજિટલ સ્ટ્રીમિંગ પ્લેટફોર્મ પૈકીનું એક હશે, જે જિયો સિનેમા અને હોટસ્ટારના માધ્યમથી ટેલિવિઝન અને ડિજિટલ પ્લેટફોર્મ્સમાં સૌથી વધારે અપેક્ષિત ઇવેન્ટ્સના એક્સેસ સહિત એન્ટરટેઇનમેન્ટ (દા.ત. કલર્સ, સ્ટારપ્લસ, સ્ટારગોલ્ડ) અને સ્પોર્ટ્સ (દા.ત. સ્ટાર સ્પોર્ટ્સ અને સ્પોર્ટ્સ18) એસેટ્સને એકસાથે લાવશે. સંયુક્ત સાહસના ભારતમાં 750 મિલિયનથી વધુ દર્શકો હશે અને તે વિશ્વમાં ભારતીય ડાયસ્પોરાને સેવા આપશે.

આ JV ભારતમાં મિડિયા અને મનોરંજન ઉદ્યોગમાં ડિજિટલ પરિવર્તનના યુગનું નેતૃત્વ કરશે અને ઉપભોક્તાઓને કોઈ પણ સમયે અને કોઈ પણ સ્થળે હાઈ-ક્વોલિટી અને કોપ્રિહેન્સિવ કન્ટેન્ટ ઓફરિંગ્સ પ્રસ્તુત કરશે. આ JVને 30,000 કરતાં વધુ ડિઝની કન્ટેન્ટ એસેટ્સના લાઇસન્સની સાથે, ભારતમાં ડિઝની ફિલ્મ્સ એન્ડ પ્રોડક્શન્સને ડિસ્ટ્રિબ્યુટ કરવાના એક્સક્લુઝિવ રાઈટ્સ પણ પ્રાપ્ત થશે, જેને પગલે ભારતીય ઉપભોક્તાઓને મનોરંજનનો સંપૂર્ણ ગુચ્છો ધરાવતા વિકલ્પો પ્રાપ્ત થશે.

આ JV વિશે, રિલાયન્સ ઈન્ડસ્ટ્રીઝના ચેરમેન અને MD મુકેશ ડી અંબાણીએ જણાવ્યું હતું કે ભારતીય મનોરંજન ઉદ્યોગમાં નવા યુગના આગમનની ઘોષણા કરતો સીમાચિહ્નરૂપ કરાર છે. રિલાયન્સ ગ્રુપના ચાવીરૂપ ભાગીદાર તરીકે અમે ડિઝનીનું સ્વાગત કરીએ છીએ.

વોલ્ટ ડિઝની કંપનીના CEO  બોબ ઈગરે જણાવ્યું હતું કે ભારતીય બજાર અને ગ્રાહકોની નાડ રિલાયન્સ સારી રીતે પારખે છે અને સાથે મળીને અમે દેશની અગ્રગણ્ય મિડિયા કંપની બનાવીશું, જે અમને ડિજિટલ સર્વિસીઝના વિશાળ પોર્ટફોલિયો તેમ જ મનોરંજન અને સ્પોર્ટ્સ કન્ટેન્ટ સાથે ઉપભોક્તાઓને વધુ સારી સેવા પૂરી પાડવાની તક આપશે. આ ટ્રાન્ઝેક્શન નિયમનકારી, શેરધારકો તેમ જ ગ્રાહકોને લગતી મંજૂરીઓને આધીન છે.

 

 

 

 

 

 

સિરિયલ બોમ્બ બ્લાસ્ટ કેસમાં કરીમ ટુંડા નિર્દોષ જાહેર

અજમેરની ટાડા કોર્ટે સીરીયલ બોમ્બ બ્લાસ્ટ કેસમાં આતંકવાદી અબ્દુલ કરીમ ટુંડાને નિર્દોષ જાહેર કર્યો છે. જ્યારે ઈરફાન અને હમીમુદ્દીનને દોષિત જાહેર કરવામાં આવ્યા છે. સીરિયલ બોમ્બ બ્લાસ્ટ કેસમાં લગભગ 30 વર્ષ બાદ કોર્ટે પોતાનો ચુકાદો આપ્યો છે. સેંકડો સાક્ષીઓ, પુરાવાઓ અને વર્ષોની ચર્ચા પછી, અજમેરની ટાડા કોર્ટના ન્યાયાધીશ મહાવીર પ્રસાદ ગુપ્તાએ પોતાનો ચુકાદો આપતાં આતંકવાદી અબ્દુલ કરીમ ટુંડાને નિર્દોષ જાહેર કર્યો. અબ્દુલ કરીમ ટુંડાના એડવોકેટ શફકત સુલતાનીએ જણાવ્યું હતું કે સીબીઆઈ કોર્ટ દ્વારા કરવામાં આવેલા આરોપોને કોર્ટે સ્વીકાર્યા નથી અને કરીમને નિર્દોષ છોડી મૂક્યો છે. અન્ય બે આરોપી ઈરફાન અને હમીમુદ્દીનને કોર્ટે દોષિત ઠેરવ્યા છે અને તેમને આજીવન કેદની સજા ફટકારી છે.

સિરિયલ બોમ્બ બ્લાસ્ટ કેસમાં આજના નિર્ણયને લઈને સવારથી જ ભારે ઉત્તેજનાનો માહોલ હતો. ગુરુવારે સવારે લગભગ 11 વાગ્યે પોલીસની ટીમ આતંકવાદીઓ કરીમ ટુંડા, હમીદુદ્દીન અને ઈરફાન સાથે ટાડા કોર્ટ પહોંચી હતી. આતંકવાદીઓની સુરક્ષા માટે ટાડા કોર્ટની બહાર પણ કડક સુરક્ષા વ્યવસ્થા કરવામાં આવી છે.

6 ડિસેમ્બર 1993ના રોજ અયોધ્યામાં બાબરી મસ્જિદના ધ્વંસ બાદ કોટા, લખનૌ, કાનપુર, હૈદરાબાદ, સુરત અને મુંબઈની ટ્રેનોમાં શ્રેણીબદ્ધ બોમ્બ વિસ્ફોટ થયા હતા. 28 ફેબ્રુઆરી 2004ના રોજ ટાડા કોર્ટે આ કેસમાં 16 આરોપીઓને આજીવન કેદની સજા ફટકારી હતી. જેમાં સુપ્રીમ કોર્ટે ચાર આરોપીઓને નિર્દોષ જાહેર કર્યા હતા અને બાકીના આરોપીઓની સજા પુનઃસ્થાપિત કરી હતી, જેઓ જયપુર જેલમાં બંધ છે.ટાડા કોર્ટના જજ મહાવીર પ્રસાદ ગુપ્તાએ અબ્દુલ કરીમ ટુંડા, હમીદુદ્દીન અને ઈરફાન અહેમદ વિરુદ્ધ પોતાનો ચુકાદો આપ્યો હતો. જેમાં અબ્દુલ કરીમ ટુંડાને નિર્દોષ જાહેર કરવામાં આવ્યા છે. હમીદુદ્દીન અને ઈરફાન પર આંધ્રપ્રદેશ, યુપી, ગુજરાત, રાજસ્થાન અને મહારાષ્ટ્રના શહેરોમાં બોમ્બ વિસ્ફોટ કરવાનો આરોપ હતો. તે જ સમયે, અબ્દુલ કરીમ ટુંડા પર કેસનો માસ્ટરમાઈન્ડ હોવાનો આરોપ મૂકવામાં આવ્યો હતો.

ચાર બંગડી બાદ મોગલ છેડતા કાળો નાગ ગીતને લઈને થયો વિવાદ

ગુજરાતી ગાયક કિંજલ દવેના ચાર ચાર બંગડી વાળી ગાડી ગીતનો વિવાદ હજુ શમ્યો નથી ત્યાં વધુ એક ગીત મુદ્દે વિવાદ થયો છે.`મોગલ છેડતા કાળો નાગ’ ગીતના અનધિકૃત ઉપયોગ અંગે રાજકોટ કોર્ટમાં નરહરભાઈ ગઢવી દ્વારા શિવ સ્ટુડિયોના માલિક ભાવિન ખખર સામે કોપીરાઇટ એકટના ભંગનો દાવો કરવામા આવ્યો છે. જેમાં અરજદારે જણાવ્યું હતું કે મોગલ છેડતા કાળો નાગ ગીત અરજદારના પિતા આપાભાઈ ગઢવીએ લખ્યું છે. તેને કંપોઝ પણ તેમને કર્યું છે. જેથી વારસાઈની દ્રષ્ટિએ તેમનો આ ગીત ઉપર હક્ક છે.

આ અંગે શીવ સ્ટુડિયો તરફથી જણાવવામાં આવ્યું હતુ કે, આ એક ધાર્મિક ગીત છે અને 1993થી તે ગવાતું આવ્યું છે. અનેક ગુજરાતી કલાકારો તેને ગાઈ ચૂક્યા છે તેમની સામે કેસ કરવામા આવ્યો નથી. અરજદાર પાસે પણ આ ગીતના અધિકારને લઈને કોઈ પુરાવા નથી. આ મામલે ગાયક હેમંત ચૌહાણ સામે પણ કોપીરાઇટ ભંગનો કેસ થયો હતો. જેમાં નક્કી થઈ શક્યું નહોતું કે આ ગીત અરજદારની માલિકીનું છે કે કેમ? કોર્ટ સમક્ષ દલિલ કરવામાં આવી હતી કે, અરજદારના પિતા ગુજરાતી ધાર્મિક ભજનો લખતા હતા. 60 વર્ષ સુધી કોપીરાઇટ તેના માલિક પાસે રહે છે. જેથી શિવ સ્ટુડિયોને તે ગીત પ્રસારીત કરવાની મંજૂરી આપી શકાય નહિ.

રાજકોટ કોર્ટે અરજદારની અરજી માન્ય રાખીને શીવ્ સ્ટુડીયોને આ ગીતની રજૂઆત કરતા રોકવા હુકમ કર્યો હતો. રાજકોટ કોર્ટના આ હુકમ સામે શિવ સ્ટુડિયોના માલિકે હાઇકોર્ટમાં અપીલ કરી હતી. જેની સુનાવણીમાં અરજદારે જણાવ્યું હતુ કે, તેઓ તેમના સ્ટુડિયોમાં ગીતો રેકોર્ડ અને પબ્લીશ કરે છે. આ ગીતના મૂળ લેખક 1994માં ગુજરી ગયા હતા અને આ આ ગીત પબ્લિક ડોમેનમાં છે. કોર્ટના હુકમ બાદ આ ગીત યુટ્યુબ ઉપરથી હટાવી લેવાયુ છે. ત્યારે હાઈકોર્ટે તમામ દલીલો સાંભળી રાજકોટ કોર્ટના હુકમને યથાવત રાખ્યો હતો.

1...2,0382,0392,040...5,118Page 2,039 of 5,118