ગડકરીએ મુંબઈમાં લોન્ચ કરી દેશની પ્રથમ ઈલેક્ટ્રિક ડબલ-ડેકર AC બસ
ભારતની પહેલી ઈલેક્ટ્રિક એરકન્ડિશન્ડ ડબલ-ડેકર બસનું કેન્દ્રીય રોડ ટ્રાન્સપોર્ટ અને હાઈવેઝ ખાતાના પ્રધાન નીતિન ગડકરીએ 18 ઓગસ્ટ, ગુરુવારે મુંંબઈમાં યશવંતરાવ ચવાણ સેન્ટર ખાતે અનાવરણ કર્યું હતું. એ પ્રસંગે હિન્દુજા ગ્રુપની કંપનીઓના ચેરમેન અશોક હિન્દુજા, અશોક લેલેન્ડ કંપનીના ડાયરેક્ટર શોમ હિન્દુજા અને સ્વિચ મોબિલિટી કંપનીના સીઈઓ મહેશ બાબુ ઉપસ્થિત રહ્યા હતા. મુંબઈમાં આ બસ જાહેર જનતા માટે આવતા સપ્ટેમ્બરમાં સેવામાં ઉતારવામાં આવશે. મુંબઈમાં સ્વિચને 200 ઈલેક્ટ્રિક ડબલ ડેકર બસોનો ઓર્ડર મળ્યો હોવાનું કહેવાય છે. આ બસ મુંબઈ મહાનગરપાલિકા સંચાલિત બેસ્ટ કંપનીના કાફલામાં સામેલ કરવામાં આવશે.
સ્વિચ મોબિલિટી હિન્દુ ગ્રુપની અશોક લેલેન્ડ કંપનીનું ઈલેક્ટ્રિક વેહિકલ ડિવિઝન છે. આ કંપની બ્રિટનમાં ટ્વિન-ફ્લોર ઈલેક્ટ્રિક એસી બસનું સંચાલન કરે છે.
ઈલેક્ટ્રિક એસી ડબલ ડેકર બસ એક વાર ચાર્જ કરાયા બાદ 250 કિ.મી.નું અંતર પસાર કરે છે.
આ બસમાં 65 પ્રવાસીઓને બેસવાની ક્ષમતા છે. બસોનું બુકિંગ એપ્લિકેશન મારફત કરવામાં આવશે.
ગડકરી હવાનું પ્રદૂષણ ઘટાડવા માટે દેશમાં પરંપરાગત ઈંધણને બદલે વધુ ને વધુ ઈલેક્ટ્રિક વાહનોના વપરાશના હિમાયતી રહ્યા છે.
(તસવીરોઃ દીપક ધુરી) 
