ઉત્તર પ્રદેશ: ઝાંસીથી પ્રયાગરાજ જતી ટ્રેન પર મધ્યપ્રદેશના હરપાલપુરમાં હુમલો થયો. હુમલાખોરોએ ટ્રેન પર પથ્થરમારો કર્યો, સાથે તેમાં તોડફોડ પણ કરી. આ ટ્રેન મહાકુંભ માટે જઈ રહી હતી. આવતીકાલે મૌની અમાવસ્યાના કારણે, વિવિધ સ્થળોએથી લાખો ભક્તો પ્રયાગરાજ પહોંચી રહ્યા છે.
મળતી માહિતી મુજબ, આ ઘટના રાત્રે લગભગ 1 વાગ્યે ઝાંસી ડિવિઝનના હરપાલપુર સ્ટેશન પર બની હતી. અહીં ટોળાએ અચાનક ટ્રેન પર હુમલો કર્યો. જેના કારણે ટ્રેનની અંદર બેઠેલા મુસાફરો ગભરાઈ ગયા. હુમલાના વાયરલ વીડિયોમાં જોઈ શકાય છે કે ભીડમાંથી લોકો ટ્રેનની બોગી પર પથ્થરમારો કરી રહ્યા છે. એવું કહેવામાં આવી રહ્યું છે કે ભીડ ટ્રેનમાં પ્રવેશવાનો પ્રયાસ કરી રહી હતી, પરંતુ જ્યારે લોકો અંદર પ્રવેશી શક્યા નહીં, ત્યારે તેઓએ દરવાજા અને બારીઓ તોડી નાખી.
આ ઘટના બાદ સ્થાનિક પોલીસ અને રેલ્વે પ્રોટેક્શન ફોર્સને તાત્કાલિક ઘટનાસ્થળે બોલાવવામાં આવ્યા હોવાનું જણાવવામાં આવી રહ્યું છે. મામલાની ગંભીરતાને ધ્યાનમાં રાખીને, રેલવે અધિકારીઓએ તપાસના આદેશ આપ્યા છે. આ ઘટનાને કારણે રેલ વ્યવહાર પ્રભાવિત થયો હતો અને ઘણી ટ્રેનો મોડી પડી હતી. છતરપુર સિવિલ લાઇન્સ પોલીસ સ્ટેશનના ઇન્ચાર્જ વાલ્મિક ચૌબેએ જણાવ્યું હતું કે, છતરપુર રેલ્વે સ્ટેશન પર ફાટક ન ખોલવાને કારણે રાત્રે લગભગ 1 વાગ્યે કેટલાક લોકોએ ટ્રેન પર પથ્થરમારો કર્યો અને તોડફોડ કરી.
માહિતી મળ્યા પછી, અમે ઘટનાસ્થળે પહોંચ્યા, ટ્રેન છતરપુરથી પ્રયાગરાજ કુંભ જઈ રહી હતી, બધા આરોપીઓ ઘટના સ્થળેથી ભાગી ગયા હતા. દરમિયાન, હરપાલપુર પોલીસ સ્ટેશનના ઇન્ચાર્જ પુષ્પક શર્માએ જણાવ્યું હતું કે પોલીસ ટીમે યોગ્ય સલાહ આપ્યા પછી ટ્રેન મોકલી હતી, ખજુરાહો અને છતરપુરમાં પણ લોકોએ અશાંતિ ઉભી કરી છે.
