નવી દિલ્હીઃ છેલ્લા કેટલાક દિવસોથી ગરમી સતત વધી રહી છે. ગરમીથી લોકોના હાલ-બેહાલ થયા છે. આવનારા મહિનાઓમાં ગરમીમાં ઓર વધારો થવાની શક્યતા છે. વિશ્વમાં આ વર્ષે એપ્રિલનો મહિનો સૌથી ગરમ રહ્યો અને રેકોર્ડ ગરમી, વરસાદ, પૂરને કારણે અનેક દેશોમાં સામાન્ય જનજીવન અસ્તવ્યસ્ત થઈ ગયું હતું. યુરોપિયન યુનિયનમાં વર્ષ 2024માં ગરમીએ અત્યાર સુધીનો 83 વર્ષનો રેકોર્ડ તોડ્યો હતો.
કોપરનિક્સ ક્લાયમેટ ચેન્જ સર્વિસના અનુસાર આ એપ્રિલ 1940 પછી સૌથી વઘુ ગરમ હતો, જે સતત 11મો મહિનો છે, જે રેકોર્ડ પર સૌથી વધુ ગરમ છે. એપ્રિલમાં યુરોપિયન યુનિયનનું સરેરાશ તાપમાન 15.03 ડિગ્રી સેલ્સિયસ નોંધવામાં આવ્યું હતું. વર્ષ 2016ના એપ્રિલની તુલનામાં આ વર્ષે એપ્રિલ મહિનો 0.14 ડિગ્રી સેલ્સિયસ વધુ ગરમ હતો.
દેશના બાકીના ભાગોમાં ખાસ કરીને પૂર્વ અને દક્ષિણ ભારતમાં તાપમાન આ એપ્રિલમાં 1901 પછી આઠમો સતત ગરમ રહ્યો હતો. આ પહેલાં વર્ષ 2016ના એપ્રિલ મહિનો સૌથી વધુ ગરમ રહેવા માટે નોંધાયો હતો. એપ્રિલમાં ન્યૂનતમ તાપમાન સામાન્યથી 1.78 ડિગ્રી સેલ્સિયસ વધુ હતું અને સરેરાશ તાપમાન સામાન્યથી બે ડિગ્રી સેલ્સિયસ વધુ હતું.
C3Sના ડિરેક્ટર કાર્લો બૂનટેમ્પોએ કહ્યું હતું કે વર્ષના પ્રારંભમાં અલ નિનો એની ચરમસીમાએ હતું અને પૂર્વી ઉષ્ણકટિબંધ પ્રશાંત ક્ષેત્રમાં સમુદ્રની સપાટીનું તાપમાન હવે ન્યુટ્રલ સ્થિતિઓ તરફ પરત ફરી રહ્યું છે. બીજી બાજુ, ગ્રીનહાઉસ ગેસોની વધતી સાંદ્રતાને કારણે સમુદ્ર અને વાયુમંડળમાં હાજર વધારાની એનર્જી વૈશ્વિક તાપમાનને નવા રેકોર્ડ તરફ ધકેલતી રહેશે.
આ તાપમાન વૃદ્ધિને કારણે વિશ્વભરમાં રેકોર્ડ દુકાળ, જંગલોમાં આગ અને પૂર જેવી ઘટનાઓ જોવા મળી રહી છે. એક અભ્યાસ અનુસાર જળવાયુ ઘટનાઓની અસરથી વૈશ્વિક અર્થતંત્રને 2049 સુધી પ્રતિ વર્ષ આશરે 380 ખર્વ અમેરિકી ડોલરનું નુકસાન થવાની શક્યતા છે.
