મુંબઈ: બૉલિવૂડની જાણીતી અભિનેત્રીના ભાઈની પોલીસે ધરપકડ કરી છે. આ મામલો ડ્રગ્સ સાથે સંબંધિત છે. અભિનેત્રીના ઘરે નવી મુસીબત આવી પડી છે. અમે જે અભિનેત્રી વિશે વાત કરી રહ્યા છીએ તેનું નામ છે રકુલ પ્રીત સિંહ. હા, રકુલ પ્રીત સિંહ, જેનું નામ સુશાંત સિંહ રાજપૂતના મૃત્યુ પછી ડ્રગ્સ કેસમાં ઉછળ્યું હતું. હવે તેનો ભાઈ અમન પ્રીત સિંહ ડ્રગ્સના કેસમાં મુશ્કેલીમાં છે.
પોલીસે 2.6 કિલો કોકેઈન જપ્ત કર્યું
હા, તાજેતરમાં સમાચાર મળ્યા છે કે રકુલના ભાઈની હૈદરાબાદ પોલીસે ડ્રગ્સના કેસમાં ધરપકડ કરી છે. અહેવાલો અનુસાર તેલંગાણા એન્ટી નાર્કોટિક્સ બ્યુરો એટલે કે TGANB, માહિતી મળ્યા પછી સાયબરાબાદ પોલીસ અને નરસિંઘી પોલીસ સાથે મળીને એક ફ્લેટ પર દરોડો પાડ્યો જ્યાં અભિનેત્રીનો ભાઈ પણ હતો. આ સિવાય વિભાગે અહીં કોકેઈનના 13 સંભવિત હાઈ સોસાયટી ગ્રાહકોને પણ પકડ્યા હતા. અમન પ્રીત સિંહ ઉપરાંત કિશન રાઠી, અનિકેત, યશવંત, રોહિત, શ્રી ચરણ, રઘુ, પ્રસાદ, હેમંત, નિખિલ, મધુ, ક્રિષ્નમ રાજુ, વેંકટ નામના લોકોનો સમાવેશ થાય છે.
કોણ છે અમન પ્રીત સિંહ?
અમન પ્રીત સિંહ તેની બહેન જેમ એક્ટર છે. અમને તેલુગુ ફિલ્મ ઉદ્યોગમાં નિન્નેપેલદાતા (2020) અને પ્રોડક્શન નંબર 1 (2020) સહિત ઘણી ફિલ્મોમાં કામ કર્યું છે. આટલું જ નહીં અમને ફિલ્મ રામરાજ્ય (2020)થી બોલિવૂડમાં ડેબ્યૂ પણ કર્યું છે. પણ જોકે તેને બહેન રકુલ જેટલી નામના મળી નહીં. આ સાથે જ અમન પ્રીત સિંહ તેની બહેન રકુલ પ્રીત સિંહ સાથે સ્ટારિંગ યુ નામનું ટેલેન્ટ ડિસ્કવરી પ્લેટફોર્મ પણ ચલાવે છે. આ પ્લેટફોર્મ કલાકારોને પ્રોડ્યુસર્સ, કન્ટેન્ટ ઓનર અને ડિસ્ટ્રીબ્યુટર્સ સાથે જોડે છે.
આ આરોપીઓની ધરપકડ કરવામાં આવી હતી
કહેવામાં આવી રહ્યું છે કે અત્યાર સુધી અમન પ્રીત સિંહ, ઓનોહા બ્લેસિંગ (પશ્ચિમ આફ્રિકા), અઝીઝ નોહીમ, અલ્લામ સત્ય વેંકટ ગૌતમ, વરુણ કુમાર, મોહમ્મદ મહેબૂબ શરીફની પોલીસે આ કેસમાં ધરપકડ કરી છે. હાલ આ કેસમાં વધુ બે ડ્રગ્સ સપ્લાયર ફરાર છે. જણાવવામાં આવી રહ્યું છે કે તેલંગાણા એન્ટી નાર્કોટિક્સ વિભાગને આ ફ્લેટમાંથી 2.6 કિલો કોકેન પણ મળી આવ્યું છે, જેની કિંમત 35 લાખ રૂપિયા જણાવવામાં આવી રહી છે. આ કેસમાં પોલીસે 2.6 કિલો કોકેઈન ઉપરાંત 2 પાસપોર્ટ, 2 બાઈક અને 10 મોબાઈલ ફોન જપ્ત કર્યા છે. હવે પોલીસ પહેલા આ તમામ આરોપીઓની મેડિકલ તપાસ કરશે, ત્યારબાદ તમામને કોર્ટમાં રજૂ કરવામાં આવશે.
