Home Blog Page 1885

પોરબંદર સમુદ્રમાંથી 163 કિલો ડ્રગ્સ જપ્તઃ બે પાકિસ્તાનીની ધરપકડ  

અમદાવાદઃ ભારતીય કોસ્ટ ગાર્ડ અને ગુજરાત ATSએ સતત બીજા દિવસે અરબ સાગરની ભારતીય સરહદમાં 163 કિલો ડ્રગ્સ જપ્ત કરી છે. ટીમે ડ્રગ્સ પેડલિંગ કરવાવાળા બે પાકિસ્તાની નાગરિકોની પણ ધરપકડ કરી છે. આ ડ્રગ્સનો જથ્થો માછલીઓની આડમાં છુપાવીને લાવવામાં આવી રહ્યો હતો.

પોરબંદર નજીક જળસીમા નજીક આ મોટું ઓપરેશન હાથ ધરવામાં આવ્યું છે. ગુજરાત ATS અને ભારતીય કોસ્ટગાર્ડે ભારતીય જળસીમામાંથી સતત બીજા દિવસે 163 કિલો ડ્રગ્સ જપ્ત કર્યું છે. આ પકડાયેલા હશીશ નામના ડ્રગ્સની બજારની અંદાજિત કિંમત રૂ. 60 કરોડ થવા જાય છે.

ATS ગુજરાતની વિશ્વસનીય બાતમીને આધારે ભારતીય કોસ્ટ ગાર્ડે શંકાસ્પદ બોટ ભારતીય કોસ્ટ ગાર્ડના સમુદ્ર-હવા સંકલિત સર્વેલન્સમાંથી છટકી ન શકે. શંકાસ્પદ બોટની સ્પષ્ટ ઓળખ થયા બાદ તેને તરત જ અટકાવી દેવામાં આવી હતી. તપાસમાં ટૂંક સમયમાં ગુપ્તચર માહિતીની પુષ્ટિ થઈ હતી અને 2 ગુનેગારો સાથે ફિશિંગ બોટમાંથી આશરે 173 કિલો ડ્રગ્સ મળી આવ્યું હતું. દાણચોરીમાં સંડોવણીની પુષ્ટિ થઈ હતી.

આ ઓપરેશન છેલ્લાં ત્રણ વર્ષમાં ભારતીય કોસ્ટ ગાર્ડ દ્વારા કરાયેલી બારમી ધરપકડ છે. આ પહેલાં ગુજરાતના દરિયાકાંઠેથી મોટા પ્રમાણમાં ડ્રગ્સનો જથ્થો ઝડપાયો હતો. પોરબંદરના દરિયામાંથી 90 કિલો હેરોઇન જપ્ત કરવામાં આવ્યું છે. ATS અને NCB દ્વારા સંયુક્ત ઓપરેશન હાથ ધરવામાં આવ્યું હતું. આ ઓપરેશનમાં 90 કિલો હેરોઇન સાથે 14 પાકિસ્તાની નાગરિકોની ધરપકડ કરવામાં આવી હતી. આ ડ્રગ્સને ભારત લાવવામાં આવી રહ્યું હતું. સફળ ઓપરેશન હાથ ધરી હેરોઇનનો મોટો જથ્થો જપ્ત કરવામાં આવ્યો છે. આ દરમિયાન સુરક્ષા એજન્સીઓ અને પાકિસ્તાની બોટ વચ્ચે ફાયરિંગ પણ થયું હતું, જેમાં પાકિસ્તાની બોટ ચાલક ઇજાગ્રસ્ત થયો હતો.

 

 

 

 

 

 

જૂનાગઢ: કોનો ગઢ?

જૂનાગઢ:  આ એક ઐતિહાસિક નગર છે. દેશને આઝાદી 15 ઓગસ્ટ 1947માં મળી પરંતુ જૂનાગઢને ખરા અર્થમાં 9મી નવેમ્બર, 1947ના રોજ આઝાદી મળી હતી. સંત, સુરા અને સાવજની ભૂમિ તરીકે પ્રખ્યાત છે. છેલ્લાં એક દાયકાથી લોકસભાની ચૂંટણીમાં અહીં ભાજપનો ભગવો લહેરાય છે. ગરવો ગઢ ગિરનાર જેના સાનિધ્યમાં છે, અને જેને દરિયાની સંગત છે એવા જૂનાગઢ લોકસભા મતક્ષેત્રનો મિજાજ અલગ જ છે. લોકસભા 2024ની ચૂંટણીમાં જૂનાગઢ બેઠક પર ભાજપે ત્રીજીવાર રાજેશ ચુડાસમાને રીપિટ કર્યા છે જ્યારે કોંગ્રેસે વર્તમાન ઉપપ્રમુખ અને પીઢ કોંગ્રેસી અને આહીર અગ્રણી હીરાભાઈ જોટવાની પસંદગી કરી છે.  જૂનાગઢ લોકસભા મતવિસ્તારમાં કોળી સમાજના મતદારો સૌથી વધારે છે. આ સાથે લઘુમતી, દલિત, આહીર, પાટીદાર અને બક્ષીપંચ સમાજના મતદારો પણ ખૂબ મોટી સંખ્યામાં છે. 

ઉમેદવાર

ભાજપ: રાજેશ ચુડાસમા

રાજેશ ચુડાસમા કોળી જ્ઞાતિમાંથી આવે છે. તેમનો જન્મ 10 એપ્રિલ, 1982ના રોજ ચોરવાડમાં થયો હતો. હાલ તેઓ જૂનાગઢ-ગીર સોમનાથથી સાંસદ છે. અગાઉ તેઓ માંગરોળના ધારાસભ્ય હતા. રાજેશ ચુડાસમા જૂનાગઢ લોકસભા બેઠક પરથી 2014માં ભાજપની ટિકિટ પર સૌથી નાની વયના સાંસદ તરીકે ચૂંટાયા હતા. ચુડાસમા સપ્ટેમ્બર, 2014થી મે, 2019 દરમિયાન પરિવહન, પર્યટન અને સંસ્કૃતિ પરની સ્થાયી સમિતિના સભ્ય તેમજ કૃષિ મંત્રાલયમાં સલાહકાર સમિતિના સભ્ય હતા. ઉપરાંત 13 સપ્ટેમ્બર 2019થી રસાયણ અને ખાતર અંગેની સ્થાયી સમિતિના સભ્ય અને સલાહકાર સમિતિના સભ્ય છે.

કોંગ્રેસ:  હીરા જોટવા

હીરા જોટવાએ બી.એ. સુધીનો અભ્યાસ કરેલો છે. તેઓ 1991થી 2004 સુધી સુપાસી ગામના સરપંચ તરીકે રહ્યા હતા. 1995થી વર્ષ 2000 સુધી વેરાવળ યુવક કોંગ્રેસ પ્રમુખ તરીકેની પણ કામગીરી સંભાળી હતી. જૂનાગઢ જિલ્લા કોંગ્રેસના ઉપાધ્યક્ષ તરીકે વર્ષ 2000થી 2005 સુધી રહ્યા અને વેરાવળ તાલુકા કોંગ્રેસ પ્રમુખ તરીકે 2006થી વર્ષ 2013 સુધી રહ્યા હતા. આ સિવાય તેમણે 2019થી 2023 સુધી પ્રદેશ કોંગ્રેસના મહામંત્રીની જવાબદારી સંભાળી હતી. 2022મા કેશોદ વિધાનસભા બેઠક પરથી કોંગ્રેસના ઉમેદવાર તરીકે ચૂંટણી લડી હતી. હાલ તેઓ પ્રદેશ કોંગ્રેસના ઉપાધ્યક્ષ તરીકે કામગીરી બજાવી રહ્યા છે. ખેતી અને બિઝનેસ સાથે સંકળાયેલા છે. 

PROFILE

  • જૂનાગઢ લોકસભા બેઠકમાં 7 વિધાનસભા બેઠકનો સમાવેશ થાય છે. જૂનાગઢ, વિસાવદર, માંગરોળ, સોમનાથ, તલાલા, ઉના અને કોડીનાર
  • 2019માં યોજાયેલી 17મી લોકસભા ચૂંટણીમાં ભાજપના રાજેશ ચુડાસમાએ આ બેઠક પરથી 5,47,952ની લીડથી વિજેતા બન્યા હતા.

 

  • મતદારોની સંખ્યા
  • કુલ મતદારો  19,66,616
  • પુરુષ મતદાર 10,01,631
  • સ્ત્રી મતદાર   9,64,917

  • વિધાનસભા બેઠકોની સ્થિતિ
બેઠક વિજેતા પક્ષ વોટ લીડ
જૂનાગઢ સંજય કોરડિયા ભાજપ 98,792 8,860
વિસાવદર ભૂપત ભાયાણી આપ 1,13,921 39,440
માંગરોળ ભગવાનજી કરગટિયા ભાજપ 67,349 1,664
સોમનાથ વિમલ ચુડાસમા કોંગ્રેસ 90,396 28,768
તાલાલા ભગા બારડ ભાજપ 98,475 34,788
ઉના પ્રદ્યુમન વાજા ભાજપ 67,078 5,818
કોડીનાર કાળુ રાઠોડ ભાજપ 1,05,324 64,622

વિસાવદર બેઠક પરથી આમ આદમી પાર્ટીના ભૂપત ભાયાણી 2022ની વિધાનસભા બેઠકમાં જીત્યા હતા. જેમણે ધારાસભ્ય પદેથી રાજીનામું આપીને ભાજપમાં જોડાયા છે. ત્યારે આ બેઠક પર વિધાનસભાની ચૂંટણી યોજાવાની છે.

જૂનાગઢ બેઠકની વિશેષતા

  • 1962માં જૂનાગઢ બેઠક અસ્તિત્વમાં આવી.
  • કોંગ્રેસે 1989 બાદ આ લોકસભા બેઠક પર યોજાયેલી આઠ ચૂંટણી પૈકી ફક્ત 2004ની એક જ ચૂંટણી જીતી હતી.
  • ભાજપે 1991ની લોકસભા ચૂંટણીમાં પહેલી વાર જૂનાગઢ બેઠક પર વિજય મેળવ્યો હતો.
  • ભાજપના ભાવનાબહેન ચીખલિયાએ 1991થી 1999 સુધીની સળંગ ચાર લોકસભા ચૂંટણી જીત્યા હતા.

રાહુલ ગાંધીનો હુંકાર, પાટણથી મોદી પર કર્યા પ્રહાર

લોકસભા ચૂંટણીને ગમતરીના દિવસો બાકી છે. તારીખ 7મી મેના રોજ રાજ્યમાં મતદાન યોજાશે. લોકસભા ચૂંટણીને લઈ ભાજપ અને કોંગ્રેસ બંને પક્ષ એડીચોટીનું જોર લગાડી રહ્યા છે. કેટલાક અવનવી રીતે ઉમેદવારો પ્રજાને રીઝવવાનો પ્રયાસ કરી રહ્યા છે. ત્યારે ભાજપ રૂપાલા વિવાદને કારણે પડકારો સહન કરી રહ્યો છે.

આ દરમિયાન કોંગ્રેસ નેતા રાહુલ ગાંધીએ પાટણના પ્રગતિ મેદાનમાં એક જનસભા સંબોધી હતી. અહીં રાહુલ ગાંધીએ જય અંબાજી બોલીને ભાષણની શરૂઆત કરતા કહ્યું કે, ‘આટલી ગરમીમાં પણ દૂર દૂરથી આવેલા લોકોનો આભાર. હાલ દેશમાં બે વિચારધારાની લડાઇ ચાલી રહી છે. ભાજપના રાજમાં હિન્દુસ્તાનનું લોકતંત્ર અને બંધારણ બચશે કે નહીં એ મોટો સવાલ છે. ભાજપ અને સંઘના લોકો ઇચ્છે છે કે બંધારણ ખતમ થઇ જાય. પણ કોંગ્રેસ પાર્ટી બંધારણની રક્ષા કરે છે. આઝાદી પછી ગરીબ પ્રજાને જે કંઈ મળ્યું છે, તે બંધારણના કારણે મળ્યું છે.’

વધુમાં રાહુલ ગાંધીએ કહ્યું ‘બંધારણ જ ગરીબોની રક્ષા કરે છે અને મોદી સરકાર તેને જ ખતમ કરી દેવા માગે છે. અનામતને ખતમ કરવાનો બીજો માર્ગ એટલે ખાનગીકરણ. અને દેશમાં સૌથી મોટો મુદ્દો બેરોજગારી છે.’ આવકની અસમાનતા મુદ્દે પ્રહાર કરતા રાહુલ ગાંધીએ કહ્યું કે ‘મોદી સરકારે તેમના મિત્ર જેવા 22 ઉદ્યોગપતિનું 16 લાખ કરોડનું દેવું માફ કરી દીધું પણ ખેડૂતો વિશે તેમને વિચાર નથી આવતો. તેમનું દેવું માફ નથી કરતાં.’

રામ મંદિરનો ઉલ્લેખ કરતા રાહુલ ગાંધીએ કહ્યું કે, ‘હાલ બે ભારત જોવા મળી રહ્યા છે. તમે રામમંદિર પ્રાણપ્રતિષ્ઠા મહોત્સવ જોયો હશે. ખૂબ ધૂમધામથી ઉજવણી થઇ, પરંતુ ત્યાં તમને કોઈ ગરીબ જોવા નહીં મળ્યો હોય. રાષ્ટ્રપતિને પણ બોલાવાયા. પ્રોટોકોલમાં સૌથી ઉપર હોવા છતાં તેમને અંદર પણ ન જવા દીધા કારણ કે, તેઓ આદિવાસી છે. ભાષણના અંતે રાહુલ ગાંધીએ ભાવનગરના મહારાજાના પ્રજાવત્સલ રાજા કૃષ્ણકુમાર સિંહજીને પણ યાદ કરીને તેમના વખાણ કર્યા હતા.  નોંધનીય છે કે, હાલમાં જ તેમના રાજા-રજવાડા પરના નિવેદનના કારણે વિવાદ સર્જાયો હતો.

 

દેવેગૌડાનો સાંસદ દોહિત્ર સેક્સ કૌભાંડમાં ફસાયો

બેંગલુરુઃ કર્ણાટકના રાજકારણમાં રાજકીય તોફાન આવ્યું છે. JDSના સાંસદ પ્રજ્જવલ રેવન્ના હાસન સંસદીય સીટથી NDA ઉમેદવાર છે. તેમનો કથિત સેક્સ વિડિયો કર્ણાટકમાં 26 એપ્રિલે થયેલા બીજા તબક્કાની ચૂંટણીના મતદાનના ઠીક બે દિવસ પહેલાં વાઇરલ થયો હતો. કર્ણાટકમાં 28માંથી 14 સીટો પર 26 એપ્રિલને બીજા તબક્કામાં મતદાન થયું હતું અને બાકીની સીટો પર ત્રીજા તબક્કામાં મતદાન થશે.

પ્રજ્જવલ રેવન્ના દેશ છોડી દીધો છે અને તેઓ હાલ આ સમયે જર્મનીમાં છે. એક અહેવાલ મુજબ સેક્સ વિડિયો સામે આવ્યાના તરત બાદ શનિવારે સવારે તેઓ જર્મની માટે રવાના થયા હતા. રવિવારે તેમણે પોલીસમાં ફરિયાદ દાખલ કરી હતી કે વિડિયોની સાથે છેડછાડ કરવામાં આવી છે. આવી હજ્જારો ક્લિપ છે, એમ રિપોર્ટ કહે છે.

આ કૌભાંડ ગયા સપ્તાહે ત્યારે સામે આવ્યું, જ્યારે એક મહિલાએ રેવન્ના પર યૌન ઉત્પીડનનો આરોપ લગાવતાં તેમની વિરુદ્ધ પોલીસમાં કે નોંધ્યો હતો. મહિલાની ફરિયાદને આધારે પોલીસે IPCની કલમ 354A, 354D, 506 અને 509 હેઠળ FIR નોંધ્યો હતો. પીડિત મહિલાએ આરોપ લગાવ્યો હતો કે 2019 અને 2022ની વચ્ચે કેટલીય વાર તેનું યૌન શોષણ કરવામાં આવ્યું હતું. સોશિયલ મિડિયામાં વાઇરલ ક્લિપમાં કેટલીક અન્ય મહિલાઓ દેખાઈ રહી છે અને તેમના કેસ નોંધવા માટે આગળ આવવાની સંભાવના છે.

આ વિવાદ વધ્યા પછી JDSના વિધાયક શરણગૌડા કાંડકુરે પાર્ટીના અધ્યક્ષ અને ભૂતપૂર્વ વડા પ્રધાન એચડી દેવેગૌડાને બે પત્રનો પત્ર લખ્યો હતો અને પ્રજ્જવલ રેવેન્નાને પાર્ટીથી હાંકી કરવાની માગ કરી છે. કર્ણાટક સેક્સ સેકન્ડલમાં ભાજપ નેતાએ દાવો કર્યો હતો કે તેમને એક અશ્લીલ વિડિયો ભરેલી એક પેન ડ્રાઇવ મળી છે, જે વિશે તેમણે પ્રદેશાધ્યક્ષને સૂચિત કર્યા હતા.

 

 

 

 

 

 

માત્ર અભિનયમાં જ નહીં ડાન્સમાં પણ કમાલ છે આ હીરો

આજે આંતરરાષ્ટ્રીય નૃત્ય દિવસ છે. આ દિવસ દર વર્ષે 29 એપ્રિલે વિશ્વભરમાં ઉજવવામાં આવે છે. નૃત્ય એક કળા છે, જેનો બોલિવૂડ સાથે ગાઢ સંબંધ છે. ફિલ્મોમાં દર્શકોને આકર્ષવા માટે અદભૂત ગીતો અને નૃત્યો ઉમેરવામાં આવે છે. ફિલ્મોમાં પણ સ્ટાર્સ પોતાની એક્ટિંગની સાથે ડાન્સિંગ કૌશલ્યથી દર્શકોના દિલ જીતી રહ્યા છે. આવો મળીએ એવા બોલિવૂડ સ્ટાર્સને જેમના ડાન્સના ચાહકો દિવાના છે.

મિથુન ચક્રવર્તી


પોતાના સમયના પ્રખ્યાત અભિનેતા મિથુન ચક્રવર્તીને દેશના ‘ડિસ્કો ડાન્સર’ કહેવામાં આવે છે. તેમણે તેના ડિસ્કો ડાન્સને કારણે ઘણી લોકપ્રિયતા મેળવી છે. તેની પોતાની એક અલગ નૃત્ય શૈલી છે. ફિલ્મોમાં પોતાના ડાન્સનો જાદુ છોડનાર મિથુન ઘણા ડાન્સિંગ રિયાલિટી શોમાં જજની ભૂમિકા પણ ભજવી ચૂક્યા છે.

ગોવિંદા


પોતાની એક્ટિંગ અને કોમિક સ્ટાઈલ માટે પ્રખ્યાત ગોવિંદાએ પણ પોતાના ડાન્સથી દર્શકોને દિવાના બનાવી દીધા હતા. દરેક પ્રકારની એક્ટિંગમાં પોતાની ક્ષમતા સાબિત કરનાર ગોવિંદા એક ઉત્તમ ડાન્સર છે. ખાસ વાત એ છે કે ડાન્સ દરમિયાન તેમના એક્સપ્રેશન જોઈ લોકો તેના દિવાના બનાવી જાય છે. સૌથી ખાસ વાત એ છે કે ગોવિંદાની ડાન્સિંગની એક અનોખી શૈલી છે, જે તે ખૂબ જ આનંદથી કરે છે. વેડિંગ સીઝનમા ગોવિંદાના ગીત પર તેમના સ્ટેપ્સને લોકો ખૂબ ફોલો કરતા હોય છે.

પ્રભુ દેવા


પ્રભુ દેવા દેશના શ્રેષ્ઠ ડાન્સરમાંના એક છે. ડાન્સિંગ સેન્સેશન પ્રભુ દેવા તેમના લવચીક અને આકર્ષક ડાન્સ મૂવ્સ માટે જાણીતા છે. સાઉથ ઈન્ડિયન ફિલ્મ ઈન્ડસ્ટ્રીમાં પોતાની ઓળખ બનાવ્યા બાદ પ્રભુદેવાએ બૉલિવૂડમાં ધમાકેદાર પ્રવેશ કર્યો. દુનિયાભરના લોકો તેના ડાન્સની પ્રશંસા કરે છે.

હૃતિક રોશન


બોલિવૂડના ‘ગ્રીક ગોડ’ તરીકે ઓળખાતા રિતિક રોશન પોતાની એક્ટિંગની સાથે સાથે ડાન્સિંગ માટે પણ ફેમસ છે. તેની પહેલી જ ફિલ્મ ‘કહો ના પ્યાર હૈ’માં તેણે તેના ચાહકોને પોતાની આ સ્કિલથી ઈમ્પ્રેસ કરી દીધા હતાં. આ ફિલ્મના ગીતો તો હિટ થયા જ, સાથે સાથે લોકો હૃતિકના ડાન્સના પણ દિવાના બની ગયા. હૃતિકના ડાન્સિંગ મૂવ્સના ફેન્સ દુનિયાભરમાં છે. તેમની લગભગ દરેક ફિલ્મમાં એક ડાન્સ ગીત હોય જ છે, જે લોકોને ખૂબ પસંદ પડે છે.

શાહિદ કપૂર


શાહિદ કપૂર તેના અદભૂત ડાન્સ માટે પણ જાણીતા છે. શાહિદ પ્રખ્યાત કોરિયોગ્રાફર શિયામક દાવરના પ્રિય વિદ્યાર્થીઓમાંથી એક છે. શાહીદે કરિયરની શરૂઆતમાં ફિલ્મ ‘તાલ’માં બેકગ્રાઉન્ડ ડાન્સર તરીકે કરી હતી. આ પછી તેમણે ખૂબ જ મહેનત કરી આગળ આવ્યા અને આજે બૉલિવૂડના ટૉપ એક્ટરમાંના એક છે એક્ટર છે અને ડાન્સર પણ.

રણવીર સિંહ

આજની પેઢીના કલાકારોમાં રણવીર સિંહનું નામ પણ બેસ્ટ ડાન્સર્સમાં લેવામાં આવે છે. ઘણી ફિલ્મોમાં પોતાના અભિનયથી દર્શકો પર મંત્રમુગ્ધ કરનાર રણવીર સિંહે પણ પોતાની ડાન્સિંગ કૌશલ્ય ખૂબ જ સારી રીતે બતાવી છે. ડાન્સ દરમિયાન તેની એનર્જી અને એક્સપ્રેશન જોવા લાયક હોય છે.

ટાઇગર શ્રોફ


ટાઈગર શ્રોફ તેના એક્શન માટે જાણીતા છે. પરંતુ આ સિવાય તેણે પોતાના ડાન્સથી પણ ફેન્સને દિવાના બનાવી દીધા છે. બોલિવૂડ સેલેબ્સ પણ તેમના વખાણ કરતા થાકતા નથી. આટલું જ નહીં ઘણા લોકો તેની તુલના હૃતિક રોશન સાથે પણ કરે છે, જેનું તે પોતે ખૂબ સન્માન કરે છે.

BSE સેન્સેક્સ 941 પોઇન્ટ ઊછળ્યોઃ નિફ્ટી બેન્ક નવા રેકોર્ડ સ્તરે

અમદાવાદઃ સપ્તાહના પ્રારંભે શેરોમાં તેજીની આગેકૂચ થઈ હતી. ICICI બેન્ક, SBI, HDFC બેન્ક અને RILની આગેવાની હેઠળ બેન્ક શેરોમાં તેજી થઈ હતી. નિફ્ટી બેન્ક નવા રેકોર્ડ પર બંધ થયો હતો. મિડકેપ ઇન્ડેક્સ પણ નવા શિખરે બંધ થયો હતો. બેન્કિંગ, એનર્જી અને ઓઇલ એન્ડ ગેસ શેરોમાં તેજી થઈ હતી. IT અને ઓટો શેરોમાં દબાણ જોવા મળ્યું હતું. રોકાણકારોની સંપત્તિમાં કુલ 2.40 લાખ કરોડનો વધારો થયો હતો.

નિફ્ટી બેન્ક બે મહિનાની સૌથી મોટી તેજી સાથે રેકોર્ડ સ્તરે પહોંચ્યો હતો. નિફ્ટી બેન્ક 1223 પોઇન્ટની તેજી સાથે 49,424ના સ્તરે બંધ થયો હતો. BSE સેન્સેક્સ 941 પોઇન્ટની તેજી સાથે 74,621ના સ્તરે અને નિફ્ટી 223 પોઇન્ટની તેજી સાથે 22643ના સ્તરે બંધ થયો હતો.

ICICI બેન્કનાં પ્રોત્સાહક ત્રિમાસિક પરિણામોને પગલે બેન્કિંગ શેરોમાં આગઝરતી તેજી થઈ હતી. ICICI બેન્કમાં ચાર ટકાની તેજી થઈ હતી. બેન્કનું માર્કેટ કેપ રૂ. 8.14 લાખ કરોડથી વધુ થયું હતું. અત્યાર સુધી રિલાયન્સ ઇન્ડસ્ટ્રીઝ, TCS, HDFC બેન્ક, ઇન્ફોસિસ અને ભારતી એરટેલ જ રૂ. આઠ લાખ કરોડના માર્કેટ કેપને પાર કરી શક્યા છે. રિલાયન્સ હાલમાં આશરે રૂ. 20 લાખ કરોડના માર્કેટ કેપ સાથે દેશની મૂલ્યવાન કંપની છે.

આ સાથે બોન્ડ બજારમાં પણ ઘટાડાનું વલણ જોવા મળ્યું હતું. 10 વર્ષના સરકારી બોન્ડનું યિલ્ડ ઇન્ટ્રા-ડેમાં 7.176 ટકાના નીચલા સ્તરે આવી ગયું હતું, જે ગયા શુક્રવારે 7.199 ટકાથી ઓછું છે. બોન્ડ યિલ્ડથી ઇક્વિટી બજારમાં પ્રોત્સાહક તેજીના સંકેત મળે છે. બીજી બાજુ, અમેરિકી ફુગાવાના આંકડા પણ ધારણા અનુસાર રહ્યા હતા. વળી, ડાઉ જોન્સ અને નેસ્ડેક શુક્રવારે તેજી સાથે બંધ થયા હતા.

 

 

 

 

 

 

 

 

 

 

 

 

ભાજપનો ડિજિટલ પ્રચાર, 90’s ની ગેમને બનાવ્યું શસ્ત્ર

સન 1985માં જાપાનમાં બનેલી મારિયો ગેમ નેવુંના દાયકામાં ભારતમાં ખુબ પ્રચલિત થઈ હતી. એ પછી વધુ એક ગેમ કોન્ટ્રા આવી હતી. એ પણ એટલી જ લોકપ્રિય બની. હવે ફરી એકવાર વલસાડ લોકસભા ભાજપના ઉમેદવારના કારણે આ બંને ગેમ લાઇમ લાઇટમાં આવી છે.

 ગુજરાતમાં આગામી 7મી મે એ લોકસભાની ચૂંટણી થવાની છે. જેમાં વલસાડ બેઠક પર ભાજપે ધવલ પટેલને ટિકિટ આપી છે. ચૂંટણી પ્રચાર માટે ધવલ પટેલે નવુ શસ્ત્ર આજમાવ્યું છે. સુપર મારિયોની માફક સુપર ધવલ નામની એક ગેમનો વિડીયો બનાવ્યો છે. વાયરલ થઈ રહેલી આ ગેમની શરૂઆત મારિયો ગેમના પહેલા સ્ટેજની માફક થાય છે. ધવલ પટેલ પ્રારંભે કમળ લઈને આગળ વધે છે અને ભ્રષ્ટાચાર, નિરક્ષરતા, તૃષ્ટીકરણ અને બેરોજગારી જેવા મુદ્દાઓના અવરોધોને પાર કરી વલસાડ લોકસભા વિસ્તારમાં શિક્ષણને મહત્વ આપવું, ડાંગ-સાપુતારાનો પ્રવાસન તરીકે વિકાસ, આદિવાસીના હક અને અધિકારના મુદ્દાઓ, જળ-જંગલ-જમીનનું સંરક્ષણ સાથે ભગવાન શ્રીરામના આશીર્વાદ લઈ જીતનો ઝંડો ફરકાવે છે. આ સાથે સ્ટેજ પુરૂ થાય છે. સુપર મારીયો ગેમ પરથી બનાવવામાં આવેલા આ વીડિયોમાં વલસાડ લોકસભાના વિકાસના મુદ્દા આવરી લેવામાં આવ્યા છે. વલસાડ લોકસભા બેઠકનો વિકાસ કઈ રીતે કરવાનો છે, તે આ ગેમમાં બતાવવામાં આવ્યું છે.

 

                  તો તાજેતરમાં contra ગેમ આધારિત પણ એક નવો પ્રચાર વિડિયો વાયરલ થયો છે. જેમાં ધવલ પટેલ અને વડાપ્રધાન નરેન્દ્ર મોદી દેશની વિવિધ સમસ્યાઓ સામે લડી રહ્યા છે. ગેમમાં ભ્રષ્ટાચાર, ત્રીપલ તલાક, 370, આતંકવાદ, અયોઘ્યા મંદિર વગેરે મુદ્દાઓને આવરી લેવાયા છે. ભાજપના રાજમાં વડાપ્રધાન દ્વારા કરવામાં આવેલા વિવિધ કાર્યો વિશે આ વીડિયોમાં બતાવવામાં આવ્યું છે.

ભાજપ ઉમેદવાર contra સાથે ત્રીજી ફેમશ ગેમનો વિડીયો પણ બનાવ્યો છે જેનું નામ સબ વે સફર છે. જેમાં ધવલ પટલે 5 લાખની લીડથી જીવાનો વિશ્વાસ પોતાની જનતાને આપી રહ્યા છે. વિડીયોમાં એવો દર્શાવવામાં આવ્યું છે. વલસાડ બેઠકના 5 લાખ લોકોના મત તેમણે એકઠા કર્યા છે જે બાદ બહુમતી સાથે જીત મેળવી છે.

(અરવિંદ ગોંડલીયા, સુરત)

દિલ્હી પોલીસે તેલંગાણાના CM રેવન્ત રેડ્ડીને સમન્સ પાઠવ્યું

દિલ્હી પોલીસે સોમવારે તેલંગાણાના મુખ્યમંત્રી અને કોંગ્રેસના નેતા રેવંત રેડ્ડીને કેન્દ્રીય ગૃહમંત્રી અમિત શાહના સોશિયલ મીડિયા પર વાયરલ થયેલા નકલી વીડિયોના સંબંધમાં સમન્સ પાઠવ્યું હતું.મળતી માહિતી મુજબ દિલ્હી પોલીસે રેવંત રેડ્ડીને 1 મેના રોજ તેમના દ્વારા ઉપયોગમાં લેવાતા તમામ ઈલેક્ટ્રોનિક ગેજેટ્સ સાથે પૂછપરછ માટે બોલાવ્યા છે. સૂત્રોએ જણાવ્યું કે નકલી વીડિયો શેર કરનારા કોંગ્રેસના કેટલાક નેતાઓ સહિત પાંચ અન્ય લોકોને પણ દિલ્હી પોલીસ બોલાવશે. આ કાર્યવાહી એવા સમયે થઈ છે જ્યારે દિલ્હી પોલીસે ગૃહ મંત્રાલય અને ભાજપની ફરિયાદ બાદ એક દિવસ પહેલા જ આ મામલે કેસ નોંધ્યો હતો.

ભાજપે ફરિયાદ નોંધાવી

સ્પેશિયલ સેલે ભારતીય દંડ સંહિતાની વિવિધ કલમો અને આઈટી એક્ટની સંબંધિત જોગવાઈઓ હેઠળ એફઆઈઆર નોંધી છે. ફરિયાદમાં આક્ષેપ કરવામાં આવ્યો છે કે કેટલાક મોર્ફ કરેલા વીડિયો સોશિયલ મીડિયા પર ‘સમુદાયો વચ્ચે વિસંગતતા પેદા કરવાના ઈરાદાથી શેર કરવામાં આવી રહ્યા છે, જે શાંતિ અને વ્યવસ્થાને ખલેલ પહોંચાડે તેવી શક્યતા છે’.

દિલ્હી પોલીસ વધુ પાંચ લોકોને નોટિસ મોકલશે

દિલ્હી પોલીસે નોટિસ મોકલીને તેલંગાણાના સીએમને તેમનો મોબાઈલ ફોન સાથે લાવવા માટે કહ્યું છે. દિલ્હી પોલીસની ટીમ હાલ હૈદરાબાદમાં હાજર છે. આ મામલામાં કોંગ્રેસના કેટલાક નેતાઓ અને અન્ય પાંચ લોકોને નોટિસ આપવામાં આવશે. આ એ લોકો છે જેમણે ગૃહમંત્રીનો એડિટેડ વીડિયો સોશિયલ મીડિયા પર શેર કર્યો હતો. આ લોકોની પૂછપરછ કરીને પોલીસ એ જાણવાનો પ્રયાસ કરશે કે એડિટેડ વીડિયો કોણે બનાવ્યો અને આ લોકો સુધી કેવી રીતે પહોંચ્યો. આ પાંચેય લોકો તેલંગાણા સાથે સંકળાયેલા છે.

દેશના અનેક એરપોર્ટને ઈમેલ દ્વારા બોમ્બની ધમકી મળી

જયપુર, નાગપુર, ગોવા સહિત દેશના અનેક એરપોર્ટને ઈમેલ દ્વારા બોમ્બની ધમકી મળી છે. આ ઈમેલ સોમવારે મળ્યા હતા. નાગપુર એરપોર્ટ એડમિનિસ્ટ્રેશનના જણાવ્યા અનુસાર સોમવારે સવારે 10 વાગ્યાની આસપાસ ધમકીભર્યો ઈમેલ મળ્યો હતો. આ ઈમેલ એરપોર્ટ ડાયરેક્ટર આબિદ રુઈના મેઈલ આઈડી પર મળ્યો હતો. આ અંગે એરપોર્ટના વરિષ્ઠ સુરક્ષા અધિકારીઓને જાણ કરવામાં આવી હતી. એરપોર્ટ પ્રશાસને નાગપુરના સોનેગાંવ પોલીસ સ્ટેશનને ધમકીભર્યા ઈમેલની ફરિયાદ કરી છે. એરપોર્ટની સુરક્ષા વધારી દેવામાં આવી છે.

પોલીસને શંકા છે કે તે નકલી ઈમેલ છે અને અધિકારીઓએ કહ્યું કે ઈમેલ મોકલનારને શોધવાના પ્રયાસો ચાલુ છે. પોલીસને શંકા છે કે આ નકલી ઈમેલ છે અને ગભરાટ ફેલાવવાના ઈરાદાથી મોકલવામાં આવ્યા છે. પોલીસ અધિકારીઓએ જણાવ્યું કે ઈમેલ મોકલનારને શોધવાના પ્રયાસો ચાલુ છે. બે દિવસ પહેલા પણ કોલકાતા સહિત દેશના ઘણા એરપોર્ટ પર આવા જ ઈમેલ મળ્યા હતા, જે પાછળથી નકલી નીકળ્યા હતા.

સ્મૃતિ ઈરાનીનું શક્તિ પ્રદર્શન, અમેઠીથી નોંધાવી ઉમેદવારી

કેન્દ્રીય મંત્રી સ્મૃતિ ઈરાનીએ ત્રીજી વખત ભાજપ તરફથી ઉમેદવારી નોંધાવી છે. આ દરમિયાન સ્મૃતિ ઈરાની સાથે MPના CM મોહન યાદવ પણ હાજર હતા. નોમિનેશન પૂર્વે વિશાળ રોડ શો યોજાયો હતો. આ દરમિયાન કેન્દ્રીય મંત્રી સ્મૃતિ ઈરાનીએ ત્યાં હાજર લોકોને સંબોધતા કહ્યું કે જે રીતે અમેઠીના લોકોએ 2019માં ઈતિહાસ રચ્યો હતો તે જ રીતે આ વખતે પણ ઈતિહાસનું પુનરાવર્તન થશે. અમેઠીમાં ફરી એકવાર કમળ ખીલશે.

કેન્દ્રીય મંત્રી સ્મૃતિ ઈરાનીએ સોમવારે બપોરે 1 વાગ્યા બાદ ઉમેદવારી નોંધાવી હતી. આ દરમિયાન, વિજય રથથી ત્યાં હાજર લોકોને સંબોધિત કરતી વખતે, તેમણે કહ્યું, હું મોહન જીને કહેવા માંગુ છું કે અમેઠીના કાર્યકરોએ 2019 માં ભારતીય રાજકારણમાં ઇતિહાસ રચ્યો હતો. અમેઠીના સામાન્ય કાર્યકર્તાઓએ કોંગ્રેસ પાર્ટીના રાષ્ટ્રીય અધ્યક્ષને તેમના ઘરે હરાવ્યા છે.

ભારતીય જનતા પાર્ટીના કાર્યકર, રાષ્ટ્રીય સ્વયંસેવક સંઘના વફાદાર સમર્થક અને સેવક તરીકે તેમણે આ ધરતી પર લાઠીચાર્જનો સામનો કર્યો છે અને કોંગ્રેસનો ત્રાસ સહન કર્યો છે. એક સમય એવો હતો જ્યારે કોંગ્રેસ વિરુદ્ધ શબ્દ બોલવા પર કોઈને જેલમાં મોકલવામાં આવતા. પરંતુ આજની સ્થિતિ જુદી છે. અમેઠીમાં ફરી એકવાર કમળ ખીલશે. ઉલ્લેખનીય છે કે 2014ની લોકસભા ચૂંટણી વખતે સ્મૃતિ ઈરાનીને રાહુલ ગાંધી અમેઠીથી હરાવ્યા. જ્યારે 2024 માટે કોંગ્રેસ પક્ષે હાલ સુધી અસમંજસમાં છે.

1...1,8841,8851,886...5,095Page 1,885 of 5,095