કાબુલ- અફઘાનિસ્તાને પાડોશી દેશ પાકિસ્તાનને એ વાતના પુરાવા સોંપ્યા છે કે, હાલમાં અફઘાનિસ્તાનમાં કરવામાં આવેલા અનેક આતંકી હુમલાઓમાં આતંકવાદીઓને પાકિસ્તાનમાં તાલીમ આપવામાં આવી હતી. અફઘાનિસ્તાને પાકિસ્તાનને એ પણ પુરાવા આપ્યા છે કે, તાલિબાની નેતાઓ પાકિસ્તાનમાં જાહેરમાં કોઈપણ રોકટોક વગર ફરી રહ્યાં છે.
આ અંગેની માહિતી આપતાં અફઘાનિસ્તાનના ગૃહપ્રધાને કહ્યું કે, પાકિસ્તાનની રાજધાની ઈસ્લામાબાદમાં યોજાયેલી એક બેઠકમાં અફઘાનિસ્તાને પુરાવાઓ રજૂ કર્યા હતાં. આ બેઠકમાં અફઘાનિસ્તાનના જાસુસી વિભાગના પ્રમુખ અને પાકિસ્તાનના સૈન્ય અધિકારી અને જાસુસી વિભાગના અધિકારી પણ હાજર રહ્યાં હતાં.
અફઘાનિસ્તાનના નેતાએ કહ્યું કે, અમે પુરાવાઓ રજૂ કર્યા છે. હવે એ જવાબદારી પાકિસ્તાનની બને છે કે, ભવિષ્યમાં પાકિસ્તાન આ પ્રકારના હુમલાઓ થતાં અટકાવે. પાકિસ્તાન તરફથી હજી સુધી આ અંગે કોઈ ટિપ્પણી કરવામાં આવી નથી. ઘટના અંગે તપાસ કરવા પાકિસ્તાનનું એક પ્રતિનિધિ મંડળ શનિવારે કાબુલ જશે.
આપને જણાવી દઈએ કે, હાલમાં જ કાબુલમાં તબક્કાવાર રીતે આતંકી હુમલા કરવામાં આવ્યા હતા. આ હુમલાઓમાં 100થી વધુ લોકોએ જીવ ગુમાવ્યો હતો. આ હુમલાની જવાબદારી આતંકી સંગઠન તાલિબાન અને ISએ લીધી હતી. આ ઉપરાંત કાબુલની હોટલ ઈન્ટરકોન્ટિનેન્ટલ ઉપર પણ આતંકી હુમલો કરવામાં આવ્યો હતો.
