નવી દિલ્હીઃ દેશભરમાં રક્ષાબંધનથી તહેવારોનો પ્રારંભ થઈ ગયો છે. દક્ષિણ ભારતમાં ઓનમના તહેવારનો માહોલ છે. દરેક જણ ઓણમના તહેવારને લઈને ઉત્સાહિત છે. આ તહેવાર ખાસ કરીને કેરળમાં મુખ્ય રીતે ઊજવવામાં આવે છે. એમાં પણ ખાસ કરીને ખેડૂતોનો આ તહેવાર છે, જે પાક ને સારા મોસમનો આભાર વ્યક્ત કરવા માટે ઊજવવામાં આવે છે.
આ વર્ષે ઓણમ સીઝનમાં લોકોએ ખૂબ જામ છલકાવ્યા છે, જેને જોઈને લાગે કે દેશમાં મોંઘવારી કોઈને નથી નડતી. કેરળમાં દારૂની રેલમછેલ થઈ છે, જેણે પાછલા વર્ષનો રેકોર્ડ તોડ્યો છે. સીઝનના પહેલા નવ દિવસોમાં સોમવાર સુધી રાજ્યમાં રૂ. 665 કરોડના રેકોર્ડ વેચાણ નોંધાયું છે, જે પાછલા વર્ષે રૂ. 624 કરોડની તુલનાએ રૂ. 41 કરોડ વધુ નોંધાયું છે. આ વર્ષે ઓણમ 30 ઓગસ્ટથી શરૂ થઈને આઠ સપ્ટેમ્બર સુધી ચાલશે. એક અહેવાલ અનુસાર કેરળ સ્સેટ બેવરેજીસ કોર્પોરેશનના ‘ઉથ્રાડોમ દિવસે’ બેવકો આઉટલેટ્સના માધ્યમથી દારૂનું કુલ વેચાણ રૂ. 112 કરોડથી વધીને આ વર્ષે રૂ. 116.1 કરોડ નોંધાયું હતું. 
બેવકોના અધિકારીઓએ કહ્યું હતું કે બુધવાર સુધીમાં દારૂનું કુલ વેચાણ રૂ. 770 કરોડ થવાની અપેક્ષા છે, જે ગયા વર્ષે રૂ. 700.06 કરોડ હતું. મલયાલમ નવું વર્ષ ઓણમના દિવસે શરૂ થાય છે. આ તહેવાર મલયાલમ કેલેન્ડરના ચિંગમ મહિનામાં ઊજવવામાં આવે છે. આ તહેવાર સામાજિક અને સાંસ્કૃતિક એકતાને પ્રતિબિંબિત કરે છે. ઓણમ તહેવારમાં પરંપરાગત નૃત્યો, ભવ્ય શોભાયાત્રા, આનંદસભર મેળાવળા અને પ્રાર્થના દ્વારા રાજા મહાબલીના પરત ફરવાની ઉજવણી કરવામાં આવતી હોય છે. વિદ્યાર્થીઓએ પારંપારિક પોશાક પહેરીને નૃત્યો કરી ઉત્સાહભેર ઉજવણી કરવામાં આવી હતી. પારૂલ યુનિવર્સિટીના કેમ્પસમાં 6000થી વધુ દક્ષિણ ભારતીય વિદ્યાર્થીઓએ ભાગ લીધો હતો.
