કોલકાતાઃ પશ્ચિમ બંગાળની રાજધાની કોલકાતાના સૌથી વ્યસ્ત બજારમાંથી એક ઠાકુરપુર બજારમાં રવિવારે સવારે એક કાર ભીડ પર ફરી વળી હતી. આ દુર્ઘટનામાં એક વ્યક્તિનું મોત થયું હતું, જ્યારે અન્ય અનેક લોકો ઈજાગ્રસ્ત થયા હતા. પોલીસે આ મામલે જ્યારે તપાસ કરી તો જાણ થઈ કે કારચાલક એક જાણીતા ટીવી સિરિયલનો ડિરેક્ટર હતો. તેની સાથે કારમાં એક પ્રસિદ્ધ બંગાળી એન્ટરટેઈનમેન્ટ ચેનલનો કાર્યકારી નિર્માતા સવાર હતો. આ ઘટના પછી સ્થાનિક લોકોએ બંનેને અટકાવીને તેને માર માર્યો હતો.
પોલીસે સિદ્ધાંત દાસ ઉર્ફે વિકટોની ધરપકડ કરી હતી. વિકટો બંગાળી ફિલ્મ ઈન્ડસ્ટ્રીમાં કામ કરતો એક ડિરેક્ટર છે. તે ઘટના સમયે કાર હંકારી રહ્યો હતો. કારમાં એક બંગાળી એન્ટરટેઇનમેન્ટ ચેનલની એક્ઝિક્યુટિવ પ્રોડ્યુસર શ્રેયા બસુ નામની મહિલા યાત્રી હતી.
ડેલી સિરિયલની સફળતાની ઉજવણી કરવા માટે શનિવારે રાતે કોલકાતાના સાઉથ સિટી મોલમાં અડધી રાતે તેઓ બંને પાર્ટી કરવા પહોંચ્યા હતા. તેમાંના મોટા ભાગના લોકો દારૂના નશામાં ચૂર થઇને રાતે બે વાગ્યે નીકળ્યા હતા. જોકે સિદ્ધાંત દાસ અને શ્રેયા બસુ કાર લઇને શહેરમાં ફરતા રહ્યા હતા. રવિવારે સવારે અચાનક તેમની કાર ઠાકુરપુર બજારમાં ઘૂસી ગઈ અને એક પછી એક અનેક લોકોને ફંગોળી નાખ્યા. એક પ્રત્યક્ષદર્શીએ કહ્યું હતું કે તેમની કાર વિષ્ણુપુર તરફથી આવતી હતી. પોલીસના જણાવ્યાનુસાર આ દુર્ઘટનામાં અત્યાર સુધી કુલ 6 લોકો ઈજાગ્રસ્ત થયાની માહિતી મળી છે.
