નડિયાદ: કોરોના વાયરસ ને ફેલાતો અટકાવવા માટે દેશવ્યાપી લોકડાઉન જાહેર કરવામાં આવ્યું છે. ખેડા પોલીસ તેનો અસરકારક અમલ કરાવવા સાથે પોતાનું સમાજ પ્રત્યેનું ઋણ પણ અદા કરી રહી છે. ખેડા જિલ્લા પોલીસ વડા દિવ્ય મિશ્રના માર્ગદર્શન હેઠળ પ્રોજેક્ટ શુભાષિશ શરૂ કરવામાં આવ્યો છે. આ પ્રોજેક્ટ હેઠળ એકલવાયું જીવન જીવતા વયોવૃદ્ધ નાગરિકોને આવશ્યક ચીજ વસ્તુઓનો પુરવઠો ઘરે પહોંચાડવામાં આવી રહ્યો છે.
આ પ્રોજેક્ટ હેઠળ નડિયાદ,કપડવંજ, કઠલાલ સહિત ખેડા જિલ્લામાં જરૂરિયાતમંદ વયોવૃદ્ધ નાગરિકોને ઘરે જઈ પોલીસ અધિકારીઓ દ્વારા આવશ્યક ચીજ વસ્તુઓ,દવાઓ,કરિયાણું પહોંચાડવામાં આવી રહ્યું છે. ખેડા પોલીસનો આ નવતર અભિનવ પ્રયોગ હવે છેક આસામ સુધી પહોંચ્યો છે. ખેડા પોલીસનો આ પ્રયોગ ગંભીર બિમારીથી પીડાતી આસામની મહિલા માટે આશિર્વાદ રૂપ બન્યો છે.
વાત એમ છે કે સંગીતા ગોગાઈ નામની પીડિત મહિલાએ લોકડાઉનની સ્થિતિમાં ખેડા પોલીસની વયોવૃદ્ધ નાગરિકો ને મદદરૂપ થવાની વાત સોશિયલ મીડિયાના માધ્યમથી જાણી. આ બિમાર મહિલા માત્ર ફળફળાદી ઉપર જીવન ગુજારતી હતી. પરંતુ આ સ્થિતિમાં ફળફળાદી મેળવવી એ વિકટ સમસ્યા હતી. મહિલાએ પોતાની વેદના અને ખેડા પોલીસની વયોવૃદ્ધ નાગરિકો પ્રત્યેની સંવેદના ફેસબુકના માધ્યમથી વ્યક્ત કરી. અને પોલીસના અધિકારીઓ મહિલાના ઘરે જઈ જરૂરી મદદ પહોચાડી.
મહિલાએ પોતાની ફેસબૂક પોસ્ટમાં લખ્યું કે ખેડા જિલ્લા પોલીસના એસપી દિવ્ય મિશ્ર એ આ પ્રોજેક્ટનો પ્રારંભ કર્યો હતો, જેનો આભાર માન્યો છે. ‘પ્રોજેક્ટ શુભાશિશ’ જે સિનિયર સિટિઝન્સ,અને એકલી રહેતી મહિલાઓ તેમજ ગંભીર માંદગીના દર્દીઓ માટે દવાઓ અને કરિયાનું પહોંચાડે છે. (કોઈપણ વયના દર્દીઓની સહાય કરવાનો છે). ખેડા જિલ્લા પોલીસ પોતાની ફરજ બજાવ વાની સાથે વયોવૃદ્ધ લોકોની નિયમિત સાર સંભાળવા લઈ રહી છે.તેમણે મને મારી આવશ્યક ચીજોમાં પહોંચવામાં મદદરૂપ બન્યા છે હું હંમેશ માટે આભારી રહીશ (જો તેમણે વિવેક સરને બોલાવ્યા ન હોત તો હું આજ સુધી ભૂખી રહેત) પોલીસ દળ ની કાર્યક્ષમતા અંગે મારા સામાન્ય અભિપ્રાયમાં પરિવર્તન આવ્યું છે.
ખેડા પોલીસે આસામ પોલીસના અધિકારીઓનો હૃદયથી ઋણ સ્વીકાર કર્યો છે. એમાંય ખાસ કરીને લખીમપુરના ડીઆઈજી વિવેક રાજ સિંહ અને એસ.પી. રાજવીર એ આસામમાં સંગીતા ગોગોઈને શાકભાજી અને ફળ પહોંચાડવામાં જે મદદ કરી છે એ માટે અને તેમના ખૂબ ખૂબ આભારી છીએ. લોકડાઉનની સાથે ખેડા પોલીસે કાયદો અને વ્યવસ્થાની જાળવણી સાથે સમાજ પ્રત્યેનું પોતાનું ઋણ અદા કરી અનોખી સામાજિક સંવેદનાના દર્શન કરાવ્યા છે.
