અમદાવાદઃ રાજ્યનાં અનેક ભાગોમાં હાલ વરસાદ વરસી રહ્યો છે, ત્યારે રાજ્યના હવામાન વિભાગ દ્વારા આગામી છ દિવસ સુધી રાજ્યમાં સાર્વત્રિક વરસાદની આગાહી કરવામાં આવી છે. હવામાન વિભાગના જણાવ્યા અનુસાર રાજ્યના લગભગ તમામ જિલ્લાઓમાં હળવાથી મધ્યમ વરસાદ અને ગાજવીજ સાથે વરસાદની સંભાવના છે, જ્યારે દક્ષિણ ગુજરાત અને સૌરાષ્ટ્રના કેટલાક વિસ્તારોમાં ભારેથી અતિ ભારે વરસાદ પડવાની શક્યતા છે.
હવામાન વિભાગ દ્વારા કરવામાં આવેલી આગાહી અનુસાર દક્ષિણ ગુજરાતના તમામ જિલ્લા અને સૌરાષ્ટ્રના ભાવનગર, અમરેલી અને ગીર સોમનાથ જિલ્લામાં યલો એલર્ટ આપવામાં આવ્યું છે. આગામી બે દિવસ સુધી રાજ્યમાં હળવાથી મધ્યમ વરસાદની આગાહી કરવામાં આવી છે. ઉત્તર ગુજરાત, દક્ષિણ ગુજરાત અને સૌરાષ્ટ્ર-કચ્છમાં છૂટાછવાયાં સ્થળોએ ભારે વરસાદ પણ પડી શકે છે.
હવામાન વિભાગ દ્વારા આગામી 25 જૂન સુધી રાજ્યમાં ભારેથી અતિ ભારે વરસાદ થવાની સંભાવના વ્યક્ત કરી છે. હવામાન વિભાગ અનુસાર નવસારી, ડાંગ અને વલસાડમાં અત્યંત ભારે જ્યારે મહીસાગર, દાહોદ અને સુરતમાં અતિ ભારે વરસાદ થઇ શકે છે. અમદાવાદ અને ગાંધીનગરમાં આજે ભારે વરસાદની શક્યતા છે.
આ સાથે ભરૂચ, સુરત, તાપી, નવસારી, ડાંગ અને વલસાડ જિલ્લામાં ભારે વરસાદની શક્યતા છે. આ ઉપરાંત સુરેન્દ્રનગર, અમદાવાદ, બોટાદ, અમરેલી, ભાવનગર, ગીર સોમનાથ, જૂનાગઢ, પોરબંદર, દેવભૂમિ દ્વારકા મહેસાણા, પાટણ, બનાસકાંઠા, વડોદરા સહિત અન્ય જિલ્લાઓમાં હળવોથી મધ્યમ વરસાદ થઇ શકે છે, જ્યારે બનાસકાંઠા, સાબરકાંઠા, નવસારી, ડાંગ અને વલસાડ જિલ્લામાં ભારે વરસાદ થઇ શકે છે.
