Cooking Tips

પાતરાં

0

પાતરાં બનાવવા એટલે બહુ મહેનત માગી લેનારું કામ છે. પણ જો જો, ઘરમાં બનાવેલાં પાતરાંનો સ્વાદ તો ઘરનાં સભ્યોને દાઢે વળગશે!

સામગ્રીઃ

  • 10-12 અળવીનાં પાન
  • 2 કપ ચણાનો લોટ
  • ½ કપ ચોખાનો લોટ
  • 1 ટે.સ્પૂન આદુ-મરચાંની પેસ્ટ
  • ¼  ટી.સ્પૂન હળદર
  • 1 ટે.સ્પૂન લાલ મરચાં પાવડર
  • 2 ટે.સ્પૂન ધાણાંજીરૂં પાવડર
  • ખમણેલો ગોળ 2 ટે.સ્પૂન
  • આમલીનો પલ્પ (ગર) 2 ટે.સ્પૂન (આમલીના બદલે લીંબુ વાપરી શકો છો)
  • ચપટી હીંગ
  • મીઠું સ્વાદ પ્રમાણે
  • ½ ટી.સ્પૂન અજમો
  • 1 ટી.સ્પૂન જીરૂં
  • 1 ટી.સ્પૂન આખી મેથીનાં દાણાં
    વઘાર માટેઃ
  • રાઈ 1 ટી.સ્પૂન
  • તલ 2 ટી.સ્પૂન
  • ખમણેલું નાળિયેર ટે.સ્પૂ
  • ઝીણી સમારેલી કોથમીર 1 ટે.સ્પૂન
  • 2 ટે.સ્પૂન તેલ

રીતઃ સહુ પ્રથમ અળવીનાં પાન ધોઈને કોરાં કરી લો. અને પાનની પાછળનાં ભાગમાં આવેલી નસો ચપ્પૂ વડે કાઢી લો. પાનને એક બાજુએ મૂકી રાખો.

1 ટી.સ્પૂન જીરૂં અને 1 ટી.સ્પૂન આખી મેથીનાં દાણાંને તવામાં હલકાં ગુલાબી રંગના થાય ત્યાં સુધી શેકી લો. અને એને નીચે ઉતારીને બારીક પાવડર બનાવી લો.

હવે એક મોટા બાઉલમાં ચણાંનો લોટ તેમજ ચોખાનો લોટ લો. એમાં બાકીની સામગ્રી ઉમેરી લો. થોડું પાણી ઉમેરીને એકદમ જાડું ખીરૂં (પાન ઉપર ચોપડતી વખતે નીચે ના પડે એવું) બનાવી લો.

પાતરાંના પાનમાંથી એક એક પાન લેતાં જાવ. પહેલું પાન સૌથી મોટું લઈ, એનો અણીવાળો ભાગ તમારી તરફ રાખો. તેમજ પાનનો લીસો ભાગ નીચે તરફ રાખવો. આ નસ કાઢેલાં ભાગ ઉપર ખીરૂં ચોપડો. બીજું પાન થોડું નાનું લો. એનો પણ લીસો ભાગ નીચે તરફ રાખો. અને પહેલાં પાનની વિરુદ્ધ દિશામાં એનો અણીવાળો ભાગ ગોઠવો. એના ઉપર પણ ખીરૂં ચોપડી લો.

આ જ રીતે 6 થી 7 પાન ગોઠવાઈ જાય એટલે ગોઠવેલાં પાનની ડાબી બાજુએથી એક ઈંચ જેટલો ભાગ ફોલ્ડ કરી દો. એની ઉપર ખીરૂં ચોપડી લો. ત્યારબાદ જમણી બાજુ પણ ફોલ્ડ કરી એની ઉપર ખીરૂં ચોપડી લો. હવે ઉપરના ભાગેથી પાન ફોલ્ડ કરીને ઘટ્ટ રોલ વાળી લો. બાકીના રોલ પણ આ જ રીતે તૈયાર કરો.

સ્ટીમરમાં (ઢોકળાં બાફવાનું વાસણ), તેલ ચોપડેલી થાળીમાં બધાં રોલ ગોઠવી લો. વાસણ ઢાંકીને 20-25 મિનિટ ગેસ ઉપર ગરમ કરવા મૂકો. ત્યારબાદ રોલને સ્ટીમરમાંથી કાઢી એમાંથી અડધો ઈંચનાં ટુકડાં કરી લો.

એક કઢાઈમાં વઘાર માટે તેલ ગરમ મૂકીને રાઈનો વઘાર કરો. રાઈ તતડે એટલે તલ ધીરેથી નાંખી દો. (તલ નાખતી વખતે ગેસની આંચ ધીમી રાખવી અને કઢાઈ અડધી ઢાંકવી. કેમ કે ગરમ તેલમાં તલ નાંખતાં એ ચારે બાજુ ઊડે છે. જેથી દાઝવાનો ભય રહેલો છે.) એમાં પાતરાંનાં ટુકડાં નાખીને હલાવી લો. 2-3 મિનિટ બાદ કઢાઈ નીચે ઉતારી, એની ઉપર કોથમીર અને કોપરાંની છીણ ભભરાવી દો.

પાતરાં તીખી-મીઠી ચટણી સાથે પીરસો.

બ્રેડ ઉપમા

0

ઓહ, આ વરસાદ… કોઈ વસ્તુ લેવા દુકાને જવું હોય તો કંટાળો આવે છે નહિં?  પણ બ્રેડ-બટર તો મોટાભાગે ઘરમાં હોય જ છે. તો ચાલો, બનાવીએ બ્રેડનો ઉપમા!!!

 

 

સામગ્રીઃ 4-5 બ્રેડ સ્લાઈસ 1 ઈંચ ચોરસ ટુકડામાં કટ કરેલી, 1 નાનો કાંદો, 2 ટમેટાં, 2  ટે.સ્પૂન તેલ, ½ ટી.સ્પૂન રાઈ, ½ ટી.સ્પૂન જીરૂ, ચપટી હીંગ, 2 લીલાં મરચાં, 1 ઈંચ આદુનો ટુકડો, મીઠું સ્વાદાનુસાર, ¼ ટી.સ્પૂન હળદર પાવડર, ¼ ટી.સ્પૂન લાલ મરચાં પાવડર, ¼ ટી.સ્પૂન ગરમ મસાલો, અડધો કપ ઝીણી સમારેલી કોથમીર, 4-5 કળીપત્તાંના પાન

 

રીતઃ કાંદો, ટમેટાં, આદુ તેમજ મરચાં અલગ-અલગ ઝીણાં સમારી લો. એક કઢાઈમાં તેલ ગરમ કરી રાઈનો વઘાર કરો. રાઈ ફુટે એટલે જીરૂં ઉમેરી દો. જીરૂં લાલ થાય એટલે હીંગ તેમજ કળીપત્તાંના પાન નાખીને સમારેલાં આદુ-મરચાં વઘારમાં નાખો. 2-3 મિનિટ સાંતળી લીધાં બાદ કાંદો નાખીને સાંતડો. હલકો ગુલાબી સાંતળીને એમાં ટમેટાં ઉમેરી દો.

હવે ટમેટાં નરમ થઈ ઓગળે એટલે બધાં સૂકા મસાલા ઉમેરી દો. અને થોડીવાર મિશ્રણને ઢાંકીને 2-3 મિનિટ માટે ગેસની આંચ ધીમી રાખીને મૂકો. આ મિશ્રણ સાવ સૂકું ના કરવું. હવે એમાં બ્રેડના ટુકડા ઉમેરી દો અને ધીમીથી મધ્યમ આંચે ફેરવતાં રહો. 5 મિનિટ બાદ કોથમીર ભભરાવીને ગેસ બંધ કરી દો. અને કઢાઈ નીચે ઉતારી લો.

આ ઉપમાને વધુ હેલ્ધી બનાવવા તમે બાફેલી કોર્ન અથવા ફણગાવેલા કઠોળ બાફીને ઉમેરી શકો છો.

રવાના ગુલાબજાંબુ

0

આપણે રવાનો શીરો તો બનાવીએ જ છીએ, પણ આજે રવાના ગુલાબજાંબુ બનાવીશું….કેવો છે આ આઈડિયા ગુલાબજાંબુ બનાવવાનો?… રવિવાર માટે સ્વીટ ડીશની વેરાયટી મળી ગઈ ને…?

સામગ્રીઃ

  • 1 કપ ઝીણો રવો
  • 2 કપ દૂધ
  • 1½ ટે.સ્પૂન ઘી
  • 3 ટે.સ્પૂન મિલ્ક પાઉડર
  • 2 કપ સાકર
  • 1½ કપ પાણી
  • ¼ ટી.સ્પૂન એલચી પાવડર

રીતઃ સૌ પ્રથમ એક કઢાઈમાં રવો હલકો ગુલાબી રંગનો થાય ત્યાં સુધી શેકી લો .  ત્યારબાદ ગરમ કરેલું દૂધ એમાં ઉમેરી દો. અને તવેથાથી હલાવતાં રહો. એમાં ગઠ્ઠાં ના થવા જોઈએ. જેવું મિશ્રણ ઘટ્ટ થવા માંડે એટલે એમાં ઘી ઉમેરી દો અને હલાવતાં રહો. મિશ્રણ કઢાઈમાં લીસું થવા માંડે, એટલે કે કઢાઈના કિનારા છોડવા માંડીને વચ્ચે જમા થવા માંડે એટલે ગેસ બંધ કરી દો. મિશ્રણને બીજા વાસણમાં કાઢી લો અને ઠંડું થવા દો.

મિશ્રણ ઠંડું થાય ત્યાં સુધીમાં ચાસણી બનાવી લો. એ માટે ગેસ ઉપર એક વાસણમાં સાકર તેમજ પાણી મિક્સ કરીને એક તારની ચાસણી બનાવી લો. અથવા ચાસણીનું એક ટીપું બે આંગળી વચ્ચે સ્ટીકી થાય એવું મિશ્રણ તૈયાર થાય એટલે ગેસ પરથી ઉતારી લો.

રવાનું મિશ્રણ ઠંડું થયા બાદ એમાં મિલ્ક પાઉડર મિક્સ કરીને પાંચ મિનિટ સુધી લોટને લીસો થાય ત્યાં સુધી કુણી લો. એમાં થોડું ઘી ઉમેરીને ફરીથી લીસો બનાવો. અને થોડું થોડું મિશ્રણ લઈ ટાઈટ હાથે ગોળા વાળી લો.

ગેસ ઉપર કઢાઈમાં ઘી ગરમ કરવા મૂકો. ઘી ગરમ થાય એટલે ગેસની આંચ ધીમી કરીને થોડાં થોડાં ગોળા વાળતાં જવું અને ઘીમાં નાખીને તળી લો (ગોળાને હલાવતાં રહેવું). આ તળેલાં ગોળા ચાસણીમાં નાખી દો. અને ગેસ ઉપર ચાસણીને ગરમ કરવા મૂકો. એક ઉભરો આવે એટલે ગેસ બંધ કરીને વાસણ ઢાંકીને અડધો કલાક રહેવા દો. અડધા કલાક બાદ ગુલાબજાંબુ ફુલી જશે. હવે તમે ગુલાબજાંબુ ખાવામાં લઈ શકો છો.

રીંગણાની કાતરી

0

ઓછા તેલમાં બનતાં રીંગણાના આ શાકની સરખામણીએ બીજાં શાક તો સાવ ફીક્કાં લાગે.

સામગ્રીઃ

  • 1 ઓળા માટેનું મોટું રીંગણ (વજન આશરે 400-500 ગ્રામ)
  • 2 કપ ચણાનો લોટ
  • ¼ ટી.સ્પૂન હળદર
  • કોથમીર – 2-3 ટે.સ્પૂન
  • આદુ-મરચાંની પેસ્ટ ½ ટે.સ્પૂન
  • મીઠું સ્વાદાનુસાર, ચપટી હીંગ
  • ધાણાજીરૂં પાવડર 1 ટી.સ્પૂન
  • મરચાં પાવડર ½ ટી.સ્પૂન
  • ગરમ મસાલો ¼ ટી.સ્પૂન
  • આમચૂર પાવડર ¼ ટી.સ્પૂન
  • તેલ સાંતડવા માટે 3-5 ટે.સ્પૂન

રીતઃ  એક થાળીમાં ચણાનો લોટ તેમજ તેલ સિવાયનો બધો મસાલો મિક્સ કરી લો.

હવે રીંગણને ધોઈને ½  સેંમી. જાડાઈની ગોળ સ્લાઈસમાં કટ કરી લો. એક એક સ્લાઈસ લઈ તેની બંને બાજુએ મસાલાનું મિશ્રણ ચોપડી લો. ગેસ ધીમી આંચે રાખી એની ઉપર ફ્રાઈપેનમાં થોડું તેલ નાંખીને પેનમાં આવે એટલી સ્લાઈસ ગોઠવી દો. ધીમી તેમજ મધ્યમ આંચે રીંગણાની કાતરી સાંતડો.

કાતરીની એક સાઈડ સંતડાય એટલે તવેથા તેમજ ચપ્પૂની મદદથી કાતરી ઉથલાવો. અને બીજી બાજુ સંતડાવા દો. કાતરી ગોલ્ડન બ્રાઉન રંગની થાય તેમજ થોડી નરમ થાય એટલે ગેસ બંધ કરી દો. અને બધી કાતરી પ્લેટમાં ગોઠવી દો.

આલુ ટિક્કી ચાટ

0

સામગ્રીઃ  

  • 5-6 બટેટા બાફેલાં
  • કોર્નફ્લોર 50 ગ્રામ
  • પનીર 100 ગ્રામ
  • 2-3 લીલાં મરચાં ઝીણાં સુધારેલાં
  • મીઠું સ્વાદ મુજબ
  • 1 ઈંચ આદુ ખમણેલું
  • 2 ચમચી કિસમિસ
  • લાલ મરચાં પાવડર 1 ચમચી
  • ચાટ મસાલો 1 ચમચી
  • ઝીણી સમારેલી કોથમીર ½ કપ
  • કોથમીર ચટણી
  • મીઠી ખજૂરની ચટણી
  • દહીં
  • શેકેલા જીરાનો પાવડર
  • ચણાના લોટની ઝીણી સેવ

રીતઃ બાફેલાં બટેટાને છૂંદીને અથવા ખમણીને પલ્પ બનાવી લો. મીઠું સ્વાદાનુસાર મિક્સ કરી લો. આ મિશ્રણને બાજુએ રાખી મૂકો.

પનીરને બારીક ખમણી લો. એક ફ્રાઈ પેનમાં 1 ચમચી તેલ ગરમ કરી એમાં આદુ, મરચાં, કોથમીર 1 મિનિટ માટે સાંતળી લો. ત્યારબાદ એમાં પનીર, કિસમિસ તેમજ મીઠું  સ્વાદ પ્રમાણે નાખી મિક્સ કરી પેન નીચે ઉતારી લો.

તેલવાળો હાથ કરી બટેટાના મિશ્રણમાંથી થોડું મિશ્રણ લઈ એનો ચપટો ગોળો વાળી એમાં 1 ચમચી જેટલું પનીરનું મિશ્રણ ભરીને ગોળાને બંધ કરી દો. અને થોડા ચપટાં ગોળા વાળી દો.

નોનસ્ટીક ફ્રાઈ પેનમાં 3-4 ચમચાં તેલ રેડી ગરમ થાય એટલે આલૂ ટિક્કી કોર્નફ્લોરમાં રગદોળીને એમાં ગોઠવી દો. ગેસ મધ્યમ ધીમી આંચે રાખો. વચલી ટિક્કી ગોલ્ડન બ્રાઉન થાય એટલે એને ફ્રાઈ પેનના કિનારે ગોઠવી દો. આ જ રીતે બધી ટિક્કી શેકી લો. વચ્ચે વચ્ચે તવેથાથી બે થી ત્રણવાર ઉથલાવવી. ક્રિસ્પી થાય ત્યાં સુધી ધીમે આંચે થવા દો.

પીરસતી વખતે પ્લેટમાં ટિક્કી ગોઠવીને એના પર અનુક્રમે પહેલાં દહીં, પછી તીખી તેમજ મીઠી ચટણી રેડો. ત્યારબાદ એના પર મરચાંની ભૂકી તેમજ ચાટ મસાલો છાંટો તેમજ ચણાના લોટની સેવ અને ઝીણી સમારેલી કોથમીર ભભરાવો.

ખજૂર-ટમેટાંની ચટણી

0

સામગ્રીઃ 100 ગ્રામ ખજૂર, 2-3 ટમેટાં, ½ ટી.સ્પૂન વરિયાળી, ½ ટી.સ્પૂન જીરૂં, ½ ટી.સ્પૂન રાઈ, 2 નંગ લવિંગ, 2 લાલ સૂકા મરચાં, ½ ટી.સ્પૂન મરચાં પાવડર, ચપટી હિંગ, 1 કપ ગોળ, 2 ટે.સ્પૂન ઝીણી સમારેલી કોથમીર, મીઠું સ્વાદાનુસાર, 3 ટી.સ્પૂન  તેલ

રીતઃ એક કઢાઈમાં 1 ટી.સ્પૂન તેલ ગરમ કરી તેમાં રાઈ, વરિયાળી, જીરૂં, સૂકા મરચાં તેમજ લવિંગ સાંતળી લો. આ મિશ્રણ ઠંડું કરીને મિક્સીમાં પીસી લો અને એકબાજુ મૂકી રાખો.. એ જ કઢાઈમાં તેલ ગરમ કરી હિંગ નાખી ખજૂર તેમજ ટમેટાંને ઝીણાં સુધારીને ઉમેરી દો. થોડીવાર સાંતળીને એમાં મરચાં પાવડર, મીઠું તેમજ સમારેલો ગોળ નાખી હલાવો (ગોળ તમે સ્વાદ મુજબ લઈ શકો છો). 2-3 મિનિટ બાદ 2 કપ પાણી નાખીને ખજૂર તેમજ ટમેટાં ધીમી આંચે ચડવા દો. પાણી સૂકાય એટલે મેશ કરી લો. અને ગ્રાઈન્ડ કરેલો મસાલો તેમજ ઝીણી સમારેલી કોથમીર ઉમેરી 1-2 મિનિટ બાદ ગેસ પરથી ઉતારી લો.

Tomato Dates Chutney

વેજ બ્રેડ મંચુરીયન

0

મંચુરીયન માટે સામગ્રીઃ 3 બ્રેડની સ્લાઈસ, 1 કપ ખમણેલી કોબી, ગાજર ½ કપ ખમણેલું, મરચાં પાવડર ½ ટે.સ્પૂન,  આદુ-લસણની પેસ્ટ ½  ટે.સ્પૂન, કોર્ન ફ્લોર ½ કપ, મીઠું સ્વાદ પ્રમાણે, 2 ટે.સ્પૂન પાણી

મસાલા માટે સામગ્રીઃ 3 ટી.સ્પૂન તેલ, 3-4 લસણ ઝીણી સમારેલી, 1 લીલું મરચું સ્લાઈસ કરેલું, 2 ટે.સ્પૂન ઝીણો સમારેલો કાંદો, 2 ટે.સ્પૂન લીલો કાંદો ઝીણો સમારેલો, 1 સિમલા મરચું સ્લાઈસમાં સુધારેલું, 2 ટે.સ્પૂન ટોમેટો સોસ, 1 ટી.સ્પૂન ચીલી સોસ, 1 ટે.સ્પૂન વિનેગર, 1 ટે.સ્પૂન સોયા સોસ, ¼ ટી.સ્પૂન મરી પાવડર, 1 ટી.સ્પૂન કોર્ન ફ્લોર ½ કપ પાણીમાં મેળવેલું

મંચુરીયન બનાવવાની રીતઃ  બ્રેડને મિક્સીમાં પીસીને ક્રમ્સ બનાવી લો. એમાં ખમણેલાં કોબી, ગાજર, આદુ-લસણની પેસ્ટ, મીઠું, મરચાં પાવડર, કોર્ન ફ્લોર ઉમેરીને થોડું પાણી નાખીને લોટ બાંધી લો. હવે એમાંથી નાનાં ગોળા વાળીને તળીને એકબાજુએ મૂકી દો.

હવે એક કઢાઈમાં તેલ લઈ લસણ અને લીલું મરચું સાંતડી લો. ત્યારબાદ એમાં ઝીણાં સમારેલાં કાંદા, લીલા કાંદા તેમજ સિમલા મરચું કાચું-પાકું સાંતડી લો (થોડાં લીલા કાંદા બાકી રાખો). તેમજ તેમાં બધાં સોસ અને મીઠું તથા મરી પાવડર ઉમેરીને 2-3 મિનિટ સાંતળો, પાણી મેળવેલું કોર્ન ફ્લોર એમાં ઉમેરીને ઘાટું થાય એટલું સાંતળી લો અને એમાં તળેલાં મંચુરીયન તેમજ બાકી રાખેલાં લીલાં કાંદા ઉમેરીને સરખું મિક્સ કરીને ઉતારી લો.

Veg. Bread Manchurian

આંબાની ઈન્સ્ટન્ટ બરફી

0

સામગ્રીઃ 2-3 હાફુસ અથવા કેસર કેરી, ½ કપ ખાંડ, 1 ટી.સ્પૂન ઘી, 1 ટે.સ્પૂન દળેલી ખાંડ, ¼ ચમચી એલચી પાવડર

રીતઃ કેરીનો રસ ચારણીમાં ગાળી લો. એક જાડા તળિયાવાળી કઢાઈમાં 1 ટી.સ્પૂન ઘી ગરમ કરી રસને નાખી હલાવતા રહો. રસમાં એક ઉભરો આવે એટલે ખાંડ નાખી હલાવતા રહો. રસ જાડો થઈ જામવા માંડે એટલે ગેસ પરથી ઉતારી લો. આ મિશ્રણ ઠંડું થાય એટલે દળેલી ખાંડ તેમજ એલચી પાવડર નાખી મિક્સ કરી દો. અને એક ઘી ચોપડેલી થાળીમાં એકસરખું પાથરી દો. અને ચોસલા પાડી દો. એક-બે કલાક બાદ બરફી તૈયાર થાય એટલે ડબ્બામાં ભરી લેવી.

ફરાળી માલપૂઆ

0

સામગ્રીઃ  માવો 150 ગ્રામ, શિંગોળાનો લોટ 100 ગ્રામ, સાકર 200 ગ્રામ, દૂધ 1 કપ, પિસ્તા 8-10 નંગ, એલચી પાવડર ½  ચમચી, ઘી તળવા માટે

રીતઃ માવો દૂધમાં નાખીને બ્લેન્ડર અથવા મિક્સીમાં બારીક પીસી લો. હવે એમાં શિંગોળાનો લોટ અને થોડો એલચી પાવડર તેમજ દૂધ ઉમેરીને ખીરૂં તૈયાર કરી લો. આ ખીરૂં અડધો કલાક રહેવા દો.

બીજી બાજુ સાકરની એક તારની ચાસણી બનાવી લો. 1 કપ સાકરમાં ½ કપ પાણી ઉમેરી મિશ્રણ ગરમ કરવા મૂકો. મિશ્રણ ઉકળે એટલે ચમચાથી મિશ્રણનું ટીપું એક ડીશમાં પાડીને ઠંડું થાય એટલે ચેક કરી જુઓ. જો એક તાર નીકળે તો ચાસણી તૈયાર છે. આ ચાસણીમાં બાકી રહેલો એલચી પાવડર ઉમેરીને મિશ્રણને ઠંડું થવા દો.

એક કઢાઈમાં ઘી ગરમ થાય એટલે ગેસની આંચ મધ્યમ કરી એક ચમચો મિશ્રણ હળવેથી ઘીમાં રેડીને માલપૂઆને ગોલ્ડન બ્રાઉન થવા દો. ત્યારબાદ ઉથલાવીને બીજી બાજુએથી પણ તળી લો. આ જ રીતે બધાં માલપૂઆ તળીને ઠંડાં થાય એટલે ઠંડી થયેલી ચાસણીમાં ડુબાડીને પ્લેટમાં કાઢી લો. ઉપરથી પિસ્તાની કાતરી ભભરાવી દો.

રોટલી નૂડલ્સ

0

આ રોટલીની વાનગી જમવા માટે કોઈ બાળક ના નહીં પાડે!!

સામગ્રીઃ 5 રાંધેલી રોટલી, 3 ટે.સ્પૂન તેલ, 3 લસણની કળી ઝીણી સમારેલી, 1 કાંદો ઝીણો સમારેલો,  4 ટે.સ્પૂન લીલો કાંદો ઝીણો સમારેલો, ½ કપ ગાજર તેમજ ½ કપ સિમલા મરચું પાતળી સ્લાઈસમાં સુધારેલાં, ½ કપ કોબી પાતળું સુધારેલું, 2 ટે.સ્પૂન ટોમેટો સોસ, 1 ટે.સ્પૂન વિનેગર, 1 ટે.સ્પૂન સોયા સોસ, મીઠું સ્વાદાનુસાર

રીતઃ બધી રોટલીઓને એકબીજા ઉપર ગોઠવીને ટાઈટ રોલ કરો. આ રોલને પાતળી સ્લાઈસમાં કટ કરો. આ સ્લાઈસને છૂટ્ટી પાડીને એકબાજુએ રાખો. એક કઢાઈમાં તેલ ગરમ કરી લસણ તેમજ મરચું સાંતડો. ત્યારબાદ કાંદાની સ્લાઈસ સાંતડો. હવે તેમાં ગાજર, કોબી તેમજ સિમલા મરચાંની સ્લાઈસ ઉમેરીને થોડીવાર સાંતડીને તેમાં ટોમેટો સોસ, વિનેગર, સોયા સોસ તેમજ મીઠું સ્વાદાનુસાર ઉમેરીને મિક્સ કરો. હવે એમાં રોટલીની પાતળી પટ્ટીઓ તેમજ ઝીણા સમારેલાં લીલા કાંદા નાખીને થોડીવાર ગેસ ઉપર ગરમ કરી નીચે ઉતારી લો. અને ગરમાગરમ પીરસો.

WAH BHAI WAH