અમેરિકા: કેલિફોર્નિયાના આર્સેટિયા ખાતે ભારતીય અને નેપાળી સમુદાયના લોકો દ્વારા હોળી-ધૂળેટી પર્વની ધામધૂમપૂર્વક ઉજવણી કરવામાં આવી. જેમાં મોટી સંખ્યામાં લોકો જાડાયા હતા. આ ઉજવણીમાં સ્થાનિક ચૂંટાયેલા પ્રતિનિધિઓએ પણ હાજરી આપી હતી. કાર્યક્રમમાં વિવિધ રમતો રમાઈ અને વિજેતાઓને પુરસ્કાર પણ એનાયત કરાયા હતા.
રંગોના પર્વ ધૂળેટીની ઉજવણી વિશ્વના કોઈપણ ખૂણામાં વસતા ભારતીયો દ્વારા કરવામાં આવતી હોય છે. ઈન્ડો અમેરિકન કલ્ચરલ સોસાયટી ઓફ નોર્થ અમેરિકા મધેશી એસોસિયેશન તેમજ આર્સેટિયા ચેમ્બરના સહયોગથી વાયબ્રન્ટ હોળી ઉત્સવનું આયોજન આર્સેટિયા પાર્ક ખાતે કરવામાં આવ્યું હતું. આ ઉત્સવમાં ભારત અને નેપાળની સંસ્કૃતિની ઝાંખી જોવા મળી હતી. કાર્યક્રમના મુખ્ય આયોજક લેબોન હોસ્પિટાલિટી ગૃપના યોગી પટેલ, I.A.C.S.N.A.ના પરિમલ શાહ તથા દિનેશ શાહ હતા. ઉર્મિલા મેનન, શગુન શ્રેષ્ઠા દ્વારા DJ તેમજ રિધમ, રિયા અને રાજેશ્વરી દ્વારા ગીતો રજૂ થયા હતા. સોનિયા દવે દ્વારા ફેશન શોનું આયોજન કરવામાં આવ્યું હતું. નેનકીંગ ઇન્ડો ચાઈનીઝ રેસ્ટોરન્ટ દ્વારા ભોજનની વ્યવસ્થા કરવામાં આવી હતી.
રફાલી ઈવેન્ટની ફાઈનલ વેલિસ બેકે જીતી હતી. જેમને ૬૦ ઈંચનું ટીવી ભેટમાં અપાયું હતું. ઉત્સવમાં આર્સેટિયાના મેયર, સ્થાનિક પોલીસ અધિકારીઓ, નેપાળના કાઉન્સિલ જનરલ, સ્થાનિક ઉદ્યોગપતિઓની પણ હાજરી હતી.
યોગી પટેલ અને દિનેશ શાહ દ્વારા તમામને રંગો તથા ભોજન પૂરું પાડવામાં આવ્યું હતું. કાર્યક્રમના મીડિયા પાટનર તરીકે શોકોલ ચેનલ હતી. યોગી પટેલે કાર્યક્રમને સફળ બનાવવા બદલ સર્વે ભારતીયો તથા નેપાળી સમુદાયના લોકોનો આભાર વ્યક્ત કર્યા હતો.
