નવી દિલ્હીઃ ઇરાન દ્વારા પાકિસ્તાનના બલૂચિસ્તાનમાં કરવામાં આવેલી એરસ્ટ્રાઇક પછી બંને દેશો વચ્ચે ટેન્શનનો માહોલ છે. આ હુમલા પછી પાકિસ્તાને ઇરાનથી પોતાના એમ્બેસેડર બોલાવી લીધા છે. પાકિસ્તાનના કાર્યવાહક વિદેશપ્રધાન જલીલ અબ્બાસ જિલાનીએ ઇરાનના વિદેશપ્રધાન સાથે વાત કરતાં કહ્યું હતું કે કોઈ પણ દેશે આ ખતરનાક રસ્તે ના ચાલવું જોઈએ.
પાકિસ્તાને ગુરુવારે વહેલી સવારે ઈરાનના સિસ્તાન-ઓ-બલુચિસ્તાન પ્રાંત પર હુમલો કર્યો છે. પાકિસ્તાનની આ કાર્યવાહીને ઈરાને કરેલા હુમલાનો જવાબ માનવામાં આવે છે. પાકિસ્તાનના વિદેશ મંત્રાલયે અધિકૃત નિવેદન બહાર પાડીને આ વાતની પુષ્ટિ કરી છે. પાકિસ્તાને આ ઓપરેશનનું નામ ‘માર્ગ બર સરમાચાર’ આપ્યું હતું, પાકિસ્તાનના એક સિનિયર ઇન્ટેલિજન્સ અધિકારીએ તેમને આ માહિતી આપી છે.
પાકિસ્તાને ઈરાનના એક પ્રાંતમાં બલૂચી ઉગ્રવાદીઓને નિશાન બનાવ્યા છે. ઈરાનની સમાચાર એજન્સી મેહરના જણાવ્યા અનુસાર, ઈરાનના સારાવાનના શમસાર પ્રાંતમાં ડ્રોન અને મિસાઇલ હુમલાઓ થયા હોવાની માહિતી છે. એએફપી અનુસાર, હુમલાઓમાં કેટલાક લોકો ઈજાગ્રસ્ત થયા છે. તો રોઇટર્સ અનુસાર ઈરાની મીડિયાનું કહેવું છે કે અહીં ત્રણ મહિલાઓ અને ચાર બાળકોનાં મોત થયાં છે અને તેઓ ઈરાની નાગરિક ન હતા.
ઇરાને પાકિસ્તાનના બલૂચિસ્તાનમાં આતંકવાદી સંગઠન જૈશ-ઉલ-અદલનાં સ્થળો પર એર સ્ટ્રાઇક કરી હતી.આતંકવાદી સંગઠન જૈશ ઉલ- અદલને આર્મી ઓફ જસ્ટિસને નામે પણ ઓળખવામાં આવે છે. વર્ષ 2012માં સ્થાપિત એ સંગઠન એક સુન્ની આતંકવાદી જૂથ છે, જે પાકિસ્તાનથી ઓપરેટ થાય છે. અમેરિકા અને ઇરાન બંને આ સંગઠનને આતંકવાદી સંગઠન જાહેર કર્યું છે. આ સંગઠનમાં 500થી 600 આતંકવાદીઓ છે.
