મુંબઈઃ આમિર ખાન અભિનીત અને નિર્મિત ‘લાલસિંહ ચઢ્ઢા’નો બહિષ્કાર કરવાની હાકલ કર્યા બાદ ઈન્ટરનેટ યૂઝર્સ હવે આલિયા ભટ્ટ અભિનીત અને નિર્મિત થ્રિલર ફિલ્મ ‘ડાર્લિંગ્સ’ પર રોષે ભરાયા છે. આ ફિલ્મને આજે નેટફ્લિક્સ પર સ્ટ્રીમ કરવામાં આવી છે. આ ફિલ્મના નિર્માણમાં શાહરૂખ ખાનની કંપની રેડ ચિલીઝ એન્ટરટેનમેન્ટ પણ જોડાઈ છે. આ ફિલ્મમાં આલિયા ઉપરાંત શેફાલી શાહ, રોશન મેથ્યૂ અને વિજય વર્મા પણ મહત્ત્વની ભૂમિકામાં છે.
‘ડાર્લિંગ્સ’ ફિલ્મ પર નેટિઝન્સનાં ભડકવા પાછળનું કારણ એ છે કે એમનું માનવું છે કે આ ફિલ્મ દ્વારા આલિયા ઘરેલુ હિંસાના દૂષણને ઉત્તેજન આપી રહી છે. એટલે નેટીઝન્સ ‘બોયકોટઆલિયાભટ્ટ’ અને ‘બોયકોટડાર્લિંગ્સ’ હેશટેગ દ્વારા એમની ઝુંબેશ ચલાવી રહ્યાં છે. આ ફિલ્મમાં આલિયા બદરુનિસા નામની યુવતીનો રોલ કરી રહી છે જે ઘરેલુ હિંસાનો ભોગ બને છે. બાદમાં એ તેની પર અત્યાચાર કરનાર એનાં પતિ હમઝા (વિજય વર્મા) પર એ પ્રકારનો જ બદલો લે છે. આ ફિલ્મનાં નિર્દેશિકા છે જસમીત કે. રીન. એમણે ઘરેલુ હિંસાનો સંવેદનશીલ વિષય પસંદ કર્યો છે.
