Home Blog Page 1990

લોકસભા ચૂંટણી વચ્ચે ઉત્તર પ્રદેશમાંથી મોટા સમાચાર

લોકસભા ચૂંટણી વચ્ચે ઉત્તર પ્રદેશમાંથી મોટા સમાચાર છે. અહીં અપના દળ કામેરાવાડી સાથેનું ગઠબંધન તુટી ગયું છે જે સમાજવાદી પાર્ટીની સાથે ઈન્ડિયા એલાયન્સમાં હતું.આ વાતની જાહેરાત ખુદ સપા પ્રમુખ અખિલેશે કરી છે. અપના દળ કામેરાવાડી અને સપા વચ્ચે ગઠબંધન અંગે પૂછવામાં આવેલા સવાલના જવાબમાં અખિલેશ યાદવે કહ્યું- 22માં ગઠબંધન હતું, 24માં નહીં. બાકી તમે લોકો હોશિયાર છો.

અપના દળ (કે)એ 3 લોકસભા સીટો પર દાવો કર્યો હતો. અપના દળ કામરાવાડીએ ગઠબંધનમાં મિર્ઝાપુર, કૌશામ્બી, ફુલપુર સીટો માંગી હતી. એ જ દિવસે જ્યારે અપના દળ કામરાવાડીએ આ ત્રણેય બેઠકો પર દાવો કર્યો હતો, ત્યારે મોડી સાંજે સપાએ મિર્ઝાપુરથી પોતાના ઉમેદવારની જાહેરાત કરી હતી.

તમને જણાવી દઈએ કે, બુધવારે અપના દળ (કામેરાવાડી), જે ભારતીય ગઠબંધનનો ભાગ છે, એ બળવાખોર વલણ અપનાવ્યું છે અને યુપીની ત્રણ લોકસભા સીટો પર પોતાના ઉમેદવારો ઉભા રાખવાનો નિર્ણય કર્યો છે. પાર્ટીના રાષ્ટ્રીય અધ્યક્ષ ક્રિષ્ના પટેલે ખુદ આ જાહેરાત કરી હતી.

પલ્લવી પટેલે રાજ્યસભાની ચૂંટણીમાં પણ પ્રશ્નો ઉઠાવ્યા હતા

પાર્ટીએ બુધવારે ફુલપુર, મિર્ઝાપુર અને કૌશામ્બી લોકસભા સીટ પરથી ઉમેદવારો ઉભા રાખવાની જાહેરાત કરી હતી. અપના દળ (કામરાવાડી)ના રાષ્ટ્રીય અધ્યક્ષ કૃષ્ણા પટેલે કહ્યું હતું કે અમે લાંબા સમયથી ઈન્ડિયા એલાયન્સના ભાગીદાર છીએ. અમે ભારત ગઠબંધનની દરેક બેઠકમાં સામેલ થયા છીએ. પાર્ટીએ ત્રણ સીટો પર ચૂંટણી લડવાની જાહેરાત કરી છે.

અપના દળ (કામરાવાડી)ના નેતા પલ્લવી પટેલ સમાજવાદી પાર્ટીના ધારાસભ્ય છે. પલ્લવી સમાજવાદી પાર્ટીના સિરથુ કૌશામ્બી સીટથી ધારાસભ્ય છે. તેમણે રાજ્યસભાની ચૂંટણીમાં સપા સામે બળવો કર્યો હતો. તેમણે પાર્ટી દ્વારા જાહેર કરાયેલા ઉમેદવારો પર પ્રશ્નો ઉઠાવ્યા અને કહ્યું કે પીડીએ (પછાત વર્ગ, દલિત અને લઘુમતી)ની અવગણના કરવામાં આવી છે. ત્યારથી તેમનો સ્વર બળવાખોર રહ્યો હતો અને હવે તેમણે કહ્યું છે કે તેઓ સપાથી અલગ થઈને લોકસભાની ચૂંટણી લડશે.

 

શેરોમાં તેજીઃ રોકાણકારોની સંપત્તિમાં છ લાખ કરોડનો વધારો

અમદાવાદઃ વૈશ્વિક સંકેતો તેજીમય રહેતાં ભારતીય શેરબજારોમાં તેજી થઈ હતી. જેથી નિફ્ટી 22,000ને પાર પહોંચ્યો હતો. મિડકેપ અને સ્મોલકેપ ઇન્ડેક્સ પણ બે ટકાથી વધુની તેજી સાથે બંધ થયા હતા.  નિફ્ટી એક્સપાયરીને દિવસે બજારમાં શોર્ટ કવરિંગ જોવા મળ્યું હતું. જેથી રોકાણકારોની સંપત્તિમાં આશરે રૂ. 5.83 લાખ કરોડનો વધારો થયો હતો.

US ફેડરલ રિઝર્વે એક નિવેદનમાં કહ્યું હતું કે બેન્ક વર્ષ 2024માં ત્રણ વાર વ્યાજદરોમાં કાપ કરવાના વલણ પર હજી પણ કાયમ છે. બેન્ક વ્યાજદરોમાં નરમ વલણ અપનાવતાં કોઈ ફેરફાર કર્યો નહોતો. જેથી બજારની તેજીની આગેકૂચ રહી હતી.

વિશ્લેષકોએ કહ્યું હતું કે US ફેડ દ્વારા આ વર્ષમાં વ્યાજદરોમાં ત્રણ કાપના સંકેતથી બજારે રાહતના શ્વાસ લીધા છે. આ ઉપરાંત દેશમાં લોકસભા ચૂંટણી યોજાવાની છે અને માર્ચ ત્રિમાસિકનાં પરિણામો પણ જાહેર થવાનાં છે, પણ એ પહેલાં બજારમાં એક કરેક્શન આવવાની શક્યતા છે.

BSE સેન્સેક્સ 539.50 પોઇન્ટની તેજી સાથે 72,641.19ના મથાળે બંધ રહ્યો હતો, જ્યારે નિફ્ટી ઇન્ડેક્સ 172.85 પોઇન્ટ ઊછળી 22,011.95ના સ્તરે બંધ આવ્યો હતો.  BSE અને NSEના બધા સેક્ટોરિયલ ઇન્ડેક્સ તેજી સાથે બંધ થયા હતા. નિફ્ટી રિયલ્ટીમાં ત્રણ ટકાની તેજી રહી હતી. આ સિવાય મેટલ અને PSU બેન્ક ઇન્ડેક્સ બે ટકાથી વધુની તેજી થઈ હતી. મિડકેપ અને સ્મોલકેપ ઇન્ડેક્સમાં આશરે 2.5 ટકાની તેજી થઈ હતી.

BSE પર આજે 3926 શેરોમાં કામકાજ થયાં હતાં. એમાં 2760 શેરો તેજી સાથે બંધ થયા હતા. જ્યારે 1064 શેરો નરમ બંધ આવ્યા હતા. આ સાથે 104 શેરો સપાટ બંધ રહ્યા હતા. આ સિવાય 101 શેરો 52 સપ્તાહની નવી ઊંચાઈએ પહોંચ્યા હતા, જ્યારે 54 શેરો 52 સપ્તાહની નીચલી સપાટીએ પહોંચ્યા હતા.

 

 

 

 

 

ભારતીય તટરક્ષક દળે સમુદ્રી શોધ અને બચાવ કવાયત હાથ ધરી

હેડક્વાર્ટર, નંબર 1 તટરક્ષક દળ ડિસ્ટ્રિક્ટ (દક્ષિણ ગુજરાત, દમણ અને દીવ) દ્વારા 19 માર્ચ 2024ના રોજ પ્રાદેશિક સ્તરની સમુદ્રી શોધ અને બચાવ સેમિનાર/વર્કશોપનું આયોજન કરવામાં આવ્યું હતું. તમામ મેરીટાઇમ હિતધારકો દ્વારા મેરીટાઇમ SARને પ્રતિભાવ આપવા માટે સ્થાપિત કરવામાં આવેલી પ્રક્રિયાઓ અને નીતિઓ ફરી માન્યતા આપવા અને મેરીટાઇમ SARની તાલીમ પર સંસાધન એજન્સીઓ, સાધનો, સંચાર પ્રક્રિયાઓ અને અસરકારકતાની તૈયારી અને એકીકરણ ચકાસવા માટે આ કાર્યક્રમનું આયોજન કરવામાં આવ્યું હતું. જિલ્લા વહીવટી તંત્ર, સ્પેસ એપ્લિકેશન સેન્ટર, GMB, ખાનગી બંદરો, VTS કચ્છ અને મત્સ્યોદ્યોગના અધિકારીઓના સહિત વિવિધ હિતધારકો આ કાર્યક્રમમાં ઉપસ્થિત રહ્યા હતા.

સમુદ્રી શોધ અને બચાવને લગતી બાબતો પર ચર્ચા કરવામાં આવી

આ કાર્યક્રમ દરમિયાન મજબૂત વ્યવસ્થાતંત્રને ધ્યાનમાં રાખીને સમુદ્રી શોધ અને બચાવને લગતી બાબતો પર ચર્ચા કરવામાં આવી હતી તેમજ સમુદ્રી શોધ અને બચાવના બહુ-પરિમાણીય મુદ્દાની ચર્ચાને આગળ ધપાવવામાં આવી હતી જેમાં સમુદ્રમાં લોકોના જીવનની સલામતી સુનિશ્ચિત કરવા માટે દરિયા કિનારાઓમાં સમન્વયિત પ્રયત્નો અને વિશ્વાસ મેળવવા માટે હિતધારકો વચ્ચે નિયમિત ક્રિયાપ્રતિક્રિયા અને સંકલનનો પુનરોચ્ચાર કરવામાં આવ્યો હતો. સમુદ્ર/બંદર અંગે આપવામાં આવેલા ઓપરેશન ડેમો દરમિયાન હાઇ સ્પીડ ડેમો, SAR કામગીરીઓ વગેરે જેવી વિવિધ શ્રેણીઓ તમામ હિતધારકો દ્વારા જોવામાં આવી હતી.

IPL 2024: MS ધોનીએ ચેન્નાઈ સુપર કિંગ્સની કેપ્ટનશીપ છોડી

IPL 2024 પહેલા ચેન્નાઈ સુપર કિંગ્સે નવા કેપ્ટનની જાહેરાત કરીને બધાને ચોંકાવી દીધા છે. મોટા સમાચાર એ છે કે એમએસ ધોનીએ અચાનક કેપ્ટનશીપ છોડી દીધી છે અને હવે રુતુરાજ ગાયકવાડને ચેન્નાઈનો નવો કેપ્ટન બનાવવામાં આવ્યો છે. ધોનીએ ગત સિઝનમાં ચેન્નાઈને પાંચમી વખત IPL જીતાડ્યું હતું અને હવે તેણે ગાયકવાડને ટીમની કમાન સોંપી છે.

ધોનીનો કેપ્ટનશિપનો રેકોર્ડ

ધોનીએ ચેન્નાઈને પાંચ વખત IPL જીતાડ્યું એટલું જ નહીં, તેણે ટીમને પાંચ વખત ફાઇનલમાં પણ પહોંચાડી. તે એકમાત્ર એવો કેપ્ટન છે જેણે 10 IPL ફાઈનલ રમી છે. ધોનીની કેપ્ટન્સીમાં ચેન્નાઈ 2010, 2011, 2018, 2021 અને 2023માં ચેમ્પિયન બની છે. 2008, 2012, 2013, 2015 અને 2019માં તે ટીમને ફાઇનલમાં લઈ ગયો હતો.

ચેન્નાઈએ ધોનીની કપ્તાનીમાં 226 મેચ રમી હતી.
ધોનીની કપ્તાનીમાં ચેન્નાઈએ 133 મેચ જીતી અને 91માં હારનો સામનો કરવો પડ્યો.
ધોનીની કપ્તાનીમાં જીતની ટકાવારી 59.38 ટકા હતી.
ધોનીએ કેપ્ટન તરીકે 4660 રન બનાવ્યા હતા
કેપ્ટન તરીકે ધોનીએ 22 અડધી સદી ફટકારી હતી.
કેપ્ટન તરીકે ધોનીએ 218 સિક્સર અને 320 ફોર ફટકારી હતી.

રુતુરાજ ગાયકવાડ CSKનો નવો કેપ્ટન

રુતુરાજ ગાયકવાડને ચેન્નાઈ સુપર કિંગ્સનો નવો કેપ્ટન બનાવવામાં આવ્યો છે. IPLની શરૂઆત પહેલા કેપ્ટન્સનું એક ફોટોશૂટ છે જેમાં ધોનીની જગ્યાએ ગાયકવાડ પહોંચ્યા હતા. ઋતુરાજ ગાયકવાડે ચેન્નાઈ માટે માત્ર 3 સીઝન રમી છે. તેણે 2020માં ડેબ્યૂ કર્યું હતું અને પ્રથમ સિઝનમાં તે માત્ર 6 મેચ જ રમી શક્યો હતો. પરંતુ 2021માં તેને તેની પૂરી તક મળી અને આ ખેલાડીએ એક સદી અને 4 અડધી સદીના આધારે 635 રન બનાવ્યા. 2022માં ગાયકવાડે માત્ર 368 રન બનાવ્યા હતા પરંતુ છેલ્લી સિઝનમાં ગાયકવાડે 16 મેચમાં 590 રન બનાવીને ટીમને ચેમ્પિયન બનાવી હતી. ગાયકવાડે આઈપીએલમાં અત્યાર સુધીમાં 52 મેચ રમી છે અને 39થી વધુની એવરેજથી 1797 રન બનાવ્યા છે. તેનો સ્ટ્રાઈક રેટ પણ 135થી વધુ છે.

SBIએ ચૂંટણી બોન્ડનો તમામ ડેટા ચૂંટણી પંચને સબમિટ કર્યો

સ્ટેટ બેંક ઓફ ઈન્ડિયાએ સુપ્રીમ કોર્ટમાં એફિડેવિટ આપીને કહ્યું છે કે તેણે ચૂંટણી પંચને ઈલેક્ટોરલ બોન્ડ સંબંધિત તમામ ડેટા આપી દીધા છે. SBIએ કહ્યું કે અમારી તરફથી કોઈ કસર બાકી નથી. અમે કહ્યું તેમ તેની તમામ વિગતો ચૂંટણી પંચને સોંપી દીધી છે.

તમને જણાવી દઈએ કે ઈલેક્ટોરલ બોન્ડ પર સુપ્રીમ કોર્ટના નિર્ણયના એક મહિના પછી પણ સ્ટેટ બેંક ઓફ ઈન્ડિયા તેના ડેટાને યોગ્ય રીતે જાહેર કરી શકી નથી. કોર્ટે SBIને ફરી ઠપકો આપવો પડ્યો. મુખ્ય ન્યાયાધીશ ડીવાય ચંદ્રચુડે પૂછ્યું હતું કે શું બેંક કોર્ટના નિર્ણયને સમજી શકી નથી? સોમવારની સુનાવણીમાં, મુખ્ય ન્યાયાધીશ ચંદ્રચુડે બેંકો અને કંપનીઓ વતી હાજર રહેલા વકીલોને નિર્દેશ આપ્યો કે એસબીઆઈને 21 માર્ચે સાંજે 5 વાગ્યા પહેલા બોન્ડ્સ સંબંધિત તમામ ડેટા જાહેર કરવાનો આદેશ આપે. નિર્ણય અનુસાર, બેંક બોન્ડનો ડેટા ચૂંટણી પંચને સોંપવાનો હતો, જે આયોગની સાઇટ પર પ્રકાશિત કરવામાં આવશે, જેથી તે સરળતાથી મળી શકે. આ આદેશ બાદ SBIએ ગુરુવારે ચૂંટણી પંચને આ ડેટા આપ્યો.

સુપ્રીમ કોર્ટે કયા ફોર્મેટમાં ડેટા માંગ્યો?

સામાન્ય મતદારો ડેટાને સરળતાથી સમજી શકે તે માટે સુપ્રીમ કોર્ટે કહ્યું હતું કે સ્ટેટ બેંકે તમામ ડેટા યુનિક કોડ સાથે જાહેર કરવો જોઈએ. જો બેંક યુનિક કોડ સાથે ડેટા રીલીઝ કરે છે, તો બેંકે બે ભાગમાં ડેટા રીલીઝ કરવો જોઈએ. ભાગ-1 માં, ઈલેક્ટોરલ બોન્ડની ખરીદીની તારીખ, ખરીદનારના નામ, બોન્ડનો યુનિક કોડ અને તેનો સંપ્રદાય એટલે કે તેની કિંમત આપવી જોઈએ. ભાગ-2 માં, ઈલેક્ટોરલ બોન્ડના રિડેમ્પશનની તારીખ, રિડીમિંગ પાર્ટી, બોન્ડનો યુનિક કોડ અને બોન્ડનું ડિનોનેશન એટલે કે તેની કિંમત આપવી જોઈએ.

બેંગલુરુમાં ‘નો પૂલ પાર્ટી, નો રેન ડાન્સ’: લોકોને અપીલ

બેંગલુરુ: શહેર હાલના દિવસોમાં પાણીના સંકટથી પસાર થઈ રહ્યું છે. પીવાના પાણી માટે પણ લોકોએ લાંબી-લાંબી લાઇનોમાં કલાકો સુધી ઊભા રહેવું પડે છે. રંગોનો તહેવાર હોળી નજીક છે. આવામાં હોળીનો તહેવાર કેવી રીતે ઊજવવો? એના પર શહેરના જળ બોર્ડે લોકોને ખાસ અપીલ કરી છે.

બોર્ડે રહેવાસીઓને કહ્યું છે કે તેઓ હાલના દિવસોમાં શહેરમાં પેદા થયેલા જળસંકટને ધ્યાનમાં રાખતાં પૂલ પાર્ટી, રેન ડાન્સ જેવા કાર્યક્રમોથી દૂર રહેવું જોઈએ અને યોજવા ના જોઈએ. બોર્ડે બોરવેલના પાણીના ઉપયોગ કરવાની પણ મનાઈ ફરમાવી છે. શહેરમાં આગામી IPLની ક્રિકેટ મેચો દરમ્યાન ચિન્નાસ્વામી સ્ટેડિયમને પ્રતિ દિન 75,000 લિટરથી વધુ પાણી મળશે.

બોર્ડે કહ્યું છે કે હાલના સમયે શહેર જળસંકટમાંથી પસાર થઈ રહ્યું છે, ત્યારે હાલના સમયે વ્યાવસાયિક ઉદ્દેશો માટે રેન ડાન્સ અને પૂર પાર્ટી જેવાં મનોરંજનો ઉચિત નથી.  દેશની સિલિકોન વેલી ગંભીર જળ સંકટનો સામનો કરી રહી છે અને પ્રતિ દિન 50 કરોડ લિટર પાણીની ટંચાઈનો સામનો કરી રહી છે.

બીજી બાજુ, માર્ચમાં દેશનાં મુખ્ય જળાશયોમાં પાણી પાંચ વર્ષના નીચલા સ્તરે પહોંચી ગયાં છે, એમ સરકારી આંકડાઓ કહે છે.

વળી, એપ્રિલ અને મેમાં મધ્ય ભારત અને દક્ષિણ ભારતનાં શહેરોમાં સ્થિતિ વધુ વણશે એવી શક્યતા છે. મહારાષ્ટ્ર, આંધ્ર પ્રદેશ જેવાં ઓદ્યૌગિક રાજ્યો અને ઉત્તર પ્રદેશ અને પંજાબ જેવાં કૃષિપ્રધાન રાજ્યોમાં પાણીના સ્તર 10 વર્ષની સરેરાશથી પણ નીચે છે.

 

 

 

 

 

વિજય તો મળશે જ, પણ…

આજથી થોડા જ દિવસોમાં હોલિકા દહન તેમ જ રંગોત્સવની ઉજવણી દેશભરમાં થશે. ધુલેટીની આગલી રીતે ઠેર ઠેર હોળી પ્રગટે ને એની અગનજ્વાળાનો પ્રકાશ આસપાસ ફેલાય. આપણે એ સમયમાં જીવી રહ્યા છીએ, જ્યાં વિજ્ઞાનની કૃપાથી એક ચાંપ દબાવીને અજવાળાં કરી શકીએ છીએ. હા, ઔદ્યોગિક ક્રાંતિથી આપણને ભૌતિક સાધન મળ્યાં, પરંતુ તેનાં અજવાળાં તળે અનૈતિકતા અને દુરાચાર વ્યાપી રહ્યાં છે તેનાથી કેટલા માહિતગાર હશે? આજે માણસ જ માણસને મારી બીજાનાં જીવનમાં હોળી પ્રગટાવે છે. નૈતિક મૂલ્યો મૃતપ્રાય થયાં છે. હિંસા, આતંકવાદ, જુગાર, વ્યભિચાર, વ્યસન વગેરે નાથી શકાય તેવાં બેકાબૂ બની ગયાં છે. આથી જ પ્રખર અવકાશ વિજ્ઞાની વૉર્ન બ્રાઉને કહેવું પડ્યું કે: ‘વિશ્વના તમામ મનુષ્યોનાં હૃદયમાં ભગવાન વસી જાય અને આપણને સૌને નૈતિક માર્ગદર્શન આપે તો જ આપણે યાંત્રિક ક્રાંતિનાં જોખમોમાંથી બચી શકીએ તેમ છીએ. બીજો તો કોઈ ઉપાય દેખાતો નથી.’

હોળીની જેમ દિવાળી પણ આપણો મોટો ઉત્સવ. પર્વાધિરાજ. આ અવસરે વેપારીઓ ચોપડાપૂજન કરી શારદાપૂજન દ્વારા આ દિવસે પોતાના આગામી વર્ષના હિસાબ શુદ્ધ રાખવાની ભાવના કરે છે. પૂજ્ય પ્રમુખસ્વામી મહારાજ કહેતા કે ‘લોકમાં વાત થાય છે કે રામજી ચોપડા ચોખ્ખા રાખે, પણ રામજીના ચોપડા તો ચોખ્ખા છે જ. આપણે આપણા ચોપડા ચોખ્ખા રાખવા. જીવનનો ચોપડો ચોખ્ખો ત્યારે રહે, જ્યારે સદગુણોની કમાણી ચાલુ હોય.’

એક નાનકડી કથા છેઃ ગામના કૂવા પાસે ઊભીને ચાર સ્ત્રીઓ પાણી ભરી રહી હતી. વારાફરતી દરેક સ્ત્રી કૂવામાંથી પાણી ખેંચતી. એક પાણી ખેંચે ત્યારે બીજી બધી પોતપોતાનાં છોકરાંની પ્રશંસા કરતી, તેમના ગુણો ગણાવતીઃ

એક કહે કે મારા છોકરાનો અવાજ એટલો મીઠો છે કે એને તો રાજદરબારમાં સ્થાન મળશે.

બીજી કહે કે મારા છોકરાએ શરીર એટલું મજબૂત બનાવ્યું છે કે મોટો થઈને એ ભલભલા પહેલવાનને પછાડશે, તમે મારી આ વાત યાદ રાખજો.

ત્રીજી કહે કે મારો છોકરો એટલો બુદ્ધિશાળી છે કે શાળામાં એ હંમેશાં પહેલો નંબર જ લાવે છે. તેને કોઈ પણ બુદ્ધિનું કામ સોંપો એટલે તેમાં અવ્વલ જ હોય.

ચોથી સ્ત્રીએ દોરડાથી ઘડો ખેંચતાં ખેંચતાં એટલું જ કહ્યું કે મારો છોકરો તો ગામના બીજા છોકરા જેવો જ સીધોસાદો ને સરળ છે… આ વાત ચાલી રહી હતી તે જ વખતે એમનાં છોકરાં શાળાએથી ઘર તરફ જવા ત્યાંથી જ નીકળ્યાં. એક ગાતો ગાતો આવતો હતો, બીજો મસ્તી કરતો અને ત્રીજો ખુલ્લાં પુસ્તકો સાથે. ચોથી સ્ત્રીનો છોકરો પહેલાં તો ચારેય સ્ત્રીને વારાફરતી પગે લાગ્યો. પછી એણે પોતાની માના હાથમાંથી ભરેલો પાણીનો ઘડો લઈ લીધો ને ઘરે જવા લાગ્યો. આ જોઈ કૂવા પાસે બેઠેલા એક વયોવૃદ્ધ સજ્જન, જે ક્યારના તે ચારેય સ્ત્રીઓની વાત સાંભળી રહ્યા હતા, તેમણે ચારેય સ્ત્રીઓને કહ્યું, ‘તમારાં મંતવ્ય ભલે અલગ અલગ હોય, પણ મારા મતે આ ચોથો છોકરો સૌથી સારો છે. એનો શિષ્ટાચાર જોયો?’

ખરેખર, દરેકનું ભવિષ્ય એના શિષ્ટાચારથી નક્કી કરી શકાય છે અને આવી બોધકથાના આધારે આપણે જાતનું અવલોકન-મૂલ્યાંકન કરવાનું છેઃ આપણે સંસ્કાર, શિષ્ટાચાર, અભ્યાસ, પુરુષાર્થ, વગેરેમાં ક્યાં ઊણા ઊતરીએ છીએ? જ્યારે જ્યારે આપણે આવા વિચારોનું પાન કરીએ ત્યારે આપણને એમ લાગતું હશે કે હજુ તો મારે ઘણું ઘણું કરવાનું અને સુધારવાનું છે. કદાચ મનના કોઈ ખૂણે નિરાશાનો વિચાર પણ ઝબકી રહ્યો હશે કે આટલું બધું કેવી રીતે થઈ શકે? ક્યાંથી, કેવી રીતે મારે શરૂ કરવું? પણ નજર હંમેશાં સમાધાન તરફ રાખવી જોઈએ પ્રશ્ન તરફ નહીં. કહે છેને કે ‘સ્લો ઍન્ડ સ્ટડી વિન્સ ધ રેસ… ધીમી અને સાતત્યપૂર્ણ દોડ આપણને જરૂર વિજય અપાવશે, બસ, સમયે સમયે જાતનું મૂલ્યાંકન કરતા રહો.

(સાધુ જ્ઞાનવત્સલદાસ -બી.એ.પી.એસ)

(પોતાનાં પ્રેરણાદાયી વક્તવ્યોથી દેશ-દુનિયામાં અત્યંત જાણીતા એવા સાધુ જ્ઞાનવત્સલદાસ બોચાસણવાસી અક્ષરપુરુષોત્તમ સ્વામિનારાયણ સંપ્રદાય-BAPSના અગ્રણી સંત છે. એમના વાંચન-ચિંતનનો વ્યાપ વિશાળ છે. હિન્દુ સંસ્કૃતિ ઉપરાંત વિશ્વની 200થી વધુ મહાન વ્યક્તિઓની આત્મકથાનું વાંચન અને ઊંડો અભ્યાસ એમણે કર્યો છે. એમને ડોક્ટર ઓફ લિટરેચર-D. Litt ની પદવી પણ પ્રાપ્ત થઈ છે.)

કોંગ્રેસે એકાઉન્ટ્સ ફ્રીઝ મામલે સુપ્રીમ કોર્ટનાં દ્વાર ખટખટાવ્યાં

નવી દિલ્હીઃ બેન્ક એકાઉન્ટ્સ ફ્રીઝ કરવાને મામલે કોંગ્રેસે સુપ્રીમ કોર્ટનાં દ્વાર ખટખટાવ્યાં છે. કોંગ્રેસ નેતાઓએ એક પત્રકાર પરિષદમાં જણાવ્યું હતું કે તેઓ ચૂંટણીપ્રચાર માટે એકાઉન્ટ્સમાંથી પૈસા નથી કાઢી શકતા અને એટલે કોર્ટમાં અરજી દાખલ કરવામાં આવી છે.

કોંગ્રેસ પાર્ટીએ નરેન્દ્ર મોદી સરકાર અને ભાજપ પર મોટો હુમલો કર્યો છે. કોંગ્રેસના ત્રણે દિગ્ગજ નેતાઓ- મલ્લિકાર્જુન ખડગે, સોનિયા ગાંધી અને રાહુલ ગાંધીએ પત્રકાર પરિષદમાં દાવો કર્યો હતો કે કોંગ્રેસ પાર્ટીનાં બેન્ક એકાઉન્ટ ફ્રીઝ કરી દીધાં છે, જેને કારણે તેઓ ચૂંટણીપ્રચાર નથી કરી શકતા.રાહુલ ગાંધીએ કહ્યું હતું કે એક મહિના પહેલાં કોંગ્રેસ પાર્ટીનાં બધાં એકાઉન્ટ ફ્રીઝ કરી દેવામાં આવ્યાં છે. જોકોઈ પરિવારનાં બેન્ક એકાઉન્ટ ફ્રીઝ કરશો તોએ ભૂખ્યો મરી જશે. એ કોંગ્રેસ પાર્ટીની સાથે કરવામાં આવ્યું છે, પણ કોઈ સંસ્થાએ, કોર્ટે, ચૂંટણી પંચે કે કોઈએ કશું કંઈ કહ્યું નથી. આજે અમે રેલવે ટિકિટ નથી ખરીદી શકતા. અમે અમારા નેતાઓને એક જગ્યાથી બીજી જગ્યાએ નથી મોકલી શકતા.

તેમણે કહ્યું હતું કે આ મુદ્દો સાત વર્ષ જૂનો છે અને રૂ. 14 લાખનો મુદ્દો છે, જેને કારણે કોંગ્રેસ પાર્ટીનાં બધાં બેન્ક એકાઉન્ટ ફ્રીઝ કરી દેવામાં આવ્યાં છે અને રૂ. 200 કરોડનો દંડ ફટકારવામાં આવ્યો છે.

એકાઉન્ટ્સ ફ્રીઝ મામલે કોંગ્રેસ અને કેન્દ્રની મોદી સરકારની વચ્ચે ખટરાગ જોવા મળી રહ્યો છે. વાસ્તવમાં ઇન્કમ ટેક્સે કોંગ્રેસના બેન્ક એકાઉન્ટ્સને ફ્રીઝ કરી દીધા હતા. એને લઈને ઘણો વિવાદ થયો હતો અને પાર્ટીએ સરકાર પર જાણીબૂજીને કાર્યવાહી કરવાનો આરોપ લગાડ્યો હતો. જો વિભાગનું કહેવું હતું કે વર્ષ 2018-19 માટે ઇન્કમ ટેક્સ રિટર્ન દાખલ કરવામાં ગેરરીતિઓ જોવા મળ્યા હતા, જે પછી આ પગલું ભરવામાં આવ્યું હતું. ઇન્કમ ટેક્સે આરોપ લગાવ્યો હતો કે કોંગ્રેસ પાર્ટીના ઓડિટર્સે પૈસાનો દુરુપયોગ કર્યો. પાર્ટી પર ટેક્સથી જોડાયેલા અપરાધોમાં પણ સામેલ થવાનો આરોપ લગાવવામાં આવ્યો હતો.

 

 

 

 

 

 

વર્લ્ડ હેડ ઈન્જરી અવેરનેસ-ડે: સિનિયર ન્યૂરોસર્જન પાસેથી મેળવો મહત્વની માહિતી

જામનગર: તા. ર૦ માર્ચના વિશ્વભરમાં લોકોમાં જાગૃતતા લાવવા માટે વર્લ્ડ હેડ ઈન્જરી અવેરનેશ ડે તરીકે ઉજવાય છે. આ સંદર્ભમાં માથાની ઈજા અંગે જનજાગૃતિ ફેલાવવા વિવિધ કાર્યક્રમો યોજાય છે. ત્યારે જામનગરના ડૉ. એ. ડી. રૂપારેલીયા કે જેઓ પોતે સિનિયર ન્યૂરોસર્જન છે. તેઓ આપણને કેટલીક મહત્વની માહિતી આપી રહ્યા છે.

પ્રવર્તમાન સમયમાં વાહનોની સંખ્યામાં ખૂબ જ વધારો થઈ રહ્યો છે અને તેની સાથે વાહન અકસ્માતોનું પ્રમાણ અને અકસ્માતોને લીધે મૃત્યુનું પ્રમાણ ચિંતાજનક રીતે વધી રહ્યું છે. માર્ગ અકસ્માત એ જાણે આપણી જીંદગીનો કમનશીબ હિસ્સો બની રહ્યો છે, અને એક અર્થમાં આ અકસ્માતોમાં માથામાં થતી ઈજા ૧૦૦ ટકા માનવસર્જીત છે તેમ કહેવામાં અતિશયોક્તિ નથી.

માથાની ઈજાએ દુનિયાભરમાં સૌથી મોટો પબ્લિક હેલ્થ પ્રોબ્લેમ છે વિકસીત તથા વિકાસશીલ દેશોમાં આ સમસ્યા એપિડેમીક સ્વરૂપમાં પ્રસરી રહી છે. ભારતમાં અત્યારે દર ૧ મિનિટે વાહન અકસ્માત થાય છે અને દર પ મિનિટે વાહન અકસ્માતને કારણે ૧ મૃત્યુ થાય છે. સરેરાશ આખા વર્ષમાં ભારતમાં માથાની ઈજાના કારણે દોઢ લાખ લોકોના મૃત્યુ તથા પ લાખ લોકો ઈજાગ્રસ્ત થાય છે. માર્ગ અકસ્માતમાં ૭પ ટકા મૃત્યુ મગજની ઈજાના કારણે થાય છે. મૃત્યુ થવાના મુખ્ય કારણોમાં કેન્સર, હાર્ટ એટેક પછી મગજની ઈજાનો નંબર આવે છે, અને સૌથી વધારે કરૂણતા તો એ છે કે માથાની ઈજા સૌથી વધારે યુવા વર્ગમાં, ર૦ થી ૪૦ વર્ષની ઉંમરમાં થઈ રહી છે.

આ સંજોગોમા પ્રશ્ન ઉભો થાય છે કે શું માથાની ઈજા અટકાવી શકાય ? માથામાં ઈજા થાય તો તાત્કાલિક શું કરવું ? શા માટે માથાની ઈજા ગંભીર કે જીવલેણ હોય છે? માનવ શરીરનું મગજ અમુક ક્ષમતા સુધી જ ઈજા સહન કરી શકે છે. ઈજાના કારણે ઓક્સિજન અને લોહીનું પરિભ્રમણ મગજમાં જો ઓછું થઈ જાય તો મગજમાં ગંભીર અસરો અને તેના પરિણામો ઉદ્દભવતી અનેક સમસ્યાઓ સર્જાય છે. માથાની ઈજા સંપૂર્ણપણે અર્થાત ૧૦૦ ટકા અટકાવી શકાય છે જેમાં (૧) ટ્રાફિકના નિયમોનું ચુસ્તપણે પાલન કરવું જેમ કે હેલ્મેટ પહેરવી, સીટ બેલ્ટ બાંધવો વગેરે (ર) ઔદ્યોગિક એકમોમાં ફરજ સમયે સતર્ક રહેવું, એકાગ્રતા રાખવી વગેરે (૩) શાળા-કોલેજોમાં વિદ્યાર્થીઓ તથા યુવા વર્ગને માર્ગ સલામતિનું શિક્ષણ આપવું (૪) દારૂ પીને વાહન ન ચલાવવું (પ) વાહનની ગતિ મર્યાદાનું પાલન વગેરે કરવાથી અકસ્માતોનું પ્રમાણ ઘટી શકે છે અને તેથી માથાની ઈજાથી બચી શકાય છે.

સાયન્સ સિટી ખાતે વિશ્વ ચકલી દિવસની અનોખી ઉજવણી!

અમદાવાદ: ગુજરાત સરકારના વિજ્ઞાન અને ટેક્નોલોજી વિભાગ હેઠળ કાર્યરત ગુજરાત સાયન્સ સિટીના નેચર ક્લબ ઈકો લાઈફ દ્વારા 20મી માર્ચે વિશ્વ ચકલી દિવસની ઉજવણી કરવામાં આવી.

આ પ્રસંગે ‘સ્પેરો મેન’ તરીકે જાણીતા જગત કિંખાબવાલા ખાસ ઉપસ્થિત રહ્યા હતા. જેમણે પૃથ્વી પર વધતું જતું પ્રદૂષણ તથા અન્ય પરિબળોને કારણે ચકલી સહિતના પક્ષીઓ અને અન્ય જીવોને થતા નુકસાન વિશે વાત કરી હતી. તેમણે પર્યાવરણમાં ચકલી સહિતના દરેક જીવોનું મહત્વ અને તેમના સંરક્ષણ માટેના ઉપાયો વિશે જણાવ્યું હતું. કાર્યક્રમના અંતમાં જગત કિંખાબવાલાએ વિદ્યાર્થીઓને એનિમલ એન્થમ થકી આ જીવોના સંરક્ષણ અર્થેનો સંદેશ પાઠવવાની પ્રતિજ્ઞા લેવડાવી હતી.

કાર્યક્રમમાં સહભાગી વિદ્યાર્થીઓએ ‘ચકી બેન ચકી બેન’ ગીત ગાઈ ચકલીઓને ફરીથી પોતાના ઘરે આવવા માટે આમંત્રિત કરી હતી. તથા ‘Save Sparrow, Save Birds’ જેવા સ્લોગન રાઇટિંગ કરીને પોતાના મનના પ્રતિભાવ જણાવ્યા હતા. આ દરમિયાન વિદ્યાર્થીઓને ચકલી ઘરનું વિતરણ પણ કરવામાં આવ્યું હતું.

આ કાર્યક્રમમાં કાલુપુર પ્રાયમરી સ્કૂલ, આચાર્ય એકેડેમી, ચિલ્ડ્રન્સ ડેવલોપમેન્ટ ફોર એજ્યુકેશન સેન્ટર તથા ગવર્નમેન્ટ સાયન્સ કોલેજ ગાંધીનગરના વિદ્યાર્થીઓ તથા શિક્ષકોએ ઉત્સાહપૂર્વક ભાગ લીધો હતો.

1...1,9891,9901,991...5,110Page 1,990 of 5,110