વડોદરા – આ જિલ્લા-શહેરના દુમડ ગામ નજીક એક મુખ્ય માર્ગ પર એક કારને અકસ્માત નડ્યો હતો. સામાન્ય રીતે અકસ્માતને કારણે વાતાવરણ ગંભીર બની જાય, પણ આ ઘટના સર્જાતાં લોકોને મજા પડી ગઈ હતી.
વાત એમ છે કે એ કારમાં ગેરકાયદેસર રીતે દારૂ લઈ જવામાં આવતો હતો અને કારને અકસ્માત નડતાં બીયરના કેન્સ રસ્તા પર આવી પડ્યા હતા.
ગામવાસીઓને આની ખબર પડતાં જ તેઓ દોડતાં ત્યાં પહોંચ્યા હતા અને બીયરના કેન્સની લૂંટફાટ મચાવી દીધી હતી. જેટલા હાથમાં આવ્યા એટલા કેન્સ ઉપાડીને લોકો ભાગ્યા હતા.
ઉલ્લેખનીય છે કે ગુજરાતમાં દારૂબંધી છે.
ઉક્ત ઘટનાવાળી કારમાં બીયરનાં કાર્ટન્સ રાખવામાં આવ્યા હતા, જે કોઈક સ્થળે ગેરકાયદેસર રીતે સપ્લાય કરવામાં આવી રહ્યા હતા. અકસ્માત થતાં જ બધા કાર્ટન્સ ફાટ્યા હતા અને એમાં રાખેલી બીયરનાં કેન્સ રસ્તા પર આવી પડ્યા હતા.
