નવી દિલ્હીઃ દિલ્હી પોલીસે ધરણાં-પ્રદર્શનને લઈને નવી ગાઇડલાઇન્સ જાહેર કરી છે. નવા આદેશ હેઠળ જંતર-મંતરને સત્તાવાર પ્રદર્શન સ્થળની યાદીમાંથી દૂર કરવામાં આવ્યું છે. હવે દિલ્હીમાં રામલીલા મેદાન, બુરાડી મેદાન અને પૂર્વ દિલ્હીનું સીબીડ ગ્રાઉન્ડ પ્રદર્શન માટેનાં નિર્ધારિત સ્થળો રહેશે. ગૃહ મંત્રાલયની સમિતિની ભલામણોને આધારે આ ફેરફાર કરવામાં આવ્યો છે.
દિલ્હી પોલીસે સ્ટેન્ડિંગ ઓર્ડર નંબર L&O/48/2026 હેઠળ પ્રદર્શનને લઈને નવી માર્ગદર્શિકા જાહેર કરી છે. ગૃહ મંત્રાલયની સમિતિની ભલામણોને આધારે આ નિર્ણય લેવામાં આવ્યો છે. દિલ્હી પોલીસ કમિશનર અનુરાગકુમારે 11 ઓક્ટોબર, 2026એ જાહેર કરેલા નવા સ્થાયી આદેશ અનુસાર હવે જંતર-મંતર પર કોઈ પણ પ્રકારના પ્રદર્શનની મંજૂરી આપવામાં આવશે નહીં. નોંધનીય છે કે જંતર-મંતર પહેલાં દિલ્હીમાં બોટ ક્લબ સત્તાવાર ધરણાં સ્થળ હતું. ત્યાર બાદ બોટ ક્લબને હટાવીને જંતર-મંતરને સત્તાવાર પ્રદર્શન સ્થળ બનાવવામાં આવ્યું હતું.
Delhi Police has de-notified Jantar Mantar as a designated protest site and designated three new venues for holding protests and demonstrations: Ramlila Ground, Burari Ground and CBD Ground in East Delhi https://t.co/xECwZR5pAo
— IANS (@ians_india) October 12, 2026
પ્રદર્શન માટે ત્રણ નવાં સ્થળો નક્કી
નવા આદેશ હેઠળ રામલીલા મેદાન, બુરાડી મેદાન અને પૂર્વ દિલ્હીના સીબીડ ગ્રાઉન્ડને પ્રદર્શન સ્થળ તરીકે નક્કી કરવામાં આવ્યાં છે. આ સ્થળોએ પ્રદર્શન યોજવા માટેની માનક સંચાલન પ્રક્રિયા (SOP) અને વિગતવાર નિયમો અલગથી જાહેર કરવામાં આવશે.
જૂના આદેશમાં ફેરફાર કરવામાં આવ્યો
દિલ્હી પોલીસનો આ નવો આદેશ 28 એપ્રિલ, 2022એ જાહેર કરવામાં આવેલા જૂના સ્ટેન્ડિંગ ઓર્ડરમાં આંશિક ફેરફાર કરે છે. નવી માર્ગદર્શિકા હેઠળ રાજધાનીમાં ધરણાં-પ્રદર્શન માટે નક્કી કરાયેલાં સ્થળો અને તેમની સાથે જોડાયેલા નિયમોમાં ફેરફાર કરવામાં આવ્યો છે. જંતર-મંતર લાંબા સમયથી દિલ્હીમાં વિરોધ-પ્રદર્શનોનું મુખ્ય કેન્દ્ર રહ્યું છે. જોકે નવા આદેશ બાદ પ્રદર્શનકારીઓએ નિર્ધારિત નવાં સ્થળોએ જ પ્રદર્શન કરવું પડશે.
