નવી દિલ્હીઃ લોકસભા ચૂંટણીનાં પરિણામો પછી TDP અને JDUએ ભાજપ સાથે પ્રેશર પોલિટિક્સ શરૂ કરી દીધું છે. NDAની બેઠકમાં સામેલ થવા માટે CM નીતીશકુમાર અને ચંદ્રબાબુ નાયડુ દિલ્હી આવી રહ્યા છે. NDA ગઠબંધન હેઠળ જો ભાજપે ત્રીજી વાર મોદીની સરકાર બનાવવી છે તો પક્ષે TDP અને JDUની શરતોને માનવી પડશે.
ભાજપથી TDP કેન્દ્ર સરકારમાં 5-6 મંત્રાલય અને લોકસભામાં અધ્યક્ષપદની માગ કરે એવી શક્યતા છે. આટલું જ નહીં, બિહારના CM નીતીશકુમારની પાર્ટી JDU NDA સરકારમાં સામેલ થવા માટે સ્પીકર પદ અને વિવિધ મંત્રીપદોની માગ કરી શકે છે. રસપ્રદ વાત એ છે કે ઇન્ડિયા ગઠબંધને નીતીશને ડેપ્યુટી PM પદની ઓફર કરી છે, એમ સૂત્રોએ કહ્યું હતું.
NDAની બેઠકમાં ભાગ લેવા માટે નીતીશકુમાર પણ દિલ્હી આવી રહ્યા છે. જોકે દિલ્હી આવતાં પહેલાં તેઓ તેમના નિવાસસ્થાને વરિષ્ઠ નેતાઓને મળી રહ્યા છે. લલન સિંહ પણ વહેલી સવારે તેમને મળવા આવ્યા છે. NDA સરકાર માટે ભાજપ માટે નીતીશ કુમાર અને ચંદ્રબાબુ નાયડુનું સમર્થન હોવું ખૂબ જ જરૂરી છે. આવી સ્થિતિમાં સરકાર બનાવવા માટે તેને JDUની 12 અને TDPની 16 સીટોની જરૂર છે.
દિલ્હીમાં NDAના બધા ઘટક પક્ષોની બેઠક થવાની છે. તો એ માગ JDU અને TDP સત્તાવાર તરીકે ભાજપની સામે રાખી શકે છે. TDP ભાજપથી જળશક્તિ, શિક્ષણ અને ટ્રાન્સપોર્ટ મંત્રાલય જેવી માગ કરવામાં આવે એવી વકી છે.
1999માં જ્યારે ભૂતપૂર્વ PM અટલ બિહારી વાજપેયીવાળી NDA સરકાર બની, ત્યારે TDPએ સ્પીકરની માગ કરી હતી અને પાર્ટીના GMC બાળયોગીને ભાજપે લોકસભા અધ્યક્ષ બનાવવા પડ્યા હતા.
