મુંબઈઃ નેશનલ ઇન્ટરનેશનલ એક્સચેન્જે (NSE IXએ) PM મોદીની સાઇપ્રસ મુલાકાત દરમ્યાન સાઇપ્રસ સ્ટોક એક્સચેન્જ (CSE) સાથે ક્રોસ અને ડ્યુઅલ લિસ્ટિંગ્સને સક્ષમ કરવા અને દ્વિપક્ષી મૂડીબજારમાં સહયોગ વધારવા માટે વ્યૂહાત્મક સમજૂતી કરાર (MoU) કર્યા છે.
ગુજરાતના ગાંધીનગર સ્થિત GIFT સિટીમાં આવેલા NSE ઇન્ટરનેશનલ એક્સચેન્જ (NSE IX) અને સાઇપ્રસ સ્ટોક એક્સચેન્જ (CSE) વચ્ચે વ્યૂહાત્મક સમજૂતી કરાર પર હસ્તાક્ષર થયા છે, એ એક ઐતિહાસિક પગલું છે. સાઇપ્રસના લિમાસોલ શહેરમાં આયોજિત “Advancing a Strategic Economic Partnership” નામના રાઉન્ડટેબલ કાર્યક્રમમાં આ સમજૂતી કરાર પર હસ્તાક્ષર થયા હતા. આ કાર્યક્રમમાં સાઇપ્રસના રાષ્ટ્રપતિ નિકોસ ક્રિસ્ટોડુલિડેસ ઉપસ્થિત રહ્યા હતા.
આ સમજૂતીપત્રના મુખ્ય ઉદ્દેશો નીચે મુજબ છે:
- નાણાકીય સાધનોના ક્રોસ અને ડ્યુઅલ લિસ્ટિંગ્સ
- નવીન નાણાકીય ઉત્પાદનોના સંયુક્ત વિકાસ
- નોલેજ અને સંશોધન સહયોગ
- ક્ષમતા નિર્માણ અને તાલીમ કાર્યક્રમો
- ફિનટેક સંબંધિત પ્રવૃત્તિઓ અને અન્ય કાર્યક્રમો
આ વ્યૂહાત્મક સહયોગ ભારત અને યુરોપિયન મૂડીબજારો વચ્ચેના સંબંધોને મજબૂત બનાવવાનો પ્રયાસ છે અને GIFT સિટીને વૈશ્વિક નાણાકીય હબ તરીકે ઊભું કરવા ભારતની દૃઢ ઇચ્છાને પ્રતિબિંબિત કરે છે. આ કાર્યક્રમમાં વડા પ્રધાન નરેન્દ્ર મોદીએ જણાવ્યું હતું કે સાઇપ્રસ સ્ટોક એક્સચેન્જ અને NSE વચ્ચે ગુજરાતની GIFT સિટીમાં સહયોગ માટે સહમતી થઈ છે, એનો મને આનંદ છે.
NSEના મેનેજિંગ ડિરેક્ટર અને CEO આશિષકુમાર ચૌહાણે કહ્યું હતું કે આ MoU ડ્યુઅલ અને ક્રોસ લિસ્ટિંગ્સ, નવીન નાણાકીય ઉત્પાદનોના વિકાસ અને સંશોધન, તાલીમ તથા ક્ષમતા નિર્માણ જેવી પ્રવૃત્તિઓ માટે માર્ગ પ્રશસ્ત કરશે. આ સહયોગ બંને દેશોનાં મૂડીબજારની તકોમાં નવી દિશા આપશે.
NSE IXના MD અને CEO વી. બાલાસુબ્રમણિયમે ઉમેર્યું હતું કે સાઇપ્રસ સ્ટોક એક્સચેન્જ સાથેનો સહયોગ મજબૂત આંતરરાષ્ટ્રીય બજાર માળખું બનાવવાની દિશામાં મહત્વપૂર્ણ પગલું છે. આ સમજૂતી કરાર બંને યુરોપ અને ભારત માટે લાંબા ગાળાનું વ્યૂહાત્મક મૂલ્ય ઊભું કરશે.
