Home Variety Cooking Tips

Cooking Tips

પુરણપોળી

0

પુરણપોળી જમતી વખતે ગરમાગરમ ખાવી ગમે છે. એને બનાવવામાં બહુ વાર પણ નથી લાગતી. તો પીરસી દો પુરણપોળી ઘીમાં ઝબોળી!

સામગ્રીઃ

  • 1 કપ તુવેર દાળ
  • 1 થી 1 ½ કપ પાણી
  • 2 ટે.સ્પૂન તેલ, ½ કપ ખાંડ
  • ½ કપ ગોળ
  • 2 ટે.સ્પૂન ઘી
  • 1 ટે.સ્પૂન એલચી-જાયફળ વાટેલાં
  • 2 કપ ઘઉંનો લોટ
  • 2 ટે.સ્પૂન તેલ
  • થોડાં કેસરના તાંતણા
  • ઘી (પુરણ પોળી શેકવા માટે)

રીતઃ તુવેર દાળને બેથી ત્રણ પાણીએથી ધોઈને 1 કલાક માટે પલાળી રાખો. હવે દાળમાં 1 થી 1 ½ કપ પાણી ઉમેરીને કૂકરમાં છૂટ્ટી બાફવા માટે મૂકી દો. 3 વ્હીસલ થવા દો.

બીજી બાજુએ ઘઉંનો લોટ લો. એમાં 2 ટે.સ્પૂન તેલનું મોણ નાખો. અને પાણી વડે નરમ લોટ બાંધીને એકબાજુ રાખી મૂકો. એક વાટકીમાં કેસરને 2 ટી.સ્પૂન પાણીમાં પલાળી દો.

ત્રણ વ્હીસલ બાદ ગેસ બંધ કરીને કૂકર નીચે ઉતારી લો. દાળ થોડી ઠંડી થાય એટલે ચમચા વડે અથવા પાઉંભાજી સ્મેશર વડે કૂકરમાં જ વાટી લો. એમાં ગોળ મિક્સ કરી લો.

એક નોન સ્ટીક વાસણમાં 2 ટે.સ્પૂન ઘી તેમજ પુરણ નાખી ગેસ ઉપર મધ્યમ આંચે ગરમ કરવા મૂકો. એમાં ખાંડ ઉમેરીને હળવે હાથે હલાવતાં રહો. પલાળેલું કેસરનું પાણી તેમજ એલચી-જાયફળનો પાવડર પણ ઉમેરી દો. સતત હલાવતાં રહો. મિશ્રણ ઘટ્ટ થાય એટલે  એમાંથી ¼ ટી.સ્પૂન પુરણ એક નાની ડિશમાં લો. જરા ઠંડું થાય એટલે એનો ગોલો વાળી જુઓ. જો ગોલો વળે તો પુરણ તૈયાર છે. હવે પુરણ નીચે ઉતારીને ઠંડું થવા મૂકો. ઠંડું થયા બાદ એના ગોલા વાળી લો.

એક નોન સ્ટીક તવો મધ્યમ આંચ ઉપર ગરમ કરવા મૂકો. બાંધેલા લોટને થોડું મોણ નાખીને કુણી લો. એમાંથી રોટલી માટે એક લૂવો લઈ અને મધ્યમ આકારની રોટલી વણો. એમાં પુરણનો એક ગોલો મૂકીને ચારે બાજુથી પેક કરી લો. પેક કરેલી સાઈડ નીચે તરફ રાખીને હળવે હાથે પુરણપોળી વણી લો. તવા ઉપર પેક કરેલી સાઈડ નીચે તરફ આવે એ રીતે પોળી નાખો. થોડાં બબલ્સ આવે એટલે ઉથલાવી દો. થોડીવાર બાદ એની ઉપરની સાઈડ પર ઘી લગાડીને ઉથલાવીને ઝારા વડે પુરણપોળીને હલકાં હાથે દાબીને શેકી લો. નીચે ઉતારીને ફરીથી ઘી ચોપડી લો. (ઘી વધુ ન ખાવું હોય તો બીજીવાર ન લગાડવું) આ જ રીતે બધી પુરણપોળી શેકી લો.

બટેટાનું અથાણું

0

ધારો કે અચાનક ઘરે મહેમાન આવવાના હોય તો આ અથાણું તાત્કાલિક બનાવી શકાય છે. ઘરે કોઈ મોટી પાર્ટીનું આયોજન હોય તો પણ વાનગીમાં નવીનતા લાવે છે. ઉપરાંત, આ અથાણું હેલ્ધી તેમજ સ્વાદિષ્ટ પણ છે.

સામગ્રીઃ

  • બાફેલાં બટેટા 4-5
  • કાકડી 1
  • 2-3 લીલાં ભાવનગરી મરચાં
  • કાંદો 1 (optional)
  • લીંબુ 1
  • લીલું સિમલા મરચું 1
  • મીઠું સ્વાદ મુજબ
  • કોથમીર ધોઈને સુધારેલી 1 કપ
  • કાળાં મરી 7-8 દાણા
  • 3-4 ટે.સ્પૂન તલ
  • 3 ટે.સ્પૂન  શિંગદાણા
  • 1  ટી.સ્પૂન રેડ ચિલી ફ્લેક્સ
  • 2 ટે.સ્પૂન રાઈનું તેલ
  • મેથીના દાણા 1 ટી.સ્પૂન

રીતઃ બટેટાને બાફીને ચોરસ ટુકડામાં કટ કરી લો. શિંગદાણા તેમજ તલને શેકીને અધકચરો ભૂકો કરી લો. ભાવનગરી મરચાંને ગોળ સુધારી લો. કાકડી તેમજ સિમલા મરચાના નાના ચોરસ કટકા કરી લો. કાળાં મરીને અધકચરા વાટી લો.

એક બાઉલમાં સુધારેલાં બટેટા લો. એમાં સુધારેલાં મરચાં, કાકડી, સિમલા મરચું, કોથમીર, કાંદો (optional) તેમજ વાટેલાં કાળાં મરી ઉમેરો. 1 લીંબુનો રસ નિચોવીને ઉમેરી દો. શિંગદાણા તેમજ તલનો ભૂકો તેમજ સ્વાદ મુજબ મીઠું પણ ઉમેરીને બધી વસ્તુનો મિક્સ કરી લો.

એક વઘારીયામાં 2 ટે.સ્પૂન રાઈનું તેલ ગરમ કરવા મૂકો. એમાં મેથી દાણા નાખીને સહેજ તતડાવી લો. હવે આ વઘારને બટેટાના મિશ્રણમાં ઉમેરો તેમજ રેડ ચિલી ફ્લેક્સ પણ છાંટીને મિક્સ કરી લો.

આ અથાણું 2 દિવસ સુધી સારું રહે છે. બનાવ્યા પછી ફ્રિઝમાં રાખવું.

ટમેટાંના પકોડા

0

કેવાં લાગે ટમેટાંના પકોડા? બનાવી તો જુઓ…!

 

સામગ્રીઃ

  • 3 મોટાં ટમેટાં
  • 1 કપ ચણાનો લોટ
  • 2 ટે.સ્પૂન ચોખાનો લોટ
  • ચપટી હીંગ
  • 1 ટી.સ્પૂન અજમો

ચટણી માટે સામગ્રીઃ

  • અડધો કપ કોથમીર ધોઈને સુધારેલી
  • 4-5 મોળાં લીલાં મરચાં
  • 3-4 તીખાં લવિંગિયા મરચાં
  • 1 ટી.સ્પૂન શેકેલું જીરૂં
  • 8-10 કળી લસણ
  • મીઠું સ્વાદાનુસાર
  • 2 ટે.સ્પૂન ચણાના લોટની સેવ અથવા વણેલાં ગાંઠીયા કે ભાવનગરી ગાંઠીયા
  • અડધું લીંબુ

ચટણીની રીતઃ કોથમીર, મરચાં, જીરૂં તેમજ લસણને અધકચરું ગ્રાઈન્ડ કરી લો. ચટણી બહુ બારીક ના કરતાં થોડી જાડી રાખવી. ત્યારબાદ એમાં સેવ અથવા ગાંઠીયા તેમજ લીંબુનો રસ નાખીને ફરી એકવાર મિક્સરમાં ફેરવો.

ટમેટાંને ધોઈને 15-20 મિનિટ માટે ફ્રીઝમાં મૂકી દો.

એક બાઉલમાં ચણાનો લોટ, હીંગ, ચોખાનો લોટ, અજમો નાખીને થોડું પાણી ઉમેરીને ઘટ્ટ ખીરૂં બનાવી લો. એક કઢાઈમાં તેલ ગરમ કરવા મૂકી દો. તેલ ગરમ થાય એટલે 2 ટી.સ્પૂન ગરમ તેલ ખીરામાં મિક્સ કરી લો.

ટમેટાંની જાડી સ્લાઈસ સુધારી લો. હવે આ દરેક સ્લાઈસ ઉપર ચટણી ચોપડી લો. એક ચમચી વડે ચટણીવાળી ટમેટાંની સ્લાઈસ લઈ, ખીરામાં બોળીને ગરમ તેલમાં હળવેથી નાખો. કઢાઈમાં આવે એટલી સ્લાઈસ તળવા માટે મૂકો અને ગેસની આંચ મધ્યમ કરીને ગોલ્ડન તળી લો. આ જ રીતે બધાં ભજીયાં તળી લો.

લાવા કેક

0

કોઈ ખુશીમાં ચોકલેટ ખાવાનું મન થાય એ સ્વાભાવિક છે. અને એ ચોકલેટનો સ્વાદ કેકમાં તે પણ ગરમાગરમ ખાવા મળે તો? મઝા આવે ને? મોઢાંમાં પાણી આવી ગયું ને… તો ચાલો બનાવીએ લાવા કેક!

સામગ્રીઃ  

  • ½ કપ મેંદો
  • ½ કપ દળેલી સાકર
  • 5 ટે.સ્પૂન કોકો પાવડર
  • ¼ ટી.સ્પૂન બેકીંગ પાવડર
  • 140 ગ્રામ ડાર્ક ચોકલેટ
  • ¼ કપ બટર
  • 120 ગ્રામ કન્ડેન્સ્ડ્ મિલ્ક
  • ½ કપ ગરમ પાણી
  • 3-4 મફીન ટીન
  • 3 કપ ખાવાનું મીઠું

રીતઃ સૂકી સામગ્રી એક બાઉલમાં ભેગી કરી લો. ચાળણીથી ચાળીને એકબાજુએ મૂકી દો.

ધીમી ગેસની આંચે એક પેન ગરમ કરવા મૂકો. એની ઉપર બીજું એક બાઉલ ગરમ કરવા મૂકો. એમાં ડાર્ક ચોકલેટ અને બટરને મિક્સ કરી એક ચમચા વડે હલાવતાં રહો. બટર અને ડાર્ક ચોકલેટ ઓગળીને મિક્સ થવા જોઈએ.

હજી ત્રીજું બાઉલ અલગથી લો (આ બાઉલને ગરમ પેનમાં મૂકવાની જરૂર નથી). એમાં કન્ડેન્સ્ડ્ મિલ્ક લઈ એમાં ½ કપ ગરમ પાણી ઉમેરી એકરસ મિક્સ કરી લો.

આગળ વધતાં પહેલાં કૂકરને પ્રિ-હિટ કરી લો. હાં, ઓવનની જેમ કૂકરને પણ પ્રિ-હિટ કરવું જરૂરી છે. તે માટે 3 કપ જેટલું ખાવાનું મીઠું(નમક) (અથવા રેતી પણ લઈ શકો છો). મીઠાંને કૂકરમાં પાથરી દો. એની ઉપર કાંઠો અથવા રીંગ મૂકીને જાળી મૂકી દો. (કૂકરના ઢાંકણમાંથી gasket (રબરની રિંગ)  કાઢી લઈ સિટી રહેવા દેવી.) દસ મિનિટ ફાસ્ટ ગેસ ઉપર કૂકરને ઢાંકીને ગરમ થવા દો.

સૂકી સામગ્રી વાળા બાઉલમાં ચોકલેટનું મિશ્રણ, ત્યારબાદ કન્ડેન્સ્ડ્ મિલ્કનું મિશ્રણ મેળવી દો. એકસરખું ગઠ્ઠા ના બને એ રીતે મિક્સ કરી લો. બટર અથવા ઘીને મફીન ટીનમાં ચોપડી લો અને કેકનું મિશ્રણ ¾ ટીન જેટલું દરેક ટીનમાં ભરી દો. 

દસ મિનિટ બાદ ગેસની ફ્લેમ ધીમી કરી દો. કૂકરને ખોલીને અંદર જાળી ઉપર ટીનને ગોઠવીને ફરીથી કૂકર ઢાંકી દો. ગેસની ફ્લેમ હવે મિડિયમ રાખો. દસ મિનિટ બાદ કૂકર ખોલીને ચેક કરી લો. જો કેક તૈયાર થયેલી લાગે એટલે કે ટીનની ભરેલી સપાટી કરતાં ફૂલેલી હોય તો સમજવું કેક તૈયાર છે. ના થઈ હોય તો ફરીથી થોડી મિનિટ માટે થવા દો.

કૂકરમાંથી તૈયાર ટીન બહાર કાઢ્યા બાદ થોડીવાર ઠંડી થયા બાદ ખાવાના ઉપયોગમાં લો. કારણ કે, તે એકદમ ગરમ હશે, તો ખાતી વખતે મોઢું દાઝવાનો ભય છે.

તૈયાર કેક સાવ ઠંડી થયા પછી પણ ખાવામાં સારી નહીં લાગશે. એટલે ખાવાના સમયે એને ફરીથી ઓવન અથવા કૂકરમાં થોડી ગરમ કરીને ખાવામાં લો.

 

ઊંધિયું

0

બનાવો ચટાકેદાર ઊંધિયું; ઊંધિયાની સિઝન પૂરી થાય તે પહેલાં!

સામગ્રીઃ

4-5 નાના રીંગણા, 5-6 નાના બટેટા, 1 કપ સુરતી પાપડી, 1 કપ લીલા તુવેર દાણા, 1 કપ લીલા વટાણા, 300 ગ્રામ કંદ, 250 ગ્રામ શક્કરીયા, ચપટી ખાવાનો સોડા

 

લીલા મસાલા માટેની સામગ્રી

1 કપ ખમણેલું કોપરૂ, ½ કપ તલ, 1 ટે.સ્પૂન ધોઈને ખમણેલું આદુ, 7-8 લીલાં મરચાં ધોયેલા, 8-10 કળી લસણ, મીઠું સ્વાદ પ્રમાણે, 2 કપ કોથમીર ધોઈને સમારેલી, 2 ટી.સ્પૂન મરચાં પાવડર, 2 કપ લીલું લસણ ધોઈને સુધારેલું, 1 ટી.સ્પૂન ધાણા જીરૂ પાવડર, ¼ ટી.સ્પૂન હળદર, 1 ટી.સ્પૂન અજમો, 3 ટે.સ્પૂન તેલ વઘાર માટે, તેમજ તળવા માટે તેલ, 1 ટી.સ્પૂન ઉંધિયાનો મસાલો (ઉંધિયાના મસાલાની રીત જાણવા માટે ક્લિક કરોઃ (http://chitralekha.com/variety/cooking-tips/undhiyu-masala-powder/)

મુઠીયાની સામગ્રી

1 કપ ચણાનો લોટ, 1 કપ ઘઉંનો કરકરો (જાડો) લોટ, 2½ કપ ધોઈને સુધારેલી મેથીની ભાજી, 1 ટી.સ્પૂન આદુ-મરચાં પેસ્ટ, 1 ટી.સ્પૂન મરચાં પાવડર, ¼ ટી.સ્પૂન હળદર, ¼ ટી.સ્પૂન લીંબુનો રસ, ચપટી ખાવાનો સોડા, મીઠું સ્વાદ પ્રમાણે, ચપટી ખાંડ (optional), વઘાર માટે 1 ટે.સ્પૂન તેલ તેમજ તળવા માટે તેલ

મુઠીયાની રીતઃ ચણાનો તેમજ ઘઉંનો લોટ એક બાઉલમાં લો. એમાં ધોઈને સુધારેલી મેથીની ભાજી તેમજ 1 ટે.સ્પૂન તેલ સહિતની બાકીની સામગ્રી ઉમેરી દો. બધી સામગ્રી મિક્સ કરો અને થોડું પાણી ઉમેરીને મુઠીયા વાળો. એક કઢાઈમાં તેલ ગરમ કરીને મુઠીયા તળીને એક બાજુએ મૂકી દો.

ઊંધિયું બનાવવાની રીત

સહુ પ્રથમ કોપરૂ, તલ, ખમણેલું આદુ, લીલાં મરચાં, લસણ, મીઠું, 2 કપમાંથી 1 કપ કોથમીર, 2 કપમાંથી 1 કપ લીલું લસણ લઈ મિક્સરમાં ગ્રાઈન્ડ કરીને આ લીલા મસાલાને એકબાજુ મૂકી રાખો.

રીંગણા તેમજ બટેટાને ધોઈને આખા રાખી ફક્ત એમાં ચાર કાપા પાડીને એમાં લીલો મસાલો ભરી દો. બીજા ગેસ ઉપર એક ફ્રાઈ પેનમાં થોડું તેલ નાખીને રીંગણા તેમજ બટેટા નાખી દો. અને કઢાઈ ઢાંકીને મધ્યમ આંચે શેલો ફ્રાઈ થવા દો. થોડી વારે ચેક કરીને જોઈ લેવું. ચઢી જાય એટલે ગેસ પરથી નીચે ઉતારી લેવું

કંદ, શક્કરીયાને ધોઈને 1-1½ ઈંચના ટુકડા કરી લો. સુરતી પાપડી, તુવેર દાણા, લીલા વટાણાને ધોઈ લો.

એક મોટી કઢાઈમાં તેલ ગરમ થાય એટલે અજમો તેમજ હીંગનો વઘાર કરો. ત્યારબાદ એમાં બાકી રાખેલો લીલો મસાલો હળવેથી ઉમેરી દો સાથે ચપટી સોડા પણ ઉમેરી દો. તેમજ મરચાં પાવડર, હળદર, ધાણાજીરૂ મિક્સ કરીને લાંબા ઝારા વડે હલાવીને પાપડી, તુવેર દાણા, લીલા વટાણા, કંદ તેમજ શક્કરીયાના ટુકડા પણ એમાં ઉમેરીને મિક્સ કરી દો. કઢાઈ ઢાંકી દો. 1 કપ પાણી ઉમેરીને ગેસની ધીમી આંચે થવા દો.

થોડી થોડી વારે ચેક કરવું. પાપડી તેમજ કંદ અને શક્કરીયા ચઢી જાય એટલે ફ્રાઈ પેનમા ચઢી ગયેલા રીંગણા અને બટેટા એમાં ઉમેરી દો. છેલ્લે મુઠીયા તેમજ ઉંધિયાનો મસાલો (ગરમ મસાલો) અને બાકી રાખેલા 1 કપમાંથી ½ કપ કોથમીર તેમજ લીલું લસણ ઉમેરી દો અને ઝારા વડે હળવે હાથે હલાવીને કઢાઈ ઢાંકી દો. 10 મિનિટ સુધી ગેસની ધીમી આંચે થવા દો. અને ત્યારબાદ ગેસ પરથી ઉતારી લો. ઉપરથી કોથમીર તેમજ લીલું લસણ ભભરાવી દો.

ઊંધિયું મસાલો

0

ઊંધિયું બનાવવામાં ઘણી કળાકૂટ છે. પણ આ મહેનત ત્યારે સફળ થાય જ્યારે ઊંધિયું ટેસ્ટી બને! તો ચાલો, ઊંધિયાને સ્વાદિષ્ટ બનાવવા ઊંધિયાનો મસાલો બનાવીએ!

સામગ્રીઃ

  • સુધારેલી કોથમીર 2 ટે.સ્પૂન
  • કળીપત્તાં 10-15 પાન

  • આખા ધાણા 2 ટે.સ્પૂન
  • સૂકા લાલ મરચાં 3-4
  • તમાલપત્ર 2-3
  • તજનો ટુકડો 1 ઈંચ જેટલો
  • લવિંગ 2-3, જીરૂં 1 ટી.સ્પૂન
  • કાળાં મરી ½ ટી.સ્પૂન
  • બાદીયા ફુલ 1
  • વરિયાળી ½ ટી.સ્પૂન
  • દગડ ફુલ 1 ટી.સ્પૂન
  • સૂકું ખમણેલું નાળિયેર 2 ટે.સ્પૂન
  • આમચૂર પાવડર 1 ટી.સ્પૂન
  • હળદર ½ ટી.સ્પૂન
  • લીંબુના ફુલ ¼ ટી.સ્પૂન
  • જાયફળ ખમણેલું ¼ ટી.સ્પૂન
  • સ્વાદ મુજબ મીઠું

રીતઃ સુધારેલી કોથમીર અને કળીપત્તાના પાનને એક પેનમાં ગેસની ધીમી આંચે સૂકાં થાય ત્યાં સુધી (એમાંનું પાણી સૂકાય જાય ત્યાં સુધી) શેકી લો. (પાન કાળાં ના થવા જોઈએ) શેકાઈ જાય એટલે એકબાજુએ મૂકી રાખો.

હવે એ જ પેનમાં આખા ધાણા, સૂકા લાલ મરચાં, તમાલપત્ર, તજનો ટુકડો, લવિંગ, જીરૂં, કાળાં મરી, બાદીયા ફુલ , વરિયાળી તથા દગડ ફુલ બધી વસ્તુઓને ગેસની એકદમ ધીમી આંચે શેકો. બ્રાઉન રંગ થાય અને હલકી સુગંધ આવે એટલે ગેસ પરથી ઉતારીને ઠંડી કરવા મૂકો.

ઉપરની બધી સામગ્રી તેમજ શેકેલાં કોથમીર અને કળીપત્તાના પાન મિક્સીની જારમાં લો. એમાં બાકીની સામગ્રી એટલે કે, આમચૂર પાવડર, હળદર, લીંબુના ફુલ, સૂકું ખમણેલું નાળિયેર, જાયફળ તેમજ મીઠું ઉમેરીને બારીક પાવડર દળી લો.

દળેલો મસાલો તમે એર ટાઈટ જારમાં ભરી લો. આ મસાલો 4-5 મહિના સુધી સારો રહે છે.

 

ટેસ્ટી રવૈયા

0

ફાસ્ટ ફુડ ખાવાના શોખીનો પણ રવૈયા (મસાલો ભરેલા રીંગણાનું શાક) તો હોંશે હોંશે ખાઈ લે છે.

 

સામગ્રીઃ

  • 8-10 મધ્યમ સાઈઝના રીંગણા
  • શીંગદાણા ¼ કપ
  • તલ 2 ટી.સ્પૂન
  • ચણા દાળ 2 ટી.સ્પૂન
  • આખા ધાણા 1 ટે.સ્પૂન
  • વરિયાળી 1 ટે.સ્પૂન
  • જીરૂ 1 ટી.સ્પૂન
  • આખા મેથી દાણા ¼ ટી.સ્પૂન
  • સૂકા લાલ મરચાં 10 નંગ
  • 5-6 કળીપત્તા
  • સૂકું ટોપરૂ ½ કપ પાતળાં બારીક ટુકડામાં કટ કરેલું
  • 1 કાંદો લાંબી ચીરીમાં સુધારેલો
  • આમલીનો પલ્પ 1 ટી.સ્પૂન (આમલી ન વાપરવી હોય તો લીંબુ લેવું)
  • હળદર  ¼ ટી.સ્પૂન
  • ગોળ 1 ટે.સ્પૂન (optional)
  • મીઠું સ્વાદ પ્રમાણે
  • 1 ટી.સ્પૂન રાઈ
  • ચપટી હીંગ
  • તેલ વઘાર માટે

રીતઃ રીંગણાને ધોઈ લો. દરેક રીંગણું લઈ એમાં મસાલો ભરવા માટે ચપ્પૂથી ચાર ઉભા કાપા પાડો. (રીંગણામાં થોડી જગ્યા રહે એ રીતે). કાપા પાડેલાં બધાં રીંગણા એક બાઉલ લઈ પાણીમાં રાખી મૂકો.

એક ફ્રાઈ પેનમાં શીંગદાણા હલકાં શેકાય એટલે એમાં તલ પણ નાખીને થોડીવાર માટે શેકી લો. શીંગદાણા અને તલને એક વાસણમાં ઠંડા કરવા મૂકી દો.

હવે આ જ પેનમાં 2 ટી.સ્પૂન તેલ ગરમ કરો. એમાં આખા ધાણા, જીરૂ, મેથી, વરિયાળી, ચણા દાળ 1 મિનિટ માટે સાંતડો. ત્યારબાદ એમાં સૂકાં લાલ મરચાં તેમજ કળીપત્તા નાખીને 1 મિનિટ માટે સાંતડો. હવે એમાં ટોપરૂં તેમજ કાંદો નાખીને હલકો ગુલાબી રંગ થાય એટલે ગેસ બંધ કરી દો. આ મિશ્રણ ઠંડુ થાય એટલે એને શીંગદાણા અને તલ સાથે ગોળ, આમલીનો પલ્પ, સ્વાદ પ્રમાણે મીઠું તેમજ થોડું પાણી ઉમેરીને મિક્સરમાં બારીક પીસી લો.

આ મિશ્રણને દરેક રીંગણામાં ભરી લો. એક કઢાઈમાં 3 ટે.સ્પૂન તેલ ગરમ થાય એટલે રાઈ તથા હીંગનો વઘાર કરીને રીંગણા એમાં 2 મિનિટ માટે સાંતડો. થોડો રંગ બદલાય એટલે એમાં બાકી રહેલી મસાલાની પેસ્ટ ઉમેરી દો. અને અડધો કપ પાણી રેડી દો. કઢાઈ ઢાંકીને ગેસની આંચ મધ્યમ રાખીને 20-25 મિનિટ સુધી રીંગણાને થવા દો. એકવાર ચેક કરી લો રીંગણા બરોબર ચઢી જાય એટલે ખાવા માટે પીરસો

ઢાબા સ્ટાઈલ પકોડા કઢી

0

કઢી કોઈપણ રીતે બનાવો એ સ્વાદિષ્ટ લાગે જ છે. પણ, ઢાબા સ્ટાઈલ પકોડા કઢી નામ લો તો? મોઢામાં પાણી આવી જાય છે નહીં? તો ચાલો બનાવીએ પકોડા કઢી!

સામગ્રીઃ

કઢી માટેઃ 6 ટે.સ્પૂન ચણાનો લોટ, 2 કપ દહીં, મીઠું સ્વાદ મુજબ, 1 ઈંચ આદુ (છૂંદેલું), 1 ટે.સ્પૂન ધાણાજીરૂં,  4-5 લીલાં મરચાં લાંબી ચીરમાં સુધારેલાં (Cooking Shooking પ્રમાણે 1 ટે.સ્પૂન લાલ મરચાં પાવડર)

વઘાર માટેઃ 2 ટે.સ્પૂન ઘી, 5-6 દાણાં કાળાં મરી, 2-3 આખી લવિંગ, ½ ઈંચ તજનો ટુકડો,  4-5 કળીપત્તાના પાન, 1  ટી.સ્પૂન રાઈ, 1  ટી.સ્પૂન મેથીના દાણા, 1  ટી.સ્પૂન જીરૂ, ¼ ટી.સ્પૂન હીંગ, 2-3 બોરિયા મરચાં (બોરિયા મરચાંને લીધે સ્વાદ ઘણો વધી જાય છે)

પકોડા માટેઃ 1 કપ લીલી મેથીની ભાજી (ધોઈને ઝીણી સમારેલી), 1 કાંદો ઝીણો સમારેલો,  1 ઈંચ આદુ ઝીણું સમારેલું, મીઠું સ્વાદ મુજબ, ¼ ટી.સ્પૂન હળદર પાવડર, 1 ટી.સ્પૂન કાશમીરી મરચું (optional), 2-3 લીલાં મરચાં ઝીણા સમારેલાં, ¼ ટી.સ્પૂન ખાવાનો સોડા, ½ કપ દહીં (દહીં ન હોય તો લીંબુ), 1 કપ ચણાનો જાડો લોટ

રીતઃ કઢી માટે આપેલી સામગ્રીમાંથી સૂકી સામગ્રી ભેગી કરી લો. ત્યારબાદ એમાં દહીં મેળવીને એમાં જરૂર મુજબ પાણી ઉમેરી દો. ગઠ્ઠાં ના બને એ રીતે જેરણીથી વલોવી લો. ગેસની આંચ ધીમી રાખીને કઢી ઉકળવા મૂકો. (લગભગ અડધો કલાક સુધી કઢી ઉકળે તો ટેસ્ટ સારો આવશે.)

હવે પકોડા માટે ખીરૂ તૈયાર કરો. એક બાઉલમાં પકોડા માટેની બધી સામગ્રી લઈ હાથેથી મિક્સ કરો. ખીરૂં ઘટ્ટ હોય તો થોડું પાણી ઉમેરો. પકોડા તળવા માટે તેલ ગરમ થાય એટલે ગેસની આંચ મધ્યમ કરીને ગોલ્ડન પકોડા તળી લો.

કઢી તૈયાર થાય એટલે તળેલા પકોડા કઢીમાં નાખીને 2-3 મિનિટ બાદ ગેસ બંધ કરી દો. બીજી બાજુએ વઘાર માટે આપેલી સામગ્રીમાંથી એક વઘારિયામાં ઘી ગરમ કરવા મૂકો. ઘી ગરમ થાય એટલે અનુક્રમે રાઈ, જીરૂ તથા મેથીનો વઘાર કરો. ત્યારબાદ લવિંગ, મરી તથા તજ ઉમેરીને હીંગ નાખો. હવે બોરિયા મરચાં તથા કળીપત્તાના પાન તતડાવીને વઘારને કઢીમાં મિક્સ કરી દો. કઢાઈ ઢાંકીને 10 મિનિટ સુધી રહેવા દઈને બાદમાં પકોડા કઢી પિરસો.

ચીઝ ચિલી ટોસ્ટ

0

ઝટપટ તૈયાર થતો અને બાળકોનો તો ફેવરિટ નાસ્તો છે ચીઝ ચિલી ટોસ્ટ! કોઈ વાર રસોઈ બનાવવામાં હાથ અજમાવ્યો ના હોય તો પણ પહેલે પ્રયોગે સફળ થઈ જાઓ એવી વાનગી છે આ!

સામગ્રીઃ

  • 6 સેન્ડવિચ બ્રેડ
  • માખણ
  • 2-3 તાજાં લાલ અથવા લીલાં મરચાં
  • 3-4 કળી લસણ (optional)
  • 1 ટે.સ્પૂન રેડ ચિલી ફ્લેક્સ
  • 4 ચીઝ ક્યુબ્સ

 

રીતઃ દરેક બ્રેડ ઉપર માખણ સરખા પ્રમાણમાં લગાડી દો. એની ઉપર ગોળ પાતળાં સુધારેલાં મરચાંની 4-5 કટકી દરેક બ્રેડ ઉપર આવે એ પ્રમાણે ભભરાવી દો. ત્યારબાદ ઝીણું સમારેલું લસણ થોડું થોડું ભભરાવી દો.  હવે ઉપર ચીઝ ખમણી લો. ઉપરથી રેડ ચિલી ફ્લેક્સ છાંટી દો.

એક નોન-સ્ટીક પેનને ગેસ ઉપર ગરમ કરવા મૂકો. ગરમ થાય એટલે આંચને ધીમી કરી દો. એમાં ગોઠવાય એટલાં બ્રેડ મૂકીને પેનને ઢાંકી દો. 2-3 મિનિટ બાદ ચેક કરી લો. બ્રેડ નીચેથી ગોલ્ડન બ્રાઉન તેમજ ક્રિસ્પી થાય અને ચીઝ ઓગળી જાય એટલે ઉતારી લો.

 

 

વેજ ગોલ્ડ કોઈન

0

બચ્ચાં પાર્ટીને ખુશ કરવા એમને ભાવતી વાનગી બનાવવા કંઈ કેટલીય માથાઝીંક કરવી પડે છે! ગોલ્ડ કોઈન એક એવું સ્ટાર્ટર છે જે સ્વાદિષ્ટ ઉપરાંત હેલ્ધી પણ છે. શું કરીએ બાળકોની વાત આવે એટલે હેલ્થનો વિચાર જરા વધુ કરવો પડે!

સામગ્રીઃ

  • બે બાફેલાં બટેટા મેશ કરેલા
  • 1 નાનો કાંદો ઝીણો સમારેલો
  • ½ કપ બાફીને ક્રશ કરેલાં કોર્ન
  • 1 નાનું ગાજર ખમણેલું
  • અડધું સિમલા મરચું ઝીણાં ચોરસ ટુકડામાં સુધારેલું
  • ½ કપ તાજા લીલા વટાણા બાફેલાં
  • 1 ટે.સ્પૂન આદુ-મરચાં પેસ્ટ
  • 2 લીલાં મરચાં ઝીણાં સમારેલાં
  • ½ કપ કોથમીર ઝીણી સમારેલી
  • 4 સ્લાઈસ બ્રેડની (બ્રાઉન બ્રેડ લઈ શકો છો)
  • મીઠું સ્વાદ મુજબ
  • 1 ટે.સ્પૂન સોયા સોસ
  • 3 ટે.સ્પૂન તલ
  • તળવા માટે તેલ

રીતઃ એક બાઉલમાં મેશ કરેલા બટેટા તેમજ કોર્ન, ગાજર, વટાણા, કાંદો, સિમલા મરચું, આદુ-મરચાં પેસ્ટ, કોથમીર લઈ લો. એમાં સ્વાદ મુજબ મીઠું ઉમેરી દો. તેમજ સોયા સોસ ઉમેરીને મિક્સ કરી લો.

રાઉન્ડ કૂકી કટર લઈ દરેક બ્રેડમાંથી ગોળાકાર કટ કરી લો. (ગોળાકારને બદલે સ્ક્વેર કટ પણ કરી શકો છો.) 1 ટે.સ્પૂન જેટલું પુરણ લઈ બ્રેડના રાઉન્ડ પીસ ઉપર એક સાઈડ ઉપર સરખું લગાડી દો. તલને એક થાળીમાં કાઢી લો. બ્રેડના પુરણ લગાડેલા ભાગને તલમાં રગદોળી લો. આ રીતે બધાં પીસ તૈયાર કરતાં જાઓ. અને એક નોન-સ્ટીક પેનમાં તેલ ગરમ થાય એટલે એમાં આવે એટલા બ્રેડના પીસ શેલો-ફ્રાય કરવા મૂકી દો. ગેસની આંચ મધ્યમ ધીમી રાખવી. કોઈનને બંને બાજુએથી ગોલ્ડન ક્રિસ્પી તળી લો.

આ ગોલ્ડ કોઈન ટોમેટો સોસ અથવા લીલી ચટણી સાથે પિરસો.

બ્રેડને ગોળાકારને બદલે સ્ક્વેર કટ પણ કરી શકો છો.