અમદાવાદઃ હવામાન વિભાગે રાજ્યનાં વિવિધ સ્થળોએ ભારેથી અતિ ભારે વરસાદની ‘ઓરેન્જ’ ચેતવણી જારી કરી છે. વિભાગે જણાવ્યું હતું કે 24થી 28 જૂન દરમિયાન ઘણી જગ્યાએ હળવાથી મધ્યમ વરસાદની સંભાવના છે, જ્યારે 24થી 27 જૂન દરમિયાન એક કે બે વાર ભારે વરસાદ પડી શકે છે અને કેટલીક જગ્યાએ ખૂબ જ ભારે વરસાદ પડી શકે છે. છેલ્લા 24 કલાકમાં ગુજરાતમાં વરસાદે તબાહી મચાવી છે. તેના કારણે ઘણા વિસ્તારોમાં પાણી ભરાયા છે.
હવામાન વિભાગ (IMD)એ ચેતવણી આપી છે કે આગામી થોડા દિવસો સુધી વરસાદ ચાલુ રહેશે. 24 જૂને સૌરાષ્ટ્ર અને દક્ષિણ ગુજરાતના 16 જિલ્લાઓમાં ભારેથી અતિ ભારે વરસાદની આગાહી છે. અમરેલી, ભાવનગર, નવસારી અને વલસાડ માટે ઓરેન્જ એલર્ટ જારી કરવામાં આવ્યું છે, જ્યારે રાજકોટ, જૂનાગઢ, ગીર સોમનાથ, ભરૂચ, નર્મદા, સુરત, તાપી, ડાંગ, વડોદરા, છોટા ઉદેપુર, પંચમહાલ અને દાહોદ માટે યલો એલર્ટ જારી કરવામાં આવ્યું છે.
હવામાન વિભાગની આગાહી મુજબ છેલ્લા કેટલાક દિવસથી રાજ્યના હવામાનમાં પલટો આવ્યો છે. અરબ સાગરમાં કરંટ આવ્યો છે અને વરસાદી સિસ્ટમ બની છે. જેથી છેલ્લા 24 કલાકથી રાજ્યના મોટા ભાગના વિસ્તારમાં વરસાદ થઈ રહ્યો છે. જે અંતર્ગત છેલ્લા 24 કલાકમાં 170 તાલુકામાં વરસાદ થયો છે. સુરત જિલ્લામાં ગઈ કાલે ભારે વરસાદ થતાં લોકોને હાલાકી ભોગવવી પડી રહી છે.
ગઈ કાલે સૌરાષ્ટ્ર, દક્ષિણ સુરત અને મધ્ય સુરતમાં ધોધમાર વરસસાદ વરસ્યો છે. વરસાદ પડતાં લોકો ભારે હાલાકીમાં મુકાયા છે. ધંધા-રોજગાર પર જતા લોકોને ભારે અગવડતા પડી છે. સુરત જિલ્લાના દરેક તાલુકામાં એક ઈંચ કરતાં વધુ વરસાદ થયો છે.
