અમદાવાદઃ એશિયન બજારોમાં તેજી છતાં ઘરેલુ શેરબજારોમાં ત્રીજા ટ્રેડિંગ સેશનમાં ઘટાડા સાથે બંધ થયાં હતાં. રોકાણકારોના ઊંચા મૂલ્યાંકન, સેન્સેક્સની વીકલી એક્સપાયરી અને ટ્રમ્પની ટેરિફને કારણે વૈશ્વિક અનિશ્ચિતતાની વચ્ચે બજારમાં ભારે ઉતાર-ચઢાવ જોવા મળ્યા હતા. રોકાણકારોના રૂ. 2.5 લાખ કરોડ સ્વાહા થયા હતા.
મજબૂત અમેરિકી ટ્રેઝરી યિલ્ડ અને વૈશ્વિક વેપારને લઈને વધતી અનિશ્ચિતતાની વચ્ચે વિદેશી રોકાણકારોની વેચવાલીને કારણે ફાઇનાન્શિયલ અને IT શેરોમાં ભારે ઘટાડો નોંધાયો હતો. બીજી બાજુ, ઇરાની LPG આયાતમાં અમેરિકી તપાસ પર અદાણી ગ્રુપના શેરોમાં ઘટાડાની અસર બજારના સેન્ટિમેન્ટ્સ પર પડી હતી.
વૈશ્વિક નબળા સંકેતો, ધીમો આર્થિક વિકાસ અને જિયોપોલિટિકલ ટેન્શનને કારણે રોકાણકારોના સેન્ટિમેન્ટ પર નકારાત્મક અસર પડી હતી, જેનાથી બજારમાં ભારે વેચવાલી જોવા મળી હતી. ટ્રેડિંગ સેશનને અંતે સેન્સેક્સ 636 પોઇન્ટ તૂટીને 80,7373.51 પર બંધ થયો હતો. નિફ્ટી 174 પોઇન્ટ તૂટીને 24,543ના મથાળે બંધ થયો હતો. નિફ્ટી બેન્ક 303 પોઇન્ટ તૂટીને 55,600ના સ્તરે બંધ થયો હતો. નિફ્ટી મિડકેપ 259 પોઇન્ટ તૂટીને 57,517ના મથાળે બંધ થયો હતો. નિફ્ટી પ્રાઇવેટ બેન્ક ઇન્ડેક્સ એક ટકાથી વધુ ઘટ્યો હતો.
BSE પર કુલ 4144 શેરોમાં કામકાજ થયાં હતાં. એમાં 1733 શેરો તેજી સાથે બંધ થયા હતા અને 2264 શેરોમાં ઘટાડો થયો હતો. આ સાથે 147 શેરો સપાટ બંધ થયા હતા. આ સિવાય 108 શેરોએ નવી 52 સપ્તાહની ઊંચી સપાટી સર કરી હતી, જ્યારે 37 શેરોએ 52 સપ્તાહના નવા નીચલા સ્તરે સ્પર્શ્યા હતા. આ સાથે 268 શેરોમાં અપર સરકિટ લાગી હતી, જ્યારે 208 શેરોમાં લોઅર સરકિટ લાગી હતી.
