નવી દિલ્હીઃ બોલીવુડ અભિનેત્રી કંગના રણૌતે કહ્યું છે કે પોતે રાજકારણ ક્ષેત્રમાં ઘેરી દિલચસ્પી ધરાવે છે, પરંતુ વ્યાવસાયિક રીતે એમાં પ્રવેશ કરવાની હાલમાં તેની કોઈ યોજના નથી.
35 વર્ષીય કંગનાએ ગઈ કાલે અહીં નેશનલ ગેલેરી ઓફ મોડર્ન આર્ટની મુલાકાત લીધી હતી. એ વખતે પત્રકારો સાથેની વાતચીતમાં એણે કહ્યું કે હાલમાં તો હું મારી ફિલ્મી કારકિર્દી પર ધ્યાન કેન્દ્રિત કરવાનું ચાલુ રાખવાની છું. હાલ હું મારી ફિલ્મોનાં શૂટિંગમાં વ્યસ્ત છું. મેં મારી ઉંમરના 16મા વર્ષે ફિલ્મી કારકિર્દી શરૂ કરી હતી અને ખૂબ સંઘર્ષ કર્યા બાદ આ સ્તરે પહોંચી છું. મને રાજકારણમાં રસ છે, પરંતુ એમાં પ્રવેશ કરવાનો હાલમાં મારો કોઈ પ્લાન નથી. હું દેશભક્ત છું અને કાયમ એવા લોકોનું સમર્થન કરીશ જેઓ આપણા દેશ માટે સારું કામ કરતાં હોય, પછી એ ભલે ગમે તે રાજકીય પક્ષનાં હોય.
