નવી દિલ્હીઃ સુપ્રીમ કોર્ટમાં રાજકીય પક્ષો દ્વારા અપાતી રેવડીઓ મુદ્દે એક અરજી દાખલ કરવામાં આવી છે. જેના પર કેન્દ્ર અને ચૂંટણી પંચને નોટિસ પાઠવી છે. આ પિટિશનમાં ચૂંટણી પહેલાં રાજકીય પક્ષો દ્વારા આપવામાં આવતી મફત રેવડીઓનાં વચનોને લાંચ તરીકે જાહેર કરવાની માગ કરવામાં આવી છે.
CJI ડીવાય ચંદ્રચૂડની અધ્યક્ષતાવાળી ખંડપીઠે કેન્દ્ર અને ચૂંટણી પંચને નોટિસ જારી કરી છે અને લાંબા સમયથી પેન્ડિંગની અરજીને એની સાથે જોડી દીધી છે.સુપ્રીમ કોર્ટે આ અરજીને પેન્ડિંગ કેસોમાં જોડી દીધી છે. અરજદાર દલીલ કરે છે કે ચૂંટણી પહેલાં રાજકીય પક્ષો દ્વારા વચન આપવામાં આવતા મફત પર તાત્કાલિક પ્રતિબંધ મૂકવો જોઈએ.
વર્ષ 2022માં ભાજપના નેતા અશ્વિની ઉપાધ્યાય ફ્રીબીઝ સામે PIL લઈને સુપ્રીમ કોર્ટ પહોંચ્યા હતા. તેમની અરજીમાં ઉપાધ્યાયે ચૂંટણીમાં મતદારોને રાજકીય પક્ષો દ્વારા મફત અથવા મફત ભેટોનાં વચનો બંધ કરવાની અપીલ કરી હતી. ચૂંટણી પંચે આવા પક્ષોની માન્યતા રદ કરવી જોઈએ તેવી માગ કરવામાં આવી છે.
આ પહેલાં ભૂતપૂર્વ ચીફ જસ્ટિસ એનવી રમનાની આગેવાની હેઠળની ત્રણ સભ્યોની બેન્ચ દ્વારા ઓગસ્ટ 2022માં ફ્રીબીઝ કેસની સુનાવણી શરૂ કરવામાં આવી હતી. આ બેંચમાં જસ્ટિસ જેકે મહેશ્વરી અને જસ્ટિસ હિમા કોહલી પણ હતા. હવે CJI ડીવાય ચંદ્રચુડ કેસની સુનાવણી કરી રહ્યા છે.
સુપ્રીમ કોર્ટમાં સુનાવણીમાં ચૂંટણી પંચે કહ્યું હતું કે પક્ષો દ્વારા ફ્રીબીઝ પર અપનાવવામાં આવેલી નીતિનું નિયમન કરવું ચૂંટણી પંચની સત્તામાં નથી. ચૂંટણી પહેલાં મફત આપવાનું વચન આપવું કે ચૂંટણી પછી આપવાનું એ રાજકીય પક્ષોનો નિર્ણય છે. આ અંગે નિયમો બનાવ્યા વિના કોઈ પણ પગલાં લેવાથી ચૂંટણી પંચની સત્તાનો દુરુપયોગ થશે. માત્ર કોર્ટે નક્કી કરવું જોઈએ કે ફ્રી સ્કીમ શું છે અને કંઈ નથી. આ પછી અમે તેનો અમલ કરીશું.
