અમદાવાદ: ટોરેન્ટ ગ્રુપની ચેરિટેબલ સંસ્થા યુ.એન.એમ. ફાઉન્ડેશને બુધવારે નરોડા ખાતે તૈયાર કરવામાં આવેલ નવા જાહેર બગીચાને જનતાને સમર્પિત કર્યો. આ સાથે અમદાવાદમાં યુ.એન.એમ. ફાઉન્ડેશનની ‘પ્રતીતિ’ પહેલ અંતર્ગત વિકસાવવામાં આવેલ અને સંચાલિત જાહેર બગીચાની સંખ્યા વધીને 10 થઈ છે.
નરોડા ખાતે તૈયાર કરવામાં આવેલ નવા બગીચાનું ઉદ્દઘાટન બુધવારે અમદાવાદ શહેરના મેયર પ્રતિભા જૈન દ્વારા કરવામાં આવ્યું. આ પ્રસંગે ટોરેન્ટ પાવર લિમિટેડના એક્ઝિક્યુટિવ ડિરેક્ટર સુધીર પ્રસાદ હાજર રહ્યા હતા.
કુલ 6,766 ચોરસ મીટર વિસ્તારમાં ફેલાયેલ આ નવો જાહેર બગીચો અમદાવાદ મહાનગર પાલિકાના ઉત્તર ઝોનના નરોડા વોર્ડમાં પેનેશિયા રેસિડેન્સી પાસે આવેલ છે. નરોડા ખાતે નવો વિકસિત આ ગાર્ડન શહેરની ઉત્તમ જાહેર માળખાકીય સુવિધાઓનો ઉત્તમ નમૂનો છે. ગાર્ડનમાં 750 મીટર લાંબો વૉકિંગ ટ્રેક છે. વિવિધ ૨૨ જેટલી પ્રજાતિઓના લગભગ 80 વૃક્ષો ઓક્સિજન ઉત્પન્ન કરવાની સાથે ધૂળના કણોને શોષવામાં મહત્વનો ફાળો આપી રહ્યા છે. અલગ-અલગ 73 પ્રજાતિઓની 33,000થી વધુ ઝાડીઓ, વાંસ અને ઘાસ, બગીચાના તાપમાનને નિયંત્રિત કરવામાં અને ઠંડકયુક્ત માઇક્રોક્લાઇમેટ બનાવવામાં મદદ કરે છે.
યુ.એન.એમ. ફાઉન્ડેશને પોતાની ‘પ્રતીતિ’ પહેલ હેઠળ અત્યાર સુધી અમદાવાદ શહેરમાં ૯૮,૮૬૪ ચોરસ મીટર વિસ્તારને આવરી લેતા જાહેર બગીચાઓનું નવ નિર્માણ/વિકાસ અને જાળવણી કરી રહી છે. યુ.એન.એફ. ફાઉન્ડેશન શહેરી જગ્યાઓમાં ગ્રીન કવરના સંરક્ષણ અને જાળવણી ઉપર વિશેષ ભાર મુકી રહ્યું છે. ‘પ્રતીતિ’ પહેલ હેઠળ અમદાવાદ, ગાંધીનગર, સુરત અને દમણ શહેરમાં આવેલ ૧૩ બગીચાઓમાં લગભગ ૩.૪૭ લાખ ચોરસ મીટર ગ્રીન સ્પેસની જાળવણી કરવામાં આવી રહી છે.
