ગાંધીનગરઃ રાજ્યના ગાંધીનગરમાં ચાર વર્ષની બાળકી સાથે દુષ્કર્મના કેસમાં તેના જ પિતાની પોલીસે ધરપકડ કરી છે. પોલીસના જણાવ્યા મુજબ આ ઘટના ત્યારે બની જ્યારે આરોપીની પત્ની ઝઘડા બાદ પોતાનાં બાળકોને લઈને ઘર છોડીને પિયર ચાલી ગઈ હતી. આ વિવાદની શરૂઆત ત્યારે થઈ હતી જ્યારે આરોપીએ પત્નીની ઘરે આવેલી એક મહિલા મિત્ર સાથે કથિત રીતે અશ્લીલ વર્તન અને છેડછાડ કરી હતી.
પોલીસના જણાવ્યા મુજબ પીડિત બાળકીની માતાએ પોતાની એક મહિલા મિત્રને ઘરે બોલાવી હતી. મહિલાએ આરોપ લગાવ્યો હતો કે જ્યારે તે ઘરમાં એકલી હતી ત્યારે આરોપીએ તેની સાથે અયોગ્ય વર્તન કર્યું અને છેડછાડ કરી હતી. આ ઘટનાને લઈને પતિ-પત્ની વચ્ચે ઉગ્ર ઝઘડો થયો, જેના બાદ મહિલા પોતાની ચાર વર્ષની દીકરી અને બે વર્ષના પુત્રને લઈને પિયર ચાલી ગઈ. ત્યાર બાદ આરોપી પોતાના સાસરિયામાં પહોંચ્યો અને બાળકોમાંથી એકને પોતાની સાથે લઈ જવાની જીદ કરવા લાગ્યો. શરૂઆતમાં પરિવારજનોએ ના પાડી હતી, પરંતુ બાદમાં તેમણે ચાર વર્ષની બાળકી પિતાની સાથે મોકલી દીધી હતી.
પોલીસના જણાવ્યા મુજબ, ઘરે પરત ફર્યા બાદ આરોપીએ રાત્રે પોતાની સાથે સૂઈ રહેલી બાળકી પર કથિત રીતે દુષ્કર્મ આચર્યું હતું. બાળકી દુખાવાને કારણે રડવા લાગી ત્યારે આ હરકત બંધ થઈ. બીજા દિવસે સવારે બાળકીને નવડાવતી વખતે તેની ફોઈએ લોહીના નિશાન જોયા અને તરત જ પરિવારને જાણ કરી. ત્યાર બાદ માતાને જાણ કરવામાં આવી અને બાળકીને ગાંધીનગર સિવિલ હોસ્પિટલમાં સારવાર માટે લઈ જવાઈ, જ્યાં તબીબી તપાસમાં બાળકી પર યૌન શોષણ થયાની પુષ્ટિ થઈ હતી.
પરિવારની સત્તાવાર ફરિયાદને આધારે પોલીસે પોક્સો (POCSO) અધિનિયમની સંબંધિત કલમો હેઠળ ગુનો નોંધ્યો હતો. ફરિયાદ મળ્યાના થોડા જ કલાકોમાં પોલીસે 32 વર્ષીય આરોપીની ધરપકડ કરી હતી અને આગળની કાયદાકીય કાર્યવાહી શરૂ કરી હતી.
