અમેરિકા: લોસ એન્જલસમાં ઈમિગ્રેશનના કાયદાઓ વિરુદ્ધ હિંસક દેખાવો થઈ રહ્યા છે. જે બાદ ડોનાલ્ડ ટ્રમ્પે બે હજાર નેશનલ ગાર્ડ્સ તૈનાત કરવાના આદેશ આપ્યા હતા. જો કે આ પગલા બદલ અમેરિકાના રાષ્ટ્ર પ્રમુખ સામે જ કેસ કરી દેવાયો છે. રાજ્યના ગવર્નરનું કહેવું છે કે કાયદો વ્યવસ્થા સંભાળવામાં તેઓ સક્ષમ છે અને ટ્રમ્પે તેમાં દખલ આપવાની જરૂર નથી.
કેમ કરાયો કેસ?
કેલિફોર્નિયાના અધિકારીઓ નેશનલ ગાર્ડ્સ તૈનાત કરવાના નિર્ણયનો વિરોધ કરી રહ્યા છે. રાજ્યના અધિકારીઓ કહી રહ્યા છે કે નેશનલ ગાર્ડ તૈનાત કરવાનો નિર્ણય ગેરકાયદેસર છે અને તેના કારણે જ પરિસ્થિતિ વધુ તનાવપૂર્ણ બની રહી છે. કેલિફોર્નિયાના એટોર્ની જનરલ રોબ બોનટાએ સોમવારે કેસની જાણકારી આપતા કહ્યું, કે ‘ડોનાલ્ડ ટ્રમ્પે તમામ હદો પાર કરી દીધી છે. તેમણે ગવર્નર ગેવિન ન્યૂસમની સંમતિ વિના જ સૈનિક તૈનાત કરવાના આદેશ આપ્યા. રાષ્ટ્ર પ્રમુખ જાણી જોઈને દેશમાં અરાજકતા અને સંકટ પેદા કરી રહ્યા છે જેથી પોતાના રાજકીય હિત મેળવી શકે.’
કેસમાં કહેવામાં આવ્યું છે કે અમેરિકામાં કોઈ વિશેષ પરિસ્થિતિમાં જ રાષ્ટ્ર પ્રમુખને સૈનિક મોકલવાનો અધિકાર છે. એવો કોઈ વિદેશી હુમલો કે અમેરિકન સરકાર સામે બળવો હાલ નથી થઈ રહ્યો. જેથી ટ્રમ્પે સૈનિકો મોકલવાનો આદેશ આપી કાયદાનો દુરુપયોગ કર્યો છે.
ગવર્નરે કહ્યું- ટ્રમ્પ આગમાં ઘી નાંખી રહ્યા છે
કેલિફોર્નિયાના ગવર્નર ન્યૂસમે ટ્રમ્પ સરકારને પત્ર લખી સૈનિકો હટાવવાની માગ કરી છે. તેમણે કહ્યું છે કે, લોસ એન્જલસમાં નેશનલ ગાર્ડ્સની કોઈ જરૂર નથી. સૈનિકો મોકલવા એ રાજ્યની સંપ્રભુતાનું ઉલ્લંઘન છે. એવું લાગે છે કે પરિસ્થિતિ વધુ ખરાબ કરવા માટે જાણી જોઈને આ નિર્ણય લેવામાં આવ્યો છે.’
બીજી તરફ વિરોધ છતાં ટ્રમ્પ પાછળ હટવા તૈયાર નથી. પેન્ટાગને તો ત્યાં સુધી કહ્યું છે કે જરૂર પડી તો હજુ સૈનિકો મોકલીશું.
