નવી દિલ્હીઃ દિલ્હીના શાહબાદ ડેરી વિસ્તારમાં 16-વર્ષની સાક્ષી નામની એક છોકરીની કરપીણ હત્યા કરનાર સાહિલ નામના 20 વર્ષીય કિશોરની દિલ્હી પોલીસે ઉત્તર પ્રદેશના બુલંદશહરમાંથી આજે બપોરે ધરપકડ કરી છે. આરોપી સાહિલ શાહબાદ ડેરી વિસ્તારમાં એસી મિકેનિક તરીકે કામ કરતો હતો.
સાહિલને સાક્ષી સાથે પ્રેમ હતો. પરંતુ ગઈ કાલે રવિવારે એમને કોઈક વાતે ઝઘડો થયો હતો. સાક્ષીએ એનાં એક સંબંધીનાં જન્મદિવસની પાર્ટીમાં જવાનું નક્કી કર્યું હતું. સાહિલને તે ગમ્યું નહોતું. એટલે એણે સાક્ષીનો પીછો કર્યો હતો અને રસ્તામાં એની પર ચાકૂ વડે ઘાતકી રીતે હુમલો કર્યો હતો. શાહબાદ વિસ્તારમાં જે.જે. કોલોનીમાં સાક્ષીનાં ઘરની બહાર જ તેની અત્યંત કરપીણ રીતે હત્યા કરી હતી. એનો કાળજું કંપાવી દે તેવો વિડિયો પોલીસે કબજામાં લીધો છે. સાહિલે નિર્દયતાપૂર્વક સાક્ષીને ચાકૂના 40 ઘા માર્યાં હતાં અને ત્યારબાદ પથ્થર વડે એનું માથું છુંદી નાખ્યું હતું. હત્યા કર્યા બાદ એ ફરાર થઈ ગયો હતો. રસ્તામાં કેટલાક રાહદારીઓએ તે કરપીણ હત્યા જોઈ હતી, પરંતુ કોઈ સાક્ષીની મદદે ગયું નહોતું.
આ ભયાનક બનાવ અંગે મુખ્ય પ્રધાન અરવિંદ કેજરીવાલે આઘાતની લાગણી વ્યક્ત કરી છે.
સાહિલને પકડવા માટે દિલ્હી પોલીસે છ ટીમ તૈયાર કરી હતી. પોલીસના ચોપડે અગાઉ સાહિલના નામે કોઈ ક્રિમિનલ રેકોર્ડ નોંધાયો નહોતો.
